Qullaawu Maxaafi Giddo Addaxxinanni Biddishshi No
Mitto coye doodhineemmo woyite ninkera lawinonkere woy wolootu assitannore assineemmoha ikkiro, doodhinoommo doorshi dancha guma abba hoogara dandaanno. Qullaawu Maxaafi kuni ikkannohu mayiraatiro kulanno; kayi hakkiinni sainoreno kulanno. Qullaawu Maxaafi giddo garanna gara ikkinokkire bande anfeemmo gede kaaꞌlannonkehu addaxxinanni biddishshi no; hagiirraamma ikkineemmo gede assannonkehu qaru coyi isooti.
MAGANU BIDDISHSHI HASIISANNONKE
Qullaawu Maxaafi, mannu oosora Maganu Yihowaa aanno biddishshi hasiisannonsatanna uminsa heeshshonsa qineessiꞌra dandiitannokkita xawise kulanno. (Ermiyaasi 10:23) Maganu Qullaawu Maxaafi giddo nooha, garanna gara ikkinokki coyi daafira kulanno biddishsha uyinonkehu iseraati. Isi manna baxanno; hattono busha doorsha doodhine xissiisiꞌnammoranna qarrammammora dihasiꞌranno. (Marro 5:29; 1 Yohaannisi 4:8) Hakkiino sae, isi Kalaqaanchonke ikkino daafira ninkera baalanta roortanno amaale aate hayyonna egenno noosi. (Faarso 100:3; 104:24) Ikkirono, Maganu mannu biddishshasi harunsanno gede horo digiddeessanno.
Yihowa Addaamiranna Heewanira addu hagiirre afidhanno gede assannonsa coye baala uyinonsa. (Kalaqama 1:28, 29; 2:8, 15) Qoleno isi qarrissannokki hajajo uyinonsa. Ikkirono isi uyinonsa biddishshira hajajantannoronna teꞌee uminsa doodhitanno gede fajjinonsa. (Kalaqama 2:9, 16, 17) Hige ma assinayi, Addaaminna Heewani Maganu biddishsha agurte uminsa biddishshinni heeꞌra doodhitino. (Kalaqama 3:6) Tini mayi guma abbituyya? Mannu ooso garanna gara ikkinokkire uminsa doodhituro woyyanno? Diwoyyanno. Maganu biddishsha lashshi assa geedote keerenna hagiirre afiꞌnanni gede assitannokkita xagge leellishshanno.—Rosiisaancho 8:9.
Qullaawu Maxaafi, lophinoommo gari woy budinke ikkihano ikkiro, dancha doorsha doodhate kaaꞌlannonke biddishsha kulannonke. (2 Ximootewoosi 3:16, 17; “Baalunku Mannira Kaaꞌlanno Maxaafa” yitanno saaxine lai.) Hanni Qullaawu Maxaafi kaaꞌlannonke gara laꞌno.
Qullaawa Maxaafa ‘Maganu qaaleeti’ yaa garankolla yineemmohu mayiraatiro ledde rosi.—1 Teselonqe 2:13. JW.ORG aana fultinota Qullaawa Maxaafa Qixxeessinohu Ayeti? yitanno viidiyo lai.
QULLAAWU MAXAAFI MAGANU BIDDISHSHA KULANNO
Qullaawu Maxaafi, hundinni kayise Maganoho mannu ooso ledo noosi aante hiittootero kulannonke. Giddosi noo hedo, Maganu albaanni garanna gara ikkinokkiri hattono kaaꞌlannorinna gawajjannori maatiro anfeemmo gede kaaꞌlitannonke. (Faarso 19:7, 11) Qullaawu Maxaafinni barru barrunku dancha doorsha doodhineemmo gede kaaꞌlannonkeha diru shaarannokkiha xintu seera ronseemmo.
Hanni Lawishsha 13:20 noo amaale laꞌno: “Egennaamu ledo hosannohu egennaamo ikkanno; hawanyootu jaali kayinni qarru aana uwanno.” Kuni xintu seeri hundi yannara kaaꞌlinte gede xaa yannarano kaaꞌlannoho. Qullaawu Maxaafi giddo togoohu kaaꞌlannohu batinyu xintu seeri no.—“Qullaawu Maxaafita Diru Shaarannokki Hayyo” yitanno saaxine lai.
Kayinni, ‘Qullaawu Maxaafi amaale xaa yannara kaaꞌlitannoeta mayinni buuxa dandeemmo?’ yite hedattoha ikkara dandaanno. Aananno birxichira mite addu xagge laꞌneemmo.
a Yihowa Maganu suꞌmaati.—Fulo 6:3, lekkaalliidi qaagiishsha.