Yesuusinni Kainohunni Gufidhina Ikka?

1. Mite yite Qullaawu Maxaafi halaale wolootaho kulitto woyite dhagge ikkinoheri maa ikkara dandaanno?

MITE yite halaale macciishshitto yanna qaagatto? Qullaawu Maxaafinni rosoottori baaluri xawe leellinoheha ikkara dandaanno! Atente gede ‘Baalunku manni konne halaale ammane adhanno’ yite hedoottoha ikkara dandaanno. Qullaawu Maxaafi rosi, insa xaa yannara hagiirraame heeshsho, albillitteno dhagge ikkitanno hexxo heedhannonsa gede assannota ammanootto. (Far. 119:105) Hakko daafira rosootto halaale jaallakkiranna fiixikkira baalaho quqquxante kulootto. Kayi insa giddo rooru konne halaale macciishsha gibbuta dhagge assiꞌroottoha ikkara dandaanno.

2-3. Yesuusi waro batinyu manni iso ma assino?

² Kulleemmo sokka mannu macciishsha giwiro dhagge assiꞌra dihasiissannonke. Yesuusi Maganu soyinosita leellishshaata addi addi maalale loosinoha ikkirono, rooru manni giwinosi. Lawishshaho Yesuusi Aliaazaari reyotenni kayisino; isi tenne maalale loosinota giwannosi manni nafa kaada didandaanno. Ikkirono Yihudu sooreeyye isi Mesihicha ikkinota diammantino. Isinni Yesuusano Aliaazaarino shaa hasidhino.—Yoh. 11:47, 48, 53; 12:9-11.

³ Yesuusi rooru manni isi Mesihicha ikkinota ammana giwannota afino. (Yoh. 5:39-44) Isi Cuuaanchu Yohaannisi rosaanora “Anenni kainohunni gufiꞌrannokkihu hagiirraamoho” yiino. (Mat. 11:2, 3, 6, NW) Batinyu manni Yesuusa ammana giwinohu mayiraati?

4. Konni birxichira maa ronseemmo?

⁴ Konni birxichiranna aane noohura, umi xibbi diro batinyu manni Yesuusa ammana giwinohu mayiraatiro ronseemmo. Qoleno xaa yannara batinyu manni kulleemmo sokka macciishsha giwannohu mayiraatiro laꞌneemmo. Roorenkanni, gufiꞌneemmokki gede Yesuusira noonke ammana kaajjishiꞌra hasiissannonkehu mayiraatiro ronseemmo.

(1) YESUUSI LOPHINO GARA

5. Mitu manni Yesuusi daanno yinoonni Mesihicha diꞌꞌikkino yee hedinohu mayira ikkara dandaanno?

⁵ Batinyu manni Yesuusi lophino gara lae gufiꞌrino. Insa Yesuusi worba rosiisaancho ikkinotanna addi addi maalale loosinota ammantino. Kayi insara Yesuusi mittu buxichu hanaaxichi beetto calla lawinonsa. Yesuusi lophinohu Naaziretete katamiraati; kuni mannu mishanno katama ikkara dandaanno. Gedensoonni Yesuusi rosaancho ikkinohu Naatinaeeli nafa umi qara “Naaziretetenni danchu coyi fulannoni?” yiino. (Yoh. 1:46) Naatinaeeli Yesuusi heeꞌrinoha Naaziretete katama naadannokkiha ikkara dandaanno. Woy isi Mesihichu Naaziretete ikkikkinni Beetelihemete ilamannota kultannota Mikiyaasi 5:2te noo masaalo hedinoha ikkara dandaanno.

6. Mannu Yesuusi Mesihicha ikkinota huwatate maa assannohu gatino?

⁶ Qullaawa Borro mayitanno? Masaalaanchu Isayaasi Yesuusi diinna “[Mesihichu] ilama” woy heeshsho daafira haja assitannokkita masaalino. (Isa. 53:8) Yesuusi heeshsho daafira lowore masaalloonni. Insa Yesuusi daafira kultanno masaalo xiinxallitinoha ikkoommero, Yesuusi Beetelihemete ilamannotanna Moote Daawiti sircho ikkinota huwata dandiitanno. (Luq. 2:4-7) Yesuusi ilaminohu Mikiyaasi 5:2te masaalloonni katamiraati. Ikkina mannu soꞌro maati? Muddante togo togooti yite coyiꞌransaati. Insa woꞌmanka coye seekkite dibuuxxino. Gufidhinohuno iseraati.

7. Xaa yannara batinyu manni Yihowa Farciꞌraasine giwannohu mayiraati?

⁷ Yannankerano hattoori kalaqamara dandaanno? Ee. Xaphoomunni laꞌniro, Yihowa manni alba heeꞌrino heeshsho mannu jajanno gedeeta diꞌꞌikkitino; mannu insa ‘roso rossinokkirinna mullu manni’ gede asse hedanno. (Soq. 4:13) Mitu manni Yihowa Farciꞌraasine egennaminohu Qullaawu Maxaafi rosi mine eꞌe rossinokki daafira Maganu Qaale rosiisa didandiitanno yee hedanno. Wolootu qolte ‘Yihowa Farciꞌraasine “Ameeriku ammaꞌnooti”’ yite heddanno; noore coyiꞌniro kayinni alamete doyichora noohu Yihowa Farciꞌraasine ikkino manni giddo Ameerikaho heeꞌrannohu xibbunni mite 14 anga calla ikkannoho. Mitootu qolte ‘Yihowa Farciꞌraasine Yesuusa diammantanno’ yinanna macciishshitino. Lowo diro Yihowa Farciꞌraasine “Soꞌrisiisaanote,” “Faranjete ammaꞌnooti” hattono “Maate diiggannoreeti” yinanni keeshshinoonni. Togoore coyiꞌnanna macciishshino manni, Yihowa manni daafira gara ikkinore buuxinokkihura gufiꞌrino woy Yihowa Farciꞌraasine ikka dihasiꞌranno.

8. Soqqamaasinete Looso 17:11 kultanno garinni, mannu yannankera nooti Maganu soqqamaano ayeootiro afate maa assa hasiissannonsa?

⁸ Gufiꞌneemmokki gede maa assa hasiissannonke? Ronsoommore seekkine buuxiꞌra hasiissannonke. Wongeellu borreessaanchi Luqaasino hatto assate sharramino. Isi ‘uminni kayise baalanke coye xiinxalle laino.’ Luqaasi Wongeellasi nabbawanno manni Yesuusi daafira macciishshinori ‘halaalaancho ikkinota seekke afara’ hasiꞌrino. (Luq. 1:1-4) Hunda Beeriyaho heeꞌrinohu Yihudu mannino Luqaasi gede seekke xiinxallino. Insa umo Yesuusi daafira kulannoha dancha duduwo macciishshitu woyite, rossinori halaale ikkinota buuxate Ibiraawootu Afiita Qullaawa Borro seekkite laꞌino. (Soqqamaasinete Looso 17:11 nabbawi.) Ninkeno ronsoommore seekkine buuxa hasiissannonke. Maganu manniwiinni ronsoommore, Qullaawa Borro yitannori ledo taashshine laꞌꞌa hasiissannonke. Qoleno yannankera noohu Yihowa manni daafira kultanno xagge xiinxalla hasiissannonke. Coye kaimunni seekkine xiinxallineemmoha ikkiro, mitto coye mulla kaꞌne digimbeemmo woy mannu yiinotera hoode dihaꞌneemmo.

(2) YESUUSI MESIHICHA IKKINOTA LEELLISHATE YEE MAALALE DILOOSINO

9. Yesuusi gordunni malaate leellisha giwita mannu ma assino?

⁹ Yesuusi dhagge ikkanno roso rosiisinoha ikkirono, mitootu tennenni kassi diyitino. Insa hakkiinni sainore hasidhino. Isi ‘Gordunni malaate leellishe’ Mesihicha ikkinota leellishansara hasidhino. (Mat. 16:1) Insa Yesuusi malaate leellishansara hasidhinohu Daanieeli 7:13, 14 noo hedo garimale huwattino daafira ikkara dandaanno. Ikkollana tini masaalo woꞌmitanno gede Yihowa murino yanna hattee diꞌꞌikkitino. Yesuusi rosiisinonsari woleteemmero isi Mesihicha ikkinota ammantanno gede assannonsareeti. Kayinni insa leellishinke yitino malaate leellisha giwita gufidhino woy iso gibbino.—Mat. 16:4.

10. Yesuusi, Isayaasi Mesihichu daafira masaalino masaalo woꞌmitanno gede assinohu hiittoonniiti?

¹⁰ Qullaawa Borro mayitanno? Masaalaanchu Isayaasi Mesihichu daafira togo yee borreessino: “Cance dicoyiꞌranno; dooggateno qoonqosi naggi diassanno.” (Isa. 42:1, 2) Yesuusi soqqami woyite diluulino woy leellamate diwoꞌnaalino. Yesuusi hoola yinoonniha qullaawa mine dimiꞌnino, ammaꞌnote murrooti gede badde leellishshanno uddano diuddiꞌrino, hattono baxxino suꞌminni woshshinasira dihasiꞌrino. Yesuusi yoo yinasira Moote Heeroodisi albira shiqe heeꞌre nafa iso maalaꞌlisate yee maalale diloosino. (Luq. 23:8-11) Yesuusi mite maalale loosinoha ikkirono, qaru loosisi dancha duduwo duduwate. Isi rosaanosira “Ani Dancha Duduwo lallawate dayommo” yiino.—Maq. 1:38.

11. Mitu mannira hiitti gara ikkitinokki lao noonsa?

¹¹ Yannankerano hattoori kalaqamara dandaanno? Ee. Xaa yannara batinyu manni hoola yinoonni misilla afidhinota jajjabba beetekiristaanna, seedu maaragete suꞌmi noonsa qeesoota, hattono addi addi ayyaanna jajanno; tini ayyaanna rooru manni kaimasenna mayimmase deinote. Togoo ammaꞌno gambooshshe haꞌranno manni, Maganunna isi hedinori daafira hakkeya rosannori dino. Kiristaanu gambooshshenke daanno manni kayinni, Yihowa maa assinammora hasiꞌrannoronna isi fajjo ledo sumuu yaanno garinni heeꞌra dandaanno gara rosanno. Gambooshshu Addaraashuwanke ishintinokkitenna loworira kaaꞌlitannote; kayinni bikkunnite. Songote albisa ikkite soqqantannori baxxitino uddano diuddidhanno; maaragete suꞌminni woshshinansarano dihasidhanno. Rosiinseemmorinna ammanneemmori Maganu Qaali aana xintaminoreeti. Ikkirono batinyu manni ‘Insa magansidhanno gari dibaꞌraasinoho’ yee hedanno daafiranna rosiinseemmo rosi insa macciishsha hasiꞌrannoha ikkinokki daafira gufiꞌranno woy kulleemmonsare dimacciishshanno.

12. Ibiraawoota 11:1, 6 kultanno garinni, ammananke mayi aana xintantinota ikka hasiissannose?

¹² Gufiꞌneemmokki gede maa assa hasiissannonke? Soqqamaasinchu Phaawuloosi Roomaho heeꞌranno Kiristaana togo yino: “Ammaꞌna macciishshatenni dagganno; macciishshinannihuno Kiristoosi qaaleeti.” (Rom. 10:17) Ammananke kaajjishiꞌneemmohu Qullaawa Borro seekkine xiinxallineeti ikkinnina, Maganu Qaali ledo sumuu yaannokkiha ammaꞌnote bude agadhine diꞌꞌikkino; togoo budi baxisannoha lawara dandaanno. ‘Ammana nookkiha Magano hagiirsiisa’ dandiinannikki daafira, halaalaancho egenno aana xintantinota kaajjado ammana afiꞌrate sharrama hasiissannonke. (Ibiraawoota 11:1, 6 nabbawi.) Cuꞌmiꞌnoommohu halaale ikkinota buuxate, iiminni dhagge ikkanno malaate laꞌꞌa hasiissannonke yaa diꞌꞌikkino. Seekke ammanatenna huluullo hooꞌlate, ammana kaajjishannoha Qullaawu Maxaafi roso seekke xiinxalla calla ikkitanno.

(3) YESUUSI ADDI ADDIHA AYIHUDETE BUDE DIAYIRRISINO

13. Batinyu manni Yesuusa giwinohu mayiraati?

¹³ Yesuusi waro Cuuaanchu Yohaannisi rosaano, Yesuusi rosaano xoontannokki daafira gurchaabbino. Yesuusi, isi ledonsa noo geeshsha xooma hasiissannonsakkita xawisino. (Mat. 9:14-17) Farisootunna Yesuusa gibbannori kayinni isi budensanna wodhonsa harunsinokki daafira effidhe gibbinosi. Isi Sambatu barra dhiwantinore hursita lowo geeshsha hanqitino. (Maq. 3:1-6; Yoh. 9:16) Insa kaꞌaanni Sambata ayirrinseemmo yitanni kaꞌaanni kayi qullaawu mini giddo daddaꞌlitanno. Yesuusi tennera rufinsata hanqite giira kaxxitino. (Mat. 21:12, 13, 15) Yesuusi Naaziretete noohu xaadu mine sabbakanni heeꞌre, umonsa calla baxxannorenna ammana noonsakkire ikkitinota leellishate, insa hasatto ledo sumuu yaannokki lawishsha horoonsiꞌrita hanqite fooggaltino. (Luq. 4:16, 25-30) Batinyu manni Yesuusi insa heddino gede ikka hoogino daafira gufiꞌrino woy iso macciishsha giwino.—Mat. 11:16-19.

14. Yesuusi Qullaawa Borro ledo sumuu yitannokkita mannu woga giwinohu mayiraati?

¹⁴ Qullaawa Borro mayitanno? Yihowa masaalaanchisi Isayaasi widoonni togo yiino: “Tini gosa afuunni ayirrissannoe; wodanunni kayinni anewiinni faffe no. Magansidhannoehuno mannu woga wonshateeti.” (Isa. 29:13) Yesuusi Qullaawa Borro ledo sumuu yitannokkita mannu woga giwasi garankolla. Mannu woganna bude Qullaawa Borronni roorsite laꞌannori, Yihowanna isi soyino Mesihicha gibbino.

15. Xaa yannara batinyu manni Yihowa Farciꞌraasine baxannokkihu mayiraati?

¹⁵ Yannankerano hattoori kalaqamara dandaanno? Ee. Yihowa Farciꞌraasine Qullaawa Borro ledo sumuu yitannokki ayyaanna lawishshaho ilamate barranna Ganna diayirrinseemmo yitanno woyite batinyu manni giiramanno. Wolootu kayinni Yihowa Farciꞌraasine addi addiha gobbate ayyaana ayirrissannokki daafira woy Qullaawu Maxaafi ledo sumuu yaannokkiha madaarshu seera harunsitannokki daafira hanqitanno. Konni garinni Yihowa Farciꞌraasinera hanqitannori Magano halaalunni magansiꞌnanni heeꞌnoommo yite ammantannoha ikkara dandaanno. Ikkollana insa teeꞌlinokkiha Qullaawu Maxaafi roso agurte alamete wodho roorsidhannoha ikkiro Magano hagiirsiisa didandiitanno.—Maq. 7:7-9.

16. Faarso 119:97, 113, 163-165 kultanno garinni maa assa hasiissannonke? Giwa hasiissannonkeri maati?

¹⁶ Gufiꞌneemmokki gede maa assa hasiissannonke? Yihowa seeranna biddishsha albinni roore baxa hasiissannonke. (Faarso 119:97, 113, 163-165 nabbawi.) Yihowa banxeemmoha ikkiro, iso hagiirsiisannokki bude baala gimbeemmo. Aye coyino Yihowa banxeemmota hoolankera diwodhineemmo.

(4) YESUUSI GASHSHOOTE SOORRATE DIWOꞌNAALINO

17. Yesuusi waro batinyu manni Mesihichu maa assanno yee hedino?

¹⁷ Yesuusi waro mitu manni, isi bayichonko gashshoote soorrara hasiꞌrino. Insa Mesihichu, gadadisinonsahu Roomu gashshootinni wolassannonke yite heddino. Yesuusa moote assitara woꞌnaaltuta isi kayi giwino. (Yoh. 6:14, 15) Kakkalaasinenna Roomu gashshooti silxaane uyinonsari wolootu ammaꞌnote murrooti, Yesuusi gashshoote soorreenna silxaanenke hoongeemmo yite yaaddino. Tini batinyu Yihudu manni gufiꞌranno gede woy Yesuusa giwanno gede assitino.

18. Batinyu manni Mesihichu daafira kultannota hiittenne masaalo lashshi assino?

¹⁸ Qullaawa Borro mayitanno? Batinye masaalo Mesihichu yannate gedensaanni ola qeelannota kultannoha ikkirono, wole masaalo kayinni isi balaxe ninke cubbi daafira reya hasiissannosita kultanno. (Isa. 53:9, 12) Ikkina Yihudu manni Mesihichuwiinni gara ikkinokkire agadhinohu mayiraati? Yesuusi waro batinyu manni isi qarransa hakkawoyintenni hoolannokkita leellishshanno masaalo lashshi assino.—Yoh. 6:26, 27.

19. Batinyu manni sokkanke macciishshannokkihu mayyee hedanno daafiraati?

¹⁹ Yannankerano hattoori kalaqamara dandaanno? Ee. Xaa yannara batinyu manni poletikaho anga wodhineemmokki daafira giwannonke. Insa mirca tungammora hasidhanno. Ikkollana mannu gashshoote doodhineemmoha ikkiro, tini Yihowa giwa ikkitinota anfoommo. (1 Sam. 8:4-7) Qoleno mannu ‘Insa rosu minnanna hospitaale dimintannoreeti, hattono dagooma kaaꞌlanno looso diloossannoreeti’ yee hedara dandaanno. Insa xaa yannara mannu oosora iillanni noo qarra tirate ikkikkinni dancha duduwo duduwate illachinsheemmo daafira gufidhanno woy sokkanke dimacciishshitanno.

20. Yesuusi Maatewoosi 7:21-23te coyiꞌrino garinni, loosa hasiissannonkehu qaru loosi hiikkonneeti?

²⁰ Gufiꞌneemmokki gede maa assa hasiissannonke? (Maatewoosi 7:21-23 nabbawi.) Yesuusi loonsammora hajajinonke looso illachisha hasiissannonke. (Mat. 28:19, 20) Tenne alamehu poletikunna dagoomittete coyi hedonke billaallitanno gede assankera wodha dihasiissannonke. Manna banxeemmo, iillannonsa qarrino dadillisannonke; ikkirono insa kaaꞌla dandiineemmoti baalanta roore doogo Maganu Mangiste daafira rosiisanna Yihowa ledo jaalooma kalaqidhanno gede kaaꞌla ikkitinota anfoommo.

21. Maa assate murciꞌra hasiissannonke?

²¹ Konni birxichira, umi xibbi diro mannu Yesuusinni kainohunni gufiꞌranno gede woy iso giwanno gede assinoha shoole coye laꞌnoommo; kuri coyibba xaa yannarano mitu manni Yesuusi harunsaano macciishsha giwanno gede assitara dandiitanno. Ikkollana hooꞌla hasiissannonketi guficho ikkitanno coyibba kuri callaatini? Deeꞌni. Aananno birxichira guficho ikkannoha wole shoole coye laꞌneemmo. Gufiꞌneemmokki gedenna ammananke kaajjitanno gede assiꞌrate murciꞌno!