Keeraanchu Manchi Gufiꞌranno Gede Assasira Dandaannori Dino

1-2. Mittu borreessaanchi mayyee coyiꞌrino? Konni birxichira maa ronseemmo?

XAA yannara lowo miliyoone ikkanno manni Yesuusa ammannoommo yaannoha ikkirono, isi rosiisinore diharunsanno. (2 Xim. 4:3, 4) Mittu borreessaanchi isinni togo yino: “Biꞌree Yesuusi coyiꞌrinore coyiꞌrannohu yannankera wolu ‘Yesuusi’ nooha ikkoommero, lamu kumi diri albaanni gimbummosi gede xaano gimbammosi ikka? . . . Yannankera rooru manni assannorinna akatinsa ‘Ee gimbeemmo’ yine qollanni gede assannoho.”

² Umi xibbi diro batinyu manni Yesuusi rosiisanna macciishshinohanna maalale loosanna lainoha ikkirono, iso ammana giwino. Mayira? Sai birxichira, mannu Yesuusi coyiꞌrinorinninna assinorinni gufiꞌranno gede assinoha shoole coye laꞌnoommo. Xa hanni wole shoole korkaata laꞌno. Qoleno xaa yannara mannu Yesuusi rosaano giwannohu mayiraatironna ninke gufiꞌneemmokki gede qoropha dandiineemmohu hiittoonniitiro ronseemmo.

(1) YESUUSI DIMALLAADINO

3. Mitu manni Yesuusi maa assino daafira gufiꞌrino?

³ Yesuusi uullate aana noo yannara baalunku gari manniwa aanino. Isi dureeyyetenna silxaane noonsari ledo sagale itinoha ikkirono, roore yanna sayisinohu kayinni buxanetenna hawaaxaammu ledooti. Qoleno isi mannu “cubbaataammu” gede asse laꞌꞌannore mararino. Insaneeto keeraanote gede asse laꞌꞌannohu mitu manni Yesuusi assinorinni gufiꞌrino. Insa Yesuusi rosaano “Qaraxaasinetenna cubbaataammu ledo ittinannihunna agginannihu mayiraati?” yite xaꞌmitino. Tennera Yesuusi togo yee qolinonsa: “Dhiwantinorira ikkinnina fayyaaleeyyete xagisannohu dihasiisannonsa. Ani cubbaataammu aagintaabbe higganno gede woshshammora ikkinnina, keeraano woshshate didayommo.”—Luq. 5:29-32.

4. Masaalaanchu Isayaasi coyiꞌrino garinni, Yihudu manni Mesihicha ma assinannita heda hasiissannonsa?

⁴ Qullaawa Borro mayitanno? Mesihichu daara lowo dirira albaanni masaalaanchu Isayaasi iso alame gibbannota masaalino. Isi togo yee masaalino: “Mannu mishinosihonna giwinosiho; . . . Mannu mishe alba shawwu yiinosi; ninkeno diayirrinsoommosi.” (Isa. 53:3) Mannu Mesihicha ‘giwannota’ masaalotenni kulloonni daafira, umi xibbi diro heeꞌrinohu Yihudu manni Yesuusa gimbannita heda hasiissannonsa.

5. Xaa yannara batinyu manni Yesuusi harunsaano ma garinni laꞌꞌanno?

⁵ Yannankerano hattoori kalaqamara dandaanno? Ee. Batinyu ammaꞌnote murrooti maccaha ikkinoha, dureeyye, hattono alame egennaammu gede assite laꞌanno manna, miillansa ikkitanno gede anga fante haadhanno. Kuri ammaꞌnote murrooti, miilansa ikkate daanno manni amanyootinna heeshshonsa gari Maganu seeri ledo sumuu yaannokkiha ikkiro nafa, anga fante haadhanno. Insa Yihowara diinaggaabbe soqqantannorenna danchu amanyooti noonsare Maganu soqqamaasine, alamete giddo maccare ikkitinokki daafira calla woffi assite laꞌanno. Phaawuloosi yiinonte gede, Maganu tenne alamera ‘mishantinore’ doorino. (1 Qor. 1:26-29) Ikkirono, baalanti Yihowa soqqamaano isira muxxete!

6. Yesuusi Maatewoosi 11:25, 26te mayino? Ninke isite gedee lao heedhannonke gede assiꞌra dandiineemmohu hiittoonniiti?

⁶ Gufiꞌneemmokki gede maa assa hasiissannonke? (Maatewoosi 11:25, 26 nabbawi.) Maganu manna alame laꞌanno garinni laꞌneemmokki gede qoropha hasiissannonke. Yihowa fajjosi wonshate jooguulle calla horoonsiꞌrannota deꞌnoonke. (Far. 138:6) Alame egennaammu woy hayyootu gede assite laꞌannokki manna horoonsiꞌre Yihowa mageeshshi looso loosanni nooro hiinci.

(2) YESUUSI KAPHU ROSO XAWO FUSHSHINO

7. Yesuusi Farisoota lawisiisaanote yiinohu mayiraati? Insa hatto yiinsata ma ikkitino?

⁷ Yesuusi lawisiisaano ikkitinore ammaꞌnote murroota, mannu Yihowa garunni magansiꞌranno gede rosiissannokki daafira waajjikkinni boroorino. Lawishshaho isi, Farisootu annuwansanna amuuwansa towaatantenni roore, anga hayishshiꞌnanni gari huluullannonsa daafira insa lawisiisaano ikkitinota anfanni gede assino. (Mat. 15:1-11) Yesuusi rosaano isi coyiꞌrinore dhagge assidhinoha ikkara dandaanno. Insa iso “Konne coyiꞌritto coye macciishshite Farisootu soꞌrantinota afoottoni?” yite xaꞌmitino. Yesuusi togo yee qolino: “Gordu Anniꞌya kaasinokki kaashshi baalu buqqisamanno. Insa illiweelte heedhe illiweeloota massaggannoreetina agurre. Illiweelu illiweelo massagiro lamunku balete ubbanno.” (Mat. 15:12-14) Ammaꞌnote murrooti Yesuusi coyiꞌrinorira hanqitinoha ikkirono, isi kayinni halaale kula diagurino.

8. Yesuusi Magano hagiirsiissannoti baalanta ammaꞌno ikkitinokkita xawisinohu hiittoonniiti?

⁸ Yesuusi kapho ikkinoha ammaꞌnote rosono xawo fushshino. Isi baalanti ammaꞌno Magano hagiirsiissanno diyiino. Hatteentenni isi batinyu manni baonniwa massitannota halaꞌlado doogo haꞌrannotanna heeshshonniwa massitannota ruukkashsho doogo kayi shiimu manni calla haꞌrannota coyiꞌrino. (Mat. 7:13, 14) Isi mitu manni Maganoho soqqammanni heeꞌnoommo yaannoha ikkirono, Maganoho soqqamanni nookkita xawisino. Togo yee qorowisiisino: “Kaphaano himanaanowiinni umoꞌne agadhe! Insa geꞌreewu lande uddidhe doggannoꞌne; giddoyidonsa kayinni bibbiddanno hiyyeeyyeeti. Insa baddine affinannihu guminsanniiti.”—Mat. 7:15-20.

9. Yesuusi xawo fushshinohu kapho ikkinohu mitu ammaꞌnote rosi hiikkonneeti?

⁹ Qullaawa Borro mayitanno? Qullaawu Maxaafi giddo Mesihichu Yihowa minira laalaatannota masaalloonni. (Far. 69:9; Yoh. 2:14-17) Tini laala Yesuusi kapho ikkinoha ammaꞌnote rosonna assoote xawo fushshanno gede kakkayissinosi. Lawishshaho Farisootu lubbo direyitanno yite ammantanno; Yesuusi kayinni reyitinori goxxe noota rosiisino. (Yoh. 11:11) Saduqootu reyino manni reyotenni dikaꞌꞌanno yitanno; Yesuusi kayinni jaalasi Aliaazaari reyotenni kayisino. (Yoh. 11:43, 44; Soq. 23:8) Farisootu baalunku coyi ikkannohu annu annu kaayyonna Maganu murino garinniiti yitanno; Yesuusi kayinni mannu ooso Maganoho soqqama woy soqqama hooga doodha dandiitannota rosiisino.—Mat. 11:28.

10. Batinyu manni rosiinseemmo rosinni gufiꞌrannohu mayiraati?

¹⁰ Yannankerano hattoori kalaqamara dandaanno? Ee. Qullaawu Maxaafi aana xintamino rosinke, kapho ikkinoha ammaꞌnote roso xawo fushshanno daafira batinyu manni gufiꞌranno woy giwannonke. Ammaꞌnote murrooti miillansara Maganu bushuulle sioolete giiranni qorichishanno yite rosiissanno. Insa konne kaphu roso horoonsidhannohu manna waajjishiishateeti. Ninke kayinni baxillaanchu Magani Yihowara soqqammeemmore ikkinoommo daafira, konne kaphu roso xawo fushshineemmo. Ammaꞌnote murrooti lubbo direyitanno yiteno rosiissanno. Kuni rosi adda ikkiro, kao dihasiissanno yaate; ninke kayinni kuni rosi Qullaawu Maxaafi aana xintaminokkiha ikkinota xawo fushshineemmo. Batinye ammaꞌno mittu mittunku manchi assannore Maganu balaxe murino yite rosiissanno; ninke kayinni mittu manchi Maganoho soqqama woy soqqama hooga doodha dandaannota rosiinseemmo. Tennera ammaꞌnote murrooti hiitto ikkitanno? Duucha woyite giirantanno!

11. Yesuusi Yohaannisi 8:45-47 coyiꞌrino garinni, Maganu mannisi maa assara hasiꞌranno?

¹¹ Gufiꞌneemmokki gede maa assa hasiissannonke? Halaale banxeemmoha ikkiro, Maganu kulannonkere ammanne hajajama hasiissannonke. (Yohaannisi 8:45-47 nabbawi.) Ninke Sheexaanu Daawuloosi gede halaale diagurreemmo. Ammanneemmori ledo sumuu yaannokkiha mitto coyeno diassineemmo. (Yoh. 8:44) Maganu, mannisi Yesuusi gede ‘busha coye giwaranna dancha coye cuꞌmiꞌre heeꞌrara’ hasiꞌranno.—Rom. 12:9; Ibi. 1:9.

(3) YESUUSIRA DARTU IILLINOSI

12. Yesuusi haqqaho sutame reyasi batinyu Yihudu manni gufiꞌranno gede assitinohu mayiraati?

¹² Yesuusi waro Yihudootu gufidhanno gede assinonsahu wolu coyi maati? Phaawuloosi togo yiino: “Ninke kayinni sutaminonkeha Kiristoosa kulleemmo. Kuni coyi, Ayihudete gufichoho.” (1 Qor. 1:23) Yesuusi haqqaho sutame reyasi batinyu Yihudu manni gufiꞌranno gede assitinohu mayiraati? Yesuusa haqqaho sunte shinoonnihura isi Mesihicha ikkikkinni jaddo loosinohanna cubbaataamo lawinonsa daafiraati.—Mar. 21:22, 23.

13. Yesuusinni kainohunni gufiꞌrino manni huwatinokki coyi maati?

¹³ Yesuusa haqqaho sunte shinoonnitera gufidhinori mitu Yihudu manni, Yesuusi beebbaataamo ikkinotanna kaphunni kassansoonnisita, hattono miincoonnisita huwata didandiitino. Yesuusi hajo laꞌino daanyooti halaale wirtino. Yesuusi hajo laꞌꞌate gamba yiinohu Yihudunnihu aliidi yoo mini yoo yiinohu gawa gawa asse yoote seera agadhikkinniiti. (Luq. 22:54; Yoh. 18:24) Daanyootu Yesuusa kassansoonni kissenna shiqqino taje mittowa higge tuqqitukki laꞌꞌa agurte, insa uminsa “Yesuusa shinanni gede, kaphu taje” hasidhino. Insa taje hoogguta, kakkalaasinete roorrichi Yesuusa bushiishate isi gara ikkinokkire coyiꞌranno gede assate woꞌnaalino. Tini horonta seeru ledo sumuu diyitannote. (Mat. 26:59; Maq. 14:55-64) Yesuusi reyotenni kaihu gedensaanni, halaale wirtino daanyooti waamma agartinori Roomu olantora ‘lowo woxe uyitno;’ insa hatto assitinohu waamma fano ikkitinohu mayiraatiro kaphu duduwo tareessitanno gedeeti.—Mat. 28:11-15.

14. Qullaawa Borro giddo Mesihichu reyo daafira mayine masaalloonni?

¹⁴ Qullaawa Borro mayitanno? Yesuusi waro batinyu Yihudu manni Mesihichu reya hasiissannosita hedinokkiha ikkirono, Qullaawa Borro giddo kayinni togo yine masaalloonni: “Lubbosi reyote sayise uyino; bunshe assitannori ledo kiirroonnisi. Ikkeennano lowo manni cubbo duqqino; sao assitinori daafira araara eanno.” (Isa. 53:12) Hakko daafira, Yihudu manni Yesuusa cubbaataamu gede haqqaho sunte shinoonnitera gufiꞌranno gede assannonsari dino.

15. Mitu manni Yihowa Farciꞌraasine giwanno gede assitinoti Yihowa Farciꞌraasine kassansoonni kisse hiitteeti?

¹⁵ Yannankerano hattoori kalaqamara dandaanno? Eewana! Yesuusa kaphunni kassanse yoo yinoonnisi; xaa yannarano Yihowa Farciꞌraasine konni garinni miincanni keeshshinoonni. Hanni mito lawishsha laꞌno. Ameerikaho 1930nna 1940 balla Yihowa faajjetenni magansiꞌneemmota hoollannikki gede duucha hinge yoote mine gaarammoommo. Mitu daanyooti saala baꞌe Yihowa Farciꞌraasinera gara ikkitinokki yoo yitino. Kanaadaho Kiwubeeki qoqqowira ammaꞌnote murrootinna gashshaano loosonke hoolate buusante gano gantino. Batinye halashshaano mannaho Maganu Mangiste daafira kultinohura calla usuru minira eessinoonninsa. Jarmanete Naazi gashshooti yannara Magano waajjannokki gashshooti ammanaminoha batinye wedella roduuwa shiino. Muli yannara qole Ruusiyu gobbara roduuwinke Qullaawu Maxaafire hasaabbino daafira calla jaddo loossino yine usuru minira essinoonninsa; gashshaano insa mangistete seera diiggino yitinonsa. Wole agurina Ruusiyu Afiinni qixxeessinoonnita Qullaawa Borrota Haaro Alame Tiro nafa agamboonni, hattono tini tiro Yihowa suꞌma amaddinota ikkitino daafira gashshootu seeri ledo sumuu yaannokki maxaafaati yinoonni.

16. Umi Yohaannisi 4:1 kultanno garinni, Yihowa manni daafira tareessinanni kaphinni dogama hasiissannonkekkihu mayiraati?

¹⁶ Gufiꞌneemmokki gede maa assa hasiissannonke? Halaale ikkinori maatiro buuxi. Yesuusi ilaalaho sabbakanni heeꞌre, macciishshanni noosi mannira mitootu ‘kaphunni suꞌmansa huntannota’ coyiꞌrino. (Mat. 5:11) Konni kaphi buicho Sheexaaneho. Isi halaale baxanno manna gibbannori insa daafira kapho tareessitanno gede assanno. (Aju. 12:9, 10) Gibbannonkeri tareessitanno kapho macciishsha dihasiissannonke. Togoo kaphi waajjineemmo gede woy ammananke shoshshoggitanno gede assara wodha dihasiissannonke.—1 Yohaannisi 4:1 nabbawi.

(4) YESUUSA SAYINSE UYINOONNI HATTONO HUNNE HAꞌNOONNI

17. Mitootu gufidhinohu Yesuusi reyara albaanni ikkinoha hiikkonne coye laꞌe ikkara dandaanno?

¹⁷ Yesuusi reyara albaanni 12 soqqamaasinesi giddo mittu sayise uyinosi. Wolu soqqamaasinchisi qole sase hige kaadinosi; soqqamaasinesi baala Yesuusi reyara gaꞌa gede techo hashsha iso agurte xooqqino. (Mat. 26:14-16, 47, 56, 75) Tini Yesuusira dhagge diꞌꞌikkitinosi. Isi umisi kuni coyi ikkannota balaxe coyiꞌrino. (Yoh. 6:64; 13:21, 26, 38; 16:32) Mitootu tenne laꞌe gufidhinohu, ‘Yesuusi soqqamaasine hatto ikkitu geeshsha ani insa wido ikka dihasiꞌreemmo’ yite hedde ikkara dandaanno.

18. Yesuusi reyara albaanni hiitti masaalo woꞌmitino?

¹⁸ Qullaawa Borro mayitanno? Lowo dirira albaanni Yihowa Qaalisi giddo Mesihicha 30 kinchu birrira sayinse hirrannita coyiꞌrino. (Zak. 11:12, 13) Sayise hirannohu qole Yesuusira muli jaalla ikkitinori giddo mittoho. (Far. 41:9) Masaalaanchu Zakkaariyaasino “Ledoꞌya nooha allaalaasinchoꞌya gani! Hakkawoyite, geꞌreewu billaallanno” yee borreessino. (Zak. 13:7) Suwashshu wodani noonsa manni tini masaalo Yesuusi aana woꞌmitanna laꞌꞌanno woyite gufiꞌrantenni jawaatanno.

19. Suwashshu wodani noonsari maa wodanchitanno?

¹⁹ Yannankerano hattoori kalaqamara dandaanno? Ee. Yannankera boodu egennaminohu Yihowa Farciꞌraasine ikkino manni halaale agure kaadaasine ikkino; wolootano halaalu mininni fushshate woꞌnaalino. Insa xaadooshshu buusinna interneetete widoonni Yihowa Farciꞌraasine daafira gara ikkinokkire, gama wido calla halaale ikkinore hattono woꞌmunni woꞌma kapho ikkinore tareessitanno. Suwashshu wodani noonsari kayi tennenni digufidhanno. Hatteentenni insa togoo coyi ikkanno yine Qullaawu Maxaafi giddo balanxe masaalloonnita wodanchitanno.—Mat. 24:24; 2 Phe. 2:18-22.

20. Halaale agure fulino manni assannorinni gufiꞌneemmokki gede mayi kaaꞌlannonke? (2 Ximootewoosi 4:4, 5)

²⁰ Gufiꞌneemmokki gede maa assa hasiissannonke? Qullaawa Maxaafa ganyine xiinxalline, woꞌmanka woyite huuccatto assiꞌne, hattono Yihowa uyinonke looso diinaggaambe loonse ammananke kaajjite heedhanno gede assiꞌra hasiissannonke. (2 Ximootewoosi 4:4, 5 nabbawi.) Kaajjado ammana heedhunkero, Yihowa Farciꞌraasine daafira gara ikkinokkire coyiꞌnanna macciishshineemmo woyite dimanseemmo. (Isa. 28:16) Yihowa, Qaalesinna ammanate roduuwanke banxeemmo daafira, halaale agure fulino manni assannorinni digufiꞌneemmo.

21. Xaa yannara batinyu manni sokkanke macciishshannokkiha ikkirono, huluullammeemmokki coyi maati?

²¹ Umi xibbi diro batinyu manni gufiꞌrino hattono Yesuusa giwino. Wolootu kayinni iso ammantino. Sanihediriini shongo giddonni ajayi ajeenna mittu manchi iso ammanino; wole agurina ‘lowo geeshsha batinye’ kakkalaasine nafa iso ammante adhitino. (Soq. 6:7; Mat. 27:57-60; Maq. 15:43) Xaa yannarano lowo miliyoone ikkanno manni digufiꞌrino. Mayira yiniro, insa Qullaawa Borro giddo noo halaale affino, hattono konne halaale baxxanno. Maganu Qaali togo yaanno: “Seerakki baxxannorira coꞌo yiino keeri noonsa; horontanni mittu coyino sarraaqansara didandaanno.”—Far. 119:165.