“Wolootuwiinni Lowore Rosoommo!”

Hakku waajjishanno hashshi heeshshoꞌya soorrino; korkaatuno mite yee Magano woshshiꞌroommohu hakka woyiteeti. Hakko hashsha hakkiinni aanche ikkinore kulammoꞌnera albaanni anje heeshshoꞌya daafira odeesseemmoꞌne; anje heeꞌre laoommori Magano afate hasatto heedhannoe gede assinoe.

ANJE HEEꞌRE ANNIꞌYAWIINNI ROSOOMMORE

Ilamoommohu 1937nni Faransayete gobbara aliyyeenni addi addi shiilo ummannihu Gisinaani yinanni katamiraati. Kasalete shiilo umannohu anniꞌyawiinni jawaate loosa lowo geya hasiissannota rosoommo. Anniꞌya manna mallaada giweemmo gede rosiisinoe; isi beebba assiꞌnannihunna heeshshonsa qarru giddo tuge shiilo umanno mannira halamanno. Heeshshonsa woyyaabbanno gede assa hasiꞌrino daafira, shiilo umanno manni qoossora gaarantanno dirijjite miila ikkino. Isi qooxeessu qeesooti lawisiisaano ikkitinota laꞌꞌanno woyite lowo geya giiramanno. Insa giddo batinyu qawaaxxidhe heedhannoha ikkirono, shiilo ume galinoha buxane manna sagalenna woxe abbe yitanno. Qeesootu ikkito annaꞌya lowo geya ceeꞌmishshinosi daafira, ammaꞌnote daafira mittoreno dirosiisinoe. Isinni Maganu daafira horo hasaambe diegenninoommo.

Jawa ikkummoti anino manna mallaandannita effire giwa hanafummo. Wole gobbanni daye Faransayete heeꞌranno manna mulla kaꞌne gimbannitino lowo geya giirtannoe. Wole gobbanni daggino ooso ledo kaase godoꞌlanna insa ledo hosa baxissannoe. Amaꞌyano Faransayete gobbata ikkitukkinni Poolaandete gobbanni dagginote. Baalunku sirchi kuꞌu koꞌoye miicikki keerunni mittee heeꞌranno yanna quqquxamoommo.

HEESHSHOTE DAAFIRA SEEKKE HEDA HANAFUMMO

Gashshootu 1957nni olaho haꞌreemmo gede woshshie. Wona kulummoꞌne garinni Aljeeriyu ilaalira hashsha tunsote noommohu hakko garinni olaho haꞌroommowaati. “Maganoꞌya! Maganoꞌya!” yee raarummo gedensaanni albaꞌyaanni fule tuncu yiinoehu diina ikkikkinni dubbu harrichooti. Hakkii wodanu hirikki yiie! Hakka woyite iillinoerinna olu heeshshote daafira seekke hedeemmo gede assinoe. ‘Isi kalaqammoommohu mayiraati? Maganu ninke daafira hedanno? Geedote keere afiꞌnammo ikka?’ yee hedummo.

Gedensoonni annaꞌyanna amaꞌya layiꞌrammora maroommowa mittu Yihowa Farciꞌraasinchinni xaadummo. Isi Kaatoolike Faransayete Afiinni qixxeessitinoha Qullaawa Maxaafa uyie; Aljeeriya higummoti konne maxaafa nabbawa hanafummo. Yohaannisi Ajuuja 21:3, 4 noo hedo roorenka dhagge ikkitinoe. Qummeeshshu togo yaanno: “Maganu heeꞌrannowi mannu mereero no.  . . Hindiiddo baala illensanni feyanno; albi ikkito saꞌino daafira, reyo woy dadillu woy wiꞌla woy shetto kunni kaꞌa diheedhanno.” Togoo hedo horo nabbawe diegennoommo. ‘Isi kuni coyi ikkaanko?’ yee hedummo. Hatte yannara Maganunnireno ikko Qullaawu Maxaafi daafira afoommori dino yaa dandeemmo.

Olu yanna gude 1959nni qaera higummohu gedensaanni Firaansiwa yinannihu Yihowa Farciꞌraasinchinni xaadummo; isi lowoha Qullaawu Maxaafi halaale rosiisinoe. Lawishshaho, isi Maganoho Yihowa yinanni suꞌmi noosita Qullaawu Maxaafinni leellishinoe. (Far. 83:18, NW) Qoleno Firaansiwa Yihowa uullate aana taashsho woꞌmitanno gede assannota, baatto gannate assannota hattono Yohaannisi Ajuuja 21:3, 4 noo masaalo wonshannota kulinoe.

Rosoommo rosi ammansiisinoe, qoleno wodanaho coinoe. Ikkirono qeesootaho lowo geya hanqummo; hattono Qullaawu Maxaafi aana xintaminokki roso rosiissannohura insa boroora hasiꞌrummo. Anniꞌyara fule taashsho xeꞌinore cinca hoogoommo daafira, bayichonko mittore assate kaummo.

Firaansiwanna wole Yihowa Farciꞌraasine ikkitino jaallaꞌya kayi hanqo agure gaꞌlabbi yeemmo gede kaaꞌlitinoe. Insa, Kiristaanu loosi mannaho yoo yaa ikkikkinni Maganu Mangisteha dancha duduwo kulle mannu hexxo afiꞌranno gede kaaꞌla ikkinota xawissinoe. Yesuusi loosino loosi konneeti; harunsaanosino konne looso loossanno gede hajajinonsa. (Mat. 24:14; Luq. 4:43) Qoleno ammaꞌnonsa ikkitutano ikkituro manna shaqqillunninna hayyotenni hasaawisa rosa hasiissinoe. Qullaawu Maxaafi, “Mootichu Yesuusi soqqamaancho ikkinohu baalanka mararannoha . . . ikka hasiissannosi ikkinnina giwama dihasiissannosi” yaanno.—2 Xim. 2:24.

Biddi assiꞌra hasiissannoere biddi assiꞌrummohu gedensaanni, 1959nni woradu gambooshshiwa cuuame Yihowa Farciꞌraasincho ikkummo. Hakkiicho Enjili yinannita mitte wedellitte rodoo lae baxummo. Hakkiinni ise songo haꞌra hanafummo; gedensoonni 1960nni adhammummo. Ise worba rodooti, kaajja minaamaati, hattono Yihowa uyinoete muxxe eltooti.—Law. 19:14.

HAYYOOTUNNA WOꞌNAALSHU NOONSA RODUUWIWIINNI LOWORE ROSOOMMO

Lowo diro hayyootunna woꞌnaalshu noonsa roduuwiwiinni lowoha kaajja roso rosoommo. Umonke heeshshi assineemmohanna Lawishsha 15:22 noota ‘Malu seyiro halchinoonniri woꞌmanno’ yitanno amaale harunsineemmoha ikkiro, Yihowa dirijjite giddo shota ikkinokki looso nafa loosa dandiineemmota rosoommo.

Tini qullaawu ayyaaninni borreessinoonni hedo halaale ikkitinota 1964nni huwata hanafoommo. Hakko diro roduuwa ayyaanaamittetenni jawaachishatenna dhaawate woradu aliidi laꞌꞌaancho ikke songuwa towaata hanafummo. Ikkollana hatte yannara 27 diriha calla ikkoommo daafira, gari woꞌnaalshi dinoe. Hakko daafira soꞌro loosoommo. Kayi loosoommo soꞌronni rosate woꞌnaaloommo. Baalunkunni roore hayyootunna woꞌnaalshu noonsa roduuwiwiinni lowoha kaajja roso rosoommo.

Woradu aliidi laꞌꞌaancho ikke soqqama hanafummo balla ikkinore dihaweemmo. Paarisi katamira mitte songo towaatummohu gedensaanni mittu ayyaanaamittetenni gikki yiino rodii ‘Mitte hinge macca intoni?’ yiie. Hakkiinni “Maahoyye” yuummo.

Isi “Luwisi, akime hasiissannohu dhiwaminohuraatinso fayyohooti?” yee xaꞌmie.

“Dhiwaminohuraati” yee qolummosi.

Hakkiinni isi togo yiie: “Garalla yootto. Kayi laummo gara ikkiro ati roore woyite yanna sayisattohu songote aliidi laꞌꞌaanonna wolu ayyaanaamittetenni gikki yitino roduuwi ledooti. Songonkera hexxo mudhitinori, haaruuddu hattono waajjitanno roduuwi woꞌmite no. Insa ledo yanna sayisittoro, wole agurina minensa hadhe sagale itittoro lowo geeshsha hagiidhitanno.”

Hakku rodii amaalinoe amaale hasiissinoetenna kaaꞌlitannote. Isi Yihowa geꞌreewo baxanno gari dhagge ikkinoe. Konnira naaxxa agure bayichonkonni isi yiinoere assa hanafummo. Yihowa togoo roduuwa uyinoehura galaxxeemmosi.

Paarisi katamira 1969nna 1973nni assinoonnihu daga dagiyyote gambooshshiwa sagale shiqishshanno kifilera aliidi laꞌꞌaancho ikke soqqamoommo. Hakko katamira 1973nni assinoonni gambooshshira 60,000 meddi yaanno manna onte barra itisa hasiissinonke! Hatte yannara maa asseemmokka yee gurchaawoommo. Ikkollana Lawishsha 15:22 kultanno garinni hayyootu ledo amaalamaꞌya hakka woyiteno kaaꞌlitinoe. Ayyaanaamittetenni gikki yitinorenna sagale shiqishate daafira woꞌnaalshu noonsa roduuwa amaaꞌloommo. Insa giddo mitu maalu mini noonsareeti, akaakilte kaassannoreeti, sagale qishshannoreetinna maa maa hira hasiissannoro affinoreeti. Baalunku kaaꞌlamme gooddo ikkinonke looso umo fushsha dandiinoommo.

Anenna minaamaꞌya 1973nni Faransayete noo Beeteelera soqqammeemmo gede koyinsoonninke. Hakkiicho umo uyinoonnie loosino shota diꞌꞌikkino. Afirikaho noote Kameruuni yinanni gobbara heedhanno roduuwinkera borro masseemmo gede kulloonnie; hatte gobbara 1970nni kayise 1993 geeshsha loosonke agambe heeꞌnoonni. Xaano hakkonne looso ma garinni loosa dandeemmoro diafoommo. Hatte yannara Faransayennite sinu biirora aliidi laꞌꞌaancho ikkino rodii tenne huwatikki digatino; isi togo yiinoe: “Kameruuni heedhanno roduuwinkera ayyaanaamittete sagale lowo geya hasiissannonsa. Tini sagale gatte baꞌoonkensa ballo!” Qoleno gatte dibaꞌinonsa.

Kameruuninni daggino cimeeyyenni xaadate hatte gobba qooxeessira noota addi addi gobbuwa duucha hige haꞌroommo. Kuri worbuullunna hayyootu roduuwi Kameruuni gobbara noo roduuwira ayyaanaamittete sagale ganye masseemmo gara wodancheemmo gede kaaꞌlitinoe. Yihowa assinoommore maassiꞌrino. Mitu lemuu diri geeshsha hatte gobbara heedhanno roduuwinkera Agarooshshu Shaeno ikko Maganu Mangiste Soqqanshonke gatte diegentinonsa.

MUXXE MINAAMAꞌYAWIINNINO LOWORE ROSOOMMO

Enjili adhate layiꞌra hanafummo yannanni kayise, ise ayyaanaamittetenni worba ikkitinota huwatoommo. Adhammummo gedensaannino ise ayyaanaamittetenni worba ikkitinota roore huwatoommo. Isinni sargenke hawarro, lamunku mitteenni wolqanke assitu geya Yihowara soqqama dandiineemmo gede kaaꞌlankera huuccatto assinke yitinoe. Yihowano huuccattonke macciishshino.

Enjili Yihowa albinni roore addaxxeemmo gedeno kaaꞌlitinoe. Lawishshaho, 1973nni Beeteelete soqqammeemmo gede koyinsoonninke; woradu looso lowo geya baxeemmo daafira lame wodana ikkoommo. Ikkollana Enjili heeshshonke Yihowara sayinse uyinoommota qaagiissitinoe. Ise “Dirijjitesi asse yitunkere baala assa dihasiissannonke?” yitinoe. (Ibi. 13:17) Tennera mayyee heewisameemmo! Hakko daafira Beeteele eꞌnummo. Minaamaꞌya ledo heeꞌroommohu lowo diri giddo ise xiinxalla, wodanchitannota, hattono Yihowa baxxannota ikkase adhamanke kaajjitanno gede assitino, hattono danchare doodhineemmo gede kaaꞌlitinonke.

Lamunku geedhinoommoha ikkirono, Enjili xaano worbatenna kaaꞌlaanchoꞌyaati. Lawishshaho Enjilinna ani tiokiraasete rosi minira eꞌne rosate Ingilizete Afii dandoonke woyyeessiꞌra hananfoommo; korkaatuno mite rosu minnara rosiinsannihu konni afiinniiti. Lamalawu diri balla ikkinkerono dandoonke woyyeessiꞌrate Ingilizete Afii songo haꞌra hananfoommo. Faransayennite sinu biiro komite miila ikkoommohura loosu batiꞌrannoe daafira, wole qaale rosa shota diꞌꞌikkitinoe. Ikkirono Enjili ledo mimmito kaaꞌlinoommo. Xa 80 diri balla ikkinonke; xaano songote gambooshshira Ingilizetenna Faransayete Afiinni qixxaambeemmo. Qoleno ganyine gambooshshe haꞌratenna dandaaminke deerrinni songonke roduuwi ledo soqqamate sharrammeemmo. Ingilizete Afoo rosate sharrammoommotera Yihowa maassiꞌrinonke.

Qoleno 2017nni mitto baxxino atoote afiꞌnoommo. Enjilinna ani Niwu Yorkete Paaterseni, Sinu Biiro Komite Miillaranna Minaamuwinsara Qixxeessinoonni Rosi Mine eꞌne rosate qoosso afiꞌnoommo.

Yihowa Bayira Rosiisaanchooti. (Isa. 30:20) Hakko daafira, ninke baalunku yaano ajuno akkaluno isiwiinni taalle nookki roso ronsanni heeꞌnoommo! (Mar. 4:5-8) Yihowa yaannorenna woꞌnaalshu noonsa roduuwi kultannonsare macciishshitanno wedellooti ayyaanaamittetenni dancha gede lophitannotanna Yihowara ammanante soqqantannota wodanchoommo. Lawishsha 9:9 “Egennaamo rosiisittoro, egenno lexxanno; keeraancho mancho rosiisittoro, lede wodanchanno” yitanno.

Mito woyite, 60 diri albaanni Aljeeriyu ilaalira heeꞌre hashsha tunsote masoommo gara hedeemmo. Hatte yannara togoota dancha heeshsho heeꞌreemmota diafoommo. Wolootuwiinni lowore rosoommo! Yihowa anino Enjilino hagiirrunna harshammo noo heeshsho heeꞌneemmo gede kaaꞌlinonke. Hakko daafira, iimi Anninke Yihowawiinnino ikko iso baxannohu hayyootunna woꞌnaalshu noonsa roduuwiwiinni rosa agurreemmokki gede murciꞌnoommo.