Yihowa Jawaachishannohe

1-2. Batinye Yihowa Farciꞌraasinera mayi qarri iillannonsa?

SOQQAMAASINCHU PHAAWULOOSI Ximootewoosinna Kiristaana baalanka soqqanshonsa guutate dandiiture baala assitanno gede jawaachishinonsa. (2 Xim. 4:5) Ninke baalunku Phaawuloosi amaale seekkine harunsa hasiissannonke. Ikkirono tenne amaale harunsa mito woyite shota diꞌꞌikkitannonke. Lowo roduuwinke sabbakate looso loosa waajjitanno. (2 Xim. 4:2) Lawishshaho, hanni loosonke hoolloonni woy agamboonni gobbara heedhanno roduuwanke hendo. Insa usurransara dandiinannita affinoha ikkirono sabbakate looso loossanno.

² Yihowa mannira hexxo mudhanno gede assannonsahu addi addi qarri iillannonsa. Lawishshaho, batinyu roduuwi maatensara hasiisannore shiqishate lowo saate loossanno. Insa albinni roore soqqama hasidhanno; kayinni lamalate jeefora tenne assate wolqa hoogganno. Wolootaho kayinni bayicho assiꞌrino dhibbinni woy geedhimmatenni kainohunni assa hasidhannore assa qarra ikkitinonsa; insara mininni fula nafa qarra ikkitansara dandiitanno. Mitootu kayinni ‘Yihowara soqqamate diꞌꞌikkinoommoreeti’ yite heddanno. Mereerimu Soojjaatira heedhannoti Meerib yinanni rodoo togo yitino: “Hexxo mudheemma gede assitannoe hedo gargadhate lowo geeshsha sharrama hasiissannoe. Tini qolte soqqameemma yannanna wolqa guddannoe daafira aneneeto bushiisheemma.”

3. Konni birxichira maa ronseemmo?

³ Heeꞌnoommo gari ikkihano ikkiro, Yihowa mitti mittinke iillannonke qarra dandiine saꞌneemmo gedenna wolqanke assitu geeshsha isira soqqammeemmo gede jawaante ikkannonke. Yihowa ninke kaaꞌlannonkehu hiittoonniitiro laꞌnammora albaanni, hanni isi Phaawuloosinna Ximootewoosi qarru iillinsarono soqqanshonsa umo fushsha dandiitanno gede kaaꞌlinonsahu hiittoonniitiro ronso.

YIHOWA SABBANKEEMMO GEDE JAWAANTE AANNONKE

4. Phaawuloosira mayi qarri iillinosi?

⁴ Phaawuloosira lowo qarri iillinosi. Roorenkanni iso gannisi woyite, hattono kinnatenni awwaallisinna usurrisi woyite jawaante hasiissinosi. (2 Qor. 11:23-25) Phaawuloosi gara ikkitinokki hedo waaddinosi woyiti noota maaxikkinni coyiꞌrino. (Rom. 7:18, 19, 24) Qoleno ‘utu gede qasanno qarra’ cince saꞌꞌa hasiissinosi; isi konne qarra Maganu hoolasira halchino.—2 Qor. 12:7, 8.

5. Phaawuloosira qarru iillinosiha ikkirono maa assa dandiino?

⁵ Yihowa, Phaawuloosira lowo qarri iillisirono soqqanshosi umo fushshanno gede wolqa uyinosi. Hanni Phaawuloosi loosinore laꞌno. Lawishshaho isi Roomaho usurame noo yannara Yihudu ammaꞌno murrooti albaanni danchu duduwira laalaate gaaramino; isi gashshaasinete albaannino gaaraminoha ikkara dandaanno. (Soq. 28:17; Fil. 4:21, 22) Qoleno isi batinye mootete mini agaraasineranna laꞌꞌasira daanno mannira baalaho farciꞌrino. (Soq. 28:30, 31; Fil. 1:13) Isi hatte yannankura xaa geeshsha Kiristaana kaaꞌlitanni noota addi addi sokka qullaawu ayyaaninni borreessino. Hakkiinnino sae Phaawuloosi lawishshi Roomaho heedhanno songo jawaachishino; isi lawishshi ammanate roduuwisi, “Maganu qaale kultara waajja nookkiha albinni roore” jawaattanno gede kaaꞌlinonsa. (Fil. 1:14) Phaawuloosi assa hasiꞌranno geeshshire assinokki woyiti nooha ikkirono, wolqasi assitu geeshsha kayinni sharramino; tini ‘danchu duduwi halaꞌlanno’ gede assitino.—Fil. 1:12.

6. Layinki Qorontoosi 12:9, 10 kultanno garinni, Phaawuloosi soqqanshosi umo fushshanno gede kaaꞌlinosiri maati?

⁶ Phaawuloosi Yihowara soqqama dandiinohu Maganu uyinosi jawaantenni ikkinnina umisi wolqanni ikkinokkita afino. Isi Maganu wolqa guutte leeltannohu ‘wolqiweellesi aana ikkinota’ coyiꞌrino. (2 Qorontoosi 12:9, 10 nabbawi.) Phaawuloosira dartu iillinosiha, usurroonnisiha hattono wolu addi addi qarri iillinosiha ikkirono, Yihowa soqqanshosi umo fushshanno gede qullaawu ayyaanisi widoonni wolqa uyinosi.

7. Ximootewoosi soqqanshosi umo fushshate hiikkonne qarra qeela hasiissinosi?

⁷ Phaawuloosi jaala ikkinohu wedellichu Ximootewosino soqqanshosi umo fushshate Maganu aannosi wolqa addaxxino. Phaawuloosi misiyoone ikke seeda doogo haꞌri yannara Ximootewosino ledosi haꞌre soqqamino. Qoleno Phaawuloosi isi songuwa towaatannonna jawaachishanno gede soyinosi. (1 Qor. 4:17) Ximootewoosi, ‘Ani tennera ikkado diꞌꞌikkoommo’ yee hedinoha ikkara dandaanno. Phaawuloosi “Anjekki ayino mishoonkehe” yee amaalinosihu isera ikkara dandaanno. (1 Xim. 4:12) Qoleno hatte yannara Ximootewoosi umisira utu gede qasanno qarri yaano ‘godowu gajaajjo’ noosi. (1 Xim. 5:23) Ikkollana Ximootewoosi, Yihowahu qullaawu ayyaani dancha duduwo duduwatenna roduuwisira soqqamate jawaante aannosita afino.—2 Xim. 1:7.

YIHOWA QARRU IILLINKERONO AMMANAMME HEEꞌNEEMMO GEDE JAWAANTE AANNONKE

8. Xaa yannara Yihowa mannasi jawaachishannohu hiittoonniiti?

⁸ Yihowa xaa yannara mannisi isira ammaname soqqamanni heeꞌranno gede “jawa wolqa” aannonsa. (2 Qor. 4:7) Hanni Yihowa ninke jawaachishatenna isira ammanamme soqqammanni heeꞌneemmo gede kaaꞌlate qixxeessinota shoole qixxaawo laꞌno; insano: huuccattote, Qullaawa Maxaafaati, ammanate roduuwankeetinna soqqanshote.

9. Huuccatto kaaꞌlitankera dandiitannohu hiittoonniiti?

⁹ Huuccattote widoonni jawaachishannonke. Efesooni Sokka 6:18te Phaawuloosi Magano ‘Woꞌmanka woyite huuccidhe’ yee amaalinonke. Maganuno jawaante aannonke. Jaanii yinannihu Boliiviyaho heeꞌranno rodii addi addi qarri iillisi yannara Yihowa irkisinosita wodanchino. Minaamasi, hattono annisinna amasi mitteenni buuto dhiwamino. Jaaniira sasenka mittee towaaxxa qarra ikkitinosi. Amasi fooliishshidhino; minaamasinna annisi kayinni dhiwame lowo yanna keeshshino. Jaanii hattee qaage “Buutote qarri iillie yannara hasiisannoere Yihowara bade kuꞌlaꞌya lowo geya kaaꞌlitinoe” yiino. Yihowa Jaaniira iillinosi qarra cince saꞌꞌate kaaꞌlitanno jawaante uyinosi. Boliiviyaho heeꞌrannohu Roonaaldi yinanni cimeessira amasi kaanserete dhibbi amadinota kullisi. Ise mittu agani gedensaanni mannu aalo ikkitino. Hatte yannara iso kaaꞌlinosiri maati? Roonaaldi togo yiino: “Huuccatto giddoꞌyatanna macciishshaminoere gudise Yihowara kuꞌleemmo gede kaaꞌlitinoe. Wolu baalunkunni roore ane qarri isira leellannosi; isi ane daafira anenni nafa roorse egenninota afoommo.” Mito woyite gurchaambammora woy mayine huucciꞌneemmoro afa hoongammora dandiineemmo. Kayinni Yihowa giddonketa isira fushshine kuꞌla qarra ikkitunkero nafa, huucciꞌneemmo gede koyisinonke.—Rom. 8:26, 27.

10. Ibiraawoota 4:12 kultanno garinni, Qullaawa Maxaafa nabbawanna nabbamboommore hiinca hasiissannonkehu mayiraati?

¹⁰ Qullaawu Maxaafi widoonni jawaachishannonke. Phaawuloosi Qullaawa Borronni jawaantenna shesho afiꞌrinte gede ninkeno Maganu Qaalinni jawaantenna shesho afiꞌra dandiineemmo. (Rom. 15:4) Maganu Qaale nabbambeemmonna hiincineemmo woyite, Yihowa qullaawu ayyaanasi horoonsiꞌre Qaalisi kaaꞌlannonke gara leellishankera dandaanno. (Ibiraawoota 4:12 nabbawi.) Aleenni qummi assinihu Roonaaldi togo yiino: “Barru baala hashsha hashsha Qullaawa Maxaafa nabbawaꞌya lowo geeshsha kaaꞌlitinoe. Maganu akattanna isi soqqamaasinesi towaatanno gara seekke hiinceemmo. Tini wirro jawaateemmo gede kaaꞌlitannoe.”

11. Qullaawu Maxaafi mitte buuto xissiisidhino rodoo kaaꞌlinosehu hiittoonniiti?

¹¹ Maganu Qaale hiincanke iillinonke qarri daafira gara ikkitino lao heedhannonke gede kaaꞌlitannonke. Hanni Qullaawu Maxaafi mitte minaanna shiidhe manchittino rodoo kaaꞌlinose gara laꞌno. Isera mittu cimeessi Iyyoobi maxaafa nabbawa kaaꞌlitannoseta kulinose. Ise konne maxaafa nabbabbuti umi qara gara ikkitinokki lao noosihura Iyyoobi bushiishshino. Ise hedosenni, “Iyyoobi! Qarrikki daafira calla heddooti!” yitino. Ikkollana alba iserano Iyyoobite gedee lao nooseta wodanchitino. Tini, laose biddi assidhanno gede kaaꞌlitinose; hattono minaannase shiidhe xissiisidhino xisso dandiite saꞌanno gede jawaante ikkitinose.

12. Yihowa ammanate roduuwinke widoonni jawaachishannonkehu hiittoonniiti?

¹² Ammanate roduuwinke widoonni jawaachishannonke. Yihowa Kiristaana jawaachishannoti wole doogo ammanate roduuwinsa widoonniiti. Phaawuloosi ammanate roduuwisi ledo xaade ‘mimmito jawaachishate’ quqquxaminota borreessino. (Rom. 1:11, 12) Aleenni kulliti Meeri ammanate roduuwise ledo yanna sayisa lowo geya baxxannota coyidhino. Ise togo yitino: “Yihowa qarraꞌya nafa afinokki roduuwa horoonsiꞌre kaaꞌlinoe. Insa jawaachishannore coyidhe woy sokka borreessite jawaachishshinoe; insa assitinoeri hatte yannara hasiise nooereeti. Qoleno anera iillinoe gedee qarri iillinonsa roduuwira hasaaphaꞌyanna insa assinore assaꞌya kaaꞌlitinoe. Songote cimeeyyeno woꞌmanka woyite songote giddo waagu nooeta huwateemma gede kaaꞌlitinoe.”

13. Songote gambooshshiwa mimmito jawaachisha dandiineemmohu hiittoonniiti?

¹³ Mimmito jawaachinsheemmo bayichi giddo mittu songote gambooshsheeti. Gambooshshe haꞌratto woyite, roduuwunniwa shiqqi yite baxattonsata kulattonsaranna assitanni noorira galatattonsara dandaatto. Lawishshaho mittu cimeessi gambooshshu hanafara albaanni minaannise Yihowa Farciꞌraasincho ikkinokkite mitte rodoora togo yiino: “Ati gambooshshe daakki mageya jawaachishshawonkero afoottaro! Woꞌmanka woyite leenka qaaqquullekki gambooshshe biifisse haadhe daatta; qoleno dawaro qolanno gede qixxeessattansa.” Ise tini lowo geeshsha jawaachishshinose daafira hindiiddo qalxiteennase “Togoo jawaante techo lowo geya hasiisse nooe!” yitino.

14. Soqqansho kaaꞌlitannonkehu hiittoonniiti?

¹⁴ Soqqanshote widoonni jawaachishannonke. Qullaawu Maxaafi halaale wolootaho kulleemmo woyite mannu macciishshirono macciishsha giwirono jawaante afiꞌneemmo. (Law. 11:25) Isteesiyi yinanni rodoo soqqansho lowo geya jawaachishshara dandiitannota huwattino. Ise mittu maatese miili songotenni bohamita lowo geya dadillitino daafira, ‘Iso kaaꞌlate maa asseemmahu gati ikka?’ yite heddino. Isteesiyira tenne agurranna wolere heda qarra ikkitinose. Ikkina ise konne yaachishanno coye dandiite saꞌanno gede kaaꞌlinoseri maati? Soqqanshote! Ise soqqansho fultanno woyite qoqqowisera heeꞌrannoha kaaꞌlo hasiissannonsa manna heda hanaffu. Ise togo yitino: “Hatte yannara Yihowa ayyaanaamittetenni rakke lophitannota Qullaawu Maxaafi rosaancho afiꞌreemma gede kaaꞌlinoe. Tini lowo geya jawaachishshinoe. Baalunkunni roore wodanaaꞌmeemma gede kaaꞌlitinoeti soqqanshote.”

15. Meeri coyidhinorinni maa rosootto?

¹⁵ Heeshshonsa giddo iillannonsari, mitootu gari geeshsha soqqama didandiineemmo yite heddanno gede assansara dandaanno. Aterano hattoori macciishshamannoheha ikkiro, isira soqqamate dandiitto geeshshire assittoro Yihowa hagiidhannota deꞌooti. Hanni Meeri lawishsha wirro laꞌno. Ise wole qaale coyiꞌnanni qoqqowo hadhuti, hakkeya kaaꞌlitannori nookkihu gede assite heddino. Togo yitino: “Mite yanna geeshsha gambooshshunniwa harancho dawaro qola woy qummeeshsha nabbawa woy soqqanshonniwa tiraakte ela agurranna wolere assa didandoomma.” Ise hakkoye qaale seekke coyiꞌranno manna hedde ‘Ani ditidhoommate’ yite heddino. Ikkollana ise hedose biddi assidhino. Gari dandoo hoogguserono Yihowa horoonsiꞌrannoseta wodanchitino. Meeri togo yitino: “Heeshsho gatisanno halaali huwatate qarrisannokkiha ikkirono, mannu heeshsho soorre biddi assannohu konne halaaleeti.”

16. Mininni fula dandiitannokkiri jawaante afidhanno gede mayi kaaꞌlansara dandaanno?

¹⁶ Mininni fula dandiineemmokkiha ikkiro nafa, Yihowa isira soqqama halchineemmota laꞌꞌanno, hattono tenne naadanno. Isi towaattannonkerira woy akimootaho farciꞌneemmo gede faro fanankera dandaanno. Xa assinanni heeꞌnoommore alba assinoommori ledo heewisiinseemmoha ikkiro, hexxo mudhinammora dandiineemmo. Ikkollana Yihowa xa kaaꞌlanni noonke gara huwantummoro, aye geeshshi qarrano hagiirrunni cincine saꞌꞌate jawaante afiꞌneemmo.

17. Rosiisaancho 11:6 kultanno garinni, bayichonkonni dancha guma afiꞌra hoongummoro nafa sabbaka agura hasiissannonkekkihu mayiraati?

¹⁷ Winxeemmohu halaalu wixi giddo hiikku rumuxxaranna lophara dandaannoro dianfoommo. (Rosiisaancho 11:6 nabbawi.) Lawishshaho Barbara yinanniti 80 diri balla ikkannose rodoo, silke dowwolte hattono sokka borreessite ganyite soqqantanno. Ise “Maganu Assinoheri Maati?” yaanno birxicho afidhinota Badheessa 1, 2014nnita Agarooshshu Shae, borreessitino sokka giddo mittete ledo sokkino. Ise affukkinni tenne sokka bohamino minaanniranna minaamara sokkino. Kuri minaanninna minaama tenne borro hige hige nabbawino. Minaanni Yihowa xaaddotenni hasaawisanni noosihu gede asse hedino. Insa wirro gambooshshe haꞌra hanafino; 27 diro bohame keeshshinore ikkirono gedensaanni wirro Yihowa Farciꞌraasine ikkino. Barbara borreessitinote mitte sokkanni, insa halaalu minira higansa ise mageeshshi geeshsha jawaachishshinosero heda dandiineemmo.

18. Maganu aanno jawaante afiꞌrate maa assa dandiineemmo?

¹⁸ Yihowa jawaante afiꞌneemmota lowo faro faninonke. Isi qixxeessino qixxaawo horoonsiꞌneemmoha yaano, huuccatto assiꞌneemmoha, Qullaawa Maxaafa xiinxallineemmoha, roduuwinkewa gamba yineemmohanna soqqansho fulleemmoha ikkiro, Yihowa ninke kaaꞌlate wolqanna hasatto noosita addaxxineemmota leellinsheemmo. “Isira gudisante aamantinore jawaachisha” baxannoha iimi Annanke woꞌmanka woyite addaxxino.—2 Dud. 16:9.