Nabbawaano Xaꞌmitanno Xaꞌmo

Soqqamaasinchu Phaawuloosi “seeru widoonni seeraho reyommo” yaasi mayyaate?—Gal. 2:19, NW.

Phaawuloosi togo yee borreessino: “Maganoho heeꞌrate yee, seeru widoonni seeraho reyommo.”—Gal. 2:19, NW.

Roomu gashshooti giddo noohu Galaatiyu katamira noo songuwara heeꞌrannoha mito Kiristaana kaphu rosiisaano soꞌrisiissinonsa. Kuri rosiisaano, gato afiꞌrate Muse Seera hakko iso barcimmanni gede kulanno seera agadha hasiissanno yite rosiissanno. Ikkirono Phaawuloosi, Magano ammanino mannira xaate barcima gidde ikkitinokkita afino. Isi ammansiisanno garinni kuni rosi kapho ikkinota xawisino; hattono roduuwu Yesuusi Kiristoosita wodote kakkalo seekkite ammantanno gede jawaachishino. (Gal. 2:4; 5:2) Isi Kiristaanaho Muse Seera agadhate giddeeti noonsakkita seekke xawisanni, Galatiyu Sokka 2:19 noo hedo borreessino.

Qullaawu Maxaafi mittu manchi reyihu gedensaanni mittoreno afannokkita woy qooxeessisira noori mittoreno assannosikkita xawise kulanno. (Ros. 9:5) Phaawuloosi, “seeraho reyommo” yii woyite, Muse Seeri xaate iso mittoreno asse afannokkita xawisanni no. Phaawuloosi wodote kakkalo ammananno daafira, ‘Maganoho heeꞌrannota’ afino.

Phaawuloosi heeshsho soorrantinohu ‘seeru widooniiti.’ Hiittonni? Isi hakkuyira albaanni noo kiirora, “mannu keeraaꞌmannohu Yesuusa Kiristoosa ammaꞌnatenni ikkinnina, Muse Seera wonshatenni ikkinokkita” xawisino. (Gal. 2:16) Muse Seeri loworira kaaꞌlinoti egennantinote. Phaawuloosi Galatiyu Kiristaanira togo yee xawisino: “Seera lendoonnihu Abirihaami . . . sirchi daa geeshsha cubbu hiittoohoro egensiisateeti.” (Gal. 3:19) Muse Seeri cuubbaataammunna guuntete xeꞌne noonsari mannu ooso konne Seera guutu garinni wonsha dandiitannokkita anfanni gede assino; hattono insara layinki assinannikkiti guuta kakkalo hasiissannonsati leeltanno gede assino. Hakko daafira Muse Seeri manna ‘sirchunniwa’ yaano Kiristoosiwa iillishino. Mittu manchi Yesuusi Kiristoosa ammanannota leellishiro, Maganu albaanni keeraancho ikka dandaanno. (Gal. 3:24) Phaawuloosi keeraancho ikkinohu, Yesuusa ammane adhino daafiraati. Konni garinni Phaawuloosi, ‘seeraho reye’ ‘Maganoho heeꞌrino.’ Phaawuloosi aana silxaane noosihu Maganoho ikkinnina Seera diꞌꞌikkino.

Phaawuloosi Roomu Kiristaanira borreessino sokkarano togoo hedo coyiꞌrino. Togo yiino: “Roduuwaꞌya, . . . kiꞌne Kiristoosi bisi widoonni Seeraho reyitinoonnireeti. . . . Usurinonke Seeriwiinni reyinohu gede ikkine baxxinoommo daafira, Seeru usuriwiinni tidhamme heeꞌnoommo.” (Rom. 7:4, 6) Kuni qummeeshshino ikko Galatiyu Sokka 2:19 Phaawuloosi coyiꞌranni noohu, Muse Seeri hunda heeꞌne cubbo loonse reyate daafira ikkinokkita leellishshanno. Hatteentenni isi coyiꞌranni noohu konni seeri giddonni keere fulate daafiraati. Xaate Muse Seeri Phaawuloosino ikko isi gedee manna asse afannori dino. Insa Kiristoosita wodote kakkalo ammantanno daafira keere fultino.