Nooꞌne Qoossonni Hagiidhe

1. Batinyu roduuwi Yihowara albinni roore soqqamate sharrantanni noohu hiittoonniiti?

ALAMETE goofimarchi gambise dayinote tenne yannara, loonseemmohu lowo loosi no. (Mat. 24:14; Luq. 10:2; 1 Phe. 5:2) Ninke baalunku Yihowara wolqanke assitu deerrinni soqqama hasiꞌneemmo. Batinyu roduuwi soqqanshonsa halashshidhanni no. Mitu suwisaano ikkite soqqamate heddanni no. Wolootaho Beeteele eꞌꞌe soqqamate woy Maganu mine mina kaaꞌlate mixo noonsa. Batinyu labballu roduuwi kayinni songote soqqamaano woy cimeeyye ikkite soqqamate ikkadda ikkate sharrantanni no. (1 Xim. 3:1, 8) Yihowa mannisi togo uminsa fajjonni isira soqqama hasiꞌrannota laꞌꞌanno woyite lowo geeshsha hagiidhanno!—Far. 110:3; Isa. 6:8.

2. Mite ayyaanaamittete mixonke wonshiꞌra hoongummoro, hiitto ikkinammora dandiineemmo?

² Ikkollana, mite ayyaanaamittete mixonke wonshiꞌnummokki lowo yanna saꞌuro, dadillinammora dandiineemmo. Qoleno, diru akkallenni woy wolu korkaatinni mite qoosso afiꞌra hoongummoro, hexxo mudhinammora dandiineemmo. (Law. 13:12) Meliisarano togoo coyi tuncu yiinose.b Ise Beeteelete soqqama woy Maganu Mangiste Sawaakooti Rosi Mine eꞌe rosa lowo geeshsha halchitanno. Ikkirono togo yitino: “Xa diru akkalle amaddinoe daafira, togoota soqqanshote qoosso afiꞌra didandeemma. Hakko daafira, mito woyite hexxo mudheemma.”

3. Mitu roduuwi mite soqqanshote qoosso afiꞌrate maa assa hasiissannonsaha ikkara dandaanno?

³ Wedella ikkitinorinna dancha ordu fayyimma noonsari mitu roduuwi, mite qoosso afiꞌrate gikki yaanna mite akatta lossiꞌra hasiissannonsaha ikkara dandaanno. Insa busulla, hobbi ruxxi yitannokkire, hattono loosate quqquxantannore ikkitara dandiitanno; ikkirono, albinni roore cinca, uyinanninsa looso qorophite loosa, hattono manna ayirrisa rosa hasiissannonsaha ikkara dandaanno. Hasiissannohe akatta lossiꞌrate sharramattoha ikkiro, soqqanshote qoosso hedoottokki yannara uyinahera dandiinanni. Hanni Niiki yinanni rodii woꞌnaalsha laꞌno. Isi 20 dirihu noo waro, songote soqqamaancho assine shooma hoongoonnisi daafira lowo geeshsha dadillino. “‘Shooma hoongoonniehu maikkeennaatikka?’ yee hedoommo” yiino. Ikkirono, Niiki hexxo dimudhino. Hatteentenni albinni roore sabbakatenna songote giddo soqqamate diinaggaawino. Xaa yannara isi Sinu Biiro Komite miila ikke soqqamanni no.

4. Konni birxichira maa ronseemmo?

⁴ Mixokki wonshiꞌra hoogootto daafira hexxo mudhootto? Hatto ikkiro, giddokkita Yihowara hasaaphi. (Far. 37:5-7) Qoleno, soqqanshokki woyyeessiꞌra dandaatto gara kultannohe gede gikki yitino roduuwa amaaꞌli; hakkiinni, amaaltinohere assate sharrami. Hatto assittoro, hedootto qoosso afiꞌrattora woy mixokki wonshiꞌrattora dandaatto. Ikkollana, aleenni kullite Meliisa gede, halchootto qoosso afiꞌra dandaattokkita ikkitara dandiitanno. Hatto ikkiro, hagiirrikki baikkinni heeꞌra dandaattohu hiittoonniiti? Tenne xaꞌmora dawaro qolate, konni birxichira (1) hagiidhineemmo gede assannonkeri maatiro, (2) hagiirrinke lexxanno gede assiꞌra dandiineemmohu hiittoonniitiro, hattono (3) roore hagiirraamma ikkineemmo gede hiittoo mixo fushshiꞌra dandiineemmoro ronseemmo.

HAGIIDHINEEMMO GEDE ASSANNONKERE

5. Hagiirraamma ikkate maa illachisha hasiissannonke? (Rosiisaancho 6:9)

⁵ Rosiisaancho 6:9 hagiirraamma ikkineemmo gede kaaꞌlannonkeri maatiro kultannonke. (Qummeeshsha nabbawi.) ‘Noosi coyinni hagiidhanno’ manchi, noosire naadanno. Afiꞌra dandaannokkire lexxate haafamanno manchi kayinni, hagiirre diafiꞌranno. Konni qummeeshshinni maa ronseemmo? Hagiirraamma ikkate, wonshiꞌra dandiineemmokki mixo agurre noonke coye illachisha hasiissannonke.

6. Aanchine hiikkonne lawishsha xiinxallineemmo? Konni lawishshinni maa ronseemmo?

⁶ Ikkina addinta noonkerinni hagiidha dandiineemmo? Woꞌmanka woyite haaro coye rosa hasiꞌneemmo daafira, duuchu mannira kuni dandiinannikkire lawannonsa. Ikkirono, noonkerinni hagiidhinanni heeꞌra dandiineemmo. Hiittoonni? Tenne afate, hanni Yesuusi Maatewoosi 25:14-30 coyiꞌrinoha taalaantetec lawishsha laꞌno. Konne lawishsha xiinxallineemmo woyite, hagiirre afiꞌra dandiineemmo garanna noonke coyinni roore hagiidha dandiineemmo gara ronseemmo.

HAGIIRRINKE LEXXANNO GEDE ASSIꞌRA DANDIINEEMMO GARA

7. Yesuusi taalaantete daafira coyiꞌrino lawishsha haransite kuli.

⁷ Konni lawishshira kulli manchi, doogo haꞌrara kae no. Isi haꞌrara albaanni borojjootasi woshshe, daddaltara taalaante uyinsa.d Kuni manchi borojjootisi dandoo hede, mittoho onte taalaante, mittoho lame, mittoho kayinni mitte uyino. Umiri lamu borojjooti uyinoonninsa woxinni seekkite daddalte, mootichinsa woxi lexxanno gede assitino. Sayikki borojjichi kayinni uyinoonnisi woxinni mittoreno diassino; hakko daafira, mootichisi daye iso loosunni hoolino.

8. Lawishshu giddo kullihu umi borojjichi hagiidhinohu mayiraati?

⁸ Umi borojjichi mootichisi onte taalaante uyinosi daafira lowo geeshsha hagiidhinoti dihuluullissannote. Onte taalaante lowo woxe ikkitino daafira, tini mootichisi iso lowo geeshsha ammanannosita leellishshanno! Layinki borojjichina? Woleteemmero isi uyinoonnisi taalaante umi borojjichira uyinoonnite geeshsha ikkitinokki daafira dadillara dandaanno. Isi kayinni ma assino?

9. Yesuusi lawishshu giddo kulihu layinki borojjichi mayyee digungumino? (Maatewoosi 25:22, 23)

⁹ Maatewoosi 25:22, 23 nabbawi. Yesuusi, layinki borojjichi lame taalaante calla uyinoonnisi daafira hanqino woy caaccaawino diyiino. Qoleno Yesuusi kuni borojjichi togo yee gungumino diyiino: ‘Anera tenne calla uyinayie? Onte taalaante uyini borojjichi ane ma rooranno! Mootichiꞌya hakkeya naadannoekkiha ikkiro, tenne uyinoeta lame taalaante waame agure umiꞌya looso loosiꞌreemmo.’

10. Layinki borojjichi uyinoonnisi taalaantenni maa assino?

¹⁰ Umi borojjichi gede, layinki borojjichino uyinoonnisi looso lowo geeshsha ayirrisino; qoleno mootichisira diinaggaawe soqqamino. Hakko daafira, uyinoonnisi taalaantenni daddale woxe ero assino. Kuni borojjichi diinaggaawe loosino daafira, mootichisi baꞌraasinosi. Mootichisi lowo geeshsha hagiidhino; qoleno wole looso nafa lede uyinosi!

11. Hagiirrinke lexxanno gede assiꞌra dandiineemmohu hiittoonniiti?

¹¹ Hatteente gede, Yihowara soqqammammora uyinanninke loosi ikkihano ikkiro, wolqanke assitu deerrinni diinaggaambe loonsummoro, hagiirrinke lexxanno. Sabbakate looso laalaatte loosi; hattono songoꞌne ledo gamba yite loosi. (Soq. 18:5; Ibi. 10:24, 25) Songote gambooshshiwa jawaachishshanno dawaro qola dandaatto gede, seekkite qixxaabbe haꞌri. Kiristaanu Heeshshonna Soqqansho gambooshshira uyinanniheta aye kifileno shiimuri gede assite laꞌooti. Songote giddo mito looso kaaꞌli yinihero, yannante marte kaaꞌli; hattono ammaꞌninanniha ikki. Uyinanniheha aye loosono loosatto woyite, mulla yannakki guxxitanni noottohu gede assite heddooti. Dandookki woyyeessiꞌrate sharrami. (Law. 22:29) Yihowa loosira diinaggaawitto deerrinni, ayyaanaamittetenni rakke lophatto, hattono hagiirrikki lexxanno. (Gal. 6:4) Qoleno, ati halchootto qoosso wolootu afidhanno woyite, insa ledo hagiidha qarra diꞌꞌikkitannohe.—Rom. 12:15; Gal. 5:26.

12. Lamu roduuwi hagiirrinsa lexxanno gede maa assino?

¹² Aleenni kullita Beeteele eꞌe soqqama woy Maganu Mangiste Sawaakooti Rosi Mine eꞌe rosa halchitannota Meliisa yinanni rodoo qaagatto? Ise tenne qoosso afiꞌra dandiitinokkiha ikkirono, togo yitino: “Suwisaancho ikke soqqameemma soqqansho woꞌma giddoꞌyanni soqqamate sharrameemma; qoleno duuchunku gari soqqansho soqqamate woꞌnaaleemma. Tini lowo geeshsha hagiidheemma gede assitinoe.” Niiki songote soqqamaancho assine shooma hoongeennasi dadilli yannara ma assiyya? Isi togo yiino: “Assa dandeemmore illachishoommo; lawishshaho soqqanshotenna gambooshshunniwa jawaachishshanno dawaro qolate diinaggaawoommo. Qoleno, Beeteele eate forme wonsheenna layinki diro woshshinoonnie.”

13. Xa nooheha ayyaanaamittete looso diinaggaambe loosittoro, maa afiꞌratto? (Rosiisaancho 2:24)

¹³ Xa nooheha ayyaanaamittete looso diinaggaabbe loosittoro, albillitte wole qoosso afiꞌratto? Niiki gede atino afiꞌrattoha ikkara dandaanno. Kayinni Meliisa gede wole qoosso afiꞌra hoogittoro nafa, roore hagiirraamo ikka dandaatto; hattono Yihowara loossanni nootto loosinni tashshi yaannohe. (Rosiisaancho 2:24 nabbawi.) Qoleno, Mootichanke Yesuusi Kiristoosi hagiirsiissanni noottota afootto daafira, lowo geeshsha hagiidhatto.

ROORE HAGIIRRAAMO IKKATTO GEDE KAAꞌLITANNOHE MIXO

14. Ayyaanaamittete mixo daafira hendeemmo woyite, maa qaaga hasiissannonke?

¹⁴ Xa noonke qoosso illachinsheemmo yaa, Yihowara soqqammeemmo soqqansho halashshiꞌneemmo faro dihasiꞌneemmo yaateni? Hatto yaa diꞌꞌikkino! Sabbakatenna rosiisate dandoonke woyyeessiꞌrate kaaꞌlitannonketanna roduuwanke albinni roore kaaꞌlineemmo gede assitannonke mixo fushshiꞌra dandiineemmo. Uminke hasatto agurre woloota kaaꞌlate illachinsheemmoha ikkiro, tini mixonke woꞌmitanno.—Law. 11:2; Soq. 20:35.

15. Hagiirrikki lexxanno gede kaaꞌlitannoheti mite mixo hiikkuriiti?

¹⁵ Fushshiꞌrattora dandaattoti mite mixo hiitteeti? Wonshiꞌra dandaatto mixo hiitteetiro afatto gede kaaꞌlahera Yihowa huucciꞌri. (Law. 16:3; Yai. 1:5) Konni birxichira umi gufora kulli mixo giddo mitte fushshiꞌra lawishshaho, kaaꞌlaancho suwisaancho woy woꞌma yanna suwisaancho ikka, Beeteelete soqqama, woy Maganu mine mina kaaꞌla dandaatto ikka? Woy dancha duduwo halashshate wole qaale rosa, wole agurina wole qooxeessa hadhe sabbaka nafa dandaattoha ikkara dandaanno. Tenne addi addi mixo daafira ledde afate, Yihowa Fajjo Assate Qinaawino Manna (Amaaru Afoo) yaanno maxaafa fooliishsho 10 nabbawanna songokki cimeeyye hasaawisa dandaatto.e Togoo mixo wonshiꞌrate sharramattoha ikkiro, ayyaanaamittete lophokki leeltanno, hagiirrikkino lexxanno.

16. Xaa yannara mitte mixo wonshiꞌra dandaattokkiha ikkiro, maa assa dandaatto?

¹⁶ Kayinni aleenni kulli mixo xa wonshiꞌra dandaattokkihalla ikki? Hatto ikkiro, wonshiꞌra dandaattota wole mixo fushshiꞌri. Hanni fushshiꞌrattora dandaattota mite mixo laꞌno.

17. Umi Ximootewoosi 4:13, 15 kultanno garinni, mittu rodii worba rosiisaancho ikkate maa assa dandaanno?

¹⁷ Umi Ximootewoosi 4:13, 15 nabbawi. Ati cuuamootto rodootiro, coyiꞌratenna rosiisate dandookki woyyeessiꞌrate sharrama dandaatto. Mayira? Nabbawate, coyiꞌratenna rosiisate ‘diinaggaawattoha’ ikkiro, macciishshanno manni lowo horo afiꞌranno. Nabbawatenna Rosiisate Dandiittore Baala Assi yitanno birosherera noota mitte mittenta xiinxallote naxiwe nabbawatenna harunsate mixo fushshiꞌri. Mitte higge mitte naxiwe calla xiinxalli, hattenne hedo mine rosiisiꞌri, hattono kifile shiqishatto woyite hattee amaale harunsi. Kaaꞌlaancho amaalaancho woy “qaale kultanninna rosiissanni [daafurtannore wole] cimeeyye” amaale xaꞌmiꞌri.f (1 Xim. 5:17) Birosherete giddo kulloonni hedo huwatate calla ikkikkinni, macciishshanno manni ammana kaajjitanno gede kaaꞌlatenna insa loosoho kakkayisate sharrami. Hatto assittoro, atehuno insa hagiirrino lexxanno gede assatto.

18. Qanchu soqqanshora fushshiꞌnoommo mixo wonshiꞌrate kaaꞌlannonkeri maati?

¹⁸ Ninke baalunkura sabbakatenna manna rosaano assate looso uyinoonninke. (Mat. 28:19, 20; Rom. 10:14) Konni lowo geeshsha hasiisanno loosira dandookki woyyeessiꞌra hasiꞌratto? Nabbawanna Rosiisa yitanno biroshere xiinxallatto woyite, rosoottore harunsate kaaꞌlitannohe mixo fushshiꞌri. Qoleno, Kiristaanu Heeshshonna Soqqansho—Xiinxallote Maxaaficho aananna Kiristaanu Heeshshonna Soqqansho gambooshshiwa shiqqannote lawishsha ikkanno hasaawa leellishshanno viidiyubbanni dancha amaale afiꞌra dandaatto. Qooxeessiꞌnera roore kaaꞌlitannoti hiitteetiro afate, addi addi hayyo woꞌnaali. Tenne amaale harunsite soqqamattoha ikkiro, soqqanshote fullahoottoha ikkatto daafira lowo hagiirre afiꞌratto.—2 Xim. 4:5.

19. Magano hagiirsiissanno akatta lossiꞌra dandaattohu hiittoonniiti?

¹⁹ Fushshiꞌra hasiissannohete lowo geeshsha hasiissanno mixo giddo mitte, Magano hagiirsiissanno akatta lossiꞌra ikkitinota habbooti. (Gal. 5:22, 23; Qol. 3:12; 2 Phe. 1:5-8) Tenne mixo wonshiꞌrate maa assa dandaatto? Lawishshaho, hanni ammanakki albinni roore kaajjitara hasiꞌrootto yine hendo. Ammanakki kaajjishiꞌrate kaaꞌlitannohe amaale kultanno birxichuwa borronke giddonni nabbawa dandaatto. Qoleno roduuwinke addi addi qarri giddo heedhenni kaajjado ammana noonsata leellishshino gara kultanno woꞌnaalshuwa JW Biroodikaastera laꞌꞌakkino lowo geeshsha kaaꞌlitannohe. Woꞌnaalshansa laittohu gedensaanni, heeshshokki giddo insa faale haꞌra dandaatto doogga hedi.

20. Hagiirrinke lexxanno gede assiꞌranna dadillisannonkere ajisha dandiineemmohu hiittoonniiti?

²⁰ Ninke baalunku Yihowara xa soqqammanni heeꞌnoommohunni roore soqqama halchineemmoti dihuluullissannote. Maganu abbannote haaro alamera, isira hasiꞌnoommo deerrinni soqqama dandiineemmo. Hakka geeshsha kayinni, dandiineemmore assate wolqanke assitu geeshsha sharrammeemmoha ikkiro, hagiirrinke lexxanno gede assiꞌranna dadillisannonkere ajisha dandiineemmo. Roorenka kayinni, ‘hagiirraamu Maganinke’ Yihowa ayirranno gedenna guweenya adhanno gede assineemmo. (1 Xim. 1:11, NW) Konni daafira, noonke qoossonni hagiidhino!