Yihowa Danchumma Qamassine Laꞌe—Hiittoonni?

1-2. Faarso 34:8 kultanno garinni, Yihowa danchumma huwata dandiineemmohu hiittoonniiti?

HANNI konni albaanni itte egennoottokki sagale uyinoonnihe yine hendo. Tenne sagale laꞌe, suꞌniissite, qinshoonni gara xaꞌmite, woy ite egennino manna xaꞌmite sagale hiittootero afattora dandaatto. Ikkollana, tenne sagale baxattoronna teꞌee afa dandaattohu qamasittoro callaati.

² Qullaawa Maxaafanna borronke nabbambe, hattono wolootu Yihowa assinonsa danchumma hasaabbanna macciishshine Yihowa danchumma daafira ronsammora dandiineemmo. Ikkollana, Yihowa mageeshshi geeshsha danchahoro roore huwata dandiineemmohu, danchummasi ‘shinqe’ woy qamanse laꞌnummorooti. (Faarso 34:8 nabbawi.) Hanni tenne assa dandiineemmota mitte doogo leellishanno lawishsha laꞌno. Lawishshaho, woꞌma yanna soqqansho giddora eꞌne soqqama hasiꞌnoommoha ikkara dandaanno; ikkollana, hattee mixonke wonshiꞌrate, heeshshonke bikkunnita assiꞌra hasiissannonke. Yesuusi Maganu Mangiste balaxisiinsummoro Yihowa addinta hasiisannonkere baalankare wonshannonketa coyiꞌrino qaale duucha hinge nabbamboommoha ikkara dandaanno; kayinni kuni qaali heeshshonke giddo woꞌmanna horo laꞌnoommokkiha ikkara dandaanno. (Mat. 6:33) Ikkirono, Yesuusi coyiꞌrino qaale addaxxine, woxe fushshineemmo doogo ajinsheemmo, looso loonseemmo yanna ajinsheemmo, hattono soqqanshonke illachinsheemmo. Hatto assinummoro, Yihowa mageeshshi geeshsha towaatannonkero uminke heeshshonni laꞌneemmo. Yihowa danchumma qamanse laꞌneemmo yaate.

3. Faarso 16:1, 2 yitanno garinni, Yihowa danchumma leellishannohu ayeooraati?

³ Yihowa “mannu baalunkura” wole agurina iso affinokkirira nafa “shaqqadoho.” (Far. 145:9; Mat. 5:45) Ikkollana, roorenkanni Yihowa baxxannorinna woꞌma lubbonsanni isira soqqantannori isiwiinni lowo atoote afidhanno. (Faarso 16:1, 2 nabbawi.) Hanni Yihowa assinonkehu danchu coyi giddo mito laꞌno.

4. Yihowa, isiwa shiqa hanafino mannira danchummasi leellishannohu hiittoonniiti?

⁴ Yihowa rosiisinonkere assinummo kiiro, isi rosiisannonkeri mageeshshi geeshsha kaaꞌlannonkero huwanteemmo. Lawishshaho, Yihowa daafira rosanna iso baxa hananfummo yannara, Yihowa isiwiinni xeertiꞌneemmo gede assitannonke hedonna rosicho qeeꞌlineemmo gede kaaꞌlinonke. (Qol. 1:21) Qoleno ninkeneeto Yihowara sayinse uyine cuuammummo woyite, isi dancha tiia oyenke, hattono isi ledo muli jaalooma kalaqiꞌneemmo gede asse danchummasi lede leellishinonke.—1 Phe. 3:21.

5. Soqqammeemmo woyite Yihowa danchumma laꞌneemmohu hiittoonniiti?

⁵ Soqqammeemmo woyiteno, Yihowa danchumma heeshshonkenni laꞌneemmo. Manna ille qasse laꞌꞌa waajjatto? Batinye Yihowa soqqamaasine hattooreeti. Yihowa Farciꞌraasincho ikkattora albaanni, egennoottokki manni qae marte batinyu manni hakkeya baxannokki sokka afoottokki mannira kuleemmo yite horo hedde egennoottokkiha ikkara dandaanno. Xa kayinni kuni woꞌmanka woyite loosatto loosooti. Hakkiinnino saꞌe, Yihowa kaaꞌlonni sabbakate looso lowo geeshsha baxattoha ikkootto! Yihowa wole dooggannino irkisinohe. Soqqantanni heedhe xaadootto manni ayirrinye bainore coyiꞌrirono Yihowa wodanaaꞌmatto gede kaaꞌlinohe. Qoleno, hasatto noosi manchira malino qummeeshsha qaagge kulatto gedeno kaaꞌlinohe. Hakkiinni saeno, soqqanshote qoqqowiꞌnera noo manni macciishsha giwirono, soqqama agurattokki gede jawaante uyinohe.—Erm. 20:7-9.

6. Yihowa qajeelsannonke gari danchummasi leellishannohu hiittoonniiti?

⁶ Yihowa soqqanshote qajeelsenkeno danchummasi leellishinonke. (Yoh. 6:45) Kiristaanu Heeshshonna Soqqansho gambooshshiwa, manna danchu garinni hasaawisa dandiineemmo gara leellishshanno viidiyubba shiqqannonke; qoleno hakkiinni ronsoommore soqqanshote horoonsiꞌneemmo gede jawaachinshoonninke. Haaro coye woꞌnaala umi qara waajjinammora dandiineemmo; ikkollana, haarote ronsoommo doogonni sabbakate woꞌnaalleemmo woyite, qooxeessinkera noo manni macciishshannota wodanchineemmo. Qoleno, songotenna qoqqowu gambooshshiwa, miteekkine konni albaanni horo sabbanke egenninoommokki doogonni sabbankeemmo gede jawaachinshanninke. Hattee doogganni sabbakano umi qara waajjineemmoha ikkara dandaanno; ikkirono, hatto assate woꞌnaalleemmo woyite, Yihowa maassiꞌrannonke. Hanni, heeshshonke gari ikkihano ikkiro, Yihowara albinni roore soqqamate haaro doogga woꞌnaalleemmo woyite Yihowa maassiꞌrannonke gara laꞌno. Hakkiinni soqqanshonke halashshiꞌra dandiineemmo gara ronseemmo.

YIHOWA ISO ADDAXXITANNORE MAASSIꞌRANNO

7. Soqqanshonke halashshiꞌrate sharrammummoro, mayi atoote afiꞌneemmo?

⁷ Yihowawa albinni roore shinqeemmo. Hanni galtesi ledo Kolombiyaho soqqamanni noohu Saamueelib yinanni cimeessi lawishsha laꞌno. Insa alba songonsara suwisaano ikkite hagiirrunni soqqantanno; hakkiinni kayinni kaaꞌlo roore hasiissanno songo noowa hadhe soqqanshonsa halashshiꞌra hasidhu. Tenne mixonsa wonshiꞌrate, mito baxxanno coye agura hasiissinonsa. Saamueeli togo yiino: “Maatewoosi 6:33 yitannore harunsine, hasiisannonkekki uduunne hidha agurrummo. Kayinni roore qarra ikkitinonketi minenke agure haꞌrate. Lowo geeshsha injiinonke mineeti; woxeno baante gundoommoho.” Insa wole songo haꞌrihu gedensaanni, hasiisannonsare afiꞌrate albiha hendiro shiimu woxi callu ikkannonsata huwatino. Saamueeli togo yiino: “Yihowa massagannonke garanna huuccattonkera dawaro qolanno gara laꞌnoommo.” Lede togo yiino: “Yihowa ninkenni hagiidhinota anfoommo; qoleno konni albaanni anfe egenninoommokki garinni baxillesi laꞌnoommo.” Atino soqqanshokki halashshiꞌra dandaatto gari heeꞌrakka? Hatto assittoro, Yihowawa albinni roore shiqattotanna isi towaatannoheta addaxxa dandaatto.—Far. 18:25.

8. Ivaaninna Viktooriya coyiꞌrinorinni maa rosootto?

⁸ Soqqanshonkenni hagiidhineemmo. Hanni Kirgistaanete suwisaano ikke soqqamannori Ivaaninna Viktooriya yinanni minaanninna minaama yiinore laꞌno. Insa Maganu mine mina kaaꞌlano ikko uyinanninsaha ayyaanaamittete looso baalanka loosa dandiitanno gede, heeshshonsa bikkunnita assidhino. Ivaani togo yiino: “Uyinanninkeha mitto mittonka looso woꞌma wolqankenni loonseemmo. Hawarro hawarro daafursannonkeha ikkirono, wolqanke Maganu Mangiste loosira uyinoommota anfoommo daafira giddiidi keerenna harshammo afiꞌneemmo. Qoleno batinye haaro jaalla kalaqiꞌnoommo daafiranna hagiirsiissanno woꞌnaalshuwa afiꞌnoommo daafira, tashshi yaannonke.”—Maq. 10:29, 30.

9. Mitte qarru amadinose rodoo soqqanshose halashshiꞌrate maa assitino? Mayi atoote afidhinoyya?

⁹ Qarrisannori heeꞌriro nafa, Yihowara soqqamme hagiidha dandiineemmo. Lawishshaho, Galchimi Afirikira heedhannoti Miire yinanniti minaanna shiidhinoti jawa rodoo, alba akimitte ikkite loossanno. Hakkiinni, xurata fultuti suwisaancho ikkite soqqama hanaffino. Miire darga assiꞌrinohu qaafa hoꞌlanno dhibbi amadinose daafira, minunni mine hadhe mitte saate saꞌe soqqama didandiitanno. Kayinni borrote gaare horoonsidhe roore saate soqqama dandiitanno. Xa ise galagalte marte hasaawissannohunna Qullaawa Maxaafa xiinxallissannohu batinyu manni noose; kuri giddo mito silketenni hasaawissanno. Miire albinni roore soqqantanno gede kakkayisinoseri maati? Ise togo yitino: “Yihowaranna Kiristoosi Yesuusira nooe baxilli giddoꞌya woꞌmino. Qoleno Yihowa wolqaꞌya assitu deerrinni isira soqqameemma gede kaaꞌlaera ganye huucciꞌreemma.”—Mat. 22:36, 37.

10. Yohaannisi 6:45 kultanno garinni, Yihowara albinni roore soqqamate insaneeto shiqishshannori mayi atoote afidhanno?

¹⁰ Yihowa lede qajeelsannonke. Moorishesi yinanni giddichora suwisaancho ikke soqqamannohu Keeni, tini halaale ikkitinota heeshshosinni laino. Isi halaale macciishshiti, rosanni noo yuniversitenni agure fulino; hakkiinni cuuamihu gedensaanni, woꞌma yanna soqqansho soqqama hanafino. Isi togo yiino: “‘Ani haꞌreemmona, ane soqqie’ yee coyiꞌrinohu masaalaanchu Isayaasi gede ikkate woꞌnaaleemmo.” (Isa. 6:8) Keeni batinye Yihowa mine mina kaaꞌlino; hattono borronke insa qaalira qole tira kaaꞌlino. Isi togo yiino: “Uyinoonnie looso loosate hasiissannoe dandoo heedhannoe gede kaaꞌlannoe qajeelsha adhoommo.” Ikkollana isi rosinoti loosu ogimma calla diꞌꞌikkitino. Isi lede togo yiino: “Assa dandeemmokkiri nootanna albinni roore dancha Yihowa soqqamaancho ikkate hiittoo akatta lossiꞌra hasiissannoero rosoommo.” (Yohaannisi 6:45 nabbawi.) Atino Yihowa lede qajeelsannohe gede heeshshokki giddo mitore biddi assiꞌra dandaatto ikka?

11. Wodiidi Kooriyira heeꞌrannori sase roduuwi Yihowara soqqamate maa assino? Mayi atoote afiꞌrinoyya? (Aaniidi qoolira noo misileno lai.)

¹¹ Yihowara lowo diro soqqantino roduuwi nafa, haaru gari soqqansho soqqamate qajeelshu hasiisannonsa. Koroonu fayya ubbe noo yannara, mitte Wodiidi Kooriyira noo songora soqqantanno cimeeyye togo yite borreessitino: “Mite halashshaano dhiwanni waadannonsa daafira, alba soqqansho gari geeshsha difultanno; xa kayinni viidiyote widoonni ganyite soqqama dandiitino. Settawu diri ale ikkinonsari sase roduuwi, kompiyutere horoonsiꞌnanni gara rose soqqansho barru baala fulanno yaa dandiinanni.” (Far. 92:14, 15) Soqqanshokki halashshiꞌranna Yihowa danchumma albinni roore qamasse laꞌꞌa hasiꞌratto? Hanni tenne mixo wonshiꞌrate assa dandaattoha mito coye laꞌno.

MIXOKKI WONSHIꞌRA DANDAATTO GARA

12. Yihowa iso addaxxitannorira maa assara qaale eino?

¹² Yihowa addaxxa rosi. Yihowa, iso addaxxinummoronna wolqanke gudinse uyine soqqammummosiro, atootesi duushshankera qaale eino. (Mil. 3:10) Kolombiyaho heedhannoti Fabiyola yinanni rodoo, Yihowa coyiꞌrino qaale wonshannota heeshshosenni laꞌino. Ise cuuantanni heedhenni mulenni, woꞌma yanna suwisaancho ikkite soqqama hasidhino. Ikkollana, maatese hasiisannore afidhanno gede iseno loossanni kaaꞌla hasiissinose. Konnira ise xurata fultanno yanna iillituta, Yihowa kaaꞌlannose gede eeggifatte huuccidhino. Ise togo yitino: “Duucha woyite, xurata fulanno manni xuratu fajjo afiꞌrate lowo yanna keeshshanno. Ani kayinni kuꞌlummahunni mittu agani gedensaanni fajjinoonnie. Maalalete yaa dandeemma!” Lamu agani gedensaanni, ise suwisaancho ikkite soqqama hanaffino. Isera xa 70 diro saꞌꞌannose; hattono suwisaancho ikkite soqqantanna xa 20 diro ale ikkinose. Tenne yanna giddo, ise settu manni halaale macciishshe cuuamanno gede kaaꞌlitino. Togo yitino: “Mito woyite wolqiweeloommaha lawierono, Yihowa suwisaancho ikke soqqama agureemmakki gede kaaꞌlanni nooe.”

13-14. Yihowa addaxxine soqqanshonke halashshiꞌneemmo gede ayeoo lawishshi kaaꞌlankera dandaanno?

¹³ Yihowa addaxxino manni lawishshinni rosi. Qullaawu Maxaafi giddo Yihowara diinaggaawe soqqaminohu batinyu manni xagge no. Batinye xagge leellishshannonte gede, Yihowa insa baxxino garinni maassiꞌrinonsahu iso addaxxitannota leellishannore assituhu gedensaanniiti. Lawishshaho, Yihowa Abirihaami maassiꞌrinohu, Abirihaami “haꞌrannowa afa hoogirono” qaesinni fulihu gedensaanniiti. (Ibi. 11:8) Yaiqoobi baxxino atoote afiꞌrinohu sokkaasinchu ledo sharramihu gedensaanniiti. (Kal. 32:24-30) Israeelete daga Hexxote Gobba eꞌara kaꞌe noo yannara Yordaanoosi Laga tayisse saꞌꞌa dandiitinohu, kakkalaasine iima haꞌranni noo laga balaxxe eꞌuhu gedensaanniiti.—Iya. 3:14-16.

¹⁴ Yihowa addaxxite soqqanshonsa halashshidhinori yannankera noori Yihowa soqqamaasine lawishshino kaaꞌlannohe. Lawishshaho, Payiteni yinanni rodiinna minaamasi Diyaana soqqanshonsa halashshiꞌrino roduuwi xagge nabbawa baxanno; insa nabbawino woꞌnaalshuwa giddo mite “Insaneeto Uminsa Fajjonni Shiqishshino” yaanno birxichi hunda fultinote.c Payteni togo yiino: “Tenne woꞌnaalshuwa nabbambeemmo woyite, mittu manchi coommitanno sagale itanna sammi yine laꞌnanni heeꞌnoommoha lawannonke. Laꞌne laꞌne yinummoti, Yihowa dancha ikkinota qamanse laꞌꞌa hasiꞌnoommo.” Gedensoonni, Payteninna Diyaana sabbakkannori roore hasiissannowa soqqantara hadhino. Ati tenne birxichuwa nabbawootto? Qoleno, jw.org aana noota Xeertiꞌre Noo Qooxeessira Sabbaka—Awustiraaliya yitannotanna Xeertiꞌre Noo Qooxeessira Sabbaka—Ayerilaande yitanno viidiyubba laootto? Tini birxichuwanna viidiyubba, soqqanshokki halashshiꞌra dandaatto doogga hedatto gede kaaꞌlitahera dandiitanno.

15. Heeshshonsa giddo Yihowa balaxisiissannori ledo jaalooꞌmanke kaaꞌlitannonkehu hiittoonniiti?

¹⁵ Yihowara albinni roore soqqamatto gede jawaachishshannohe jaalla doodhi. Konni albaanni inte egenninoommokki sagale, hattee sagale baxanno manni ledo heeꞌnummoro qamase laꞌꞌa roore rakkankera dandiitanno. Hatteente gede, heeshshonsa giddo Yihowa balaxisiisanno manniwa aanneemmoha ikkiro, soqqanshonke halashshiꞌneemmo doogo heda roore rakkannonke. Kentinna Veroonika yinanni minaanninna minaama, tini halaale ikkitinota huwatino. Kenti togo yiino: “Jaallankenna maatenke alba soqqamme egenninoommokki doogganni soqqammeemmo gede jawaachishshinonke.” Lede togo yiino: “Maganu Mangiste balaxisiisanno manniwa aananke, haaro coye woꞌnaala waajjineemmokki gede kaaꞌlitinonketa wodanchinoommo.” Kentinna Veroonika xa Serbiyaho baxxitino suwisaano ikkite soqqantanni no.

16. Yesuusi Luqaasi 12:16-21 coyiꞌrino lawishshi garinni, Yihowara soqqamate uminke qiniite agura hasiissannonkehu mayiraati?

¹⁶ Yihowara soqqamate umikki qiniite aguri. Yihowara soqqamate banxeemmore baalankare agurreemmo yaa diꞌꞌikkino. (Ros. 5:19, 20) Ikkollana, mito banxeemmo coye agura gimboommo daafira calla Maganoho albinni roore soqqama hoongeemmoha ikkiro, Yesuusi lawishshunni kuli manchi loosino soꞌro loonsanni heeꞌnoommo; kuni manchi umisira lowoha dancha coye qixxeessiꞌrinoha ikkiro, Magano kayinni hawino. (Luqaasi 12:16-21 nabbawi.) Faransayete gobbara heeꞌrannohu Kiristiyani yinanni rodii togo yiino: “Yihowaranna maateꞌyara gari yannanna wolqa dioommo.” Gedensoonni, isinna minaamasi suwisaano ikke soqqamate hedi. Kayinni tenne mixonsa wonshiꞌrate, loosanno looso agura hasiissinonsa. Insa heeshshote hasiisannore afiꞌrate, minenna biiro feyannore ikkino; qoleno noonsarinni kassi yee heeꞌra rosino. Insa Yihowara soqqamate yee uminsa qiniite aguransanni hagiidhino? Kiristiyani togo yiino: “Xa soqqansho albinni roore lowo geeshsha banxoommo; qoleno Qullaawa Maxaafa xiinxallinseemmohunna galagalle marre hasaawinseemmo manni Yihowa daafira rosanna laꞌꞌanke hagiirsiissannonke.”

17. Soqqammeemmo woyite haaro coye woꞌnaaleemmokki gede guficho ikkankera dandaannori maati?

¹⁷ Alba soqqante egennoottokki garinni soqqama waajjitooti. (Soq. 17:16, 17; 20:20, 21) Yunayitidi Isteetisete heedhannoti Sheerlii yinanni suwisaancho, Koroonu fayya ubbe noo yannara soqqantanno gara biddi assiꞌra hasiissinose. Ise umi qara silketenni farciꞌrate hobbi ruxxi yitino. Ikkollana, woradu aliidi laꞌꞌaanchi songonsa towaati yannara qajeeltuhu gedensaanni, ganyite silketenni sabbaka hanaffino. Togo yitino: “Umi qara lowo geeshsha waajjoomma; xa kayinni konni garinni soqqama lowo geeshsha baxeemma. Minunni mine haꞌneemmo waro xaandeemmo manna rooranno manninni xaandanni heeꞌnoommo!”

18. Soqqanshonke halashshiꞌrate woꞌnaalleemmo woyite, qarra ikkannore qeela dandiineemmohu hiittoonniiti?

¹⁸ Mixo fushshidhe wonshiꞌrate woꞌnaali. Qarrisanno coyi tuncu yaannonke woyite, kaaꞌlannonke gede Yihowa huucciꞌneemmo, hattono maa assa hasiissannonkero afate seekkine hendeemmo. (Law. 3:21) Awuroppaho Roomaaniyu Afoo coyidhanno gaamora soqqantannoti Sooniya yinanniti woꞌma yanna suwisaancho togo yitino: “Mixoꞌya woraqataho borreesse wodha baxeemma; hattono hakkoye woraqata leellannowa wodheemma. Lakkitte doogo leellishshanno misile xarapheessu aana wodhoomma. Mitto coye doodheemma woyite, hattee doogo lae, doodheemmari mamira qole massannoero hedate woꞌnaaleemma.” Sooniya qarra ikkannori tuncu yaannose woyite, dancha danchare hedate woꞌnaaltanno. Ise togo yitino: “Tuncu yaannoehu mittu mittunku coyi guficho ikkannoe gede woy buusu gede ikke kaaꞌlannoe gede assiꞌreemmati aneeti.”

19. Maa assate murciꞌra hasiissannonke?

¹⁹ Yihowa duucha doogganni maassiꞌrannonke. Isi guweenya adhanno gede assate dandiinummore baala assine, aannonke atoote naandeemmota leellisha dandiineemmo. (Ibi. 13:15) Tenne assa dandiineemmo doogga giddo mitte, soqqanshonke halashshiꞌrate haaro coye woꞌnaalate; hatto assankeno Yihowa lede maassiꞌrannonke gede assitanno. Konnira, barru barrunku Yihowa dancha ikkinota qamanse laꞌneemmo doogo hasiꞌno. Hatto assinummoro, ninkeno Yesuusi gede, “Ane sagale soyinoehu haja wonshatenna loososi guutate” yaa dandiineemmo.—Yoh. 4:34.