Yihowa Ledo Nooꞌne Jaalooma Wirro Kaajjishidhe

DIRU kiiro, batinyu muxxe geꞌreewi wirro Kiristaanu songo higanno. Insa mittu mittunku songo higganno woyite, “gordoho lowo hagiirre [ikkannota]” heda dandiineemmo! (Luq. 15:7, 10) Atino wirro songo higoottoha ikkiro, Yesuusi, sokkaasinenna Yihowa umisi higootto daafira lowo geeshsha hagiidhitannota addaxxa dandaatto. Ikkollana, Yihowa ledo noohe jaalooma wirro kaajjishiꞌrate woꞌnaalatto woyite, qarra ikkannori tuncu yaahera dandaanno. Qarra ikkahera dandaannori maati? Togoo qarra qeelatto gede mayi kaaꞌlahera dandaanno?

QARRA IKKAHERA DANDAANNORI MAATI?

Batinyu roduuwi songo higguhu gedensaanni nafa hexxo mudhitanno. Moote Daawiti qarri miteekke aterano leellahera dandaanno. Isi Yihowa cubbosi gatona yiisihu gedensaanni nafa, “Cubbu amadeennae laꞌꞌa hoogoommo” yiino. (Far. 40:12; 65:3) Mittu manchi Yihowawa higihu gedensaanni, gaabbonna saalu lowo diro qarrisasira dandaanno. Isaabeeli bohante 20 saꞌꞌanno diro keeshshitino.a Ise togo yitino: “Yihowa cubboꞌya maarinoe yee ammana lowo geeshsha qarra ikkitinoe.” Hexxo mudhittoro, ayyaanaamittetenni wirro wolqiweelatto. (Law. 24:10) Togoori ikkahera wodhitooti.

Mitootu kayinni, ‘Yihowa ledo wirro muli jaalooma kalaqiꞌrate assa hasiissannore baalare asse afeemmokka?’ yite yaaddanno. Antooni bohame higihu gedensaanni togo yiino: “Alba Yihowa Farciꞌraasincho ikke noommo waro rosoommoha woy asseemmoha roore coye hawe aguroommo.” Mitootu togoo hedo macciishshantannonsa daafira, ayyaanaamittete coyira diinaggaawate hobbi ruxxi yitanno.

Lawishshaho, mittu manchi minesi hombobalatte baasa gawajjituro, hakkonne mine wirro minate mageeshshi wolqanna yanna hasiissannoro hedanno woyite baasa yaadara dandaanno. Hatteente gede, jawa cubbo loosseenna Yihowa ledo noohe jaaloomi daafaminoha ikkiro, konne jaalooma wirro kaajjishiꞌrate lowore assa hasiissannoheti leeltinoheha ikkara dandaanno. Ikkirono kaaꞌlannoheri no.

Yihowa “Amme hanni mala hansona!” yee koyisinonke. (Isa. 1:18) ‘Mala hasate’ woy coye biddi assate wonanni lowore assite kaootto. Yihowa tenne assoottohura lowo geeshsha baxannohe. Hanni tenne hedi: Yihowawa higootto daafira, isi ate widoonni Sheexaanu kaphaancho ikkinota leellisha dandaanno!—Law. 27:11.

Yihowawa higootto daafira isiwa shiqa hanafootto; konnira isino atewa shiqeemmo yee qaale eino. (Yai. 4:8) Songo higge wirro songote miili gede ikkite kiiramakki hagiirsiissannote; kayinni hakkiinni sainore assa hasiissannohe. Annikkinna Jaalikki Yihowara noohe baxilli lexxanni haꞌranno gede assiꞌra hasiissannohe. Tenne assa dandaattohu hiittoonniiti?

WONSHIꞌRA DANDAATTO MIXO FUSHSHIꞌRI

Wonshiꞌra dandaatto mixo fushshiꞌrate woꞌnaali. Yihowa daafira rosootto halaalenna isi Gannatete daafira uyino hexxo xaano qaagattoha ikkara dandaanno. Ikkollana, wirro ayyaanaamittete coye ganyite assa rosa hasiissannohe; lawishshaho, ganyite dancha duduwo sabbaka hattono ammanate roduuwikkiwa aana hasiissannohe. Hanni aante noo mixo laꞌno.

Yihowa woꞌmanka woyite hasaawisi. Annikki Yihowa loosootto cubbira tiiꞌꞌikki bushiishanni waadannoheha ikkiro, huuccatto assiꞌra qarra ikkitannoheta afino. (Rom. 8:26) Ikkirono, Yihowara isi jaala ikka lowo geeshsha hasiꞌrattota kulte ‘jaatte huucciꞌri.’ (Rom. 12:12) Andire albita qaage togo yiino: “Aneneeto baasa bushiishoommo hattono saaloommo. Ikkirono huuccatto assiꞌrummo kiiro woyyimma afiꞌreemmo. Albinni roore giddoyidi keere afiꞌroommo.” Mayite huucciꞌrattoro afa hoogittoro cubbo loose maaro einohu Moote Daawiti Faarso 51 nna 65te huucciꞌrino huuccatto laꞌꞌa dandaatto.

Qullaawa Maxaafa ganyite xiinxalli. Tenne assakki ammanakki kaajjitanno gedenna Yihowara noohe baxilli lexxanno gede kaaꞌlitannohe. (Far. 19:7-11) Felippe togo yiino: “Wonanni ayyaanaamittetenni daafureemmo gedenna Yihowa dadilliseemmo gede assitinoeti, ganye Qullaawa Maxaafa nabbawanna xiinxalla hoogaꞌyaati. Wirro Yihowa dadillisa hasiꞌroommokki daafira Qullaawa Maxaafa ganye xiinxallate murciꞌroommo.” Atino hatto assa dandaatto. Hojju xiinxallokkira malino birxicho afiꞌrate, mittu ayyaanaamittetenni gikki yiino rodii kaaꞌlannohe gede kuꞌla dandaatto.

Ammanate roduuwikki ledo wirro jaalooꞌmi. Bohame songo higinohu mitu roduuwi wolootu ninke daafira gara ikkinokkire heddanno yee yaadanno. Laarisa yinanni rodoo togo yite noore maaxxukkinni coyidhino: “Lowo geeshsha saaloomma. Roduuwa lowo geeshsha dadillisoomma yee hedoomma. Togo yee hedanni lowo yanna keeshshoomma.” Cimeeyyenna wolootu ayyaanaamittetenni gikki yitino roduuwi Yihowa ledo wirro jaalooꞌmatto gede kaaꞌlitahera hasidhannota huluullantooti. (“Cimeeyye Assa Dandiitannore” yitanno saaxine lai.) Insara ati Yihowawa higootto daafira tashshi yaannonsa; qoleno hagiirraamo ikkattora hasidhanno.—Law. 17:17.

Songote roduuwiwa albinni roore shiqatto gede mayi kaaꞌlahera dandaanno? Ganyite ammanate roduuwikki ledo gamba yite Yihowa magansiꞌri hattono insa ledo soqqami. Tini kaaꞌlitannohehu hiittoonniiti? Filikisi yinanni rodii togo yiino: “Roduuwu ani songo higeemmo yanna quqquxante agarte no. Insa baxxannoeta huwatoommo. Insa baalunku wirro songote miila ikkoommota, Yihowa gatona yiinoetanna isira soqqamanni heeꞌra dandeemmota huwateemmo gede kaaꞌlitinoe.”—“Maa Assa Dandaatto?” yitanno saaxine lai.

HEXXO MUDHITOOTI!

Yihowa ledo noohe jaalooma wirro kaajjishiꞌrate sharramatto woyite, Sheexaanu hombobalattete gedeehu addi addi qarri amadannohe gede assa diaguranno. (Luq. 4:13) Yihowa ledo noohe jaalooma kaajjishidhe iillannohe qarrira xaanni qixxaawi.

Yihowa geꞌreewisi daafira coyiꞌranni togo yiino: “Bainore hasiꞌreemmo; billaallinore gamba assiꞌreemmo; hiiqqaminore sisseemmo. Dhiwaminore xagiseemmo.” (Hiz. 34:16) Yihowa batinyu roduuwi isi ledo noonsa jaalooma wirro kaajjishidhanno gede kaaꞌlinonsa. Isi atino isi ledo noohe jaalooma wirro kaajjishidhanni haꞌratto gede kaaꞌlahera hasiꞌrannota huluullantooti.