Haarote Adhantinoonniri Yihowara Soqqamate Illachishshe

1-2. (a) Haarote adhantinori Yihowa addaxxa hasiissannonsahu mayiraati? (Faarso 37:3, 4) (b) Konni birxichira maa ronseemmo?

MULI yannara adhamate qixxaabbinoonnireeti? Woy haarote adhantinoonnireeti? Hatto ikkiro, lowo geeshsha baxxinanni galteꞌne ledo hagiidhitinanni heeꞌrate quqquxantinoonniti dihuluullissannote. Hige adhantinorira mitu qarri iillannonsati egennantinote; qoleno insa lowo geeshsha hasiisanno doorsha doodha hasiissannonsa. Qarru amadannoꞌne woyite assitinannirinna doodhitinanni doorshi albillitte hagiirraamma ikkitinanni gede woy ikkitinannikki gede assaꞌnera dandaanno. Yihowa addaxxitinanniha ikkiro dancha doorsha doodhitinanni; adhamaꞌneno kaajjado ikkitanno hattono hagiirraamma ikkitinanni. Maganu biddishsha harunsa hoogginiro kayinni, qarru iillaꞌnera dandaanno hattono hagiirraamma diꞌꞌikkitinanni.—Faarso 37:3, 4 nabbawi.

² Kuni birxichi roore kaaꞌlannohu haarote adhantinore ikkirono, adhantinorira baalaho iillansara dandaanno qarrano kulanno. Konni birxichira Qullaawu Maxaafi giddo kulloonnihu mitu ammanamino labballinna meenti lawishshinni maa ronseemmoro laꞌneemmo. Insa lawishshi adhamankerano wole heeshshonkerano kaaꞌlannonke gara ronseemmo. Qoleno yannankera noohu mitu adhamino manni lawishshinni maa ronseemmoro laꞌneemmo.

HAAROTE ADHANTINORIRA IILLANSARA DANDAANNO QARRI MAATI?

3-4. Haarote adhantinorira iillansara dandaanno qarri maati?

³ Mitu manni haarote adhantinore, rooru manni heeꞌranno gedee heeshsho heedhara xixxiiwannonsa. Lawishshaho, annuwinsanna amuuwinsa hattono fiixinsa mulenni ooso iltanno gede xixxiiwansara dandaanno. Woy jaallansanna maatensa miilla mine hidhitanno gedenna mini giddo dancha uduunne wonshidhanno gede xixxiibbansara dandiitanno.

⁴ Haarote adhantinori qoropha hoogguro lowo asali giddora eꞌanno gede assannonsare doodhitara dandiitanno. Hakkiinni minaanninna minaama asalensa baatate seeda saate loosa hasiissannonsaha ikkara dandaanno. Kuni loosi hojju xiinxallora, maatete magansiꞌraranna soqqanshote yanna hoogganno gede assannonsa. Minaanninna minaama lowo woxe afiꞌrate woy loosonsa hoogannokki gede hashsha barra loosanni gambooshshe nafa hosara dandaanno. Tini Yihowara albinni roore soqqante afidhanno hagiirre hoogganno gede assitannonsa.

5. Kilawusinna Mareesa lawishshinni maa rosootto?

⁵ Maalaamittete coye illachisha hagiidhinanni gede assitannokkita addi addi woꞌnaalshi leellishanno. Hanni Kilawusinna Mareesa yinanni minaanninna minaama tini halaale ikkase huwatino gara laꞌno.b Insa adhamihu gedensaanni lowo woxenna jiro afiꞌrate lamunku woꞌma yanna looso loosanno. Ikkirono insa hagiirraamma diꞌꞌikkitino. Kilawusi togo yiino: “Maalaamittete coyi hasiisannonkehunni alee noonke; kayinni ayyaanaamittete mixo dinonke. Noore coyiꞌniro heeshshonke raqaxantinotenna mitiimma batidhinote.” Atino maalaamittete coye illachishakki harshammo afiꞌrattokki gede assitinoheta huwatoottoha ikkara dandaanno. Hatto ikkiro hexxo mudhitooti. Dancha lawishsha ikkanno manni xagge xiinxallakki tennera kaaꞌlitahera dandiitanno. Hanni balanxe minaannuwu Moote Iyosaafiixi lawishshinni maa rossannoro laꞌno.

IYOSAAFIIXI GEDE YIHOWA ADDAXXE

6. Iyosaafiixi batinye olanto mannasi qassara dagguta Lawishsha 3:5, 6 noota kaajja amaale harunsinohu hiittoonniiti?

⁶ Minaannuwa, mito woyite nooꞌnehu loosu qeechi wolqaꞌnera aleenni ikkinoꞌneha lawannoꞌne? Hatto ikkiro Moote Iyosaafiixi lawishshi kaaꞌlaꞌnera dandaanno. Iyosaafiixi moote ikkino daafira daga woꞌmate keere agara hasiissannosi! Isi konne shaaꞌꞌa ikkinokki qeechasi wonshate maa assino? Iyosaafiixi isi gashshino daga keere agarate dandaannore baala assino. Isi qiishote katamma seekkiꞌrino hattono 1,160,000 saꞌannota wolqaataame olanto qixxeessiꞌrino. (2 Dud. 17:12-19) Gedensoonni Iyosaafiixira lowo qarri tuncu yiinosi. Amoonootunna Moaabootu hattono ilaalaame gobbara Seiiri heeꞌranno manniti batinye olanto Iyosaafiixi, maatesinna mannasi waajjishiishino. (2 Dud. 20:1, 2) Iyosaafiixi ma assiyya? Isi kaaꞌlonna jawaante afiꞌrate Yihowa huucciꞌrino. Isi assinori Lawishsha 3:5, 6 noote kaajja amaale ledo sumuu yaannoreeti. (Qummeeshsha nabbawi.) Layinki Duduwo 20:5-12 nooti Iyosaafiixi isonooto heeshshi asse huucciꞌrino huuccatto, isi baxillaancho iimi Annasi lowo geeshsha addaxxannota leellishshanno. Yihowa Iyosaafiixi huuccattora dawaro qolinohu hiittoonniiti?

7. Yihowa Iyosaafiixi huuccattora dawaro qolinohu hiittoonniiti?

⁷ Yihowa Leewaawichu Yahazieeli widoonni Iyosaafiixi hasaawisinosi. Yihowa togo yiinosi: “Darga dargaꞌne calla amaddine agarre! Ani Kaaliiqi eemmoꞌne qeelle laꞌinannina.” (2 Dud. 20:13-17) Ikkollana ola olammannihu hakko garinni diꞌꞌikkino! Kayinni kuni biddishshi mannunniha ikkikkinni Yihowa uyinoho. Iyosaafiixi woꞌmunni woꞌma Yihowa addaxxe yinoonnisire assino. Isinna mannisi diinu ledo olamara fuli yannara, olaho albaanni worinohu, qajeeltino olanto ikkikkinni massaara qodhinokkiho Yihowa faarsotenni guwisanno labballooti. Yihowa Iyosaafiixi diꞌꞌirraawisinosi; isi diinu olanto qeelino.—2 Dud. 20:18-23.

8. Minaannuwu Iyosaafiixi lawishshinni maa rosa dandiitanno?

⁸ Minaannuwa, Iyosaafiixi lawishshinni rosa dandiitinanni. Maateꞌne towaatate qeechi nooꞌne daafira, insa agaratenna hasiisannonsare shiqishate diinaggaabbine loossinanni. Qarru tuncu yaannoꞌne woyite qarra umiꞌnenni tirate heddinanniha ikkara dandaanno. Kayinni umiꞌne jawaante addaxxitinannikki gede qorophe. Hatteentenni calluwiꞌne heedhinoonni woyite, kaaꞌlannoꞌne gede Yihowa huuccidhe. Qoleno minaamaꞌne ledo heedhinoonni woyiteno Yihowara giddoꞌneta kultine huuccidhe. Yihowa biddishsha afiꞌrate Qullaawa Maxaafanna Yihowa dirijjite qixxeessitino borro xiinxalle hattono rossinoonnire loosu aana hosiisse. Mitu manni Qullaawu Maxaafiha xintu seera harunsitine doodhitinoonnire misharanna dogantinoonnihu gede asse coyiꞌrara dandaanno. Insa woxunna woxunni hirranni coyi maateꞌnera dancha agarooshshe ikkannoꞌne yitara dandiitanno. Kayinni Iyosaafiixi lawishsha qaagge. Isi Yihowa addaxxino hattono tenne loosunni leellishino. Yihowa konne ammanamino mancho tuge diagurinosi; kiꞌneno tuge diagurannoꞌne. (Far. 37:28; Ibi. 13:5) Minaanninna minaama hagiirru noo heeshsho heeꞌrate wolere maa assa dandaanno?

MASAALAANCHU ISAYAASINNA MINAAMASI GEDE YIHOWARA SOQQAMATE ILLACHISHSHE

9. Masaalaanchu Isayaasinna minaamasi maa assino?

⁹ Masaalaanchu Isayaasinna minaamasi heeshshonsa giddo roorsiꞌranno coyi Yihowara soqqamate. Isayaasi masaalaanchoho; minaamasino ‘himanaanchote’ yinoonni daafira iseno masaalo coyidhannota ikkitukkinni digattino. (Isa. 8:1-4) Isayaasinna minaamasi heeshshonsa giddo Yihowa magansiꞌra balaxisiisino. Insa xaa yannara noo minaannuwinna minaamuwira kaajja lawishsha ikkino!

10. Minaannuwunna minaamuwu Qullaawu Maxaafi masaalo xiinxallansa, Yihowara albinni roore soqqamate murciꞌranno gede kaaꞌlitannonsahu hiittoonniiti?

¹⁰ Xaa yannara noo minaannuwinna minaamuwi Yihowara soqqamate dandiire baala asse heeshshonsa giddo Yihowara soqqama balaxisiisa dandaanno. Insa Qullaawu Maxaafi masaalo mitteenni xiinxalle hattono tini masaalo woꞌmanka woyite woꞌmitanno gara wodanche Yihowara noonsa ammana kaajjishiꞌra dandaanno.c (Tit. 1:2) Qoleno insa mite Qullaawu Maxaafi masaalo woꞌmitanno gede kaaꞌla dandaanno gara hiinca dandaanno. Lawishshaho insa, Yesuusi goofimarchu daara albaanni dancha duduwo gobba baalate dudumbanni yee masaalino masaalo woꞌmitanno gede kaaꞌla dandiitanno. (Mat. 24:14) Minaanninna minaama Qullaawu Maxaafi masaalo woꞌmitanni noota buuxi kiiro, dandii deerrinni Yihowara albinni roore soqqamate murciꞌranno.

AQIILANNA PHIRISQILLA GEDE MAGANU GASHSHOOTE BALAXISIISSE

11. Aqiilanna Phirisqilla maa assino? Mayira?

¹¹ Wedellu minaannuwinna minaamuwi, Aqiilanna Phirisqilla lawishshinni rosa dandaanno; insa Roomu katamira heeꞌrino Ayihudootaati. Insa Yesuusi daafira kulannoha dancha duduwo macciishshe Kiristaana ikkino. Aqiilanna Phirisqilla dancha heeshsho heeꞌrannoti dihuluullissannote. Ikkollana Gashshaanchu Qelawudewoosi Yihudu manni Roomu gobbanni fulanno gede hajajita heeshshonsa hedeweelcho soorrantino. Hanni Aqiilanna Phirisqilla hiitto ikkinoro hedi. Insa egentino qooxeessa agurte haꞌra, haaro qae kalaqiꞌranna dunkaana gowate loosonsa haaru qooxeessira hanafa hasiissinonsa. Kuni iillinonsa coyi Maganu Gashshoote balaxisiissannokki gede assinonsani? Tenne xaꞌmora dawaro affinoonniha ikkara dandaanno. Aqiilanna Phirisqilla Qorontoosi hadhinowa, hakko noo songo kaaꞌla hanaffino; hattono soqqamaasinchu Phaawuloosi ledo roduuwa jawaachishshino. Gedensoonni insa sabbakkannori roore hasiissannowa wole katama hadhino. (Soq. 18:18-21; Rom. 16:3-5) Insa hagiirrunna harshammo noo heeshsho heedhinoti dihuluullissannote!

12. Minaanninna minaama ayyaanaamittete mixo fushshiꞌra hasiissannonsahu mayiraati?

¹² Xaa yannara noo minaannuwinna minaamuwi, Maganu Mangiste balaxisiise Aqiilanna Phirisqilla lawishsha harunsa dandaanno. Minaanninna minaama mixonsa daafira hasaawate maltino yanna adhamara albaanni noote. Insa Yihowara soqqamate mixo fushshiꞌre mixonsa wonshiꞌrate mitteenni sharramannoha ikkiro, tini Yihowa kaaꞌlannonsata albinni roore huwattanno faro fantannonsa. (Ros. 4:9, 12) Hanni Raasilinna Elzaabeeti woꞌnaalsha laꞌno. Raasili togo yiino: “Adhammammora albaanni ayyaanaamittete mixonke daafira seekkine hasaamboommo.” Elzaabeetino togo yitino: “Mixonke daafira hasaamboommohu, gedensaanni assate doodhineemmohu wolu coyi mixonke wonshiꞌneemmota hoolannonkekki gedeeti.” Raasilinna Elzaabeeti heeshshonsa gari fajjinonsa daafira sabbakkannori roore hasiissannowa Mayikironeezhiya haꞌre soqqama dandiino.

13. Faarso 28:7 kultanno garinni, Yihowa addaxxiniro afiꞌnannihu danchu coyi maati?

¹³ Batinyu minaannuwinna minaamuwi Raasilinna Elzaabeeti gede, dandaaminsa deerrinni sabbakatenna rosiisate looso loosate heeshshonsa bikkunnita assiꞌrino. Minaanninna minaama Yihowara soqqamate mixo fushshiꞌrannohanna mixonsa wonshiꞌrate sharramannoha ikkiro dancha guma afiꞌranno. Insa Yihowa towaatannonsa gara laꞌꞌanno, albinni roore iso addaxxanno hattono addu hagiirre afiꞌranno.—Faarso 28:7 nabbawi.

SOQQAMAASINCHU PHEEXIROOSINNA MINAAMASI GEDE YIHOWA UYINO HEXXO ADDAXXE

14. Pheexiroosinna minaamasi Yihowa Maatewoosi 6:25, 31-34 eino qaale wonshanno yee ammanannota leellishinohu hiittoonniiti?

¹⁴ Minaannuwunna minaamuwu soqqamaasinchu Pheexiroosinna minaamasi lawishshinnino rosa dandaanno. Pheexiroosi umo Yesuusinni xaadinkunni lewu aganinni kayisse mittu diri geeshsha ikkitanno yanna gedensaanni, lowo geeshsha hasiisanno doorsha doodha hasiissinosi. Pheexiroosi qulxuꞌme woshshaaxxe galinoho. Isi, Yesuusi woꞌma yanna iso harunsanno gede koyisisita maatesi daafira heda hasiissinosi. (Luq. 5:1-11) Pheexiroosi Yesuusi ledo haꞌre sabbakate looso loosa doodhino. Isi dancha coye doodhino. Minaamasino isi doodhino doorshira sumuu yitinoti dihuluullissannote. Qullaawu Maxaafi, Yesuusi reyotenni kaihu gedensoonni, Pheexiroosi minaama, Pheexiroosi ledo mitowa hadhinota qummi assanno. (1 Qor. 9:5) Pheexiroosi Kiristaana ikkino minaannuwanna minaamuwa amaali woyite afoo wonshe coyiꞌrinohu minaamasi dancha lawishsha ikkitinohuraati. (1 Phe. 3:1-7) Pheexiroosinna minaamasi, insa Maganu Mangiste balaxisiisi geeshsha Yihowa hasiisannonsare wonshannonsata addaxxannota leellishino.—Maatewoosi 6:25, 31-34 nabbawi.

15. Tiagonna Esteri woꞌnaalshinni maa rosootto?

¹⁵ Adhantininku boodu diri sainoꞌnere ikkitiniro, Yihowara albinni roore soqqamate hasattoꞌne lexxitanno gede assiꞌra dandiitinannihu hiittoonniiti? Hatto assa dandiitinanniti mitte doogo wolootu minaanninna minaama lawishshinni rosate. Lawishshaho, “Insaneeto Uminsa Fajjonni Shiqishshino” yaannoha aante aantete fulanno birxicho nabbawa dandiitinanni. Kuni birxichi Biraazilete heeꞌrannori Tiagonna Esteri yinanni minaanninna minaama, sabbakkannori roore hasiissannowa haꞌre soqqamate kaꞌꞌanno gede kaaꞌlinonsa. Tiago togo yiino: “Yihowa yannankera soqqamaanosi kaaꞌlino gara kulanno woꞌnaalsha nabbambummoti, ninkeno isi massagannankenna kaaꞌlannanke laꞌꞌa hasiꞌnoommo.” Gedensoonni insa soqqamate Paraguwa yinanniwa haꞌrino; insa 2014 hanafe hakkiicho Porchugaalete afoo coyiꞌnanni qoqqowira soqqamanni no. Esteri togo yitino: “Efesooni Sokka 3:20 lamunku lowo geeshsha banxeemmo qummeeshshaati. Yihowara soqqammanni duucha hinge konni qummeeshshira kulloonni hedo halaale ikkase huwantoommo.” Phaawuloosi Efesooni Kiristaanira borreessinote tenne sokkara, Yihowa huucciꞌneemmohunni aleenni sayise aankera dandaannota xawisino. Tini woꞌmanka woyite halaaleho!

16. Wedellu minaannuwinna minaamuwi mixonsa daafira heddanno woyite ayeoo amaaꞌla dandiitanno?

¹⁶ Xaa yannara noori wedellu minaannuwinna minaamuwi, Yihowa addaxxa rosinohu wolu roduuwi woꞌnaalshinni horo afiꞌra dandaanno. Mitu minaannuwinna minaamuwi woꞌma yanna soqqansho lowo diro soqqaminore ikkara dandaanno. Fushshidhinoonni mixo daafira heddinanni heedhinoonniha ikkiro insa amaaꞌla dandiitinanni. Konni garinnino Yihowa addaxxitinannita leellisha dandiitinanni. (Law. 22:17, 19) Songote cimeeyyeno wedellu minaannuwinna minaamuwi ayyaanaamittete mixo fushshidhannonna wonshidhanno gede kaaꞌlitansara dandiitanno.

17. Kilawusinna Mareesara mayi tuncu yiinonsa? Insa woꞌnaalshinni maa ronseemmo?

¹⁷ Mito woyite albinni roore soqqamate assineemmori ninke hendoommo garinni ikka hoogara dandaanno. Hanni konni birxichira umo kulliri Kilawusinna Mareesa lawishsha laꞌno. Insa adhamihunni sasu diri gedensaanni, qaensanni xeertidhe noote Finilaandennite sinu biirora uminsa fajjonni gimbaatu looso kaaꞌlate haꞌrino. Ikkirono insa hakko lee agana sae keeshshannokkita kullinsa. Umi qara insa hexxo mudhino. Hakkiinni mulenni Arawete afoo rosanno gede koyisinsa; xa insa wole gobbara Arawete afoo coyiꞌnanni qoqqowira hagiirrunni soqqamanni no. Mareesa albita qaagge togo yitino: “Konni albaanni rosoommakkire assa waajjoomma hattono woꞌmunni woꞌma Yihowa addaxxa hasiissinoe. Ikkirono Yihowa woꞌmanka woyite hendoommokki garinni kaaꞌlannanke laoomma. Tini Yihowa albinni roore addaxxeemma gede assitinoe.” Kuni lawishshi leellishannonte gede, kiꞌneno woꞌmunni woꞌma Yihowa addaxxitinanniha ikkiro isi woꞌmanka woyite maassiꞌrannoꞌneta huwattinanni.

18. Minaanninna minaama woꞌmanka woyite Yihowa addaxxate maa assa dandaanno?

¹⁸ Adhama Yihowa eltooti. (Mat. 19:5, 6) Isi adhantinori tenne eltonni hagiidhitara hasiꞌranno. (Law. 5:18) Wedella minaannuwanna minaamuwa, heeshshoꞌne giddo maa assitinanni heedhinoonniro hedde. Yihowa uyinoꞌne elto mageeshshi geeshsha naaddinanniro leellishate dandiitinire baala assitinanni heedhinoonni? Giddoꞌneta huuccattotenni Yihowara hasaaphe. Kaaꞌlannoꞌneha xintu seera afiꞌrate Qaalesi xiinxalle. Hakkiinni Yihowa aannoꞌne amaale harunse. Yihowara soqqamate illachishshinanniha ikkiro, hagiirrunna harshammo noo heeshsho heedhinanni!