Manna Giwa Agura Dandiinanni!

Ate mannu giwe egenninohekkiha ikkiro, wole manna gimbanna laꞌe egennoottoha ikkara dandaanno. Duucha woyite manna gobbansanna gaꞌrensa wole ikkitinohura, woy labbaaha woy meyata ikkitinohura calla gimbannansa laꞌneemmo. Hakko daafira, batinye gashshaano manna giwannoha qorichinshanni gede seera fushshitino.

Gimbanninsa manni duucha woyite rabbisiꞌrannohanna wole manna giwannoha ikkanno daafira, mimmito giwanno manni batiꞌrayi haꞌranno.

Miteekke mannu ate mulla kae giwinoheha, qacifatinoheha, xoninoheha, hattono waajjishiishinoheha ikkara dandaanno. Ikkollana duucha woyite manna gimbannihu konni garinni calla diꞌꞌikkino. Woloota giwanno manni duucha woyite wolqatenni gawajjara, jajja hunara, ganara, giddeesse bushiishara, shaara woy sircho bade gudate nafa kaꞌꞌara dandaanno.

Tini metseete aante noo xaꞌmuwara dawaro qoltanno; hattono manna giwa agura dandiinannihu hiittoonniitiro xawissanno:

• Woloota giwanno manni batiꞌrinohu isi mayiraati?

• Woloota giwa agura dandiinannihu hiittoonniiti?

• Horonta manna gimbannikki yanna dagganno ikka?