Horonta Manna Gimbannikki Yanna Dagganno!
Manna giwate hedo wodaninke giddonni buqqinse hooꞌlinummoro nafa, wolootu assootenna akata soorra didandiineemmo. Beebbaataamma manna mannu xaano giwanni noonsa. Ikkina mannu horonta manna giwannokki gede assa dandaannohu ayeti?
Hegerera woꞌmunni woꞌma manna gimbannikki gede assa dandaannohu Magano Yihowa callaati. Qullaawu Maxaafi isi albillitte tenne assannota kulannonke.—Lawishsha 20:22.
MAGANU MANNA GIWATE KAIMA IKKINORE HUNANNO
1. SHEEXAANE DAAWULOOSI. Xaa yannara mannu mimmito giwanno gede kaima ikkinohu finqila sokkaasincho Sheexaane Daawuloosiiti. Maganu Sheexaanenna isinte gede manna gibbannore baala hunanno.—Faarso 37:38; Roomu Sokka 16:20.
2. MIMMITO GIWANNO MANNI BATIꞌRINOTA SHEEXAANU ALAME. Maganu mannu mimmito giwanno gede kakkayissannore busha poletiku gashshaanonna ammaꞌnote murrootano ikko tenne alamera nooha busha coye baala hunanno. Qoleno Maganu gubbo baxxannorenna manna miiccannore hafuuraamma daddalu dirijjitta baala woꞌmunni woꞌma hunanno.—2 Pheexiroosi 3:13.
3. MANNU OOSOTA GUUNTETE XEꞌNE. Qullaawu Maxaafi mannu baalu cubbo ragiꞌrino daafira hedonsanna assootinsa bunshete widira hige dooinota xawise kulanno. (Roomu Sokka 5:12) Mannu woloota giwanno gede assinohu mittu coyi konneeti. Maganu cubbu giddonni fulleemmo gede kaaꞌlannonke daafira, mannu horonta mimmito giwannokki yanna dagganno.—Isayaasi 54:13.
QULLAAWU MAXAAFI MIMMITO GIMBANNIKKI ALAME DAGGANNOTA KULANNO
1. TAASHSHOTE XEꞌNE DIHEEDHANNO. Hatte yannara alame woꞌma hegerera gashshitannoti iima noote Maganu Mangiste callate. (Daanieeli 2:44) Manna mulla kae giwannohunna kairira hanqanno manni diheeꞌranno. Maganu xaa yannara mannu oosora iillitanni noota taashshote xeꞌne baala biddi assanno.—Luqaasi 18:7.
2. MANNU BAALUNKU KEERE AFIꞌRANNO. Finqilletenni woy olunni kainohunni shetanno manchi diheeꞌranno. (Faarso 46:9) Baatto keere baxanno manni callu heeꞌrannota teense heeꞌnanni bayicho ikkitanno.—Faarso 72:7.
3. MANNU BAALU MITTURINO QARRISANNORI NOOKKIHA HEGERERA HEEꞌRANNO. Uullate aana heeꞌranno manni baalu mimmito godowinta baxanno. (Maatewoosi 22:39) Yaachishannori diheeꞌranno; sainoha busha coye qaaga nafa diqaangeemmo. (Isayaasi 65:17) Hatte yannara manna giwanno manni heeꞌrannokki daafira, mannu ooso lowo “keere afidhe hagiidhitanno.”—Faarso 37:11.
Togoo alamera heeꞌra baxatto? Xaa yannara nafa batinyu manni Qullaawu Maxaafi halaale rose manna giwa aguranni no. (Faarso 37:8) Alamete doyichora noori lowo miliyoone ikkitannori Yihowa Farciꞌraasine tenne assitanni no. Budinsanna lophitino gari addi addiha ikkirono insa mitte maate gede ikkite baxillunninna mittimmatenni heedhanni no.—Isayaasi 2:2-4.
Yihowa Farciꞌraasine mallaadanna taashshote xeꞌne dandiine saꞌnannihu hiittoonniitiro rosiissannohe. Insa rosiissannoheri sunu sununni manna giwa agurte baxattoha ikkatto gede kaaꞌlannohe. Baalunku mannira wole agurina galata afiꞌrinokkihura woy manna baxannokki mannira nafa shaqqado ikkatto gara rosatto. Hatto assittoro xaa yannara hagiirraamo ikkatto hattono wolootu ledo dancha aante heedhannohe. Baalunkunni roore, manna giwanno manni heeꞌrannokkiwa Maganu gashshooti giddo heeꞌrate maa assa hasiissannohero rosatto.—Faarso 37:29.