Yesuusi Gede Umiꞌne Horo Agurtine Woloota Kaaꞌle

1. Yihowa manni hiikkonne dancha coye assanni no?

LOWO diri albaanni Maganu manni Yesuusi aanno biddishsha harunse, Yihowara ‘baxe’ soqqamannota masaalloonni. (Far. 110:3) Tini masaalo yannankera woꞌmitanni no. Diru kiiro, diinaggaabbe soqqantannoti Yihowa soqqamaano sabbakate looso loossanni lowo xibbe miliyoone ikkitanno saate sayissanno. Insa tenne assitannohu uminsa fajjonni woxe baantinsakkinniiti. Qoleno insa yanna gaaꞌmite, ammanate roduuwinsara hasiisannore assite kaaꞌlitannonsa, sheshifachishshannonsa hattono ayyaanaamittetenni jawaachishshannonsa. Shoomantino roduuwi gambooshshunniwa shiqishshanno kifilla qixxaabbanninna roduuwa towaattanni lowo yanna guddanno. Yihowa manni tenne baala assanno gede kakkayisannonsari maati? Yihowaranna mannaho noonsa baxilleeti.—Mat. 22:37-39.

2. Roomu Sokka 15:1-3 kultanno garinni Yesuusi kaajja lawishsha ikkinonkehu hiittoonniiti?

² Yesuusi umisi hasattonni roore wolootu hasatto balaxisiise kaajja lawishsha ikkinonke. Ninkeno isi faale haꞌrate dandiinummore baala assinanni heeꞌnoommo. (Roomu Sokka 15:1-3 nabbawi.) Yesuusi faale hadhannori lowo atoote afidhanno. Isi, “Adhannonkunni aannohu baꞌraaꞌrinoho” yiino.—Soq. 20:35.

3. Konni birxichira maa ronseemmo?

³ Konni birxichira, Yesuusi umisi horo agure woloota kaaꞌlate assinoha mito coye laꞌneemmo hattono ninkeno isi faale haꞌra dandiineemmohu hiittoonniitiro ronseemmo. Qoleno woloota kaaꞌlate hasattonke lexxitanno gede assiꞌra dandiineemmohu hiittoonniitiro xiinxallineemmo.

YESUUSI LAWISHSHA HARUNSE

4. Yesuusi umisi hasattonni roore wolootu hasatto balaxisiisinohu hiittoonniiti?

⁴ Yesuusi daafure noo yannara nafa woloota kaaꞌlino. Hanni mitte yannara Yesuusi ilaalu mule heeꞌreenna lowo manni isiwa dayi yannara isi ma assinoro laꞌno; kuni bayichi Qifirinahoomi qooxeessa ikkikkinni digatino. Yesuusi hashsha woꞌma huuccatto assiꞌranni galino. Isi daafurinoti dihuluullissannote; ikkirono Yesuusi mannu giddo noo buxanenna dhiwantinore lae lowo geeshsha mararino. Yesuusi insa hurse agurinoha calla ikkikkinni baalantenni roortannota lowo geeshsha jawaachishshanno lallawo shiqishinonsa; tenne lallawo Ilaalu Sibikate yinanni.—Luq. 6:12-20.

5. Maatete umo ikkitinori daafurte noo yannara nafa Yesuusi lawishsha harunsa dandiitannohu hiittoonniiti?

⁵ Maatete umo ikkitinori Yesuusi lawishsha harunsitanni noo gara. Hanni mitto lawishsha laꞌno: Mittu anni barra woꞌma loosanni hose daafurinohu hawarro minira dayino. Isi hakko hashsha assidhannota Maatete Magansiꞌra wolu barrira sayisate hedinoha ikkirono, xiinxallo massaganno gede kaaꞌlasira Yihowa huucciꞌrino. Yihowa kaaꞌleennasi isi bashshonte gede Maatete Magansiꞌra massagino. Oosonsa hakko hashsha lowo geeshsha hasiisanno roso rossino; insa anninsanna amansa baalunku coyinni roore ayyaanaamittete coye balaxisiissannota wodanchitino.

6. Yesuusi callisi heeꞌra hasiꞌranno yanna woloota kaaꞌlate horoonsiꞌrinohu hiittoonniitiro leellishanno lawishsha kuli.

⁶ Yesuusi callisi heeꞌra hasiꞌrino yannara nafa woloota kaaꞌlino. Yesuusi Cuuaancho Yohaannisi goowa murre shinoonnita macciishshi woyite hiitto ikkinoro heda dandiineemmo. Yesuusi lowo geeshsha dadillinoti dihuluullissannote. Qullaawu Maxaafi togo yaanno: “Yesuusi Yohaannisi reyo macciishshe, yowolote ofolle mannu nookkiwa hasiꞌre callisi haꞌri.” (Mat. 14:10-13) Isi callisi heeꞌra hasiꞌrinohu mayiraatiro huwata diqarrissannonke. Ninke giddo batinyu shiiꞌne xissiisiꞌneemmo woyite callootinke heeꞌra hasiꞌneemmo. Yesuusira kayinni coyi hedino gede diꞌꞌikkinosi. Yesuusi haꞌrara hedinowa lowo manni balaxe marino. Yesuusi maa assiyya? Isi mannaho hasiisannore hedino; hattono ‘mararinonsa.’ Yesuusi insara ayyaanaamittete jawaante hasiissannonsata huwatino hattono hasiisannonsare bayichonkonni wonshinonsa. Isinni Yesuusi insara ‘lowo coye rosiisinonsa.’—Maq. 6:31-34; Luq. 9:10, 11.

7-8. Roduuwaho kaaꞌlo hasiissanno woyite cimeeyye insa kaaꞌlite Yesuusi faale haꞌra dandiitanno gara leellishanno lawishsha kuli.

⁷ Shaqqadda songote cimeeyye Yesuusi lawishsha harunsitanno gara. Insa uminsa horo agurte ninke kaaꞌlate assitannorira lowo geeshsha galanteemmonsa! Batinyu roduuwi cimeeyye loossannoha roore looso diaffanno. Lawishshaho, mitu roduuwira hedeweelcho xagisira hasiissannonsa woyite, Hospitaalete Ledo Xaadissanno Komite insa bayichonkonni kaaꞌlate woꞌnaaltanno. Duucha woyite togoo hedeweelcho kalaqantannohu hashshu taalootiraati! Ikkollana muxxe ikkitinori kuri cimeeyye qarru amadinonsa roduuwa marartanno daafira, insanna maatensa uminsa hasattonni roore ammanate roduuwinsa hasatto balaxisiissanno.

⁸ Songote cimeeyye Gambooshshu Addaraashenna wole Magano magansiꞌnanni minna minate loosono kaaꞌlitanno; hattono kalaqamu dano kalaqantanno woyite roduuwa kaaꞌlitanno. Qoleno songonke cimeeyye ninke rosiisate, jawaachishatenna kaaꞌlate sayissannota lowo yanna heda dandiineemmo. Kuri roduuwanna maatensa lowo geeshsha galata hasiissannonke. Insa uminsa hoꞌro agurte assitannorira Yihowa maassiꞌronsa! Hige cimeeyyeno wolu manninte gede quwa saꞌannokkire ikka hasiissannonsa. Insa songote looso, maatensa towaaxxitanno yanna hoogga geeshsha loosa dihasiissannonsa.

UMINKE HORO AGURRE WOLOOTA KAAꞌLA DANDIINEEMMO GARA

9. Filiphisiyusi Sokka 2:4, 5 kultanno garinni baalunku Kiristaani hiikkonne akata lossiꞌra hasiissannonsa?

⁹ Filiphisiyusi Sokka 2:4, 5 nabbawi. Cimeeyye calla ikkikkinni ninke baalunku Yesuusi gede uminke hasattonni roore wolootu hasatto balaxisiisa rosa hasiissannonke. Qullaawu Maxaafi Yesuusi, “borojjichu daniha” ikkinota kulanno. (Fil. 2:7) Hanni konni qummeeshshinni maa ronseemmoro hendo. Mittu borojjichi woy soqqamaanchi mootichasi hagiirsiisanno faro hasiꞌranno. Yihowa borojjoota ikkinoommohuranna roduuwanke kaaꞌlineemmo daafira, albinni roore Yihowa hagiirsiisannorenna roduuwanke kaaꞌlannore assa hasiꞌneemmoti dihuluullissannote. Aante noo hedo xiinxallanke tenne assate kaaꞌlitannonke.

10. Ninkeneeto hiikkuri xaꞌmuwa xaꞌma dandiineemmo?

¹⁰ Akataꞌne layidhe. Kiꞌneneeto aante noo gedee xaꞌmo xaꞌme: ‘Umiꞌya horo agure woloota kaaꞌlate maahoyye yeemmo? Lawishshaho, mitto jawa rodoo mare laeemmo gede woy mitte jawa rodoo gambooshshe haaꞌre haꞌreemmo gede kulliero ma asseemmo? Qoqqowu gambooshshi bayicho woy Gambooshshu Addaraashe feyanno manni hasiisiro feyate maahoyye yeemmo?’ Yihowa heeshshonke isira sayinse uyinoommori baalunku yannankenna wolqanke mararrummokkinni isira soqqammammoranna, roduuwanke kaaꞌlinammora hasiꞌranno. Woyyeessiꞌra hasiissannonkeri noota huwantummoro maa assa dandiineemmo?

11. Huuccatto uminke horo agurre woloota kaaꞌlineemmo gede kaaꞌlitannonkehu hiittoonniiti?

¹¹ Yihowa eeggifattine huuccidhe. Hanni woyyeessiꞌra hasiissannoheri nooheta wodanchoottoha ikkirono hatto assate hasatto hoogootto yine hendo. Hatto ikkiro Yihowa eeggifatte huucciꞌri. Giddokkita maaxidhooti. Macciishshamannohere Yihowara hasaaphi; hattono isi, ‘hasattonna wolqa’ aannohe gede huucciꞌri.—Fil. 2:13, NW.

12. Cuuantinori wedellu roduuwi songo kaaꞌla dandiitannohu hiittoonniiti?

¹² Ati cuuamootto wedellichaatiro Yihowa songokki giddo noo roduuwa albinni roore kaaꞌlatto gede hasatto aahera huucciꞌri. Mite gobbara songote soqqamaano kiironni, cimeeyyete kiiro roortanno; songote soqqamaano giddo batinyu mereerimu dirireeti woy jajjabbaho. Yihowa dirijjite lexxitu kiiro, Yihowa manna towaattannori wedellu roduuwi hasiissanno. Kaaꞌlo hasiissannowa baalawa soqqamate maahoyye yiittoro hagiirraamo ikkatto. Mayira? Korkaatuno, Yihowa hagiirsiisatto, suꞌnaadu suꞌmi heeꞌrannohe hattono woloota kaaꞌline afiꞌnanni harshammo afiꞌratto.

13-14. Roduuwanke kaaꞌlate maa maa assa dandiineemmo? (Aaniidi qoolira noo misile lai.)

¹³ Kaaꞌlo hasiissannosihu ayetiro hedde. Soqqamaasinchu Phaawuloosi Ibiraawootu Kiristaana togo yee amaalino: “Dancha coye assanna afidhinoonnire woleho beeha habbinoonte. Magano hagiirsiissannoti hattoo kakkalooti.” (Ibi. 13:16) Tini kaaꞌlitanno amaaleeti! Yihudu Kiristaani tini sokka iillitunsahunni shiima yanna gedensaanni minensa, daddaꞌlitanni noo daddalo, hattono Kiristaana ikkinokki fiixansa agurte ‘ilaallate widira higge xooqa’ hasiissinonsa. (Mat. 24:16) Hatte yannara insa mimmito rakke kaaꞌla hasiissinonsati dihuluullissannote. Isa hakkuyira albaanni, noonsare wolootu ledo beeqqite Phaawuloosi amaalino amaale loosu aana hosiissinoha ikkiro, martinowa haaro heeshsho rosa qarra diꞌꞌikkitannonsa.

¹⁴ Roduuwinke mayi hasiisannonsaro duucha woyite kula hooggankera dandiitanno. Lawishshaho mittu rodii minaama shiiꞌre xissiisiꞌrino yine hendo. Konni rodiira sagale worannosihu, hodhishsha afiꞌranno gede kaaꞌlannosihu woy mini giddo looso kaaꞌlannosihu hasiisannosi? Isi ninke qarrisa giwe kaaꞌleꞌꞌe yaa hoogara dandaanno. Kayinni uminkenni kaꞌne hasiisannosire assine kaaꞌlinummosiro lowo geeshsha hagiidhara dandaanno. Iso wolu manni hasiisannosire asse kaaꞌlanni noosihu gede assine woy kaaꞌlo hasiissusiro kulannonke yine heda dihasiissannonke. Kiꞌneneeto togo yitine xaꞌme: ‘Ani iso ikkoommoro maa assine kaaꞌlinaera hasiꞌreemmo?’

15. Woloota kaaꞌla hasiꞌneemmoha ikkiro maa assa hasiissannonke?

¹⁵ Huxuxxi yinikkinni shinqannire ikke. Songoꞌne giddo, woꞌmanka woyite woloota kaaꞌlate qixxaabbino roduuwi noota affinoonniti dihuluullissannote. Kuri roduuwi qarrinsanni heeꞌnoommonsahu gede assine hendammora dihasidhanno. Kaaꞌlo hasiissannonke woyite kaaꞌlitannonketa anfoommo; ninkeno insa gedeere ikka hasiꞌneemmo! Aleeni yinannihu 40 diri balla ikkannosihu songote cimeessi, huxuxxi yinikkinni shinqanniha ikka hasiꞌrino. Aleeni Yesuusi lawishsha hiince togo yiino: “Yesuusira loosu batiꞌrannosiha ikkirono, baalunku manni yaano ajuno akkaluno isiwa daye huxuxxi yiikkinni kaaꞌlannonsa gede kuꞌlanno. Kuni manni Yesuusi insa daafira addinta hedannota afino. Anino Yesuusi gedeeha yaano huxuxxi yinikkinni shinqanniha, faasiiqanna mannaho hedeemmoha ikka hasiꞌroommo.”

16. Faarso 119:59, 60 noo hedo loosu aana hosiisa Yesuusi lawishsha seekkine harunsineemmo gede kaaꞌlitannonkehu hiittoonniiti?

¹⁶ Woꞌmunni woꞌma Yesuusi faale haꞌra hoongummoro hexxo mudha dihasiissannonke. (Yai. 3:2) Mittu rosaanchi, rosiisaanchisi assannore woꞌmunni woꞌma assa didandaanno. Ikkirono soꞌrinore biddi assiꞌre rosiisaanchisi lawishsha seekke harunsate sharramannoha ikkiro dandoosi woyyeessiꞌranni haꞌranno. Hatteente gede ninkeno Qullaawu Maxaafinni ronsoommore loosu aana hosiinseemmohanna soꞌronke taashshiꞌrate dandiinummore baala assineemmoha ikkiro, Yesuusi faale haꞌra dandiineemmo.—Faarso 119:59, 60 nabbawi.

UMINKE HORO AGURRE WOLOOTA KAAꞌLINUMMORO AFIꞌNEEMMO ATOOTE

17-18. Yesuusi gede uminke horo agurre woloota kaaꞌlinummoro mayi atoote afiꞌneemmo?

¹⁷ Uminke horo agurre woloota kaaꞌlineemmo woyite wolootuno hatto assate kaꞌanno. Tiimi yinannihu songote cimeessi togo yiino: “Songonke giddo ayyaanaamittetenni lophite songote soqqamaano ikkite shoomantinori wedellu roduuwi no; insa giddo gamu shiimmaaddaho; insa hatto assate kaꞌinohu wolootu uminsa horo agurte roduuwa kaaꞌlitanna laꞌino daafiraati. Kuri roduuwi songonna cimeeyye lowo geeshsha kaaꞌlitino.”

¹⁸ Heeꞌnoommohu umonsa calla baxanno manni woꞌmino alameraati. Yihowa manni kayinni hattooha diꞌꞌikkino. Yesuusi umisi horo agure woloota kaaꞌlino gari dhagge ikkannonke; ninkeno isi lawishsha harunsate murciꞌnoommo. Yesuusi lawishsha guutu garinni harunsa didandiineemmo; ikkirono isi ‘faale’ seekkine harunsa dandiineemmo. (1 Phe. 2:21) Yesuusi gede uminke horo agurre woloota kaaꞌlate dandiinummore baala assinummoro, Yihowa hagiirsiinseemmo daafira ninkeno hagiirraamma ikkineemmo.