Cuuantinihu Gedensaannino “Haaro Mannimma” Uddiꞌra Agurtinoonte

1. Roore anga ayimmanke seekkannori woy hunannori maati?

MULI barri giddono ikko lowo diri albaanni cuuammoommori, ninke baalunku Yihowa baxanno gedee akati heeꞌrankera hasiꞌneemmo. Hattoo akati heeꞌrannonke gede, hendeemmo gara qoropha hasiissannonke. Mayira? Korkaatuno roore anga ayimmanke seekkannohu woy hunannohu hendeemmo garaati. Duucha woyite ninkeneeto hagiirsiisate daafira hendeemmoha ikkiro bushare coyiꞌnammoranna assinammora dandiineemmo. (Efe. 4:17-19) Surrenke giddo danchuri woꞌmanno gede assiꞌnummoro kayinni Annanke Yihowa hagiirsiisannore coyiꞌranna assa dandiineemmo.—Gal. 5:16.

2. Konni birxichira hiikkuri xaꞌmuwara dawaro afiꞌneemmo?

² Sai birxichira laꞌnummonte gede mitteno busha hedo surrenke giddora eꞌannokki gede assiꞌra didandiineemmo. Kayinni tini hedo bushare assineemmo gede assitannonketa hooꞌla dandiineemmo. Cuuammammora albaanni Yihowa giwannore coyiꞌranna assa agura hasiissannonke. Akkala mannimma mulqe tugate tini hanafotenna lowo geeshsha hasiissannote. Woꞌmunni woꞌma Yihowa hagiirsiisate “Haaro mannimma uddidhe” yine hajanjoonninke hajajono agadha hasiissannonke. (Qol. 3:10) Konni birxichira aante noo xaꞌmuwara dawaro afiꞌneemmo: “Haaro mannimma” maati? Haaro mannimma uddiꞌranna uddiꞌnoommo gedeenni heeꞌra dandiineemmohu hiittoonniiti?

“HAARO MANNIMMA” MAATI?

3. Galatiyu Sokka 5:22, 23 kultanno garinni “haaro mannimma” maati? Mittu manchi haaro mannimma uddiꞌrannohu hiittoonniiti?

³ Haaro mannimma uddiꞌrino manchi hedanno hedonninna assanno coyinni Yihowa lawishsha harunsanno. Haaro mannimma uddiꞌrino manchi Maganu ayyaani laalo noosita leellishanno hattono hedosinna assootesi Maganunnihu qullaawu ayyaani massagannosi gede assiꞌranno. (Galatiyu Sokka 5:22, 23 nabbawi.) Lawishshaho isi Yihowanna mannasi baxanno. (Mat. 22:36-39) Togoo manchi qarru iille noosi woyite nafa hagiirrisi baꞌꞌannokki gede assiꞌranno. (Yai. 1:2-4) Isi keere kalaqannoho. (Mat. 5:9) Mannaho shaqqadohonna cincannoho. (Qol. 3:13) Danchare baxannohonna assannoho. (Luq. 6:35) Isi iimi Annisira kaajjado ammana noosita assootisinni leellishanno. (Yai. 2:18) Togoo manchi wolootu caacceessitannosi woyite wodanaaꞌme hasaawisanno hattono fonqolo ikkannori tuncu yaannosi woyite isonooto qeeꞌlanno.—1 Qor. 9:25, 27; Tit. 3:2.

4. Haaro mannimma uddiꞌrate Galatiyu Sokka 5:22, 23tenna wole Qullaawu Maxaafi giddo kulloonni akatta baala heedhannonke gede assiꞌra hasiissannonkehu mayiraati?

⁴ Haaro mannimma uddiꞌrate, Galatiyu Sokka 5:22, 23tenna wole Qullaawu Maxaafi giddo kulloonni akatta baala heedhannonke gede assiꞌra hasiissannonke.b Kuri akatta callase uddiꞌneemmo uddano gedeeta diꞌꞌikkitino. Isinni togoo akatta wole akatta ledo xaadooshshe afidhinote. Lawishshaho, mitto mancho addinta baxattoha ikkiro isira shaqqille leellishatto hattono cincatto. Qoleno addinta dancha mancho ikkate jooganna umokki qeeꞌloottoha ikka hasiissannohe.

HAARO MANNIMMA UDDIꞌRA DANDIINEEMMOHU HIITTOONNIITI?

5. ‘Kiristoosihu gedee wodani’ woy hedo heedhannonke gede assiꞌrate yaa mayyaate? Yesuusi heeshsho daafira xiinxalla hasiissannonkehu mayiraati? (1 Qorontoosi 2:16)

⁵ Umi Qorontoosi 2:16 nabbawi. Haaro mannimma uddiꞌrate ‘Kiristoosihu gedee wodani’ woy hedo heedhannonke gede assiꞌra hasiissannonke. Wole yaattonni Yesuusi hedanno gara rosanna isi faale haꞌra hasiissannonke. Yesuusi Maganu ayyaani laalo guutu garinni leellishino. Mitto coye danchu garinni leellishshanno hincilaallo gede Yesuusi Yihowa akatta guutu garinni leellishino. (Ibi. 1:3) Yesuusi hedanno garinni hendummo kiiro assootinkennino isi lawishsha harunsineemmo hattono albinni roore isite gedee akatta heedhannonke.—Fil. 2:5.

6. Haaro mannimma uddiꞌrate sharrammeemmo woyite maa qaaga hasiissannonke?

⁶ Addinta Yesuusi lawishsha harunsa dandiineemmo? ‘Yesuusi guutaho. Woꞌmunni woꞌma isi gedeeha ikka didandeemmo!’ yite hedattoha ikkara dandaanno. Hatto yite hedattoha ikkiro aante noo coyibba qaagi. Umihunni, kalaqamoottohu Yihowanna Yesuusi akatta leellisha dandaatto garinniiti. Hakko daafira insa lawishsha harunsa doodha dandaatto hattono mito geeshsha ikkirono qinaannohe. (Kal. 1:26) Layinkihunni, Maganunnihu qullaawu ayyaani kalqete alame giddo taalle nookki wolqa afiꞌrinoho. Qullaawu ayyaani kaaꞌlonni umikkinni horo dandaattokkire assa dandaatto. Sayikkihunni, Yihowa xaa yannara qullaawu ayyaani laalo woꞌmunni woꞌma leellishattora hasiꞌranno yaa diꞌꞌikkino. Isinni baxillaanchu iimi Anninke uullate aana heeꞌrate hexxo noonsari guuta ikkitannoha 1,000 diro qixxeessino. (Aju. 20:1-3) Yihowa xaa yannara dandiinummo geeshsha sharrammammoranna kaaꞌlo afiꞌrate iso addaxxinammora hasiꞌranno.

7. Kawiinni aanchine maa xiinxallineemmo?

⁷ Yesuusi lawishsha harunsa dandiineemmoti mite doogga hiitteeti? Maganu ayyaani laalo wido ikkitinota shoole akatta haransine laꞌneemmo. Mitte mittenta akatta xiinxallineemmo woyite Yesuusi kuri akatta leellishino garinni maa ronseemmoro laꞌneemmo. Tenne assineemmo woyite haaro mannimma uddiꞌrate assinoommori mageeshsha qiniinonkero afate kaaꞌlitannonketa mite xaꞌmuwano laꞌneemmo.

8. Yesuusi baxille leellishinohu hiittoonniiti?

⁸ Yesuusi Yihowa lowo geeshsha baxanno daafira Annisiranna ninke daafira yee umisi horo agurino. (Yoh. 14:31; 15:13) Yesuusi uullate aana heeꞌrino heeshsho manna lowo geeshsha baxannota leellishshanno. Isi barru baala baalunku mannira wole agurina giwannosi mannira nafa baxillenna shaqqille leellishino. Isi manna baxannota leellishinoti qara doogo Maganu Mangiste daafira mannaho rosiisate. (Luq. 4:43, 44) Qoleno Yesuusi cubbaataammu anga qarrame reyate maahoyye yee Maganonna manna baxannota leellishino. Isi konni garinni ninke baalunku hegere heeshsho afiꞌneemmo faro faninonke.

9. Baxille leellishate Yesuusi lawishsha harunsa dandiineemmohu hiittoonniiti?

⁹ Ninkeneeto Yihowara sayinse uyinoommohunna cuuammoommohu iimi Annanke banxeemmo daafiraati. Hakko daafira Yesuusi gede ninkeno mannu ledo noonke aantenni Yihowa banxeemmota leellisha hasiissannonke. Soqqamaasinchu Yohaannisi togo yee borreessino: “Laꞌꞌanni nooha rodoosi baxinokkihu illetenni afinokkiha Magano hiitto asse baxa dandaanno?” (1 Yoh. 4:20) Ninkeneeto togo yine xaꞌma dandiineemmo: ‘Manna lowo geeshsha baxeemmo? Mannu gara ikkinokkire assiero nafa shaqqille leellisheemmo? Baxillu yannaꞌyanna woxeꞌya horoonsiꞌre mannu Yihowa daafira rosanno gede kaaꞌleemmo gede kakkayisannoe? Batinyu manni asseemmore naadannokkiha woy giwannoha ikkiro nafa tenne asseemmo? Manna rosaano assate roore yanna afiꞌreemmo faro hasiꞌreemmo?’—Efe. 5:15, 16.

10. Yesuusi keere kalaqannoha ikkinohu ma garinniiti?

¹⁰ Yesuusi keere kalaqa baxannoho. Isi mannu gara ikkinokkire assisita bunshe bunshetenni diqolino. Isinni hakkiinni sainore assino. Isi keeru heeꞌranno gede assino hattono wolootu kawa kaꞌaanni higinonsa coye taashshidhanno gede jawaachishino. Lawishshaho, insa Yihowa magansiꞌransa adhara hasidhuro rodiinsa ledo kawa kaꞌaa higinore taashshiꞌra hasiissannonsata rosiisinonsa. (Mat. 5:9, 23, 24) Qoleno soqqamaasinesi insa giddo roorannohu ayetiro heewisantu yannara kawa kaꞌaa higino coye taashshidhanno gede duucha hige kaaꞌlinonsa.—Luq. 9:46-48; 22:24-27.

11. Keere kalanqeemmore ikka dandiineemmohu hiittoonniiti?

¹¹ Keere kalanqeemmore ikkate, gibbo kalaqannore qorophatenni sainore assa hasiissannonke. Uminkenni kaꞌne wolootu ledo keere kalaqanna roduuwinke kawa kaꞌaanni higinonsa coye taashshidhanno gede jawaachisha hasiissannonke. (Fil. 4:2, 3; Yai. 3:17, 18) Ninkeneeto togo yine xaꞌma dandiineemmo: ‘Umiꞌya horo agure wolootu ledo keere kalaqate maahoyye yeemmo? Mittu rodii woy rodoo koffi assitannoe woyite koma amaxxeemmo? Qarru kalaqamanno gede assinohu wole mancho lawiero nafa umiꞌyanni kae keere kalaqate woꞌnaaleemmonso hakku manchi keere kalaqa geeshsha agareemmo? Hasiisanno woyite coyi kawa kaꞌaa higinonsari keere kalaqqanno gede jawaachisheemmo?’

12. Yesuusi shaqqille leellishinohu hiittoonniiti?

¹² Yesuusi shaqqadoho. (Mat. 11:28-30) Isi qarrisanno coyi giddo noo yannara nafa jooganna quwa saꞌꞌannokkiha ikke shaqqado ikkasi leellishino. Lawishshaho mitte Kanaꞌꞌaanitte mancho qaaqqose hursanno gede huuccidhuta, isi umi qara giwino; kayinni ise kaajja ammana nooseta leellishshuta qaaqqose shaqqillunni hursino. (Mat. 15:22-28) Yesuusi shaqqado ikkirono amaale hasiissanno yannara amaalikkinni diagurino. Isi mito woyite shaqqille leellishinohu baxanno manna kaajjishe amaaleeti. Lawishshaho, Yesuusi Yihowa fajjo assannokki gede Pheexiroosi ataawe ikkasira woꞌnaalita isi Pheexiroosi wolootu rosaano albaanni seejjino. (Maq. 8:32, 33) Yesuusi hatto assinohu Pheexiroosi saalsiisate ikkikkinni iso qajeelsateetinna wole rosaanono eessannonsakkirira eꞌannokki gede qorowisiisateeti. Pheexiroosi mito geeshsha saalinoti dihuluullissannote; ikkirono uyinoonnisi seejjo kaaꞌlitinosi.

13. Shaqqadda ikkanke leellisha dandiineemmohu hiittoonniiti?

¹³ Baxattorira shaqqille leellishate mito woyite insa kaajjishshe amaala hasiissannoheha ikkara dandaanno. Hatto assatto woyite amaalatto amaale Maganu Qaali aana xintantinota ikkitanno gede assite Yesuusi lawishsha harunsi. Awu afiinni hasaawisi. Yihowanna ate baxxannori insara hedde amaalatto amaale macciishshitannota addaxxite insa daafira danchare hedi. Ateneeto togo yite xaꞌmi: ‘Mittu baxeemmo manchi gara ikkinokkire assanna afummoro waajjummokkinni hasaawiseemmo? Amaala hasiissuero shaqqillunni hasaawiseemmonso hanqe coyiꞌreemmo? Amaalate kaeemmo gede assinoeri maati? Iso amaalate kaoommohu caacceessinoe daafiraatinso iso kaaꞌlate yeeti?’

14. Yesuusi danchumma leellishinohu hiittoonniiti?

¹⁴ Yesuusi dancha ikkino coye afinoha calla ikkikkinni assino. Yesuusi Annasi baxanno; hakko daafira dancha giddonni kae woꞌmanka woyite gara ikkinore assanno. Danchu manchi woꞌmanka woyite woloota kaaꞌlanno faro hasiꞌranno hattono insara danchare assanno. Assa hasiissannoha gara ikkino coye afa calla diꞌꞌikkitanno; gara ikkino coye dancha giddonni kaꞌne assa hasiissannonke. Mittu manchi togo yee xaꞌmannoha ikkara dandaanno: ‘Gara ikkitinokki giddonni kaꞌne gara ikkinore assa dandiinannini?’ Ee. Lawishshaho Yesuusi mannu laꞌꞌansara yite buxanete mitore uyitanno mannooti daafira coyiꞌrino. Insa assitinori danchare ikkirono Yihowa kayinni dihagiidhino.—Mat. 6:1-4.

15. Danchumma leellinsheemmore ikka dandiineemmohu hiittoonniiti?

¹⁵ Danchumma leellinsheemmore ikka dandiineemmohu dancha giddonni kaꞌne gara ikkinore assineemmoha ikkiro callaati. Hakko daafira ateneeto togo yite xaꞌmi: ‘Assa hasiissannoeha gara ikkino coye afa calla ikkikkinni hakkonne coye asseemmo? Dancha coye asseemmo gede kakkayisinoeri maati?’

HAARO MANNIMMANKE AGADHINE HEEꞌRA DANDIINEEMMOHU HIITTOONNIITI?

16. Woꞌmanka woyite ma assa hasiissannonke? Mayira?

¹⁶ Haaro mannimma uddiꞌrate sharrama hasiissannonkehu cuuammammo geeshshaatilla yine heda dihasiissannonke. Haaro mannimmanke haaro uddano gede dancha gede assine agadha hasiissannonke. Tenne assa dandiineemmoti mitte doogo barru baala Maganu ayyaani laalo leellinsheemmo doogga hasiꞌrate. Mayira? Korkaatuno Yihowa ayyaani mittore assate kaꞌneemmo gede wolqa aannonke. (Kal. 1:2) Hakko daafira mittu mittunku Maganu ayyaani laalo wido ikkino akati loosoho kaꞌneemmo gede assannonke. Lawishshaho rosaanchu Yaiqoobi, “Loosu ledo nookki ammanano reyitinote” yee borreessino. (Yai. 2:26) Wole Maganu ayyaani laalo wido ikkitino akatta baalano hattooti yaa dandiinanni. Woꞌmanka woyite kuri akatta noonketa leellisheemmoha ikkiro, Maganu ayyaani giddonke loosanni nooti leeltanno.

17. Ayyaanu gumi laalo wido ikkitino akatta leellisha qarra ikkitunkero ma assa hasiissannonke?

¹⁷ Cuuantunkunni lowo diro ikkinonsa roduuwira nafa ayyaanu laalo wido ikkitino akatta leellisha mito woyite qarra ikkitansara dandiitanno. Qaru coyi kayinni hexxo mudha hoogate. Hanni mitto lawishsha laꞌno. Mitte lowo geeshsha baxatto uddano dadhanturo bayichonkonni hunatto? Dihunatto. Dandaamannoha ikkiro tenne uddano qorophite gowatto. Hakkuyi gedensaanni dadhantannokki gede seekkite qorophatto. Hatteente gede mito woyite mittu manchira danchumma, cinca woy baxille leellisha hoogittoro hexxo mudhitooti. Godowinta maaro xaꞌmiꞌrakki hakko manchi ledo noohe aante baꞌannokki gede kaaꞌlitannohe. Konni kaꞌirano roore woyyinore assate murciꞌri.

18. Maa addaxxa dandiineemmo?

¹⁸ Yesuusi dancha lawishsha ikkinonke daafira lowo geeshsha galanteemmosi! Yesuusite gedee hedonna akati heeꞌrannonke gede assiꞌnummo kiiro, assootinkennino isi faale haꞌra diqarrissannonke. Assootinkenni isi faale haꞌnummo kiiro haaro mannimma uddiꞌrate assineemmori roore qinaannonke. Konni birxichira Maganu ayyaani laalo wido ikkinoha shoole akatalla laꞌnoommo. Yanna gaaꞌmite, wole Maganu ayyaani laalo wido ikkitino akatta ledde xiinxalli hattono kuri akatta nooheta leellishate mageeshsha qiniinohero layiꞌrate woꞌnaali. Yihowa Farciꞌraasinete Xiinxallote Kaaꞌlitanno Borrora “Kiristaanu Heeshsho” yaannohura “Ayyaanu Laalo” yaannohu hunda tenne hajo daafira kultanno birxichuwa afiꞌra dandaatto. Haaro mannimma uddiꞌratenna uddiꞌrootto gedeenni heeꞌrate dandiittore baala assittoro Yihowa kaaꞌlannoheta addaxxa dandaatto.