Ajuujate Maxaafi Xaa Yannara Kaaꞌlannohehu Hiittoonniiti?

1-2. Ajuujate maxaafa illachisha hasiissannonkehu mittu korkaati maati?

MITTU egennootto manchi fotote albeemesi leellishe egenninohe? Foto laꞌꞌatto woyite duuchu manni diegennoottoho. Mitte foto kayinni seekkite laitto. Mayira? Korkaatuno hattee foto giddo atino nootto. Tenne foto seekkite laꞌꞌatto woyite mamootenna hiikko kaoottoro qaagate woꞌnaalatto. Ledokki kaꞌinorino ayeootiro buuxate woꞌnaalatto. Hatti foto atera lowo tiro afidhinote.

² Ajuujate maxaafino hattee foto gedeeti. Mayira? Togo yineemmo gede assannonkehu ajayi ajeenna lamu korkaati no. Umihunni, konne maxaafa borreessinoonnihu ninkeraati. Ajuuja fooliishsho mitte kiiro mitte togo yitanno: “Tini Yesuusi Kiristoosi ajuujaati. Muli yanna giddo ikkanno coye soqqamaanosira leellishanno gede Maganu uyinosite.” (Aju. 1:1) Hakko daafira konni maxaafi giddo noori baalunku mannira borreessinoonnire ikkikkinni, heeshshonke Maganoho sayinse uyinoommorira ninkera borreessinoonniho. Maganu manna ikkinoommo daafira, konni dhagge ikkanno maxaafi giddo kulloonni masaalo woꞌmitanno gede ninkeno kaaꞌlinanni heeꞌnoommota afanke dhagge diꞌꞌikkitannonke. Wole yaattonni hattee laꞌnanni heeꞌnoommo “foto giddo” ninkeno heeꞌnoommo yaate.

3-4. Ajuujate maxaafi kulanno garinni konni maxaafira borreessinoonni masaalo woꞌmitinohu mamooteeti? Tini ninke maa assineemmo gede kakkayissannonke?

³ Ajuujate maxaafa illachinsheemmo gede assannonkehu layinki korkaati konni maxaafi giddo kulloonni masaalo woꞌmitanno yannaati. Tini masaalo woꞌmitanno yanna kulanni soqqamaasinchu Yohaannisi togo yiino: “Qullaawu ayyaaninni Mootichu barra laoommo.” (Aju. 1:10, NW) Mootichu barri hanafinohu Yohaannisi 96 M.D balla tenne ajuuja borreessihunni lowo diri gedensaanniiti. (Mat. 25:14, 19; Luq. 19:12) Qullaawu Maxaafi masaalo kultanno garinni Mootichu barri hanafinohu, 1914nni Yesuusi moote ikke iima gashsha hanafi woyiteeti. Hattee yannanni kayisse Ajuujate maxaafira kulloonni masaalo woꞌmitanni no; Maganu mannino tini masaalo woꞌmitanno gede kaaꞌlanni no. Addanko heeꞌnoommohu ‘Mootichu barri’ giddooti!

⁴ Heeꞌnoommohu dhagge ikkitanno yanna giddo ikkino daafira, Ajuuja 1:3 baxillunni amaalloonninke amaale seekkine illachisha hasiissannonke; qummeeshshu togo yaanno: “Kuni coyi baalu muli yanna giddo ikkanno daafira, konne himanu qaale nabbawannohu baꞌraaꞌrinoho; konne qaale macciishshitannorinna kunni maxaafi giddo borreessinoonniha wonshitannori baꞌradhinoreeti.” Addanko konni maxaafi giddo borreessinoonnire ‘nabbawa,’ ‘macciishshanna’ ‘wonsha’ hasiissannonke. Wonsha hasiissannonkehu mitu qaali hiikkonneeti?

MAGANSIꞌRAKKI YIHOWA ADHANNOTERONNA TEꞌEE BUUXIꞌRI

5. Ajuujate maxaafi magansiꞌranke Yihowa adhannoteronna teꞌee buuxiꞌra hasiissannonketa luphi asse kulannohu hiittoonniiti?

⁵ Ajuujate maxaafite umi fooliishshonni kayisse noo hedo, Yesuusi songuwate giddo ikkannore seekke afinota leellishshanno. (Aju. 1:12-16, 20; 2:1) Isi Shiimiidi Iisiyira noote lamala songuwara soyino sokka tenne leellishshanno. Yesuusi tenne sokkara umi xibbi diro heeꞌrino Kiristaani magansiꞌransa Yihowa hagiirsiissannoteronna teꞌee buuxiꞌranno gede kaaꞌlannonsa biddishsha uyinonsa. Isi hatte sokkara kulinori xaa yannara noohu Maganu manni baalu harunsa hasiissannoreeti. Ninke tennenni maa ronseemmo? Massagaanchinke Kiristoosi Yesuusi ayyaanaamittetenni heeꞌnoommo gara seekke afanno. Isi massagannonke hattono towaatannonke; qoleno baalankare laꞌꞌanno. Yesuusi woꞌmanka woyite Yihowa hagiirsiinseemmo gede maa assa hasiissannonkero afino. Isi uyinohu ninke xaa yannara harunsa hasiissannonke biddishshi hiikkonneeti?

6. (a) Yohaannisi Ajuuja 2:3, 4 kultanno garinni, Yesuusi Efesooni songora noo Kiristaanira soyino sokka insara mayi qarri noonsata leellishshanno? (b) Ninke tenne xaggenni maa ronseemmo?

⁶ Yohaannisi Ajuuja 2:3, 4 nabbawi. Albihu Yihowara noonke baxilli baꞌꞌankera wodha dihasiissannonke. Yesuusi Efesooni heedhanno songora soyino sokka, insa cincitaare ikkitinotanna addi addi qarri iillinsarono Yihowara soqqama agurtinokkita leellishshanno. Ikkirono insa albi baxillensa agurtino. Insa baxillensa haaroonsiꞌra hasiissinonsa; hatto ikka hoogiro Yihowa magansiꞌransa diadhanno. Ninkeno xaa yannara cincineemmore calla ikkikkinni hakkiinni sainore assa hasiissannonke. Cincineemmo gede kakkayisannonkeri gara ikkinore ikka hasiissannosi. Maganinke assineemmo coye calla ikkikkinni hakkoye coye assineemmohu mayiraatirono laꞌꞌanno. Yihowa mitto coye assate kaꞌnoommohu mayiraatiro seekke laꞌꞌanno; korkaatuno isi, lowo geeshsha banxeemmosinna galatu noonke daafira magansiꞌnammosira hasiꞌranno.—Law. 16:2; Maq. 12:29, 30.

7. (a) Yohaannisi Ajuuja 3:1-3 kultannonte gede, Yesuusi Serdeesi songora mayi qarri noonsata kulino? (b) Ninke maa assa hasiissaanke?

⁷ Yohaannisi Ajuuja 3:1-3 nabbawi. Baqqi yine heeꞌra hasiissaanke. Serdeesi songora noo Kiristaanira kayinni kawiinni baxxino qarri noonsa. Insa alba Yihowara diinaggaabbe soqqantinoha ikkirono xa kayinni agurtino. Hakko daafira Yesuusi ‘baqqi yiiyye’ yiinonsa. Tenne xaggenni ninke maa qoropha hasiissaanketa ronseemmo? Yihowa loosonke hawaakkiti egennantinote. (Ibi. 6:10) Ikkirono, alba Yihowara soqqamate assinoommorinni calla kassi yaa dihasiissannonke. Hige alba assineemmo geeshshire xa assa dandiineemmokkiha ikkara dandaanno; ikkirono goofimarchu geeshsha baqqi yine “Mootichu looso” woꞌmanka woyite agurrummokkinni loosa hasiissannonke.—1 Qor. 15:58; Mat. 24:13; Maq. 13:33.

8. Yohaannisi Ajuuja 3:15-17 noote Yesuusi Loodooqiyaho heedhanno roduuwira soyino sokkanni maa ronseemmo?

⁸ Yohaannisi Ajuuja 3:15-17 nabbawi. Yihowa diinaggaambenna woꞌmu wodaninkenni magansiꞌra hasiissannonke. Yesuusi Loodooqiyu songora soyino sokka insara wolu qarri noonsata leellishshanno. Insa magansiꞌra ‘gammuutate.’ Insa coye lashshi assite agurtino daafira Yesuusi ‘gadadaammanna hawaaxaamma’ ikkitinota kulinonsa. Insa Yihowa diinaggaabbe magansiꞌra hasiissinonsa. (Aju. 3:19) Tenne xaggenni ninke maa ronseemmo? Albi geeshsha diinaggaambanni heeꞌnoommokkiti leeltunkero noonketa ayyaanaamittete jiro albinni roore naada hasiissannonke. (Aju. 3:18) Qawaaxxaame heeshsho heeꞌrate sharrama, hedonke bebbeehantanno gedenna ayyaanaamittete coye balaxisiinseemmokki gede assitankera wodha dihasiissannonke.

9. Yesuusi Phergamooninna Tiyaxiroosi songora heeꞌrino Kiristaanira soyino sokka leellishshannonte gede, maa qoropha hasiissannonke?

⁹ Kaadaasinete roso giwa hasiissaanke. Yesuusi Phergamooni songora heeꞌrannohu mitu Kiristaani mereeronsa mittimma heedhannokki gede assino daafira rufinonsa. (Aju. 2:14-16) Isi Tiyaxiroosi heeꞌranno Kiristaani, “Sheexaanunniha goꞌle noo coye” giwino daafira galatinonsa; qoleno halaale ‘seekke cuꞌmiꞌranno’ gede jawaachishinonsa. (Aju. 2:24-26) Togooha kaphu roso ammaninohu hakko heeꞌrannohu ammanatenni shoshshoggino Kiristaani maaro ea hasiissinonsa. Xaa yannara ninkena? Yihowa hedo ledo sumuu yaannokki roso baala giwa hasiissaanke. Kaadaasine ‘Magano magansidhannore labbara’ dandiitanno; ‘maganimmate wolqasi’ kayinni kaaddannoreeti. (2 Xim. 3:5) Maganu Qaale diinaggaambe xiinxallineemmoha ikkiro, kaphu roso bade afanna giwa qarra diꞌꞌikkitannonke.—2 Xim. 3:14-17; Yih. 3, 4.

10. Yesuusi Phergamooninna Tiyaxiroosi songora kulinorinni wolere maa ronseemmo?

¹⁰ Baalunku gari foorre giwa hasiissaanke. Phergamooninna Tiyaxiroosi songora wolu qarri noonsa. Yesuusi kuri songuwara noohu mitu Kiristaani foorre qorophinokki daafira rufinonsa. (Aju. 2:14, 20) Tenne xaggenni ninke maa ronseemmo? Yihowara lowo diro soqqammoommoha hattono xa addi addi qoosso afiꞌnoommoha ikkiro nafa, Yihowa maaeela coye assinummoro lashshi asse aguranno yine heda dihasiissannonke. (1 Sam. 15:22; 1 Phe. 2:16) Alame amanyootunni maaeeltanni hadhinoha ikkirono, Yihowa taalle nookkiha amanyootu seerasi ayirrinsammora hasiꞌranno.—Efe. 6:11-13.

11. Kageeshsha ronsoommori maati? (“Ninke Maa Ronseemmo?” yitanno saaxineno lai.)

¹¹ Kageeshsha ronsoommori maati? Magansiꞌranke Yihowa adhannoteronna teꞌee buuxiꞌra hasiissaanketa ronsoommo. Yihowa magansiꞌranke adhannokki gede assannore assinanni heeꞌnoommoha ikkiro, bayichonkonni biddi assiꞌra hasiissaanke. (Aju. 2:5, 16; 3:3, 16) Yesuusi songuwate soyino sokkara luphi asse kulinohu wolu coyino no. Hakku coyi maati?

DARTE CINCITINE SAꞌꞌATE QIXXAABBE

12. Yesuusi Semirineesinna Filidelfiyaho heeꞌranno Kiristaanira soyino sokkanni maa ronseemmo? (Yohaannisi Ajuuja 2:10)

¹² Hanni xa Yesuusi Semirineesinna Filidelfiyaho heedhanno songuwara borreessino sokka laꞌno. Isi hakko heeꞌranno Kiristaani ammanamansa kiissannonsa daafira, amadansara noo qarra waajjannokki gede jawaachishinonsa. (Yohaannisi Ajuuja 2:10 nabbawi; 3:10) Tenne xaggenni ninke maa ronseemmo? Dartu iillannonketa anfoommo; hakko daafira cincine saꞌꞌate qixxaawa hasiissaanke. (Mat. 24:9, 13; 2 Qor. 12:10) Kuni qaagiishshi hasiisannoha ikkinohu mayiraati?

13-14. Ajuuja fooliishsho 12 kulloonni ikkito Maganu mannira qarru iillanno gede assitinohu hiittoonniiti?

¹³ Ajuujate maxaafi heeꞌnoommohu ‘Mootichu barri’ giddo Maganu manna xiimbannita kulanno. Ajuuja fooliishsho 12 Yesuusi Maganu Mangiste moote ikkanni heeꞌreennanni iima olu kainota kultanno. Mikaeeli yaano ayirrinye adhinohu Yesuusi Kiristoosinna olantosi Sheexaanunna agaanintesi ledo olantino. (Aju. 12:7, 8) Hakko daafira Maganu diinna qeelantino hattono insa uullara tungoonni; tini baattote aana heeꞌranno manni baasa qarramanno gede assitino. (Aju. 12:9, 12) Tini Maganu mannira mayi qarri iillanno gede assitino?

¹⁴ Ajuujate maxaafi hakkiinni aane Sheexaanu hiitto ikkinoro kulannonke. Isi xaate iimira haꞌra dandaannokki daafira uullate aana gattino buuramaasinera hanqa hanafino; insa uullate aana Maganu Gashshoote riqibbannoreeti; hattono “Yesuusira ammanamatenni farcidhannoreeti.” (Aju. 12:17; 2 Qor. 5:20; Efe. 6:19, 20) Tini masaalo woꞌmitinohu hiittoonniiti?

15. Ajuuja fooliishsho 11 ‘lame farciꞌraasinenni’ lawinsoonniri ayeooti? Insara mayi qarri iillinonsa?

¹⁵ Sheexaanu Maganu diinna, Maganu Mangisteha sabbakate looso albisa ikkite loossanni noore buurantino roduuwa siꞌanno gede assino. Kuri labballo ‘lame farciꞌraasinenni’ lawinsoonni; Ajuujate maxaafi insa shinoonnita kulanno.b (Aju. 11:3, 7-11) Albisa ikkite soqqantannore sette roduuwa 1918nni beebbate kassansoonninsa; insa mittu mittunku seeda diro usurantanno gede yoo yinoonninsa. Mannu hedora kuri buurantino roduuwi loossanno loosi uurrinohu gedeeti.

16. Hendoonnikkihu 1919nni ikkino coyi maati? Ikkollana hatte yannanni kayise Sheexaanu maa assa diagurino?

¹⁶ Ajuuja fooliishsho 11 noo masaalo shiima yanna gedensaanni ‘lame farciꞌraasine’ reyotenni kaꞌannotano kultanno. Kuri roduuwa usurrihunni mitto diro ikkitannokki yanna giddo, tini masaalo dhagge ikkanno garinni woꞌmitino. Badheessa 1919nni kuri buurantino roduuwa usuru mininni tirroonni; gedensoonni kassansoonninsa kisse agurroonni. Insa bayichonkonni Maganu Mangiste looso loosa hanaffino. Ikkollana xaano Sheexaanu Maganu manna sia diagurino. Hatte yannanni hanafe Sheexaanu Maganu mannira baalaho dartu ‘lolaho’ kayisino. (Aju. 12:15) Addanko ninke mittu mittunkura ‘cincanna ammaꞌna hasiissaanke.’—Aju. 13:10.

YIHOWA UYINONKE LOOSO LOOSATE DANDIITTORE BAALA ASSI

17. Sheexaanu sia agurinonsakkiha ikkirono, Maganu manni hiittenne hendoonnikki kaaꞌlo afiꞌrino?

¹⁷ Ajuuja fooliishsho 12 aanchite kultannonte gede, Maganu manni hendoonnikki garinni shiima kaaꞌlo afiꞌranno. Qummeeshshu, “baatto” dartu lolaho egemmitannota kulanno. (Aju. 12:16) Kulloonnirino woꞌmino. Tenne Sheexaanu alamera noori gara ikkitino lao noonsa gashshaasine, lawishshaho yoote seeri Maganu manna kaaꞌlino woyiti no. Yihowa Farciꞌraasine yoote mine duucha higge afidhino qeelle insa mito geeshshi wolapho afidhanno gede kaaꞌlitinonsa. Insa tenne wolapho horoonsidhinohu hiittoonniiti? Yihowa uyinonsa looso loosate afidhu faro baala horoonsidhino. (1 Qor. 16:9) Konni loosi giddo gamu maati?

18. Tenne goofimarchu barruwa giddo loonsanni heeꞌnoommohu qaru loosi hiikkoyeti?

¹⁸ Yesuusi mannisi goofimarchu daara albaanni, ‘Maganu Gashshootiha Dancha Duduwo’ gobba baalate duduwannota masaalino. (Mat. 24:14) Ajuujate maxaafira, “baattote aana noo gosara, gaꞌretenna addi addi afiinni coyiꞌranno manni baalaho lallawate hegereti Danchu Duduwi sokka” noosi sokkaasinchi daafira kulloonni; hakko daafira Maganu manni sabbakate looso loosanno woyite mittu sokkaasinchi woy sokkaasinete gaamo kaaꞌlitannonsa.—Aju. 14:6.

19. Yihowa baxxaari dudubbannoti wole sokka hiitteeti?

¹⁹ Maganu manni duduwannohu Maganu Gashshootiha dancha duduwo calla diꞌꞌikkino. Insa Ajuuja fooliishsho 8tenni 10 geeshsha kulloonni sokkaasine loossanno loosono kaaꞌla hasiissannonsa. Kuri sokkaasine Maganu Gashshoote gibbannorira aante aantete iillitanno bao kultino. Konni garinni Yihowa Farciꞌraasine ‘giiratenna kaadete’ gedee sokka dudubbanni keeshshitino; tini sokka Maganu busha Sheexaanu alamera yiino yoo leellishshannote. (Aju. 8:7, 13) Mannu heeshshonsa biddi assiꞌre Yihowahu hanqu barrinni gata dandaanno gede goofimarchu gambisinota afa hasiissannonsa. (Sof. 2:2, 3) Ikkollana tini sokka duuchu manni dibaxannote. Tenne sokka duduwate worbuulle ikka hasiissaanke. Bayiru qarri yannara dudumbeemmoti jeefonniti yoote sokka mannu roore giwannota ikkitanno.—Aju. 16:21.

MASAALOTE GIDDO KULLOONNI QAALE WONSHE

20. Aane noohu lamu birxichira maa ronseemmo?

²⁰ Ajuujate maxaafi giddo kulloonni masaalo woꞌmitanno gede ninkeno kaaꞌlammeemmo daafira, “konne himanu qaale” wonsha hasiissannonke. (Aju. 1:3) Ikkina darte cincine saꞌꞌanna agurrummokkinni tenne sokka worbimmatenni duduwa dandiineemmohu hiittoonniiti? Aane noohu lamu coyi jawaante afiꞌneemmo gede kaaꞌlannonke: umihu Ajuujate maxaafi Maganu diinna daafira kulannoreeti; layinkihu ammanamme heeꞌnummoro albillitte afiꞌneemmo atooteeti. Aane noohu lamu birxichira tenne hajo daafira ronseemmo.