Ajuujate Maxaafi Kulanno Sokka Maati?
Qullaawu Maxaafi mayyaanno?
Qullaawu Maxaafi giddo nooha Ajuujate maxaafa Giriikete Afiinni Apokaalypisisi yinanni; kuni qaali “Diwamino Coye Fana” woy “Xawo Fulanno Gede Assa” yitanno tiro afiꞌrino. Kuni suꞌmi Ajuujate maxaafi tiro huwanteemmo gede kaaꞌlannonke; kuni maxaafi, dahaawino coyenna konne maxaafa borreessinihunni lowo diri gedensaanni woꞌmitanno coyibba xawise kulannoho. Konni maxaafi giddo borreessinoonniti batinye masaalo xaara diwoꞌmitino.
Ajuujate Maxaafi Amado
Bitima.—Yohaannisi Ajuuja 1:1-9.
Yesuusi lamala songora soyino sokka.—Yohaannisi Ajuuja 1:10–3:22.
Maganu iima zuufaanesira ofolle ajuujatenni leellino.—Yohaannisi Ajuuja 4:1-11.
Hoode hoodete leeltinota addi addi ajuuja:
Lamala sumuda.—Yohaannisi Ajuuja 5:1–8:6.
Lamala xurumba; jeefote ufuunfoonnihu sasu xurumbi sase aanneꞌe woy bayissibao daggannota kulanno.—Yohaannisi Ajuuja 8:7–14:20.
Lamala gawatta; mitte mittenti gawate baattote aana dunnanniha Maganu hanqo amaddino.—Yohaannisi Ajuuja 15:1–16:21.
Maganu baarigaarra baꞌanna leellishshannota addi addi ajuuja.—Yohaannisi Ajuuja 17:1–20:10.
Gordohonna baattote aana dirrannoha Maganu atoote leellishshanno ajuuja.—Yohaannisi Ajuuja 20:11–22:5.
Gumulo.—Yohaannisi Ajuuja 22:6-21.
Ajuujate maxaafi yaannore huwatate kaaꞌlannore
Ajuujate maxaafi sokka, Maganu soqqamaasinera danchare kultannote ikkinnina waajjishshannota woy shabbarsitannota diꞌꞌikkitino. Batinyu manni “apokaalypsi” yaannoha ajuujate maxaafi suꞌma danotenna dawaawanote ledo xaadise hedanno; ikkirono, Ajuujate maxaafi bitimahono ikko gumulote, konni maxaafi sokka nabbawannohu, huwatannohunna harunsanno manchi konne assasinni hagiirraamo ikkannota kulanno.—Yohaannisi Ajuuja 1:3; 22:7.
Ajuujate maxaafi kulannoti batinye malaatta noo gedeenni adhinannita diꞌꞌikkitino.—Yohaannisi Ajuuja 1:1.
Ajuujate maxaafira kulloonnihu batinyu coyinna malaatta, Qullaawu Maxaafi giddo balanxe kulloonnireeti:
Yihowa—‘iima gordoho noo Maganonna’ woꞌmunku coyi Kalaqaancho.—Marro 4:39; Faarso 103:19; Yohaannisi Ajuuja 4:11; 15:3.
Yesuusi Kiristoosi—‘Maganu Geꞌrecho.’—Yohaannisi 1:29, Haaro Gondooro; Yohaannisi Ajuuja 5:6; 14:1.
Sheexaane Daawuloosi—Maganu baarigaara.—Kalaqama 3:14, 15; Yohaannisi 8:44; Yohaannisi Ajuuja 12:9.
Batiꞌra Baabiloone—hundi Baabiloonente gede (Baabeeli), Maganu Yihowanna mannisi diinaati; qolteno ammaꞌno rosiissannohu kaphu rosi buichooti.—Kalaqama 11:2-9; Isayaasi 13:1, 11; Yohaannisi Ajuuja 17:4-6; 18:4, 20.
“Baara”—Magano giwannoha busha manna.—Isayaasi 57:20; Yohaannisi Ajuuja 13:1; 21:1.
Hunda Magano magansiꞌrate horoonsiꞌnannihu xaadooshshu dunkaani ledo xaadooshshe afidhino coyibba—gondooru taawoota, hincilaallote baara (hayishshiꞌnanni saane), caabbicho, hixaanu kakkalonna kakkalote darga mitteenni.—Fulo 25:10, 17, 18; 40:24-32; Yohaannisi Ajuuja 4:5, 6; 5:8; 8:3; 11:19.
Moyichu—uullate gashshoote riqiwannoho.—Daanieeli 7:1-8, 17-26; Yohaannisi Ajuuja 13:2, 11; 17:3.
Lawishshu tiro afidhino kiiro.—Yohaannisi Ajuuja 1:20; 8:13; 13:18; 21:16.
Ajuuja woꞌma hanaffinohu “Mootichu barra,” yaano 1914nni Maganu Mangiste xintantu yannaranna Yesuusi Moote ikke gashsha hanafi woyiteeti. (Yohaannisi Ajuuja 1:10) Konni daafira, Ajuujate maxaafi giddo kulloonni masaalo roorenka woꞌmitannohu ninke yannaraati yaa dandiineemmo.
Ajuujate maxaafa huwatate kaaꞌlannonkeri, wole Qullaawu Maxaafi gafa huwatate kaaꞌlannonkeri ledo mittoho; kuri giddo gamu: Maganu aanno hayyonna konne maxaafa huwatino manni kaaꞌlooti.—Soqqamaasinete Looso 8:26-39; Yaiqoobi 1:5.