Coyidhinannireno Ikko Assitinannire Shaqqillunni Asse

LIISAa yinanni rodoo “ammanate roduuwi leellishshino shaqqilli lowo geeshsha kaaꞌlinoe” yitino. Ise togo yitinohu umo halaale macciishshitanno gede kaaꞌlinoseri maatiro kultanniiti. Aane yinanni rodoono togo yitino: “Rosoomma rosinni roore baxisinoehu Yihowa Farciꞌraasine leellishinoe shaqqilleeti.” Kuri lamenti roduuwi xa Qullaawa Maxaafa nabbawanna hiinca baxanno; kayinni roore kaaꞌlinonsahu roduuwu leellishshino shaqqilleeti.

Manna loosoho kakkayisanno garinni shaqqille leellisha dandiineemmohu hiittoonniiti? Hanni coyiꞌneemmorinninna assineemmorinni tenne assa dandiineemmo gara laꞌno. Hakkiinni shaqqille leellisha hasiissannonkehu ayeooraatiro laꞌneemmo.

SHAQQILLUNNI COYIꞌRA

Lawishsha fooliishsho 31 kulloonniti maanaame minaama shaqqillunni coyidhannota kulloonni. (Law. 31:26) Shaqqillu ise maa coyidhannoronna ma garinni coyidhannoro balaxxe heddanno gede assannose. Annuwuno shaqqillunni coyiꞌra hasiissannonsa. Batinyu annuwinna amuuwi kaajjishenna hanqe coyiꞌra oosonsa gawajjitannotanna hajajantannokki gede assitannota wodanchino. Hakko daafira oosonsa macciishshite hajajantanno gede annuwunna amuuwu shaqqillunni coyiꞌrate sharrama hasiissannonsa.

Annanna ama ikkinummorono ikka hoongummorono shaqqillunni coyiꞌra dandiineemmohu hiittoonniiti? Lawishsha 31:26 nooti umi hedo tenne afate kaaꞌlitannonke. Qummeeshshu, “Afiisenni egenno [“hayyo”, NW] fultanno” yaanno. Togo assate coyiꞌneemmo qaallanna coyiꞌneemmo gara hayyotenni doora hasiissannonke. Ninkeneeto togo yine xaꞌmanke kaaꞌlitannonke: ‘Coyiꞌreemmori hanqo kakkayisannoreetinso hanqo qiissaareeti?’ (Law. 15:1) Addaho coyiꞌnammora albaanni seekkine heda hayyote.

Lawishshu maxaafi wole basera “Dayi gede coyiꞌnanni coyi manna urdete gede qasanno” yaanno. (Law. 12:18) Coyiꞌneemmorinna coyiꞌneemmo gari wolootaho mayi macciishamannonsa gede assannoro hendummoro qorophine coyiꞌneemmo. Ee, shaqqillunni coyiꞌneemmoha ikkiro gawajjannore dicoyiꞌneemmo woy kaajjinshe dicoyiꞌneemmo. (Efe. 4:31, 32) Gara ikkinokkire hedanna coyiꞌra agurre kiannore baxisanno garinni coyiꞌneemmo. Yihowa, waajjino soqqamaanchosi Eeliyaasi jawaachishi woyite tennera dancha lawishsha ikkinonke. Yihowa riqiwe dayino sokkaasinchi ‘shiima huuronni’ coyiꞌrino. (1 Mot. 19:12) Ikkirono shaqqado ikkate shaqqillunni coyiꞌratenni sainore assa hasiissannonke. Shaqqadda ikkinoommota leellishannore assa hasiissannonke. Hiittoonni?

SHAQQILLUNNI ASSINEEMMORI WOLOOTA LOOSOHO KAKKAYISANNO

Yihowa lawishsha harunsineemmoha ikkiro coyiꞌneemmo coyinninna assineemmorinni shaqqille leellinsheemmo. (Efe. 4:32; 5:1, 2) Aleenni qummi assiniti Liisa Yihowa Farciꞌraasine leellishshinose shaqqille kultino. Togo yitino: “Maatenke ledo hedeweelcho heeꞌnoommo mininni agurre fula hasiissunke yannara, Yihowa Farciꞌraasine ikkitinori lamu minaanninna minaama loosoho haꞌra agurte fooliishsho wonshite uduunne hogophinanna dagge kaaꞌlitinonke. Hatte yannara Qullaawa Maxaafa xiinxalla nafa dihanafoomma!” Roduuwu shaqqillunni assitinori Liisa Qullaawa Maxaafa seekkite xiinxallitanno gede kakkayisinose.

Hanafote kulliti Aanino Yihowa Farciꞌraasine leellishshinose shaqqille naaddino. Ise togo yitino: “Alamete aana noohu Yihowara soqqamannokki manni ikkito manna ammaꞌneemmakki gede assitinoe. Yihowa Farciꞌraasinenni xaadummati insano diammaꞌnoomma. ‘Insara aneri togo dhiwinonsahu mayiraati?’ yee hedoomma. Kayinni Qullaawu Maxaafi rosiisaanchoꞌya anera addinta heddannota leellishshino daafira ise ammanoomma.” Tini mayi guma abbituyya? Aane, “gedensaanni rosanni noommare seekke illachisha hanafoomma” yitino.

Roduuwu Liisaranna Aanera shaqqille leellishansa loosoho kaꞌanno gede assitinonsatanna halaale rosanno gede kaaꞌlitinonsata qaango. Roduuwu leellishshinonsa shaqqilli insa Yihowanna mannasi addaxxitanno gede kaaꞌlinonsa.

MANNAHO SHAQQILLE LEELLISHATE MAGANU LAWISHSHA HARUNSE

Mitu manni budinsanni kainohunni shaqqillunni coyiꞌranno hattono faasiiqaho. Mannu budinsanni woy akatinsanni kainohunni shaqqille leellishansa danchate. Shaqqille leellinsheemmohu konni garinni calla ikkiro shaqqille leellishate Maganu lawishsha diharunsinoommo.—Soqqamaasinete Looso 28:2 ledo heewisiisi.

Maganu lawishsha harunsine leellinshannihu addu shaqqilli woy shooshanqe qullaawu ayyaani laalo widooti. (Gal. 5:22, 23) Hakko daafira togoo shaqqille leellishate Maganu ayyaani kaaꞌlo hasiissannonke. Togoo shaqqille leellinsheemmoha ikkiro Yihowanna Yesuusi lawishsha harunsineemmo. Qoleno Kiristaana ikkinoommo daafira wolootaho lowo geeshsha hendeemmo. Tenne assineemmo gede kakkayisannonkehu Yihowaranna mannaho noonke baxilleeti. Togoo shaqqilli giddonkenni kaꞌne leellinsheemmoho kaajja akataati; hattono Magano hagiirsiisanno.

SHAQQILLE LEELLINSHEEMMOHU AYEOORAATI?

Danchare assinonkehura woy anfoommo mannira shaqqille leellisha qarra diꞌꞌikkitannonke. (2 Sam. 2:6) Shaqqille leellinsheemmoti mitte doogo insa galatate. (Qol. 3:15) Ikkollana mittu manchira shaqqille leellisha hasiissannonkekkiha lawinkerona?

Hanni tenne hendo: Yihowa elto oyenke shaqqille leellishate kaajja lawishsha ikkinonke; Qaalisino konne akata leellishate daafira kaajja roso rosiisannonke. Giriikete Afiite Qullaawa Borro giddo “elto” yaanno qaali duucha basera no. Maganu shaqqille leellishinonkehu hiittoonniiti?

Hanni Yihowa baalunku mannira heeshshote hasiisannonsare oye shaqqille leellishino gara hendo. (Mat. 5:45) Isinni Yihowa shaqqille leellishinonkehu iso nafa anfummokkinniiti. (Efe. 2:4, 5, 8) Lawishshaho isi mitto Beettosi manna baalaho sayise uyino. Soqqamaasinchu Phaawuloosi Yihowa “elto woꞌma ikkitinohura” Isi wodo qixxeessinota coyiꞌrino. (Efe. 1:7) Qoleno Yihowa cubbo loonseemmohanna iso dadillinseemmoha ikkirono massaganna rosiisa diagurannonke. Isi rosiisannonke rosinna qaalisi ‘shoru xeeni’ gedeeti. (Mar. 32:2) Isi leellishanni noonke shaqqilli baalaho galata qola didandiineemmo. Qoleno albillitte hegere heeshsho afiꞌneemmohuno Yihowa shaqqillinni ikkinota anfoommo.—1 Pheexiroosi 1:13 ledo heewisiisi.

Yihowa shaqqilli jawaachishannohanna loosoho kakkayisannoha ikkinoti dihuluullissannote. Hakko daafira mitu mannira calla ikkikkinni barru baala baalunku mannira shaqqille leellinshe Yihowa lawishsha harunsate sharrammo. (1 Tes. 5:15) Agurrummokkinni shaqqille leellinsheemmoha ikkiro qiidu yannara iibbishshanno giira gede ikka dandiineemmo. Qoleno mininke mannira, ammanate roduuwinkera, ledonke loossannorira, ledonke rossannoriranna qachinke mannira shesho ikkineemmo.

Hanni maateꞌne woy songote giddo shaqqillunni coyidhine woy mitore assitine jawaachishshinanni manni nooro hedde. Songoꞌne giddo roorenkanni mini giddo looso loonse, gate loosa kaaꞌline hattono dikkotenni haꞌne mitore hira kaaꞌlinanni rodii heeꞌrara dandaanno. Qoleno soqqantinanni heedhine kaaꞌlo hasiissannosi mancho xaaddiniro mitore assitine kaaꞌla dandiitinanni?

Yihowa lawishsha harunsine coyiꞌneemmorinninna assineemmorinni woꞌmanka woyite shaqqille leellinsho.