Huuccattote Qoossoꞌne Lowo Geeshsha Naadde

1. Yihowa uyinonketa huuccattote qoosso ma garinni laꞌꞌa hasiissannonke?

DHAGGE ikkitannoti iimanna uulla kalaqino Magano huuccattotenni hasaawisate qoosso noonke. Hanni tenne hendo: Dinye amandummokkinni hasiꞌnummo yannara hasiꞌnoommo qaalinni giddonketa gudinse Yihowara hasaapha dandiineemmo. Baxillaanchu Anninke huuccattonke macciishshannota addaxxine, akimete mine gonxoommowa heeꞌne woy usuru mine heeꞌne huuccatto assiꞌra dandiineemmo. Tenne qoosso mulluri gede assine dilaꞌneemmo.

2. Moote Daawiti huuccattote qoosso naadannota leellishinohu hiittoonniiti?

² Moote Daawiti huuccattote qoosso lowo geeshsha naadanno. Daawiti Yihowara, “Huuccattoꞌya hixaanu gede . . . assite lai” yee faarsino. (Far. 141:1, 2) Daawiti waro kakkalaasine halaalu magansiꞌrara horoonsidhannoha qullaawa hixaana qorophine qixxeessinanni. (Ful. 30:34, 35) Daawiti hixaanu daafira coyiꞌrinori, iimi Annasi huuccattotenni hasaawisanno woyite yaannore seekke heda hasiꞌrannota leellishanno. Ninke hasattono tenneeti. Huuccattonke Yihowa hagiirsiissannota ikkitara hasiꞌneemmo.

3. Huuccatto assiꞌneemmo woyite Yihowa ma garinni hasaawisa hasiissannonke? Mayira?

³ Yihowa huucciꞌneemmo woyite iso lowo geeshsha ayirrinseemmota leellisha hasiissannonke. Hanni Isayaasi, Hiziqeeli, Daanieelinna Yohaannisi laꞌinota dhagge ikkitanno ajuuja hendo. Insa laꞌino ajuuja babbaxxitinote; ikkirono mitto assannonsa coyi no. Insa baalunku Yihowa ayirrado Moote ikkinota laꞌino. Isayaasi, Yihowa “ayirrinyunni gaamaare ayirradu baarcimi gashshootunnihura ofolle nooha” laino. (Isa. 6:1-3) Hiziqeeli, Yihowa ‘magani-seemote gedeehu waraꞌa yiino xawaabbi gaangeesseennasi’ iimi saragallisira ofolle nooha laino. (Hiz. 1:26-28) Daanieeli, “Hegerera Heeꞌrannohu” waajjo uddano uddiꞌrinotanna giirate buwani ayirradu barcimisinni fulanna laino. (Dan. 7:9, 10) Yohaannisi kayinni, Yihowa haanja dilqa labbannoti biifado magani-seemo doyissitino barcimira ofolle nooha laino. (Aju. 4:2-4) Yihowaha taalle nookki ayirrinye hiincanke, huuccattotenni iso hasaawisa lowo qoosso ikkitinotanna huucciꞌneemmo woyite iso ayirrisa hasiissannonketa qaangeemmo gede assitannonke. Ikkina ma garinni huucciꞌra hasiissannonke?

‘KUNNIRA KIꞌNE TOGO YITINE HUUCCIDHE’

4. Yesuusi Maatewoosi 6:9, 10 kulinote lawishsha ikkitanno huuccattonni maa ronseemmo?

⁴ Maatewoosi 6:9, 10 nabbawi. Yesuusi Ilaalu Sibikatesi yannara, rosaanosi Magano hagiirsiisanno garinni huucciꞌra dandiitannohu hiittoonniitiro rosiisinonsa. Yesuusi ‘togo yitine huuccidhe’ yee kulihu gedensaanni umo, Yihowa hedinori ledo xaadooshshe afiꞌrinoha lowo geeshsha hasiisanno coye qummi assino. Insano: Maganu suꞌmi qullaambeeti, Maganu diinna baala hunannohu Maganu Gashshooti daatinna albillitte isi uullatenna mannu oosora abbara hedino atooteeti. Huuccatto assiꞌneemmo woyite kuri coyibba daafira huuccanke, Maganu fajjo woꞌmitara hasiꞌneemmota leellishshanno.

5. Uminke hajo daafira huucciꞌra hasiissannote?

⁵ Yesuusi hakkiinni aane uminke hajo daafirano huucciꞌra hasiissannota ikkitinota rosiisino. Yihowa barru sagale aannonke gede, cubbonke gatona yaannonke gede, jifamatenni agarannonke gedenna bushuwiinni gatisannonke gede huucciꞌra dandiineemmo. (Mat. 6:11-13) Yihowa kuri coyibba huucciꞌneemmo woyite, isi kaaꞌlo hasiissannonketa huwantoommotanna iso hagiirsiisa hasiꞌneemmota leellinsheemmo.

6. Lawishshu huuccattora kulloonnire calla huucciꞌra hasiissannonke? Xawisi.

⁶ Yesuusi harunsaanosi lawishshu huuccattora kulloonnire calla huuccidhara hasiꞌranno yaa diꞌꞌikkino. Isi wole yannara yaachishinosihu addi addi coyi daafira huucciꞌrino woyiti no. (Mat. 26:39, 42; Yoh. 17:1-26) Ninkeno yaachishinonkehu aye coyi daafirano huucciꞌra dandiineemmo. Mitto doorsha doodhate kaꞌneemmo woyite Yihowa hayyonna egenno aannonke gede huucciꞌra dandiineemmo. (Far. 119:33, 34) Mitto shaaꞌꞌa ikkinokki looso uyinanninke woyiteno hayyonna wodancha aannonke gede Yihowa huucciꞌra dandiineemmo. (Law. 2:6) Annuwunna amuuwu oosonsara, ooso qolte annuwinsanna amuuwinsa daafira huucca dandiitanno; hattono ninke baalunku Qullaawu Maxaafi rosaanonkeranna sabbankeemmo mannira huucca dandiineemmo; qoleno togo assanke hasiissannote. Ikkollana Yihowawiinni mitore afiꞌrate calla huucciꞌra dihasiissannonke.

7. Yihowa huuccattotenni guwisa hasiissannonkehu mayiraati?

⁷ Huuccattotenni Yihowa guwisa hasiissannonketa qaaga hasiissaanke. Maganinke geeshsha guweenyu hasiisannohu dino. Isi ‘shaqqadohonna cubbono agurannoho’; qoleno isi, ‘maarannohonna mararannoho, hanqate muddamannokkiho, bagamannokkihu baxillisinna halaalisi batiꞌraho.’ (Far. 86:5, 15) Addanko akattasinna assinori Yihowa galanteemmosi gede assannonke.

8. Yihowa galaxxineemmo gede assannonkehu mitu coyi maati? (Faarso 104:12-15, 24)

⁸ Yihowa huuccattotenni guwinseemmotano agurranna, isi qixxeessinonkehu maalaꞌlinanni coyira iso galatano hasiissannonke. Lawishshaho baxisannoha addi addi kuula afidhino daraaro daafira, kiirre tunqannikkite coommitanno sagale daafiranna jaallanke ledo yanna sayinse afiꞌneemmo hagiirri daafira Yihowa galata dandiineemmo. Baxillaanchu Anninke kurinna wole batinye coyibba uyinonkehu hagiidhinammora yeeti. (Faarso 104:12-15, 24 nabbawi.) Wolu baalunkunni roore, falakkinota ayyaanaamittete sagale shiqishannonke daafiranna dhagge ikkitannote albillittete hexxonke daafira Yihowa galaxxineemmosi.

9. Yihowa galata hambeemmokki gede kaaꞌlankera dandaannori maati? (1 Teselonqe 5:17, 18)

⁹ Yihowa assinonke coyi baalaho galata hambeemmoha ikkara dandaanno. Qaangeemmo gede kaaꞌlankera dandaannori maati? Yihowa huucciꞌnoommo coye borreessine amaxxanna isi huuccattonkera dawaro qolinonkehu hiittoonniitiro afate hakko coye wirro laꞌꞌa dandiineemmo. Hakkiinni isi kaaꞌlinonke daafira huuccattotenni galaxxa dandiineemmo. (1 Teselonqe 5:17, 18 nabbawi.) Hanni tenne hendo: Wolootu galattannonke woyite lowo geeshsha hagiidhineemmo. Hatteente gede Yihowa huuccattonkera dawaro qolinonketa qaange galanteemmosi woyite lowo geeshsha tashshi yaannosi. (Qol. 3:15) Kayinni Maganonke galanteemmo gede assannonkehu wolu lowo geeshsha hasiisanno coyino.

BAXANNO BEETTOSI UYINONKE DAAFIRA YIHOWA GALANTO

10. Umi Pheexiroosi 2:21 kultanno garinni, Yesuusa uullara soyinonke daafira Yihowa galaxxa hasiissannonkehu mayiraati?

¹⁰ Umi Pheexiroosi 2:21 nabbawi. Yihowa rosiisannonke gede baxanno Beettosi soyinonke daafira galaxxa hasiissannonke. Yesuusi heeshsho daafira xiinxalline Yihowa daafira lowore rosanna iso hagiirsiinseemmo gara afa dandiineemmo. Kiristoosi kakkalo ammanneemmota loosunni leellinshummoro, Yihowa ledo danchu jaaloomi heeꞌrannonke hattono isi ledo keerunni heeꞌneemmo.—Rom. 5:1.

11. Yesuusi suꞌminni huucciꞌra hasiissannonkehu mayiraati?

¹¹ Beettisi widoonni iso huucciꞌra dandiineemmo daafira Yihowa galaxxineemmosi. Yesuusi Yihowa huuccattonkera dawaro qolate horoonsiꞌranno buusaati. Yihowa Yesuusi suꞌminni huucciꞌnanni huuccatto macciishshanno hattono dawaro qolanno. Yesuusi togo yee coyiꞌrino: “Maganu Annu, Beettunni ayirranno gede suꞌmiꞌyanni huuccidhinannire baala asseemmoꞌne.”—Yoh. 14:13, 14.

12. Beettisi daafira Yihowa galanteemmo gede assannonkehu wolu coyi maati?

¹² Yihowa Yesuusite wodote kakkalo widoonni cubbonke gatona yaannonke. Qullaawu Maxaafi Yesuusi daafira kulanni, “Gordoho ayirradu Magani barcimira qiniiteenni ofollinohu togoo qeesichi [“kakkalaanchi,” NW] noonke” yaanno. (Ibi. 8:1) Yesuusi “Maganu Annunniwa ninkera sae coyiꞌramanno.” (1 Yoh. 2:1) Yihowa laanfenke afinohanna ‘ninke daafira huuccannoha’ Kakkalaanote Biilo qixxeessinonke daafira galanteemmosi. (Rom. 8:34; Ibi. 4:15) Guuntete xeꞌne noonkere ikkinoommo daafira Yesuusi kakkalo nookkiha huuccattotenni Yihowawa shiqa didandiineemmo. Addanko Yihowa tenne baxxitino elto yaano muxxe Beettosi uyinonke daafira woꞌmunni woꞌma galata qoꞌla didandiineemmo!

AMMANATE RODUUWIꞌNERA HUUCCENSA

13. Yesuusi reyara albaanni noo hashsha rosaanosi baxannota leellishinohu hiittoonniiti?

¹³ Yesuusi reyara albaanni noo hashsha, Annisi rosaanosi ‘bushuwiinni gatisannonsa’ gede seeda yanna huuccino. (Yoh. 17:15) Tini Yesuusi insa mageeshshi geeshsha baxannonsaro leellishshanno! Isi lowo qarri iillasira kae noota afirono soqqamaasinesi keeri yaachishinosi.

14. Ammanate roduuwanke banxeemmota leellisha dandiineemmohu hiittoonniiti?

¹⁴ Yesuusi lawishsha harunsineemmoha ikkiro uminke hasatto calla dibalaxisiinseemmo. Hatteentenni woꞌmanka woyite ammanate roduuwinke daafira huuccineemmo. Hatto assineemmo woyite Yesuusi mimmito banxeemmo gede hajajinonke hajajo wonshinanni heeꞌnoommo; hattono ammanate roduuwanke mageeshshi geeshsha banxeemmoro leellinshanni heeꞌnoommo. (Yoh. 13:34) Ammanate roduuwinke daafira huucca mulla yanna guxxa diꞌꞌikkitino. Maganu Qaali, “keeraanchu manchi huuccatto, lowo guma uyitannota jawa wolqa” afidhinota kulanno.—Yai. 5:16.

15. Ammanate roduuwinke daafira huucca hasiissannonkehu mayiraati?

¹⁵ Ammanate roduuwinkera lowo qarri iillannonsa daafira huuccatto assa hasiissannonke. Insa dhibba, kalaqamu dano, olanna darte hattono wole qarra dandiite saꞌanno gede kaaꞌlansara Yihowa huucca dandiineemmo. Qoleno uminsa horo agurte kaaꞌlo hasiissannonsare kaaꞌlitanno roduuwinke daafirano huucca dandiineemmo. Togoo qarri iillanni noonsari affinoonni roduuwi heedhara dandiitanno. Suꞌmansa gantine insa daafira huuccatto assa dandiitinanni. Yihowa iillannonsa qarra dandiite saꞌanno gede kaaꞌlansara huuccineemmoha ikkiro addu baxilli noonketa leellinsheemmo.

16. Albisa ikkite soqqantanno roduuwi daafira huucca hasiissannonkehu mayiraati?

¹⁶ Albisa ikkite soqqantannori insa daafira huuccinannita lowo geeshsha baxxanno; qoleno tini huuccatto kaaꞌlitannonsa. Soqqamaasinchu Phaawuloosi woꞌnaalshino tini adda ikkase leellishanno. Isi togo yee borreessino: “Danchu Duduwiha goꞌlino coye ruxxi yuummokkinni coyiꞌrate, hasiisino qaale aannoe gede anerano huucceꞌꞌe.” (Efe. 6:19) Xaa yannarano albisa ikkite diinaggaabbe soqqantannori batinyu roduuwi no. Yihowa loosonsa maassiꞌranno gede huuccine insa banxeemmonsata leellinsheemmo.

MANNU ALBAANNI HUUCCINEEMMO WOYITE

17-18. Mannu albaanni huuccineemmo gede koyinsankera dandiinannihu hiittoo woyiteeti? Togoo woyite maa heda hasiissannonke?

¹⁷ Mito woyite mannu albaanni huuccineemmo gede koyinsankera dandiinanni. Lawishshaho mitte Qullaawa Maxaafa xiinxallissanno rodoo, ledose xiinxallissannota wole rodoo huuccatto assitanno gede koyissara dandiitanno. Ledose xiinxallissanno rodoo Qullaawu Maxaafi rosaancho daafira garire affinokkiha ikkara dandaanno; hakko daafira ise huuccatto xiinxallo gooffanno woyite assa doodhitara dandiitanno. Konni garinni Qullaawu Maxaafi rosaancho daafira mayite huuccitannoro afa dandiitanno.

¹⁸ Mitto rodoo qanchu soqqansho gambooshshiwa woy songote gambooshshiwa huuccatto assanno gede koyinsasira dandiinanni. Gambooshshunniwa huuccatto assate qoosso noonsa roduuwi gambooshshu mayi daafira kulannohoro heda hasiissannonsa. Huuccatto assinoonni widoonni songo amaala woy mitore egensiisa dihasiissanno. Roore woyite songote gambooshshiwa faarsotenna huuccattote fajjinoonni daqiiqi onteho; hakko daafira huuccatto assanno rodii roorenkanni hanafote ‘huuccatto seedisa’ dihasiissannosi.—Mat. 6:7.

HEESHSHOꞌNE GIDDO HUUCCATTO BALAXISIISSE

19. Yihowahu yoote barrira qixxaambeemmo gede kaaꞌlannonkeri maati?

¹⁹ Yihowahu yoote barri gambise dayi kiiro, heeshshonke giddo albinni roore huuccatto balaxisiisa hasiissannonke. Yesuusi tenne daafira kulanni togo yiino: “Daannohu bushu coyi baaluwiinni gatate wolqa afidhinanni . . . gede woꞌmanka woyite jaattine huuccidhe.” (Luq. 21:36) Ee, jaante huucciꞌra Maganu barri hedeweelcho daye amadannonkekki gede, ayyaanaamittetenni baqqi yine heeꞌrate kaaꞌlitannonke.

20. Huuccattonke tanni yee suꞌnaanno hixaani gede ikka dandiitannohu hiittoonniiti?

²⁰ Xaa geeshsha maa ronsoommo? Huuccattote qoossonke lowo geeshsha naandeemmo. Huucciꞌneemmohu qaru coyi Yihowa hedinori ledo xaadooshshe afiꞌrinoha ikka hasiissannosi. Qoleno Maganu Beettinna gashshootisi daafira Yihowa galata hattono ammanate roduuwinke daafira huucca hasiissannonke. Maalaamittetenna ayyaanaamittete hasiisannonkeri daafirano huucciꞌra dandiineemmo. Huuccatto assiꞌneemmo woyite mayineemmoro seekkine hedanke, tenne dhagge ikkitanno qoosso lowo geeshsha naandeemmota leellishshanno. Huuccattonke tanni yee suꞌnaanno hixaani gede Yihowa ‘tashshi assitannota’ ikkito.—Law. 15:8.