Wolootu Qarru Yanna Dandiite Saꞌanno Gede Kaaꞌlensa

1. Yihowa soqqamaanosi huuccidhanno huuccattora duucha woyite dawaro qolannohu hiittoonniiti?

MITTU manchi giddosita kuꞌle huucciꞌrino huuccattora Yihowa dawaro qolate ate horoonsiꞌrahera dandaannota afootto? Songote cimeessa, songote soqqamaancho, suwisaancho woy halashshaanchono ikkittoro woloota kaaꞌla dandaatto. Ajuno akkaluno, labbaahuno meya roduuwino woloota kaaꞌla dandaanno. Mittu Yihowa baxanno manchi kaaꞌlannosi gede Yihowa huucciꞌriro, Yihowa togoo mancho ‘jawaachishate’ duucha woyite songote cimeeyyenna wole ammanantino soqqamaanosi horoonsiꞌranno. (Qol. 4:11) Konni garinni Yihowaranna ammanate roduuwinkera soqqama lowo qoossooti! Fayya ubbanno woyite, kalaqamu dano iillitanno woyite woy dartu iillannonsa woyite ammanate roduuwanke kaaꞌlanna jawaachisha dandiineemmo.

FAYYA UBBANNO YANNARA WOLOOTA KAAꞌLE

2. Fayya ubbanno woyite woloota kaaꞌla qarra ikkitankera dandiitannohu mayiraati?

² Fayya ubbanno woyite mimmito kaaꞌla qarra ikkitankera dandiitanno. Lawishshaho jaallanke marre xaꞌma hasiꞌneemmoha ikkara dandaanno; kayinni hatto assa gawajjitannota ikkitara dandiitanno. Angate anje noonsare mininkera sagalete koyisa hasiꞌneemmoha ikkara dandaanno; kayinni togo assano qarra ikkitara dandiitanno. Woloota kaaꞌla hasiꞌneemmoha ikkirono ninke uminke maate miilla dhiwantinoha woy angate anje qarrissinonkeha ikkara dandaanno. Ikkirono roduuwanke kaaꞌla hasiꞌneemmo; insa kaaꞌlate dandiinummore baala assineemmo woyite Yihowa hagiidhanno. (Law. 3:27; 19:17) Insa kaaꞌlate maa assa dandiineemmo?

3. Deesi songora noo cimeeyye lawishshinni maa ronseemmo? (Ermiyaasi 23:4)

³ Songote cimeeyye assa dandiitannore. Ati songote cimeessaatiro geꞌreewo seekkite egenni. (Ermiyaasi 23:4 nabbawi.) Sai birxichira kulliti Deesi yinanni rodoo togo yitino: “Soqqanshote gaamoꞌya giddo noori songote cimeeyye duucha woyite anenna wolootu ledo soqqantanno hattono mitteenni yanna sayinseemmo.”b Cimeeyye tenne assate sharramansa kaaꞌlitinonsa; insara, Koroonu fayya ubbu gedensaanninna Deesi tenne fayyanni mite maatese miilla shiidhuhu gedensaanni ise kaaꞌla shota ikkitinonsa.

4. Songote cimeeyye Deesi kaaꞌla dandiitinohu mayiraati? Ninke tennenni maa ronseemmo?

⁴ Deesi togo yitino, “Songote cimeeyye jaallaꞌya gede asse laeemma daafira macciishshamannoerenna yaachishannoere insara hasaapha qarra diꞌꞌikkitinoe.” Cimeeyye tennenni maa rossanno? Eeggo uyinoonniꞌneta Maganu hoshsha qarru kalaqamara albaanni towaatte. Insara jaalla ikkensa. Fayya ubbanno woyite insa martine towaata qarra ikkitaꞌnera dandiitanno daafira, wolu garinni towaatate woꞌnaalle. Deesi ledde togo yitino: “Mito woyite mitto barra calla addi addi cimeeyye dowoltannoe; hattono silketenni borrote sokka sokkannoe. Insa sokkinoe qummeeshshi konni albaanni afoommaha ikkirono lowo geeshsha kaaꞌlinoe.”

5. Songote cimeeyye roduuwaho hasiisinori maatiro afanna insa kaaꞌla dandiitannohu hiittoonniiti?

⁵ Ammanate roduuwiꞌnera mayi hasiisinonsaro afa dandiitinanniti mitte doogo hayyotenni insa xaꞌmo xaꞌmate. (Law. 20:5) Insara sagale, xagichunna woluri hasiisannonsari noonsa? Insa loosonsa wole agurina heedhanno mine nafa hoogganno gede assannori iillanni noonsa? Gashshootu aanno kaaꞌlo afidhanno gede insa kaaꞌla hasiissanno? Deesi maalaamittete hasiisannosere afidhanno gede ammanate roduuwise kaaꞌlitinose. Kayinni songote cimeeyye leellishshinose baxillinna Qullaawu Maxaafinni kultinoseti jawaachishshanno amaale roore kaaꞌlitinose. Ise togo yitino: “Songote cimeeyye ledoꞌya huuccatto assidhino; hatte yannara insa mayite huuccitinoro qaageemmakkiha ikkirono hakkawoyite macciishshaminoere horo dihaweemma. Yihowa ‘Ani ledokki noommo’ yiinoehu gedeeti.”—Isa. 41:10, 13.

6. Songote giddo noori batinyu roduuwi woloota kaaꞌlate maa assa dandiitanno? (Misile lai.)

⁶ Wolootu assa dandiitannore. Songote cimeeyye albisa ikkite roduuwa towaattanno yine hedanke garaho. Kayinni Yihowa ninke baalunku woloota jawaachinsheemmonna kaaꞌlineemmo gede koyisinonke. (Gal. 6:10) Shiimare assine nafa baxille leellisha dhiwamino mancho jawaachishshara dandiitanno. Mittu qaaqqi annisi woy amasi ledo mare dhiwamino rodoo xaꞌmara dandaanno. Wedellichu kayinni mitte rodoora dikkotenni mare mitore hira woy wolere asse kaaꞌla dandaanno. Songote giddo noori wolu roduuwi dhiwamino rodiira sagale qixxeessanna minisira haadhe massa dandiitanno. Hige fayya taraabbanni hadhanno woyite songote giddo noohu mittu mittunkura jawaante hasiissannoti egennantinote. Gambooshshe xaande woy viidiyote widoonni assiꞌneemmoha ikkirono, gambooshshu goofihu gedensaanni roduuwu ledo boode yanna geeshsha hasaambammora dandiineemmo. Songote cimeeyyerano jawaante hasiissannonsa. Mitu roduuwi songote cimeeyyera borrote sokka sokke galattinonsa; kuri cimeeyyera hakko iso fayya ubbanno yannara loosu batiꞌrannonsa. ‘Mimmitonke jawaachishatenna dhaawate’ dandiinummore baala assa lowo geeshsha hagiirsiissannote!—1 Tes. 5:11.

KALAQAMU DANO IILLITANNO WOYITE WOLOOTA KAAꞌLE

7. Kalaqamu dano iillituhu gedensaanni qarra ikkara dandaannori maati?

⁷ Kalaqamu dano hedeweelcho mittu manchi heeshsho qarru giddo tuggara dandiitanno. Dano iillitinonsa manni jajjansanna qaensa hoogara hattono baxanno manna nafa shiiꞌrara dandaanno. Togoohu buutote qarri ammanate roduuwinkerano iillanno. Ninke insa kaaꞌlate maa assa dandiineemmo?

8. Dano kalaqantara albaanni songote cimeeyyenna maatete umo ikkitinori maa assa dandiitanno?

⁸ Songote cimeeyye assa dandiitannore. Cimeeyye, roduuwu dano kalaqantara albaanni balaxxe qixxaabbanno gede kaaꞌlensa. Songote giddo noori baalunku dano kalaqantanno woyite maa maa assa hasiissannonsaronna songote cimeeyye ledo ma garinni xaaddannoro affinotanna teꞌee buuxxe. Sai birxichira kulliti Margareeti yinanni rodoo togo yitino: “Songonke cimeeyye songote hasiisannorira horoonsidhe yitanno kifile shiqishshu woyite dolu giira kaꞌanno yanna gooffinokkita kulte qorowisiissinonke. Insa gashshootu qaenke agurre xoonqeemmo gede kulinkero hajajama hasiissannonketanna coyi bushanni haꞌriro bayichonkonni xooqa hasiissannonketa kultinonke.” Onte lamala gedensaanni dolu giira kaꞌino daafira hakku qorowishshi lowo geeshsha hasiisinoho. Maatete umo ikkitinori maatete magansiꞌra yannara mittu mittunku maatete miili maa assa hasiissannosiro maatensa ledo hasaawa dandiitanno. Kiꞌnenna oosoꞌne balaxxine qixxaabbiniro dano kalaqantanno woyite roore wodanaaꞌma dandiitinanni.

9. Songote cimeeyye dano kalaqantara albaanninna kalaqantu gedensaanni loosonsa qinaawino garinni loosa dandiitannohu hiittoonniiti?

⁹ Ati soqqanshote gaamora aliidi laꞌꞌaanchootiro, dano kalaqantara albaanni gaamokki giddo noo halashshaano baalunnita gara ikkitinota silkensa kiironna heedhanno qooxeessa afate woꞌnaali. Silkensa kiironna heedhanno qooxeessa borreessite amadi hattono borreessootto mashalaqqe yannate kiiro buuxi. Hatto assittoro dano kalaqantanno woyite mittu mittunku halashshaanchira mayi hasiisannoro afa qarra diꞌꞌikkitannohe. Togoo woyite mashalaqqe bayichonkonni cimeeyyete bisi qineessaanchira kuli; isi qole woradu aliidi laꞌꞌaanchira kulanno. Konni garinni kaaꞌlamme loosa lowore kaaꞌlitanno. Dolu giira kaꞌuhu gedensaanni Margareeti songo towaatannohu woradu aliidi laꞌꞌaanchi 36 saate woꞌma goxikkinni keeshshino; isi goxikkinni keeshshinohu, songote cimeeyye qaensa agurte xooqqinori 450 roduuwira silke dowwoltannonna hasiisannonsare assite kaaꞌlate loossanno looso qineessanniiti. (2 Qor. 11:27) Konni garinni insa galtannowi hasiisinonsa roduuwa baala kaaꞌla dandiitino.

10. Songote cimeeyye roduuwa towaata lowori gede assite laꞌannohu mayiraati? (Yohaannisi 21:16)

¹⁰ Songote cimeeyye loossanno loosi giddo gamu, dadillitinore ayyaanaamittetenni dhaawatenna jawaachishate. (1 Phe. 5:2) Dano kalaqantanno woyite, umo songote cimeeyye mittu mittunku halashshaanchi gatato afiꞌrinoro, sagale, uddanonna galannowi noosiro buuxa hasiissannonsa. Ikkirono dano kalaqantuhunni lowo agani gedensaanni nafa mitu roduuwira ayyaanaamittete jawaantenna shesho hasiissannonsa. (Yohaannisi 21:16 nabbawi.) Dano iillitinonsare batinye roduuwa hasaawisinohu Harooldi yinannihu mittu Sinu Biiro Komite miili togo yiino: “Roduuwu galagalte jawaatate yanna hasiissannonsa. Insa albinsa gede ikkite heeꞌra hanaffara dandiitanno; kayinni shiidhino manni, bainonsahu muxxe ikkino coyinna xooqqe fultino gari qulli yaanni waadansara dandaanno. Tenne qaagansa galagalte dadillitanno gede assitansara dandiitanno. Tini nooreentilla ikkiina ammana ajjinonsata leellishshannota diꞌꞌikkitino.”

11. Dano iillitinonsa maatera hasiisannonsari maati?

¹¹ Songote cimeeyye “wiꞌlitannori ledo wiꞌle” yitanno amaale harunsitanno. (Rom. 12:15) Songote cimeeyye, dano iillitinonsa roduuwi Yihowano ikko ammanate roduuwinsa baxxannonsata buuxxanno gede assa hasiissannonsa. Songote cimeeyye dano iillitinonsa maate ayyaanaamittete coye assa yaano huuccatto assiꞌra, xiinxalla, gambooshshe haꞌranna soqqansho fula agurtannokki gede kaaꞌlitannonsa. Qoleno annuwanna amuuwa oosonsa kalaqamu dano huna dandiitannokki coye illachishshanno gede kaaꞌla hasiissannonsa; cimeeyye, annuwanna amuuwa tenne assitanno gede jawaachisha dandiitanno. Annuwanna amuuwa, oosoꞌnera Yihowa woꞌmanka woyite Jaala ikkannonsatanna woꞌmanka woyite kaaꞌlannonsata qaagiissensa. Qoleno insa kaaꞌlate qixxaabbinote alamete doyichote roduuwu maate wido ikkansa xawissine kullensa.—1 Phe. 2:17.

12. Dano kalaqantanno woyite kaaꞌlate wolootu maa assa dandiitanno? (Misile lai.)

¹² Wolootu assa dandiitannore. Dano kalaqantinohu ati heeꞌratto qooxeessi mule ikkiro, ma garinni kaaꞌla dandaattoro songote cimeeyye xaꞌmi. Mininsa diigame bainorira woy kaaꞌlitara daggino roduuwira yannate geeshsha galtannowa qixxeessa dandaattoha ikkara dandaanno. Qoleno kaaꞌlo hasiissannonsa halashshaanora sagalenna wolere shiqisha dandaatto. Dano kalaqantinowi ati noottowiinni xeertiꞌrannoha ikkirono kaaꞌla dandaatto. Hiittoonni? Dano gawajjitino roduuwi daafira huuccatto assatenniiti. (2 Qor. 1:8-11) Alamete doyicho loosirano woxe fushshite dano gawajjitinonsa roduuwa kaaꞌlate loosira kaaꞌlama dandaatto. (2 Qor. 8:2-5) Dano kalaqantino qooxeessa hadhe kaaꞌla dandaattoha ikkiro ma garinni kaaꞌla dandaattoro songote cimeeyye xaꞌmi. Haꞌratto gede fajjinihero roore kaaꞌla dandaattohu mamaatironna mamooteetiro afatto gede mito geeshsha qajeelsinanniheha ikkara dandaanno.

DARTU IILLANNO WOYITE DANDIITE SAꞌANNO GEDE AMMANATE RODUUWAꞌNE KAAꞌLENSA

13. Loosonke agamboonni gobbuwara heedhanno roduuwinkera iillannonsa qarri maati?

¹³ Loosonke agamboonni gobbuwara heedhanno roduuwira iillanno darti roore qarrisannonsa. Togoo gobbuwara heedhanno roduuwira wonanni qarru iillannonsa yaano angate anje amaddannonsa dhibbu waadannonsa hatto baxxanno manna shiidhanno. Kayinni loosonke agamboonni daafira, songote cimeeyye kuri jawaante hasiissannonsa roduuwa hasidhu gede marte laꞌꞌa woy jawaachisha didandiitanno. Sai birxichira kullihu Andirera togoo coyi iillinosi. Soqqanshote gaamosi giddo noota mitte rodoo angate anje qarrissannose. Hakkiinni isera makeenu dano iillituse. Ise duucha hinge darre akkammoonnise daafira looso loosa didandiitino. Loosonke agamboonnihanna fayya nooha ikkirono roduuwu ise kaaꞌlate dandiiture baala assitino; Yihowa ise noo gara afino daafira roduuwu kaaꞌlitannose gede assino.

14. Songote cimeeyye Yihowa addaxxate dancha lawishsha ikka dandiitannohu hiittoonniiti?

¹⁴ Songote cimeeyye assa dandiitannore. Andire huuccatto assiꞌre assa dandaannore baala assino. Yihowa ma assiyya? Isi tenne rodoo roore kaaꞌla dandiitannore songote giddo noo roduuwa kakkayisino. Mitu roduuwi ise akimete minira hadhanno woyite makeeninsanni haadhe haꞌra kaaꞌlitinose. Wolootu kayi woxe uyite kaaꞌlitinose. Yihowa insa dandiiture baala assitanno gede kakkayisinonsa; hattono insa worbimmatenninna mittimmatenni assitinore maassiꞌrino. (Ibi. 13:16) Cimeeyye, loosonke agambanni woyite qarrantinore kaaꞌlitanno gede woloota roduuwa xaꞌme. (Erm. 36:5, 6) Baalunkunni roore kayinni Yihowa addaxxe. Isi ammanate roduuwiꞌnera hasiisannonsare wonshitinanninsa gede kaaꞌlannoꞌne.

15. Dartu iillannonke woyite mittimmanke baꞌukkinni heeꞌra dandiineemmohu hiittoonniiti?

¹⁵ Wolootu assa dandiitannore. Loosonke agambanni woyite xaandeemmohu shiimu roduuwinke ledo calla ikkara dandaanno. Hakko daafira xa baalunku roduuwinke ledo salaametenni heeꞌra lowo geeshsha hasiissannote. Sheexaanu babbadaꞌnera wodhitinoonte. Roduuwiꞌne soꞌro lashshi assitine agurre woy kalaqamino qarra bayichonkonni tirate woꞌnaalle. (Law. 19:11; Efe. 4:26) Mimmito kaaꞌlate qixxaabbinoonnire ikke. (Tit. 3:14) Wolootu roduuwi kaaꞌlo hasiissinose rodoo kaaꞌlansa hatti rodoo noota soqqanshote gaamo lowo geeshsha jawaachishshino. Insa albinni roore mimmitunniwa gamba yitino; hattono maatete gede ikkitino.—Far. 133:1.

16. Qolasiyaasi Sokka 4:3, 18 kultanno garinni dartu iillanni noonsa roduuwanke kaaꞌla dandiineemmohu hiittoonniiti?

¹⁶ Lowo kume ikkitanno roduuwi gashshootu loosonke agawirono Yihowara soqqantanni no. Insa giddo mito ammanansanni kainohunni usurroonninsa. Kuri roduuwinna maatensa daafira huuccatto assino; qoleno usuru mine noo roduuwinkera maalaamittetenna ayyaanaamittete hasiisannonsare shiqishate sharrantannoriranna insa daafira yoote mine marte gaarantanno roduuwinke daafira huucca dandiineemmo.c (Qolasiyaasi Sokka 4:3, 18 nabbawi.) Huuccattoꞌne lowo wolqa afidhinota deꞌinoonte.—2 Tes. 3:1, 2; 1 Xim. 2:1, 2.

17. Dartu iillanno woyitira xaanni qixxaawa dandiitinannihu hiittoonniiti?

¹⁷ Atinna maatekki dartu iillanno woyitira xaanni qixxaawa dandiitinanni. (Soq. 14:22) Iillaꞌnera dandaannoha busha coye baala hedate woꞌnaaltinoonte. Hatteentenni Yihowa ledo nooꞌne jaaloomi kaajjanno gede assidhe; oosoꞌnerano tenne rosiisse. Yaaddo amaddannoꞌne woyite giddoꞌneta gudissine Maganoho hasaaphe. (Far. 62:7, 8) Yihowa addaxxitinannihu mayiraatiro maateꞌne ledo hasaabbe.d Dartu iillanno woyitira balaxxine qixxaawaꞌnenna Yihowa addaxxaꞌne oosoꞌneno worbuulle ikkitanno gedenna wodanaaꞌmitanno gede kaaꞌlitannonsa.

18. Albillitte hiittoo yanna daggannonke?

¹⁸ Maganu aanno keeri beꞌe yineemmokki gede assannonke. (Fil. 4:6, 7) Yihowa konni keerisi widoonni xaa yannara iillanni noonte gede, dhibbunna kalaqamu dano heedhurono hattono dartu iillinkerono wodanaaꞌmineemmo gede kaaꞌlannonke. Isi diinaggaabbe loossannori songonke cimeeyye widoonni kaaꞌlannonke. Qoleno isi ninke baalunkura mimmito kaaꞌlate qoosso uyinonke. Xa afiꞌneemmo keeri albillitte iillannonke fonqolira wole agurina ‘lowo [bayiru] qarrira’ nafa qixxeessannonke. (Mat. 24:21) Hatte yannara keerinke baꞌꞌannokki gede assiꞌranna wolootuno hatto assitanno gede kaaꞌla hasiissannonke. Hatte yanna gedensaanni kayinni yaandeemmo gede assannonke qarri diꞌꞌiillannonke. Hakka woyite Yihowa woꞌmanka woyite afiꞌnammora hasiꞌrannoha guutanna geedote keere afiꞌneemmo.—Isa. 26:3, 4.