Olunna Kipho Baalanka Gawajjitanno Gara
“Layinkihu Alamete Oli kawa, kalqete aana olu kaꞌꞌanno dargi lowo geeshsha batiꞌrino; qoleno lame biliyoone yaano alamete aana heeꞌranno manni giddo 25 anga ikkannohu olu gawajjino qarqarira heeꞌranno.”
Halantino Gashshootubbati Lekkisaancho Borreessaancho Amiina Jeen Mohaammed, Arfaasa 26, 2023.
Gaꞌlabbo afidhe keere noo qooxeessubbara, olunna gaancu hedeweelcho kaꞌꞌara dandaanno. Alame xa ise iseneewa sikkantinota ikkitino daafira, olu noowiinni xeertiꞌre heeꞌranno manni nafa gawajjamara dandaanno. Olu abbanno gawajjo, olu uurrihu gedensaanni nafa suffannote. Hanni mito lawishsha laꞌno:
Sagalete anje. Kalqenniti Sagalete Uurrinsha yitino garinni, “xaano hudete qara kora ikke noohu olaho; kalqete aana xibbunni 70 anga ikkannohu hudiꞌrino manni heeꞌrannohu olunna kipho kaꞌino qooxeessiraati.”
Bisu xeꞌnenna surrete gawajjo. Mittu qooxeessira olu kaꞌꞌara dandaanno yinanni sunsumi heeꞌriro, hakko qooxeessira heeꞌranno manni baasa yaadanno hattono dadillaawanno. Kipho noo qooxeessira heeꞌranno manni, biso gawajjamaranna surreno xissamara dandaanno. Ikkirono kuni manni duucha woyite xagishsha diafiꞌranno.
Qaetenni darama. Halantino Gashshootubbati Daramaasinete Aliidi Komishiine egensiissino garinni, Wocawaaro 2023 kawa kalqoomu deerrinni, 114 miliyoone saꞌꞌanno manni qaensanni daramino. Konni dartira qara kora ikkinohu olahonna gaanceho.
Miinju qarra. Duucha woyite olu yannara manna miinju qarri amadanno; lawishshaho, olu yannara hidhinanniri giira kaxxanno. Gashshootu wonaatiro fayyimmatenna rosoho aanno woxe olantote fushshanno daafira, mannu qarramara dandaanno. Qoleno olu gawajjino coye gatamaratenna haaroonsate lowo woxi fulanno.
Qarqaru gawajjo. Mannu, heeꞌranno qarqara anfanni heeꞌnenni hunnanni woyite baasa qarramanno. Daafamino way, daafantino ayyarenna daafamino bushshi seeda diro ledonke heeꞌranno dhibba kalaqara dandaanno; qoleno olu uurrihu gedensaanni nafa, dhoohikkinni gatino bombi dhoohe manna madiissara woy galaaffatara dandaanno.
Addanko, olu duuchare hunenna galaaffate saꞌꞌanno.