Ammanatenni Qaafa Agurtinoonte

1. Soqqamaasinchu Phaawuloosi albi heeshshosi qaage lowo geya hagiidhinohu mayiraati?

SOQQAMAASINCHU Phaawuloosi mulenni shinannisita afino; kayinni isira heeshshosinni hagiidhanno gede assannosihu ikkadu korkaati noosi. Isi albi heeshshosi qaage, “Qolchanshoꞌyara goofimarchu geeshsha dodoommo, ammanaꞌyano agadhoommo” yiino. (2 Xim. 4:6-8) Phaawuloosi Yihowara soqqame kaajja doorsha doodhino; qoleno isi Yihowa hagiirsiisinota dihuluullamino. Ninkeno dancha doorsha doodhanna Magano hagiirsiisa hasiꞌneemmo. Tenne assa dandiineemmohu hiittoonniiti?

2. Ammanatenni qaafate yaa mayyaate?

² Phaawuloosi umisinna wolu ammanamino Kiristaani daafira coyiꞌranni, “Heeꞌneemmohu [“qaanfeemmohu,” lekkaallo] ammanatenniiti ikkinnina laꞌꞌatenni diꞌꞌikkino” yiino. (2 Qor. 5:7) Isi hatto yiinohu mayyaateeti? Qullaawu Maxaafi giddo mito woyite ‘qaafa’ yaanno qaale mittu manchi hiittoo heeshsho heeꞌra doodhannoro kulate horoonsiꞌnoonni. Mittu manchi laꞌꞌatenni calla qaafannoha ikkiro, mito doorsha doodhannohu lainore, macciishshinorenna hedinore calla kaima assiꞌreeti. Ammanatenni qaafanno manchi kayinni mito doorsha doodhannohu Magano Yihowa addaxxannota leellishanno garinniiti. Kuni manchi assannori isi Maganu baꞌraasannosita addaxxinotanna Qaalisi giddo noo amaale haꞌrunsa kaaꞌlitannosita ammaninota leellishanno.—Far. 119:66; Ibi. 11:6.

3. Ammanatenni qaanfiro afiꞌnanni horo hiittenneeti? (2 Qorontoosi 4:18)

³ Hige ninke baalunku laꞌneemmorenna macciishshineemmore kaima assiꞌne doodhineemmohu mitu doorshi heeꞌrara dandaanno. Ikkollana lowo geeshsha hasiisanno doorsha doodhineemmohu laꞌneemmorenna macciishshineemmore calla kaima assiꞌne ikkiro, qarru giddo umbammora dandiineemmo. Mayira? Korkaatuno mito woyite laꞌneemmorinna macciishshineemmori dogankera dandaanno. Kuni ikka hoogiro nafa, laꞌꞌatenni calla qaanfeemmoha ikkiro, Maganu fajjo woy amaale lashshi assinammora dandiineemmo. (Ros. 11:9; Mat. 24:37-39) Ammanatenni qaanfeemmoha ikkiro kayinni, roore ‘Mooticha hagiirsiisanno’ doorsha doodhineemmo. (Efe. 5:10) Maganu aanno amaale haꞌrunsa giddoyidi keerenna addu hagiirre afiꞌneemmo gede assitannonke. (Far. 16:8, 9; Isa. 48:17, 18) Qoleno woꞌmanka woyite ammanatenni qaanfeemmoha ikkiro, albillitte hegere heeshsho afiꞌneemmo.—2 Qorontoosi 4:18 nabbawi.

4. Mittu manchi ammanatenni woy laꞌꞌatenni qaafanni nooronna teꞌee afa dandaannohu hiittoonniiti?

⁴ Ammanatenni woy laꞌꞌatenni qaanfanni heeꞌneemmoronna teꞌee afa dandiineemmohu hiittoonniiti? Ninkeneeto togo yine xaꞌma dandiineemmo: Mitto doorsha doodhineemmohu maa laꞌneeti? Laꞌneemmo coye calla kaima assiꞌneetinso Yihowa amaale haꞌrunsineeti? Hanni aane nooha sase lowo geya hasiisanno doorsha doodhineemmo woyite ammanatenni qaafa dandiineemmo gara laꞌno: looso doodhineemmo woyite, galte doodhineemmo woyitenna Yihowa dirijjite biddishsha uyitannonke woyite. Mitte mittente hajo daafira xiinxallineemmo woyite, dancha doorsha doodhate maa heda hasiissannonkero laꞌneemmo.

LOOSO DOODHINEEMMO WOYITE

5. Looso doodhineemmo woyite maa heda hasiissannonke?

⁵ Ninke baalunku ninkeneetiranna maatenkera hasiisannore afiꞌra hasiꞌneemmo. (Ros. 7:12; 1 Xim. 5:8) Mitu loosi lowo woxe baantanniho. Togoo looso loosanno manchi barru baala maatesira hasiisannore wonshanna gatino woxe suuqira dandaanno. Wole looso loosanno manchi kayinni baantannisi woxi shiima ikkino daafira, maatesira hasiisannore calla shiqisha dandaanno. Hiittoo looso loonseemmoro doodhineemmo woyite mageeshshi woxe baantanninkero heda nooreentilla. Ikkirono mittu manchi tenne calla hedannoha ikkiro laꞌꞌatenni qaafanni no yaate.

6. Looso doodhineemmo woyite ammanatenni qaafa dandiineemmohu hiittoonniiti? (Ibiraawoota 13:5)

⁶ Ammanatenni qaanfeemmoha ikkiro, doodhineemmo loosi Yihowa ledo noonke jaalooma gawajjanno garano hendeemmo. Ninkeneeto togo yine xaꞌma dandiineemmo: ‘Kuni loosi Yihowa giwannore asseemmo gede assannoeho?’ (Law. 6:16-19) ‘Yihowa magansiꞌreemmokki gede ataawe ikkannoeho? Qoleno maateꞌyawiinni xeertiꞌre lowo yanna keeshsheemmo gede assannoeho?’ (Fil. 1:10) Kuri xaꞌmuwara dawaro ee yite qolattoha ikkiro, looso afiꞌra qarra ikkitannoha ikkiro nafa togoo looso giwakki hayyote. Qaanfeemmohu ammanatenni ikkino daafira, Yihowa hasiisannonkere aannonketa ammanneemmota leellishanno doorsha doodhineemmo.—Mat. 6:33; Ibiraawoota 13:5 nabbawi.

7-8. Wodiidi Ameerikira heeꞌrannohu mittu rodii ammanatenni qaafinohu hiittoonniiti? (Misileno lai.)

⁷ Hanni Wodiidi Ameerikira heeꞌrannohu Haveeria yinanni rodii ammanatenni qaafa hasiissannota ikkitinota huwatino gara laꞌno. Isi togo yiino: “Bashsho baantannie woxinni roorino woxe baantanniehanna lowo manni halchanno looso afiꞌrate forme wonshummo; konne looso anino lowo geya halcheemmo.” Ikkirono Haveeri suwisaancho ikka lowo geya hasiꞌranno. Isi lede togo yiino: “Qaru sooreessiwa mareenna loosoho qaalu xaꞌmo xaꞌminannieta kullie. Qaalu xaꞌmo xaꞌminaera albaanni Yihowa anera woyyannore afinota addaxxe kaaꞌlannoe gede iso huucciꞌroommo. Bashshohunni roore lowo woxe baantanni looso afiꞌra hasiꞌroommo; kayinni kuni loosi ayyaanaamittete mixoꞌya wonshiꞌreemmota hoolannoeha ikkiro dihasiꞌreemmo.”

⁸ Haveeri lede togo yiino: “Qaalu xaꞌmo yannara sooreessu loosu saate gedensaannino ganye loosa hasiissannoeta kulie. Soqqansho fuleemmo daafira, tenne assa dandeemmokkita shaqqillunni kulummosi.” Hakko daafira Haveeri konne looso loosa giwino. Lame lamala gedensaanni, isi suwisaancho ikke soqqama hanafino. Qoleno gedensoonni hakko dironni darate barra loonsanni looso afiꞌrino. Isi togo yiino: “Yihowa huuccattoꞌya macciishshino hattono suwisaancho ikke soqqamate injaannoe looso afiꞌreemmo gede kaaꞌlinoe. Yihowaranna ammanate roduuwiꞌyara albinni roore soqqameemmo gede kaaꞌlaannoe looso afiꞌroommo daafira, lowo geya hagiidhinoommo.”

9. Tireezo woꞌnaalshinni maa rosootto?

⁹ Loonsanni heeꞌnoommo loosi ammanatenni qaanfeemmokki gede assanni noonketalla huwantummo? Hanni Kongote gobbara heeꞌrannohu Tireezo yinanni rodii woꞌnaalsha laꞌno. Isi togo yiino: “Haarote afiꞌroommo loosi halchanni heeꞌroommoho. Konni loosira baantannie woxi alba baantannieha sase ero rooranno; hattono mannu ayirrisannoe.” Ikkirono Tireezo loosu saate gedensaannino loosanno daafira gambooshshe duucha hige hosanno. Qoleno iso ammanama xeinore assanno gede xixxiimbannisi. Tireezo konne looso agura hasiꞌrinoha ikkirono wole looso diafiꞌreemmo yee yaadino. Iso kaaꞌlinosiri maati? Isi togo yiino: “Imbaaqoomi 3:17-19 noo hedo konni loosinni afiꞌreemmo woxe hoogeemmoha ikkiro nafa Yihowa towaatannoeta huwateemmo gede kaaꞌlitinoe. Hakko daafira konne looso aguroommo.” Jeefote isi togo yiino: “Batinye loosiisaano mittu manchi dancha woxe baantanni loosira yee baalanka coye wole agurina maatesinna ayyaanaamittete coye nafa aguranno yite heddanno. Yihowanna maateꞌya ledo nooe jaaloomi baꞌꞌannokki gede assiꞌroommo daafira lowo geya hagiidhoommo. Mittu diri gedensaanni Yihowa bikku heeshsho heeꞌreemmo gedenna ayyaanaamittete coye assate roore yanna afiꞌreemmo gede assanno looso afiꞌreemmo gede kaaꞌlinoe. Yihowa balaxisiinseemmo woyite, mite yanna geeshsha angate anje amaddankera dandiitanno; kayinni isi towaatannonke.” Addanko, Yihowa amaalenna isi eino qaale addaxxineemmoha ikkiro, ammanatenni qaafa diagurreemmo; Yihowano maassiꞌrannonke.

GALTE DOODHINEEMMO WOYITE

10. Galte doodhineemmo woyite laꞌꞌatenni qaanfeemmo gede assankera dandaannori maati?

¹⁰ Adhanna adhama Yihowa eltooti; mine kalaqiꞌra hasiꞌrano nooreentilla. Mitte rodoo galte doodhitanno woyite hakko rodii ayimma, danasi, hiittoo suꞌmi noosiro, woxe amaxxanno gara, maatesi towaata hasiissannosiro, hattono ise hagiidhitanno gede assannoseronna teꞌee heddannoha ikkara dandaanno.b Kuni baalunku coyi hasiisannoho. Ikkirono, ise kuri coyibba calla heddannoha ikkiro ammanatenni ikkikkinni laꞌꞌatenni qaaffanni no.

11. Galte doodhineemmo woyite ammanatenni qaafa dandiineemmohu ma garinniiti? (1 Qorontoosi 7:39)

¹¹ Yihowa mittu rodii woy rodoo galte doodhitanno woyite isi biddishsha haꞌrunsitanna laꞌꞌanno woyite lowo geya hagiidhanno! Lawishshaho insa baxillu jaalooma amaddara albaanni, ‘anjicho egemmita’ geeshsha agara hasiissannonsata kultanno amaale haꞌrunsitanno. (1 Qor. 7:36) Insa galte doodhitanno woyite Yihowa danchu minaannira woy minaamara heedhansara hasiꞌranno akatta illachishshanno. (Law. 31:10-13, 26-28; Efe. 5:33; 1 Xim. 5:8) Yihowa Farciꞌraasincho ikkinokkihu mittu manchi adhamate hede baxinonsata leellishiro ‘Mooticha ammaninohu’ ledo calla adhama hasiissannota kultannota 1 Qorontoosi 7:39 noo amaale haꞌrunsitanno. (Qummeeshsha nabbawi.) Insa Yihowa aye manchinni roore hasattonsa wonshannota addaxxite, woꞌmanka woyite ammanatenni qaaffanno.—Far. 55:22.

12. Rooza woꞌnaalshinni maa rosootto?

¹² Hanni Kolombiyaho heedhannote Rooza yinanni suwisaancho woꞌnaalsha laꞌno. Ise loossanno loosi Yihowa Farciꞌraasincho ikkinokkihu mittu manchi ledo duucha higge xaaddanno gede assannoseho; isi ise baxinoseta leellisha hanafino. Roozano iso baxxino. Ise togo yitino: “Isi lowo geeshsha dancha mancho lawanno. Isi umisi fajjonni qooxeessisira noo manna kaaꞌlanno; hattono danchu amanyooti noosiho. Anera shaqqille leellishannoe garano baxoomma. Isi Yihowa Farciꞌraasincho ikkinokkita agurranna ani hasiꞌreemma minaanni gedeeho. Isira dihasiꞌreeemma yee kula qarra ikkitinoe. Hatte yannara mito geya callatoomma daafira mine assiꞌra hasiꞌre noomma qoleno galte ikkannoeha halaalu mininni afiꞌra didandoomma.” Ikkirono Rooza laꞌinore calla diꞌꞌillachishshino. Ise kuni doorshi Yihowa ledo noose jaalooma gawajjanno gara heddino. Hakko daafira konni manchi ledo noose aante agurtino; hattono diinaggaabbe ayyaanaamittete coye assa hanaffino. Shiima yanna gedensaanni, ise Maganu Mangiste Sawaakooti Rosi Mine eꞌe rossara koyinsoonnise; xa ise baxxitino suwisaancho ikkite soqqantanni no. Rooza “Yihowa hagiidheemma gede assannoeha lowo atoote uyinoe” yitino. Roorenkanni lowo geeshsha hasiꞌnoommo coye agura hasiissannonke woyite ammanatenni qaafa shota ikkitannokkiha ikkirono, hatto assa gaabbissannota diꞌꞌikkitino.

DIRIJJITE BIDDISHSHA UYITANNONKE WOYITE

13. Dirijjite biddishsha uyitannonke woyte laꞌꞌatenni qaanfeemmo gede assankera dandaannori maati?

¹³ Duucha woyite, songote cimeeyye, woradu aliidi laꞌꞌaano, sinu biiro woy Aliidi Bisi widoonni magansiꞌrankera kaaꞌlanno biddishsha afiꞌneemmo. Kayinni mito woyite biddishsha uyinoonninkehu mayiraatiro leellalla hooginke? Kuni biddishshi gara ikkasi huluullammammora dandiineemmo. Wole agurina biddishsha uyitinonke roduuwi laanfe illachinshammora dandiineemmo.

14. Dirijjite biddishsha uyitannonke woyite ammanatenni qaanfeemmo gede mayi kaaꞌlannonke? (Ibiraawoota 13:17)

¹⁴ Ammanatenni qaanfeemmoha ikkiro, dirijjite massaganni noohu Yihowa ikkinotanna isi heeꞌnoommo gara afinota addaxxineemmo. Hakko daafira biddishshaho bayichonkonni hajajammeemmo; hatto assineemmohu qole dancha giddonniiti. (Ibiraawoota 13:17 nabbawi.) Hajajamanke songote mittimmara kaaꞌlitannota anfoommo. (Efe. 4:2, 3) Albisa ikkite soqqantanno roduuwi guuntete xeꞌne noonsare ikkiturono, hajajammeemmoha ikkiro Yihowa maassiꞌrannonketa addaxxa dandiineemmo. (1 Sam. 15:22) Yannasira isi biddi yaa hasiissanno coye baala biddi assanno.—Mik. 7:7.

15-16. Mittu rodii dirijjite uyitino biddishshi gara ikkasi mito geya huluullaminoha ikkirono, ammanatenni qaafanno gede kaaꞌlinosiri maati? (Misileno lai.)

¹⁵ Hanni ammanatenni qaafa kaaꞌlitanno gara leellishannoha mitto woꞌnaalsha laꞌno. Peeru gobbara roore coyiꞌnannihu Ispeenete afoo ikkirono, batinyu manni kayinni hatte gobba afoo coyiꞌranno. Kuri giddo mittu Kechiwa afooti. Kechiwa Afoo coyidhanno roduuwi lowo diro soqqanshote qoqqowi giddo konne afoo coyiꞌranno manna hassanni keeshshitino. Ikkirono gashshootu fushshino seerira hajajamate konne afoo coyiꞌranno manna hansanni gara lainohunni mito coye biddi assinoonni. (Rom. 13:1) Hakko daafira mitu roduuwi tini hakko qoqqowira loonsanni loosira guficho ikkitanno yite yaaddino. Ikkirono roduuwu konne biddishsha seekkite haꞌrunsitino daafira batinye Kechiwa Afoo coyiꞌranno manna hasate assitinore Yihowa maassiꞌrino.

¹⁶ Uyinoonni biddishshi guficho ikkara dandaanno yite yaaddu roduuwi giddo mittu Kechiwa afiinni massanganni songora cimeessa ikke soqqamannoho Keevini yinanni rodooti. Isi togo yiino: “‘Kechiwa Afoo coyiꞌranno manna xa ma garinni afa dandiineemmo?’ yee hedoommo.” Isi ma assiyya? Togo yiino: “Lawishsha 3:5 qaagoommo. Qoleno Muse daafira hedoommo. Yihowa isira kaaꞌlannokkiha lawanno biddishsha uyinosi; Muse Israeelete daga Gibitsetenni fushshe Duumu Baariwa massanno gede kulinosi. Kuni bayichi qole Gibitsootaho Israeelete daga siate injiinoha lawannoho. Ikkirono Muse hajajamino; isi hajajaminotera Yihowano dhagge ikkanno garinni maassiꞌrinosi.” (Ful. 14:1, 2, 9-11, 21, 22) Keevini haaru garinni soqqamate maahoyye yiino. Tini mayi guma abbituyya? Isi lede togo yiino: “Yihowa maassiꞌrinonke gara dhagge assiꞌroommo. Bashsho soqqamanni lekkate seeda saate haꞌneemmo; mito woyite Kechiwa Afoo coyiꞌrannoha mitto woy lame mannalla xaandeemmo. Xa kayinni konne afoo coyiꞌrannohu batinyu manni noo qoqqowo haꞌneemmo. Hakko daafira lowo manna hasaawisa, galagalle marre hasaawisanna Qullaawa Maxaafa xiinxallisa dandiinoommo. Gambooshshe daanno manni kiirono lexxitino.” Addanko, ammanatenni qaanfeemmoha ikkiro, woꞌmanka woyite Yihowa baꞌraasannonke.

17. Konni birxichira maa rosootto?

¹⁷ Sase lowo geeshsha hasiisanno doorsha doodhineemmo woyite woꞌmanka woyite ammanatenni qaafa dandiineemmo gara ronsoommo. Ikkollana heeshshonke baalatenni lawishshaho boohaarsha doodhineemmo woyite, hiittoo roso ronseemmoro doodhineemmo woyite woy ooso lossiꞌneemmo gara doodhineemmo woyite ammanatenni qaafa hasiissannonke. Doodhineemmo doorshi ikkihano ikkiro, laꞌꞌatenni calla ikkikkinni Yihowa ledo noonke jaaloominni, isi aannonke amaalenninna ninke towaatate eino qaalinni massagama hasiissannonke. Hatto assineemmoha ikkiro, “hegere geeshsha Kaaliiqa Maganonke magansiꞌneemmo.”—Mik. 4:5.