XIINXALLOTE BIRXICHO 26
FAARSO 123 Tiokiraasete Wodho Ayirrise Heeꞌra
Umoꞌne Heeshshi Assitine Affinoonnikki Coyi Noota Ammanne
Maganu jiro, hayyosinna egennosi dandiinannikkite! Yoosino fonqollannikkite; doogosino anfannikkite.—ROM. 11:33.
GUULCHO HEDO
Umonke heeshshi assine anfoommokkiri noota ammana, anfoommo coye illachishanna Yihowa addaxxa qarra dandiine saꞌneemmo gede kaaꞌlitannonke gara ronseemmo.
1. Yihowa hiittenne dandoo uyinonke? Mayira?
YIHOWA hedate, haaro coye rosate, wodanchatenna hayyoota ikkinoommota leellishate dandoo oye kalaqinonke. Isi konni garinni kalaqinonkehu mayiraati? Isi ‘Maganu coye seekkine buunxammoranna’ woꞌma surrenkenni soqqammammosira hasiꞌranno.—Law. 2:1-5; Rom. 12:1.
2. (a) Maa huwata hasiissannonke? (Rooma 11:33, 34) (Misileno lai.) (b) Anfoommokkiri noota huwata kaaꞌlitannonkehu hiittoonniiti?
2 Haaro coye rosate dandoo noonkeha ikkirono, anfoommokkihu batinyu coyi no. (Rooma 11:33, 34 nabbawi.) Hanni Iyyoobi lawishsha laꞌno. Yihowa Iyyoobi afinokkihu lowo coyi noota huwatanno gede kaaꞌlitannosi xaꞌmuwa xaꞌmino. Kuni hasaawi Iyyoobi umosi heeshshi assanno gedenna hedosi biddi assiꞌranno gede kaaꞌlinosi. (Iyo. 42:3-6) Ninkeno baalankare anfoommokkita huwatanke lowore kaaꞌlitannonke. Konni garinni dhukanke anfoommore ikkanke Yihowa addinta afa hasiissannonkere kulannonketa addaxxineemmo gede assitannonke; tini qolte danchare doodhineemmo gede kaaꞌlitannonke.—Law. 2:6.
Iyyoobi gede anfoommokki coyi noota ammana kaaꞌlitankera dandiitanno (Gufo 2 lai)
3. Konni birxichira maa xiinxallineemmo?
3 Konni birxichira anfoommokkiha mito coyenna kuri coyibba afa hooganke qarra ikkitankera dandiitanno gara laꞌneemmo. Qoleno mito coye afa hooganke dancha ikkitinohu mayiraatiro xiinxallineemmo. Tenne xiinxallanke guuta egenno afiꞌrino Magani Yihowa addinta afa hasiissannonkere kulannonketa albinni roore addaxxineemmo gede assitannonke.—Iyo. 37:16.
GOOFIMARCHU MAMOOTE DAANNORO DIANFOOMMO
4. Maatewoosi 24:36 kultanno garinni anfoommokkihu mittu coyi maati?
4 Maatewoosi 24:36 nabbawi. Tenne alame goofimarchi mamoote daannoro dianfoommo. Yesuusi nafa uullate aana noo waro hakkonne barranna hattenne saatea diafino. Isi gedensoonni soqqamaasinesira mitu coyi ikkanno ‘yanna murate’ silxaane noosihu Yihowa, yiino yanna horo sayisannokkita kulinonsa. (Soq. 1:6, 7) Yihowa tini alame baꞌanno yanna murinoha ikkirono ninkera hakkonne barra afate silxaane dinonke.
5. Goofimarchu daanno barra afa hooganke ma ikkineemmo gede assitankera dandiitanno?
5 Yesuusi yiinore hendiro goofimarchu daa geeshsha mageeshshi yanna agadha hasiissannonkero dianfoommo. Tenne afa hooganke hakko iso Yihowa barra agadhine keeshshinoommoha ikkiro cinca hoongeemmo gede woy hexxo mudhineemmo gede assitankera dandiitanno. Mininke manni woy wolootu qacifattannonketa cincano qarra ikkitankera dandiitanno. (2 Phe. 3:3, 4) Qoleno goofimarchu daanno barra bande anfoommoha ikkoommero roore cincineemmohanna qacifantanninketa dandiineemmoha lawankera dandaanno.
6. Goofimarchu mamoote daannoro afa hooganke dancha ikkitinohu mayiraati?
6 Yihowa goofimarchu daanno barra bade kula hoogasi isira soqqammeemmohu banxeemmosinna addaxxineemmosi daafira ikkinota leellinsheemmo faro fantinonke. Yihowara soqqammeemmohu hegereraati ikkinnina goofimarchu daa geeshsha calla diꞌꞌikkino. Yihowa barri daanno yanna calla illachishantenni hakku barri daye assannore illachisha woyyitanno. Tini albinni roore Maganunniwa gamba yineemmo gede, iso addaxxineemmo gedenna iso hagiirsiisate dandiinummore baala assineemmo gede kakkayissannonke.—2 Phe. 3:11, 12.
7. Anfoommo coyi maati?
7 Anfoommo coye illachisha hasiissannonke; goofimarchu barruwa 1914 hanaffinota anfoommo. Yihowa hakkonni diri daafira anfeemmo gede kaaꞌlitannonketa calla ikkikkinni hakkuyi dirinni hanafe ikkannoha mitto mittonka coye bande anfeemmo gede kaaꞌlitanno masaalo Qullaawu Maxaafi giddo borreessiisino. Hakko daafira jawu Mootichu barri [gambisinota] anfoommo. (Sof. 1:14) Qoleno Yihowa dandaami deerrinni batinyu mannira Maganu Gashshootiha dancha duduwo kullammora hasiꞌrannota anfoommo. (Mat. 24:14) Konne dancha duduwo mite 240 ikkitanno gobbuwara 1,000 saꞌꞌanno afiinni sabbankanni heeꞌnoonni. Konne lowo geeshsha hasiisanno looso diinaggaambe loosate goofimarchu daanno barranna saate afa dihasiissannonke.
YIHOWA QAAFO ADHANNOHU HIITTOONNIITIRO DIANFOOMMO
8. Woꞌmanka kalaqino Magani loosanno looso yitanno yaatto maa leellishshanno? (Rosiisaancho 11:5)
8 Woꞌmanka kalaqino Magani loosanno looso anfeemmokki woyiti no. (Rosiisaancho 11:5 nabbawi.) Woꞌmanka kalaqino Magani loosanno looso yitanno yaatto Yihowa fajjosi wonshate ikkanno gede assannore woy ikkara fajjannore leellishshannote. Yihowa mittu coyi ikkanno gede fajjannohu mayiraatiro woy ninke kaaꞌlate yee qaafo adhannohu hiittoonniitiro woꞌmunni woꞌma afa didandiineemmo. (Far. 37:5) Mittu qaaqqi amate godowi giddo lophanno gara dianfoommo; sayinseno tenne woꞌmunni woꞌma dihuwattino. Hatteente gede ninkeno Maganu looso woꞌmunni woꞌma huwata didandiineemmo.
9. Yihowa qaafo adhanno gara afa hooganke ma ikkineemmo gede assitankera dandiitanno?
9 Yihowa ninke kaaꞌlate qaafo adhanno gara afa hooganke mito coye assate hobbi ruxxi yineemmo gede assitankera dandiitanno. Uminke horo agurre soqqanshonke halashshiꞌrate lawishshaho, heeshshonke bikkunnita assiꞌrate woy sabbakkannori roore hasiissannowa haꞌne soqqamate hobbi ruxxi yinammora dandiineemmo. Woy ayyaanaamittete mixo wonshiꞌnoommokki daafira, diinaggaambe sabbankoommoha ikkirono dancha guma afiꞌnoommokki daafira, woy tiokiraasete looso loonsanna guficho ikkannori tuncu yiinonke daafira Yihowa hagiirsiinsoommoronna teꞌee huluullammammora dandiineemmo.
10. Yihowa qaafo adhannohu hiittoonniitiro afa hooganke hiikkuri hasiissanno akatta lossiꞌneemmo gede kaaꞌlitannonke?
10 Yihowa qaafo adhanno gara afa hooganke hasiissanno akatta lossiꞌneemmo gede lawishshaho umonke heeshshi assineemmorenna dhukanke anfoommore ikkineemmo gede kaaꞌlitannonke. Yihowa hedonna doogo ninketewiinni lowo geeshsha roortannota huwanteemmo. (Isa. 55:8, 9) Qoleno baalunkuri qinaannonke gede woꞌmunni woꞌma Yihowa addaxxa ronseemmo. Sabbanke woy tiokiraasete looso loonse dancha guma afiꞌnummoro Yihowa guwisa hasiissannote. (Far. 127:1; 1 Qor. 3:7) Coyi ninke hendoommo gede ikka hoogiro nafa Yihowa baalankare laꞌꞌannota qaaga hasiissannonke. (Isa. 26:12) Ninke widiidire assineemmoha ikkiro Yihowano isi widiidire assannota woꞌmanka woyite addaxxineemmo. Yihowa mito woyite hundi yannara assinte gede maalale loosannokkiha ikkiro nafa, hasiisannonke biddishsha aannonketa addaxxineemmo.—Soq. 16:6-10.
11. Anfoommohu hasiisanno coyi hiikkonneeti?
11 Anfoommo coye hiinca hasiissannonke; lawishshaho Yihowa woꞌmanka woyite baxillaancho, taashshannohanna hayyicha ikkinota anfoommo. Qoleno Yihowa isiranna ammanate roduuwinkera assineemmo coye lowo geeshsha naadannota anfoommo. Hattono isira ammanantinore woꞌmanka woyite baꞌraasannota anfoommo.—Ibi. 11:6.
GAꞌA MAYI IKKANNORO DIANFOOMMO
12. Yaaqoobi 4:13, 14 kultanno garinni anfoommokki coyi maati?
12 Yaaqoobi 4:13, 14 nabbawi. Mittu kaandannikki halaali no; gaꞌa heeshshonke hiittoota ikkitannoro dianfoommo. Tenne alamera heeꞌnummo geeshsha ‘yannanna’ hendoonnikki coyi iillannonke. (Ros. 9:11) Hakko daafira hendoommori qinaannoro wole agurina lubbote heeꞌne hendoommori qinaanna laꞌneemmoronna teꞌee dianfoommo.
13. Albillitte ikkanno coye afa hooganke ma ikkineemmo gede assitankera dandiitanno?
13 Albillitte heeshshonke hiittoota ikkitannoro afa hooganke qarra ikkitankera dandiitanno. Hiittoonni? Albillitte ikkara dandaanno coyi yaachishankera dandaanno; tini qolte hagiirrinke baꞌꞌanno gede assitanno. Hedeweelcho dano woy hendoommokki coyi dadillineemmonna caaccaambeemmo gede assankera dandaanno. Hendoommo coyi ikkikki gatiro qole wolqa baꞌnammoranna hexxo mudhinammora dandiineemmo.—Law. 13:12.
14. Addu hagiirre afiꞌrate maa assa hasiissannonke? (Misillano lai.)
14 Iillannonke qarri ikkihano ikkiro, Yihowara soqqammeemmohu iso banxeemmo daafira ikkinota leellisha dandiineemmo. Yihowa iillannonke qarra baala hoolannokkita hattono albillitte iillannonke coye balaxe murinokkita Qullaawu Maxaafi xagge leellishshanno. Yihowa albillitte ikkannore afa hoongummorono hagiirraamma ikka dandiineemmota afino. Hagiirraamma ikkineemmohu biddishshasi hasiꞌnummorootinna isira hajajammummorooti. (Erm. 10:23) Mitto coye assinammora albaanni isi biddishsha hasiꞌnummoro togo yinanni heeꞌnoommohu gedeeti: Yihowa fajjiro lubbotenni heeꞌneemmo; qoleno konne woy koꞌonne assiꞌneemmo.—Yaq. 4:15.
Yihowa biddishsha hasiꞌranna isira hajajama addu agarooshshe afiꞌnanni gede assitanno (Gufo 14-15 lai)b
15. Albillittete daafira anfoommori maati?
15 Mitto mittonka barra mayi ikkannoro anfoommokkiha ikkirono, Yihowa iima woy uulla hegere heeshsho aankera qaale einota anfoommo. Isi kaphara dandaannokkitanna eino qaale wonshannokki gede hoolasira dandaannori nookkita anfoommo. (Tit. 1:2) ‘Ikkanno coye baala balaxe kulannohunna ikkara nooreno alba asse coyiꞌrannohu’ iso callaati. Hundi yannara isi coyiꞌrinori woꞌmino; albillitteno woꞌmasi digattanno. (Isa. 46:10) Yihowa ninke baxannokki gede assasira dandaannohu mittu coyino nookkita anfoommo. (Rom. 8:35-39) Iillannonke qarri ikkihano ikkiro isi dandiine saꞌneemmo gede kaaꞌlitannonke hayyo, sheshonna wolqa aannonke. Yihowa kaaꞌlannonketanna maassiꞌrannonketa dihuluullammeemmo.—Erm. 17:7, 8.
YIHOWA MAGEESHSHI GEYA BAXANNONKERO WOꞌMUNNI WOꞌMA HUWATA DIDANDIINEEMMO
16. Faarso 139:1-6 kultanno garinni Yihowara ninke woꞌmunni woꞌma huwata dandiineemmokkiti hiitti egenno noosi?
16 Faarso 139:1-6 nabbawi. Kalaqaanchinke ninke daafira baalanka coye afino; isi maa hendoommoronna hakko coye hendoommohu mayiraatiro afino. Isi maa coyiꞌnoommoronna hakko coye coyiꞌnoommohu mayiraatiro afino. Hattono assineemmo coyenna hakko coye assineemmohu mayiraatiro afino. Moote Daawiti coyiꞌrinonte gede Yihowa woꞌmanka woyite ninke towaatatenna agarate qixxaawinoho. Kalqete alame kalaqinohu Woꞌmunkura Aliidi Mootichi hattono iimanna uulla kalaqinohu woꞌmunkura aliidi Kalaqaanchi ninke daafira hedasi lowo geeshsha dhagge ikkitannote! Daawiti, Ate egenno lowo geeshsha batiꞌrate; ane hedora aleenniiti yaasi garankolla.—Far. 139:6.
17. Yihowa seekke afinonketa ammana qarra ikkitankera dandiitannohu mayiraati?
17 Lophinoommo gari, budinke woy albi ammaꞌnonkenni kainohunni Yihowa ninke daafira hedannoha baxillaancho Annanke ikkinota ammana qarra ikkitankera dandiitanno. Woy alba jawa soꞌro loonsoommo daafira Yihowa horo ninke afa hasiꞌrannokkihanna isi ninkewiinni xeertiꞌrinoha lawankera dandaanno. Daawiti nafa hatto yee hedino woyiti no. (Far. 38:18, 21) Woy heeshshosi biddi assiꞌre Maganunnihu keeraanchu biddishshi garinni heeꞌrate sharramanni noohu mittu manchi togo yee hedara dandaanno; ‘Maganu seekke afinoeha ikkiro heeshshoꞌya biddi assiꞌra qarra ikkitannoeta afanni heeꞌrenni soorrame biddi yaammora mayira hasiꞌranno?’
18. Yihowa ninke umonke anfoommohunni roore afinonketa ammana kaaꞌlitannonkehu hiittoonniiti? (Misillano lai.)
18 Yihowa ninke umonke anfoommohunni roore afinonketanna giddonke nooha ninke laꞌꞌa dandiineemmokkiha dancha coye laꞌꞌannota ammana hasiissannonke. Isi soꞌronke hattono mitto coye hendeemmohunna assineemmohu mayiraatiro afinoha ikkirono baxannonke. (Rom. 7:15) Yihowa dandoonke afinota woꞌmunni woꞌma huwantummoro isira ammanamme hagiirrunni soqqammeemmota albinni roore addaxxa dandiineemmo.
Yihowa albillitte haaro alamera afiꞌneemmota hagiirsiissanno heeshsho albinni roore addaxxineemmo gede asse, tenne alamera iillannonkeha hedeweelcho qarra dandiine saꞌneemmo gede kaaꞌlannonke (Gufo 18-19 lai)c
19. Yihowa daafira anfoommori maati?
19 Yihowa baxille ikkinota anfoommo. Tini horo huluullammannire diafidhino. (1 Yoh. 4:8) Yihowahu keeraanchu biddishshi isi baxannonketa leellishannotanna isi woꞌmanka woyite woyyannonkere afinota anfoommo. Yihowa hegere heeshsho afiꞌnammora hasiꞌrannota anfoommo. Isi hegere heeshsho afiꞌnammora wodo qixxeessino. Wodote qixxaawo guuntete xeꞌne noonkere ikkinummorono qinaannonketa buuxissanno. (Rom. 7:24, 25) Qoleno ‘Maganu wodaninkera aliidiha ikkinotanna baalankare afinota’ anfoommo. (1 Yoh. 3:19, 20) Yihowa ninke daafira baalankare afino; hattono fajjosi wonshinummoro qinaannonketa afino.
20. Quwa saꞌne yaandeemmokki gede kaaꞌlannonkeri maati?
20 Yihowa addinta afa hasiissannonke coye dimaaxinonke. Dhukanke anfe tenne ammannummoro assa dandiineemmokki coye hendanni quwa saꞌne diyaandeemmo; hattono addinta hasiisanno coye illachisha dandiineemmo. Hatto assineemmoha ikkiro ‘woꞌma egenno afiꞌrinoha’ Yihowa addaxxineemmota leellinsheemmo. (Iyo. 36:4) Xaa yannara mito coye anfoommokkiha ikkirono, taalle nookki Magani hegerera haaro coye rosiisannonketa dihuluullammeemmo; qoleno isi daafira ronseemmohu lowo coyi no.—Ros. 3:11.
FAARSO 104 Maganu Elto Ikkinoha Qullaawa Ayyaana
a Sheexaanunnite busha alame ledo olammanni ola massagannohu Yesuusaati; hakko daafira isi Armagedooni daanno yannanna ‘qeelle adhanno’ yanna xa afino yine heda garaho.—Aju. 6:2; 19:11-16.
b MISILLATE XAWISHSHA: Mittu anninna beettisi dano kalaqantanno woyitira hasiisannore borsaho wortanni no.
c MISILETE XAWISHSHA: Mittu qarru amadinosi rodii albillitte haaro alamera afiꞌranno hagiirre hedanni no.