Yihowa Anga Horo Harancho Diꞌꞌikkitino

1. Muse Israeele Gibitsetenni massage fushshi yannara Yihowa addaxxannota leellishinohu hiittoonniiti?

IBIRAAWOOTU maxaafi giddo kulloonniri ammanatenni lawishsha ikkitannori giddo mittu kaajja ammana noosiho Museeti. (Ibi. 3:2-5; 11:23-25) Isi Israeele Gibitsetenni massage fushshi yannara ammana noosita leellishino. Muse Feriooninna olantosi waajje qece diyiino. Isi Yihowa addaxxe Israeelete daga Duumu Baari giddoonni qole sayisino; hattono gedensoonni halalla qole massagino. (Ibi. 11:27-29) Rooru Israeelete manni Yihowara hasiisannonsare wonshate dandoo noosita huluullamino; Muse kayinni Maganosi addaxxa diagurino. Muse Yihowa addaxxasi garankolla; korkaatuno Yihowa Israeelete dagara halalla maalaletenni sagalenna waa qixxeessinonsa.a—Ful. 15:22-25; Far. 78:23-25.

2. Maganu Muse “Kaaliiqi wolqa hanqatateni?” yee xaꞌminohu mayiraati? (Kiiro 11:21-23)

² Muse kaajjado ammana noosiha ikkirono, Israeele maalaletenni gatte fultuhunni mittu diri gedensaanni Yihowa mannisira maala aa dandaannota huluullamino. Muse, Yihowa halalla baddowa dunkaana qasiꞌre noohu lowo miliyoone ikkanno mannira ikkanno geeshshi maala aa dandaannota ammana hoogino. Hakko daafira Yihowa Muse “Kaaliiqi wolqa hanqatateni?” yee xaꞌmino. (Kiiro 11:21-23 nabbawi.) Tenne hedo Ibiraawootu afiinni noo gedeenni tirriro “Yihowa anga haranchoteni?” yitanno; tini Yihowaha qullaawa ayyaana woy Yihowa fajjosi wonshate horoonsiꞌranno wolqa leellishshanno. Yihowa Muse, ‘Ani asseemmo yoommore assa dandeeemmokkiha lawannohe?’ yee xaꞌmanni noosihu gedeeti.

3. Musenna Israeelete daga woꞌnaalsha afa hasiissannonkehu mayiraati?

³ Yihowa atera woy maatekkira maalaamittete hasiisannore wonshannota huluullante egennootto? Huluullamoottoha ikkiro woy ikkano hoogiro, hanni Musenna Israeelete daga woꞌnaalsha laꞌno; insa Maganu hasiisannonsare wonshannonsata huluullantino. Qullaawu Maxaafihu xintu seeri Yihowa wolqa hanqata ikkitinokkita albinni roore addaxxineemmo gede kaaꞌlannonke.

MUSENNA ISRAEELETE DAGA XAGGENNI RONSEEMMORE

4. Batinyu Israeelete manni Yihowara maalaamittete hasiisannonsare wonshate dandoo noosita huluullamanno gede assinonsari maa ikkara dandaanno?

⁴ Hanni qooxeessaho noo hedo laꞌno. Israeelete daganna Israeelete wido ikkinokkihu “wolu lowo manni” Gibitsetenni fule Hexxote Gobba haꞌri yannara halallaho mite yanna geeshsha keeshshino. (Ful. 12:38; Mar. 8:15) Israeelete wido ikkinokki manni menna ita ceeꞌmino; hakko daafira batinyu Israeelete mannino insa ledo gunguma hanafino. (Kir. 11:4-6) Insa alba Gibitsete heedhe ittanno sagale halcha hanaffino. Kuni manni Musera gungumino daafira Muse insara hasiisannonsare shiqisha hasiissannoe yee hedikki digatino.—Kir. 11:13, 14.

5-6. Wolu lowo manni Israeelete dagara hiikkonne busha akata rosiisino? Ninke tennenni maa ronseemmo?

⁵ Israeelete wido ikkinokki manni Yihowa assinonsa coyiꞌra galata baino; Israeelete mannino insa faale haꞌrino. Ninkeno galata afiꞌrinokki manni faale haꞌnammoranna Yihowa assinonkerinni kassi yaa hoongammora dandiineemmo. Alba noonkere halchineemmoha woy wolootu afidhinore hinaanseemmoha ikkiro togoo coyi kalaqamara dandaanno. Kayinni heeꞌnoommo gari ikkihano ikkiro noonke coyinni kassi yineemmoha ikkiro hagiirraamma ikkineemmo.

⁶ Israeelete daga, Maganu qaensa iillituro batinye maalaamittete coye aannonsata buuxisinonsata qaaga hasiissannonsa. Tini hexxo woꞌmitannohu halalla hadhanni noo yannara ikkikkinni Hexxote Gobba iillitanno woyiteeti. Hatteente gede ninkeno xaa yannara hoongoommo coye ikkikkinni Yihowa haaro alamera aankera qaale eino coye illachisha hasiissannonke. Qoleno albinni roore Yihowa addaxxineemmo gede kaaꞌlitannonke qummeeshshuwa hiinca dandiineemmo.

7. Yihowa wolqa hanqata ikkitinokkita addaxxa dandiineemmohu mayiraati?

⁷ Kayi xaano, ‘Maganu Muse “Kaaliiqi wolqa hanqatateni?” yee xaꞌminohu mayiraati?’ yite heddanni noottoha ikkara dandaanno. Yihowa, Muse jawaata angasi daafira calla ikkikkinni angasi baalankawa iilla dandiitannota hedanno gede kaaꞌlanni noosi. Israeelete daga xeertowa halalla nooha ikkirono Yihowa ikkannonsa geeshshi maala aansara dandaanno. ‘Jawaata angasinninna wolqaataame cigilesinni’ Maganu wolqasi leellishino. (Far. 136:11, 12) Hakko daafira fonqolu iillannonke woyite Yihowa ninke mitto mittonka kaaꞌlannonketa huluullama dihasiissannonke.—Far. 138:6, 7.

8. Halalla batinyu manni loosino soꞌro loonseemmokki gede qoropha dandiineemmohu hiittoonniiti? (Misileno lai.)

⁸ Yihowa bayichonko maala qixxeessino; mannu batinye hanshaqqe afiꞌrino. Ikkirono Israeelete daga tenne maalalera Magano digalattino. Isinni konni manni giddo batinyu hafuurino. Insa hagaagge hashsha barra yitukkinni batinye hanshaqqe gamba assidhino. Yihowa konne maalaho ‘wolsino woy hagaagino manna’ hanqino hattono qorichishino. (Kir. 11:31-34) Ninke konni lawishshinni rosa dandiineemmo. Hafuuraamma ikkineemmokki gede qoropha hasiissannonke. Dureeyye woy buxaneno ikkinummoro Yihowanna Yesuusi ledo muli jaalooma kalaqiꞌne ‘jiro iima duuꞌnate’ sharrama hasiissannonke. (Mat. 6:19, 20; Luq. 16:9) Hatto assineemmoha ikkiro Yihowa hasiisannonkere wonshannonketa addaxxa dandiineemmo.

9. Yihowa ma assannonketa addaxxa dandiineemmo?

⁹ Yihowa xaa yannarano mannasi kaaꞌlate angasi diriirsanno. Hatto yaa kayinni maalaamittete coye horo dihoongeemmo woy horo dihudiꞌneemmo yaa diꞌꞌikkino.b Ikkirono Yihowa horonta tuge diagurannonke. Addi addi qarri iillannonke woyite kaaꞌlannonke. Hanni Yihowa hasiisannonkere wonshate angasi diriirsannota addaxxineemmota leellinsheemmota lame doogga laꞌno: (1) angate anje amaddannonke woyitenna (2) albillitte maalaamittete hasiisannonkeri daafira soma fushshiꞌneemmo woyite.

ANGATE ANJE AMADDANNONKE WOYITE

10. Angate anje amaddannonkehu hiittoo woyite ikkara dandaanno?

¹⁰ Tenne busha alame goofimarchi gambise dayi kiiro miinju qarri roore lexxanni haꞌrannota anfoommo. Poletiku ikkito, olu, kalaqamu dano woy haarote ubbanno fayya hendoommokki woxe fushshineemmo gede assitankera dandiitanno; woy loosonke, jajjanke woy qaenke hoongammora dandiineemmo. Xa heeꞌnoommowa haaro looso hasiꞌra woy maatenke adhine wolewa haꞌra hasiissannonkeha ikkara dandaanno. Ikkina Yihowa addaxxineemmota leellishanno doorsha doodhineemmo gede kaaꞌlannonkeri maati?

11. Angate anje amadduhero dandiite saꞌꞌatto gede kaaꞌlannoheri maati? (Luqaasi 12:29-31)

¹¹ Assa hasiissannohehu qarunna kaaꞌlannohe coyi yaachishinohe coye Yihowara hasaaphate. (Law. 16:3) Dancha doorsha doodhatto gede hayyo aaheranna iillinohe coyi daafira ‘quwa saꞌe yaada’ agurte wodanaaꞌmatto gede kaaꞌlahera Yihowa huucciꞌri. (Luqaasi 12:29-31 nabbawi.) Noohe coyinni kassi yite heeꞌratto gede kaaꞌlahera ganyite huucciꞌri. (1 Xim. 6:7, 8) Angate anje dandiine saꞌnanni gara afate borruwanke xiinxalli. Miinju qarra dandiine saꞌnanni gara kultannoti jw.org aana noo borruwanna viidiyubba lowo manna kaaꞌlitino.

12. Mittu Kiristaanchi maatesira malino doorsha doodhanno gede kaaꞌlitannosi xaꞌmuwa hiikkuriiti?

¹² Mitootu looso loosate yite maatensawiinni xeertidhe hadhino; kayinni batinyu roduuwi togoo doorsha doodha hayyo ikkitinokkita huwattino. Haaro looso doodhatto woyite afiꞌratto woxe calla ikkikkinni abbara dandaannota ayyaanaamittete gawajjono hedi. (Luq. 14:28) Ateneeto togo yite xaꞌmi: ‘Minaamaꞌyawiinni xeertiꞌre heeꞌreemmoha ikkiro tini adhamanke gawajjitannohu hiittoonniiti? Tini gambooshshe haꞌreemmokki gede, ammanate roduuwiꞌyawa aaneemmokki gedenna soqqansho fuleemmokki gede assitannoe?’ Qoleno qaaqquullu nooheha ikkiro tenne lowo geeshsha hasiissanno xaꞌmo ateneeto xaꞌma hasiissannohe; ‘Insa ledo heeꞌreemmokkiha ikkiro qaaqquulleꞌya “Yihowa seejjonna amaalenni” lossiꞌra dandeemmohu hiittoonniiti?’ (Efe. 6:4) Qullaawa Borroha xintu seera ayirrissannokki maatekki woy jaallakkinni ikkikkinni Maganu hedo garinni massagami.c Galchimi Iisiyira heeꞌrannohu Tooni yinanni rodiira duucha hinge wole gobba haꞌre loosannoha ikkiro lowo woxe uyinannisita kulloonnisi. Ikkirono isi tenne hajo daafira huuccatto assiꞌrihunna minaamasi ledo hasaawihu gedensaanni, wole gobba haꞌre loosantenni maatesira fushshanno woxe ajisha doodhino. Tooni hakkawarita qaage togo yiino: “Lowo manni Yihowa afanno gede kaaꞌloommo; hattono qaaqquulliꞌya Yihowara diinaggaabbe soqqantannore ikkitino. Maatenke Maatewoosi 6:33 kultannore assinummo geeshsha Yihowa towaatannonketa rossino.”

ALBILLITTE MAALAAMITTETE HASIISANNONKERI DAAFIRA SOMA FUSHSHIꞌNEEMMO WOYITE

13. Geedhineemmo woyite maalaamittete hasiisannonkere afiꞌrate xa quwa saꞌnummokkinni maa assa dandiineemmo?

¹³ Geedhineemmo woyitira soma fushshiꞌrankeno Yihowa mageeshshi geeshsha addaxxineemmoro leellishshanno. Qullaawu Maxaafi albillitte hasiisannonkeha maalaamittete coye afiꞌrate diinaggaambe loonseemmo gede jawaachishannonke. (Law. 6:6-11) Anganke assitu deerrinni albillitte hasiisannonke woxe suuqiꞌra soꞌro diafidhino. Woxu mito geeshshano ikkiro agarooshshe ikkanno. (Ros. 7:12) Ikkirono woxu heeshshonke giddo qara coye ikkanno gede assiꞌra dihasiissannonke.

14. Albillitte hasiisannonkeri daafira soma fushshiꞌneemmo woyite Ibiraawoota 13:5 heda hasiissannonkehu mayiraati?

¹⁴ Yesuusi ‘Maganu albaanni dureessa’ ikkinikkinni woxe duuꞌna gowwimma ikkitinota leellishanno lawishsha kulino. (Luq. 12:16-21) Gaꞌa mayi ikkannoro afinohu dino. (Law. 23:4, 5; Yai. 4:13-15) Kiristoosi haꞌrunsaano ikkinoommo daafira calla qarru iillannonke. Yesuusi isi rosaano ikkate noonkere baala ‘agurate’ qixxaamboommore ikka hasiissannonketa kulino. (Luq. 14:33) Umi xibbi diro Yihudaho heeꞌranno Kiristaani hagiirrunni tenne assino. (Ibi. 10:34) Xaa yannarano batinyu roduuwi poletikaho anga wodha gibbino daafira woxensa hooggino. (Aju. 13:16, 17) Insa tenne assitanno gede kaaꞌlinonsari maati? Insa Yihowa “Horo diagureemmohe; dicallachisheemmohe” yee eino qaale woꞌmunni woꞌma addaxxitino. (Ibiraawoota 13:5 nabbawi.) Albillitte hasiisannonkeri daafira soma fushshiꞌrate dandiinummore baala assineemmo; hattono hedeweelchu coyi iillannonke woyite Yihowa irkisannonketa addaxxineemmo.

15. Kiristaana ikkino annuwinna amuuwi oosonsa ma garinni laꞌꞌa hasiissannonsa? (Misileno lai.)

¹⁵ Mitu budira, adhantinori ooso ila hasidhannohu qaru korkaati geedhinummoro insa towaattannonke yiteeti. Hakko daafira insa oosonsa ‘albillitte afidhanno xurati’ gede assite laꞌanno. Qullaawu Maxaafi annuwunna amuuwu oosonsara hasiisannore wonsha hasiissannonsata kulanno. (2 Qor. 12:14) Hige annuwunna amuuwu geedhitanno yannara oosonsa kaaꞌlo hasiissannonsati egennantinote; batinye oosono insa hagiirrunni kaaꞌlitanno. (1 Xim. 5:4) Ikkollana Kiristaana ikkitino annuwinna amuuwi lowo hagiirre afidhannohu ooso albillitte kaaꞌlitannonke yite lossidhuro ikkikkinni Yihowa soqqamaano ikkitanno gede assite lossidhuro ikkinota affino.—3 Yoh. 4.

16. Annuwunna amuuwu oosonsa umonsa dandiitanno gede qajeelsa dandiitannohu hiittoonniiti? (Efessooni 4:28)

¹⁶ Oosoꞌne albillitte umonsa dandiitanno gede qajeelsitinanni woyite Yihowa addaxxitanno gede lawishsha ikkitine kaaꞌlensa. Anjensanni hanaffine diinaggaambe loosa afidhino waaga affanno gede assensa. (Law. 29:21; Efessooni 4:28 nabbawi.) Lophitanni hadhanno woyite, rosoho worbuulle ikkitanno gede kaaꞌlensa. Annuwunna amuuwu oosonsa hiittoo roso rossannoro hayyotenni doodhitanno gede kaaꞌlate, Qullaawu Maxaafiha xintu seera xiinxalla dandiitanno. Tini oosonsa umonsa dandiitanno gedenna Yihowara albinni roore soqqamate yanna afidhanno gede kaaꞌlitannonsa.

17. Huluullammeemmokki coyi maati?

¹⁷ Yihowati ammanantino soqqamaano, isi insara maalaamittete hasiisannonsare wonshate dandoonna hasatto noosita addaxxitanno. Tenne busha alame goofimarchi gambise dayi kiiro, Yihowara noonke ammana fonqolanno coyi tuncu yaannonketi dihuluullissannote. Iillannonke coyi ikkihano ikkiro, Yihowa wolqasi horoonsiꞌre maalaamittete hasiisannonkere aannonketa woꞌmunni woꞌma addaxxino. Jawaata angasinna wolqaataame cigilesi ninke kaaꞌlate harancho ikkitinokkita dihuluullammeemmo.