XIINXALLOTE BIRXICHO 18
FAARSO 65 Alba Higge Qaafi!
Labballo Wedella Roduuwa Maarqoosinna Ximootewoosi Lawishsha Haꞌrunse
“Maarqoosi soqqanshote kaaꞌlannoe daafira ledokki haadhe amo.”—2 XIM. 4:11.
GUULCHO HEDO
Maarqoosinna Ximootewoosi lawishshi wedellu labballu roduuwi, albinni roore wolootaho soqqamate hasiissannonsa akatta afidhanno gede kaaꞌlannonsa gara ronseemmo.
1-2. Maarqoosinna Ximootewoosi wolootaho albinni roore soqqantannokki gede guficho ikkansara dandaannori maati?
WEDELLA labballo roduuwa, albinni roore Yihowara soqqamanna songoꞌne giddo noore kaaꞌla hasidhinanni? Hasidhinanniti dihuluullissannote. Batinyu labballu wedelli uminsa fajjonni wolootaho soqqantanna laꞌꞌa lowo geeshsha hagiirsiissannote! (Far. 110:3) Ikkirono qarra ikkannori tuncu yaaꞌnera dandaanno. Albillitte tuncu yaannoꞌnere waajjitinoonni daafira soqqanshoꞌne halashshiꞌrate hobbi ruxxi yitinoonni? Dandoo dinoe yitine heddinoonni daafira uyinoonniꞌne looso adha gibbinoonni woyiti no? Hatto ikkiro togo yitine heddinoonniri kiꞌne calla diꞌꞌikkitinoonni.
2 Maarqoosiranna Ximootewoosirano togoori tuncu yiinonsa. Kayinni insa, albillitte tuncu yaansara dandaannore waajjanna dandoo dinoe yee heda wolootaho soqqantannokki gede assitansara diwodhitino. Soqqamaasinchu Phaawuloosinna Barnabaasi umo misiyoone ikkite hadhu yannara, Maarqoosi ledonsa haꞌranno gede koyissino; hatte yannara isi amasi ledo danchu mininsara heeꞌranni nooha ikkikki digatino. (Soq. 12:12, 13, 25) Maarqoosi soqqanshosi halashshiꞌrate konne rosino qooxeessa agure haꞌrino. Umo isi, Antsookiya haꞌrino. Hakkiinni Phaawuloosinna Barnabaasi ledo xeertiꞌre nooha wole qooxeessa haꞌrino. (Soq. 13:1-5) Ximootewoosino Phaawuloosi ledosi soqqamanno gede koyisisi yannara, annisinna amasi ledo heeꞌrannoha ikkikki digatino. Ximootewoosi wedellichanna woꞌnaalshu noosikkiha ikkino daafira, didandeemmo yee agure badhera higa dandaanno. (1 Qorontoosi 16:10, 11 nna 1 Ximootewoosi 4:12 ledo heewisiisi.) Ikkirono isi Phaawuloosi koyishsha maahoyye yee adhino; tini lowo atoote afiꞌranno gede assitinosi.—Soq. 16:3-5.
3. (a) Phaawuloosi Maarqoosinna Ximootewoosi mageeshshi geeshsha naadino? (2 Ximootewoosi 4:6, 9, 11) (Misillano lai.) (b) Konni birxichira hiikkuri xaꞌmuwa xiinxallineemmo?
3 Maarqoosinna Ximootewoosi anjensanni kayisse kaaꞌlanno woꞌnaalsha afidhino; hattono shaaꞌꞌa ikkinokki looso loonsanni gara rossino. Phaawuloosi kuri wedella lowo geeshsha naadanno daafira, muli yanna giddo reyannota afiti isiwa dagganno gede woshshino. (2 Ximootewoosi 4:6, 9, 11 nabbawi.) Phaawuloosi Maarqoosinna Ximootewoosi baxannonsa gede assitinoti hiittenne akattaati? Wedellu labballu roduuwi insa lawishsha haꞌrunsa dandiitannohu hiittoonniiti? Phaawuloosi baxillunni amaalino amaale insa kaaꞌlitannonsahu ma garinniiti?
Maarqoosinna Ximootewoosi anje heedhe shaaꞌꞌa ikkinokki looso loossino daafira Phaawuloosi lowo geya baxinonsa (Gufo 3 lai)b
MAARQOOSI LAWISHSHA HAꞌRUNSITINE UMIꞌNE FAJJONNI SOQQAMME
4-5. Maarqoosi umisi fajjonni wolootaho soqqamannota leellishinohu hiittoonniiti?
4 Mitte borro kultanno garinni, ‘wolootaho soqqama’ yitanno yaatto “diinaggaambe hexxo mudhinikkinni woloota kaaꞌlate sharrama” yitanno tiro afidhino. Maarqoosi tennera dancha lawishsha ikkino. Phaawuloosi layinkimeeshsho misiyoone ikke haꞌri woyite, Maarqoosi ledosi haaꞌre haꞌra giwita Maarqoosi xissiisiꞌrinohanna hexxo mudhinoha ikkara dandaanno. (Soq. 15:37, 38) Kayinni Maarqoosi tennera hexxo mudhe ammanate roduuwasi kaaꞌla diagurino.
5 Maarqoosi fiixisi Barnabaasi ledo wolu qooxeessira soqqamino. Mitu 11 diri gedensaanni Phaawuloosi umo Roomaho usurame noo yannara, kaaꞌlinosi manni giddo mittu Maarqoosiiti. (Film. 23, 24) Isinni Phaawuloosi, Maarqoosi kaaꞌlinositera lowo geeshsha hagiidhino daafira ‘sheshote buicho ikkinoe’ yiino.—Qol. 4:10, 11.
6. Maarqoosi gikki yiino Kiristaaniwa aanasi kaaꞌlitinosihu hiittoonniiti? (Lekkaaliidi qaagiishsha lai.)
6 Maarqoosi gikki yiino Kiristaani ledo muli jaalooma kalaqiꞌrasi kaaꞌlitinosi. Isi Roomaho mite yanna geeshsha Phaawuloosi ledo keeshshihu gedensaanni Baabiloonete soqqamaasinchu Pheexiroosi ledo soqqama hanafino. Lamunku jaalla ikkitino daafira Pheexiroosi iso “Beettiꞌya Maarqoosi” yiinosi. (1 Phe. 5:13) Maarqoosinna Pheexiroosi mitteenni soqqantanni noo yannara Pheexiroosi Yesuusi heeshshonna soqqansho daafira batinye dhagge ikkannore kulisikki digatino; gedensoonni Maarqoosi Wongeellasi borreessi woyite, Pheexiroosi kulinosire borreessino.a
7. Singu Wuu yinannihu wedellichu rodii Maarqoosi lawishsha haꞌrunsinohu hiittoonniiti? (Misileno lai.)
7 Maarqoosi diinaggaawe soqqamino hattono gikki yitino roduuwiwa aana diagurino. Maarqoosi lawishsha haꞌrunsa dandiitinannihu hiittoonniiti? Mitte soqqanshote qoosso afiꞌra hoogginiro hexxo mudhitinoonte; hattono Yihowara soqqamanna songote noore kaaꞌla dandiitinannita wole doogga hasiꞌra agurtinoonte. Hanni xaa yannara songote cimeessa ikke soqqamannohu Singu Wuu yinanni rodii woꞌnaalsha laꞌno. Isi wedellichu noo waro isonooto wolu wedellu roduuwi ledo heewisiisanno. Insa giddo mitootu iso balaxxe qoosso afidhino. Singu Wuu tennera lowo geeshsha xissiisiꞌrino; isi gedensoonni giddosita wolu gikki yitino roduuwira hasaaphino. Mittu cimeessi isi assannore wolootu huwattannokkiha ikkiro nafa wolootaho soqqamate dandiire baala assanno gede jawaachishinosi. Tini amaale Singu Wuu jajjabba roduuwanna gambooshshe daate hodhishshu kaaꞌlo hasiissannonsare kaaꞌlanno gede kakkayissinosi. Isi albita qaage togo yiino: “Wolootaho soqqamate yaa mayyaatero xa leeltinoe. Wolootaho mitore assine kaaꞌliniro afiꞌnanni atoote afiꞌroommo.”
Wedella roduuwa gikki yitino roduuwiwa aana kaaꞌlitannonsahu hiittoonniiti? (Gufo 7 lai)
XIMOOTEWOOSI LAWISHSHA HAꞌRUNSITINE WOLOOTAHO BAXILLE LEELLISHSHE
8. Phaawuloosi ledosi haꞌranno gede Ximootewoosi doorinohu mayiraati? (Filiphisiyusi 2:19-22)
8 Phaawuloosira, alba mannu giwisi katama higi yannara ledosi haꞌrannohu worbu jaali hasiisinosi. Isi umo ledosi haꞌranno gede woꞌnaalshu noosiha Silaasi yinanni Kiristaancho doodhino. (Soq. 15:22, 40) Qoleno gedensoonni Ximootewoosi doodhino. Phaawuloosi Ximootewoosi doodhinohu mayiraati? Umihunni isira suꞌnaadu suꞌmi noosi. (Soq. 16:1, 2) Hattono isi wolootu daafira lowo geeshsha hedannoho.—Filiphisiyusi 2:19-22 nabbawi.
9. Ximootewoosi ammanate roduuwisi daafira lowo geeshsha hedannota leellishinohu hiittoonniiti?
9 Ximootewoosi Phaawuloosi ledo soqqansho hanafihunni kayise, umisinni roorse wolootu daafira hedannota leellishino. Konnira Phaawuloosi Ximootewoosi addaxxino daafira Beeriyaho noota haaro rosaano jawaachishara hakko keeshshanno gede assino. (Soq. 17:13, 14) Hatte yannara Ximootewoosi Beeriyaho Silaasi ledo keeshshino; iso Silaasi lawishshi kaaꞌlinositi dihuluullissannote. Gedensoonni kayinni Phaawuloosi Teselonqe katamira noo Kiristaana jawaachishanno gede iso callichosi hakkira soyino. (1 Tes. 3:2) Hakkiinni Ximootewoosi hakko keeshshinohu 15 diri giddo, qarrantinore baala mararanna “wiꞌlitannori ledo [wiꞌla]” rosino. (Rom. 12:15; 2 Xim. 1:4) Wedellu labballu roduuwi isi lawishsha haꞌrunsa dandiitannohu hiittoonniiti?
10. Jee Wuu yinanni rodii wolootaho hedannota leellisha rosinohu hiittoonniiti?
10 Jee Wuu yinanni rodii wolootaho hedannota leellisha rosino. Isi wedellichu noo yannara geedhitino roduuwi ledo hasaawa qarra ikkitinosi. Hakko daafira isi Gambooshshu Addaraashewa insa keere calla haaꞌre agure haꞌranno. Mittu cimeessi, Jee Wuu ammanate roduuwisira insa baxannonsa gede assannosire kule hasaawa hanafanno gede jawaachishinosi. Qoleno kuni cimeessi wolootu maa baxxara dandiitannoro hedanno gede jawaachishinosi. Jee Wuu tenne amaale haꞌrunse wolootu ledo noosi aante woyyeessiꞌrino. Xaa yannara cimeessa ikke soqqamanni noohu Jee Wuu togo yiino: “Xa aju akkali ledo baxisanno hasaawa hasaawa roore shota ikkitinoe. Xa wolu manni qarri albinni roore leellannoe daafira tashshi yaannoe. Tini ammanate roduuwaꞌya jawaachisheemmo gede baasa kaaꞌlitinoe.”
11. Wedellu labballu roduuwi songonsa giddo noorira albinni roore heda dandiitannohu hiittoonniiti? (Misileno lai.)
11 Kiꞌne wedellu labballu roduuwino wolootaho hendannita leellinshanni gara rosa dandiitinanni. Gambooshshunniwa ajahono akkalahono hattono addi addi budi noonsa roduuwira heddinannita leellishshe. Insa keere xaꞌme hattono hasaaphitanno woyite macciishshe. Tini insa kaaꞌlitinanni gara wodanchitinanni gede assitannoꞌne. Mittu geedhino minaanniranna minaamara JW Layibirere horoonsiꞌranno gara kulannonsahu hasiisinota huwattinara dandiitinanni. Woy ledonsa soqqansho fulannohu nookkita huwattinara dandiitinanni. Togoo roduuwira elekitiroonikisete uduunnichonsa horoonsiꞌranno gara kultine woy ledonsa soqqansho fultine insa kaaꞌla dandiitinanni? Umiꞌne fajjonni woloota kaaꞌlitine baalunkura dancha lawishsha ikka dandiitinanni.
Wedellu labballu roduuwi songo duucha doogganni kaaꞌla dandiitanno (Gufo 11 lai)
PHAAWULOOSI BAXILLUNNI AMAALINO AMAALE KAAꞌLITANNOꞌNE
12. Phaawuloosi Ximootewoosi baxillunni amaalino amaale wedella labballo kaaꞌlitannohu hiittoonniiti?
12 Phaawuloosi Ximootewoosira hagiirru noo heeshsho heeꞌranno gedenna soqqanshosinni dancha guma afiꞌranno gede kaaꞌlitannosi amaale uyinosi. (1 Xim. 1:18; 2 Xim. 4:5) Kiꞌne wedella labballo roduuwano Phaawuloosi baxillunni amaalino amaale kaaꞌlitannoꞌne. Magarinni? Phaawuloosi Ximootewoosira borreessinota lame sokka kiꞌnera borreessinohu gede assitine nabbabbe; hattono loosu aana hosiisa dandiitinanni amaale hiittenneetiro huwatate woꞌnaalle. Hanni mito lawishsha laꞌno.
13. Yihowa ledo muli jaalooma kalaqiꞌrate maa maa assa hasiissannoꞌne?
13 “Maganoho galate mixidhe ateneeto qajeelsi.” (1 Xim. 4:7b) Maganoho galate yaa mayyaate? Yihowa hagiirsiisannore assate halchine isi ledo muli jaalooma kalaqiꞌrate. Kuni akati adhine ilammanniha ikkinokki daafira lossiꞌra hasiissannonke. Hiittoonni? “Ateneeto qajeelsi” yine tirroonnihu Giriikete Afii qaali, qolchanshote qixxaabbannori diinaggaabbe qajeeltanno gara kulate horoonsiꞌnanniho. Kuri qolchamaano insaneeto eemadha hasiissannonsa. Ninkeno Yihowawa gamba yaate kaaꞌlitannonke akatta lossiꞌrate ninkeneeto eemadha hasiissannonke.
14. Qullaawa Maxaafa nabbambeemmo woyite mixonke maa ikka hasiissannose? Lawishsha kuli.
14 Qullaawa Maxaafa nabbawa roso assiꞌneemmo woyite, mixonke Yihowawa shiqa ikkitinota qaango. Lawishshaho, Yesuusinna wedellichu dureessu manchi hasaabbinota kultanno xaggenni maa rosa dandiineemmo? (Maq. 10:17-22) Kuni wedellichi Yesuusi Buuraminoha ikkinota ammaninoha ikkirono, iso haꞌrunsate ammana ajjinosi. Ikkirono Yesuusi ‘konne mancho baxinosi.’ Yesuusi konne wedellicha hasaawisino gari dhagge diꞌꞌikkinohe? Yesuusi kuni manchi dancha doorsha doodhara hasiꞌrinoti egennantinote. Qoleno Yesuusi konne wedellicha Yihowa baxannosi garinni baxino. (Yoh. 14:9) Tenne xaggenna heeshshokki gara hedatto woyite ateneeto togo yite xaꞌmi: ‘Yihowawa albinni roore shiqatenna wolootaho soqqamate maa assa hasiissannoe?’
15. Wedellu labballu roduuwi wolootaho dancha lawishsha ikka hasiissannonsahu mayiraati? Lawishsha kuli. (1 Ximootewoosi 4:12, 13)
15 “Ammanantinorira lawishsha ikki.” (1 Ximootewoosi 4:12, 13 nabbawi.) Phaawuloosi Ximootewoosi nabbawatenna rosiisate dandoo lossiꞌranno gede calla ikkikkinni baxillenna ammana lossiꞌranno gede hattono coꞌicha ikkanno gedeno amaalinosi. Mayira? Danchu lawishshi coyiꞌneemmorinni roore wolqa afiꞌrino. Hanni albinni roore diinaggaawe sabbakate daafira lallawo shiqishatto gede kulloonnihe yine hendo. Ati umikki diinaggaabbe sabbakkanni noottoha ikkiro, tenne hajo daafira afoo wonshite coyiꞌra qarra diꞌꞌikkitannohe. Danchu lawishshikki coyiꞌrattori roore wolqa afiꞌranno gede assanno.—1 Xim. 3:13.
16. (a) Wedellu Kiristaani wolootaho lawishsha ikka dandiitannoti onte doogga hiikkuriiti? (b) Mittu wedellichi ‘coyiꞌranno coyinni’ lawishsha ikka dandaannohu hiittoonniiti?
16 Umi Ximootewoosi 4:12 kultanno garinni, Phaawuloosi wedellu labballu roduuwi lawishsha ikka dandiitannota onte doogga qummi assino. Hojju xiinxallo assiꞌratto woyite tenne mitte mittenta hedo hiinci. Hanni “coyiꞌratto coyinni” dancha lawishsha ikka hasiꞌrootto yine hendo. Woloota dhaawannore coyiꞌra dandaatto doogga hedi. Annikkinna amakki ledo heeꞌrattoha ikkiro, assitannohe coyira albinni roore insa galata dandaatto? Gambooshshunniwa kifile shiqishino rodoo isi shiqishino kifile kaaꞌlitinohe gara kulte galata dandaatto? Qoleno gambooshshunniwa umikki yaattonni dawaro qola dandaatto. Coyiꞌrattorinni lawishsha ikkate sharramakki ayyaanaamittetenni lophitanni noottota leellishshanno.—1 Xim. 4:15.
17. Mittu wedellichi ayyaanaamittete mixosi wonshiꞌranno gede kaaꞌlannosiri maati? (2 Ximootewoosi 2:22)
17 “Wedellimmate yortowiinni xooqi; hatteentenni, . . . keeraanchimma, . . . haꞌrunsi.” (2 Ximootewoosi 2:22 nabbawi.) Phaawuloosi Ximootewoosi ayyaanaamittete mixosi wonshiꞌrannokki gede hedosi bebbeekkannotanna Yihowa ledo noosi jaalooma gawajjitara dandiitannota busha yorto hooꞌlate gaaramanno gede amaalinosi. Qoleno mitu coyi soꞌro ikka hoogirono ayyaanaamittete coye assate yanna hoogatto gede assanni nooheta huwatattora dandaatto. Hanni lawishshaho, ispoorte loossanni, interneete horoonsidhanni woy viidiyote geeme godoꞌlitanni sayisatto yanna hedi. Tenne yanna giddonni gama tiokiraasete looso loosate horoonsiꞌra dandaatto? Lawishshaho, Gambooshshu Addaraashe gatamarate woy gudumaalu soqqansho soqqamate horoonsiꞌra dandaatto. Kuri coyibba assattoha ikkiro, ayyaanaamittete mixo fushshiꞌratenna wonshiꞌrate kaaꞌlitannoheta haaro jaalla afiꞌra dandaatto.
WOLOOTAHO SOQQAMA ATOOTE ABBITANNO
18. Maarqoosinna Ximootewoosi hagiirsiissannotanna harshammi assitanno heeshsho heedhino yineemmohu mayiraati?
18 Maarqoosinna Ximootewoosi albinni roore wolootaho soqqamate uminsa horo agurtino; hattono hagiirsiissannotanna harshammi assitanno heeshsho heedhino. (Soq. 20:35) Maarqoosi ammanate roduuwasi kaaꞌlate addi addi gobba haꞌrino. Qoleno isi Yesuusi heeshshonna soqqansho daafira kulannoha dhagge ikkanno Wongeella borreessino. Ximootewoosi, Phaawuloosi addi addi songuwa xinti yannaranna ammanate roduuwasi dhaawi yannara iso kaaꞌlino. Maarqoosinna Ximootewoosi uminsa horo agurte woloota kaaꞌlitino daafira, Yihowa hagiidhinoti dihuluullissannote.
19. Wedellu labballu roduuwi Phaawuloosi Ximootewoosi baxillunni amaalino amaale haꞌrunsa hasiissannonsahu mayiraati? Tini mayi guma abbitanno?
19 Phaawuloosi wedellichu jaalisira Ximootewoosira borreessino sokka iso lubbora baxannota leellishshanno. Qoleno tini qullaawu ayyaaninni borreessinoonni sokka Yihowa kiꞌne labballo wedella lowo geeshsha baxannoꞌneta leellishshanno. Isi qinaaꞌnera hasiꞌranno. Hakko daafira Phaawuloosi baxillunni amaalino amaale loosu aana hosiisate sharramme; hattono woloota albinni roore kaaꞌlate hasattoꞌne lexxitanno gede assidhe. Hatto assitiniro xaa yannara dancha heeshsho heedhinanni hattono albillitte “addu heeshsho seekkitine cuꞌmiꞌra” dandiitinanni.—1 Xim. 6:18, 19.
FAARSO 80 Yihowa Dancha Ikkinota Qamassine Laꞌe
a Pheexiroosi giddosita fushshe coyiꞌra fokkifatannokki mancho ikkino daafira, Yesuusi addi addi coyi tuncu yiisi woyite hiitto ikkinoronna maa assinoro Maarqoosira xawise kula dandaanno. Maarqoosi borreessino xaggera Yesuusira macciishshaminosirenna isi maa assinoro duucha hige qummi assinohu isera ikkara dandaanno.—Maq. 3:5; 7:34; 8:12.
b MISILETE XAWISHSHA: Maarqoosi, Phaawuloosinna Barnabaasi misiyoone ikkite soqqantanna kaaꞌlinonsa. Ximootewoosi roduuwa jawaachishate mitte songo umisi fajjonni towaatanni no.