Yihowa “Heeshshote Magano” Ikkinota Qaagge

1. Yihowa manni qarru iillinsarono iso magansiꞌra agurannokki gede kaaꞌlannonsari maati?

QULLAAWU MAXAAFI heeꞌnoommo yanna “qarrissanno yanna” ikkitinota kulanno. (2 Xim. 3:1) Tenne alamera baalunku mannira iillanno qarri iillannonsatano agurranna Yihowa manna gimbanninsa hattono daramanno gede assinanninsa. Togoo qarri iillinkerono Yihowa magansiꞌra agurreemmokki gede kaaꞌlannonkeri maati? Tennera kaaꞌlannonkehu qara coyi Yihowa “heeshshote Magano” ikkinota afate.—Erm. 10:10; 2 Xim. 1:12.

2. Yihowa heeshshote Magano ikkasi leellishannori maati?

² Yihowa iillannonke qarra baala laꞌꞌanno; hattono isi ninke kaaꞌlanno faro hasiꞌranno. (2 Dud. 16:9; Far. 23:4) Yihowa heeshshote Magano ikkinota afa iillannonke fonqolo baala dandiine saꞌneemmo gede kaaꞌlitannonke. Hanni tini Moote Daawiti kaaꞌlitinosi gara laꞌno.

3. Daawiti Yihowa “heeshshonniho” yiinohu mayyaateeti?

³ Daawiti Yihowa egennino hattono iso addaxxino. Isi Moote Saaoolinna wole diinnasi shorritusi yannara kaaꞌlannosi gede Yihowa huucciꞌrino. (Far. 18:6) Yihowa huuccattosi macciishshe gatisisihu gedensaanni Daawiti “Kaaliiqi Heeshshonniho!” yiino. (Far. 18:46) Hatto yaasi, Daawiti Yihowa nooha ikkinota ammanannota leellishshannota calla diꞌꞌikkitino. Mitte borro Daawiti togo yaasi, Yihowa “mannasi gatisate woꞌmanka woyite qaafo adhannoha heeshshote Magano ikkinota addaxxannota leellishshannote” yitino. Addanko Daawiti iillinosi coyinni Maganisi heeshshonniha ikkinota huwatino; tini isira soqqamanninna iso guwisiꞌranni heeꞌranno gede jawaante ikkitinosi.—Far. 18:28, 29, 49.

4. Yihowa heeshshote Magano ikkinota afa kaaꞌlitannonkehu Hiittoonniiti?

⁴ Yihowa heeshshote Magano ikkinota addaxxa isira diinaggaambe soqqammeemmo gede kaaꞌlitannonke. Iillannonke fonqolo dandiine saꞌneemmo jawaante afiꞌneemmo; hattono Maganoho woꞌmanka woyite diinaggaambe soqqamate hasatto heedhannonke. Qoleno isiwa gamba yine heeꞌrate murciꞌneemmo.

HEESHSHOTE MAGANI JAWAACHISHANNOꞌNE

5. Fonqolu iillannonke woyite beꞌe yineemmokki gede assannonkeri maati? (2 Qorontoosi 4:7)

⁵ Yihowa heeshshonniha ikkinotanna woꞌmanka woyite kaaꞌlannonketa qaangeemmoha ikkiro, iillannonke fonqoli shiima woy jawano ikkiro qeelle saꞌꞌa dandiineemmo. Iillannonkehu aye qarrino Yihowa wolqara aliidiha diꞌꞌikkino. Isi Woꞌmanka Dandaannoha ikkino daafira dandiine saꞌneemmo wolqa aannonke. (2 Qorontoosi 4:7 nabbawi.) Hakko daafira iillannonke fonqolo waajjineemmokki gede assannohu ikkadu korkaati noonke. Yihowa shiimu fonqoli iillinonke yannara kaaꞌlinonketa qaaganke jawu fonqoli iillannonke woyiteno kaaꞌlannonketa addaxxineemmo gede assitannonke.

6. Daawiti albinni roore Yihowa addaxxanno gede assannosihu wedellichu heeꞌreenna iillinosi coyi maati?

⁶ Hanni Daawiti albinni roore Yihowa addaxxanno gede assinosiha lame iillinosi coye laꞌno. Isi wedellichu heeꞌre geꞌreewo allaalanni noo yannara dibi yinanni moyichinna doobbiichu annisita mitte mitte geꞌrecho adhite hadhino. Lamente yannara Daawiti worbimmatenni konne moyicho shorrino hattono geꞌreewo gatisino. Kayinni isi qeelle afiꞌrinohu umisinni ikkinohu gede asse dihedino. Kaaꞌlinosihu Yihowa ikkinota afino. (1 Sam. 17:34-37) Daawiti konne coye horo dihawino. Isi tenne hiincasi heeshshote Magani albillitteno jawaante aannosita addaxxanno gede assitinosi.

7. Daawiti gara ikkinore illachishasi Goliyaadi ledo olamanno gede kaaꞌlitinosihu hiittoonniiti?

⁷ Gedensoonni Daawiti Israeelete olanto noo kaampe haꞌrino; isi hatte yannarano wedellicha ikkikki digatino. Isi maranno woyite Filisxeemennihu jigeessu manchi Goliyaadi, “Israeelete olanto uggeemmo” yaanna Israeelete olanto waajjite qece yite no. (1 Sam. 17:10, 11) Israeelete olanto waajjitinohu Gooliyaadi jigeessa ikkinota laꞌeeti hattono isi coyiꞌrannore illachishsheeti. (1 Sam. 17:24, 25) Daawiti illachishinohu kayinni wole coyeeti. Daawiti Goliyaadi qacifatanni noohu Israeelete olanto calla ikkikkinni “heeshshote Magani olanto” ikkinohu gede asse hedino. (1 Sam. 17:26) Isi Yihowa daafira hedino. Alba geꞌreewo allaale heeꞌreenna kaaꞌlinosi Magani xaano kaaꞌlannosita addaxxino. Maganuno kaaꞌleennasi Goliyaadi ledo qasame qeelino!—1 Sam. 17:45-51.

8. Qarru iillannonke woyite Yihowa addaxxineemmo gede kaaꞌlannonkeri maati? (Misileno lai.)

⁸ Heeshshote Magani ninkeno kaaꞌlate qixxaawinoha ikkinota qaangeemmoha ikkiro, iillannonke qarra qeelle saꞌꞌa dandiineemmo. (Far. 118:6) Yihowa alba assinore hiincineemmoha ikkiro isi kaaꞌlannonketa albinni roore addaxxa dandiineemmo. Yihowa mannasi kaaꞌlinota qaagatto gede assitannoheta Qullaawu Maxaafi xagge nabbawi. (Isa. 37:17, 33-37) Qoleno Yihowa xaa yannara ammanate roduuwanke kaaꞌlanni noo gara leellishshannota jw.org webisayitenkera fultino rippoorte nabbawi woy lai. Hattono Yihowa ate kaaꞌlate qaafo adhino yanna qaagi. Yihowa ate doobbiichu woy dibi yinanni moyichi gedee qarrinni gatisate maalale ikkannore assinoha lawa hoogahera dandaanno; kayinni Yihowa heeshshokki giddo lowo coye assinohe. Yihowa isi ledo jaalooma kalaqiꞌratto gede assinohe. (Yoh. 6:44) Xaa geeshsha halaalu mine noottohu isi kaaꞌlinohe daafira callaati. Yihowa huuccattokkira dawaro qolinohe gara, kaaꞌlo hasiisse noohe yannara kaaꞌlinohe gara woy qarru giddo heedheenna towaatinohe gara qaagatto gede kaaꞌlahera iso huucciꞌri. Kuri coyibba hiincakki Yihowa albillitteno ate kaaꞌla agurannokkita albinni roore addaxxatto gede assitannohe.

9. Fonqolu iillannonke woyite maa qaaga hasiissannonke? (Lawishsha 27:11)

⁹ Yihowa heeshshote Magano ikkinota qaaganke iillannonke fonqolira gara ikkitino lao heedhannonke gede assitannonke. Hiittoonni? Fonqolu iillannonke woyite roore hasiisanno coye illachisha hasiissannonke. Daawuloosi qarru iillinkero Yihowara badhe wodhineemmohu gede asse coyiꞌrino. (Iyo. 1:10, 11; Lawishsha 27:11 nabbawi.) Kayinni fonqolu iillannonke woyite qeelle saꞌnummoro Yihowa banxeemmota leellinsheemmo; hattono Daawuloosi kaphaancho ikkinoti leeltanno gede assineemmo. Gashshaano gibbinoꞌneha, angate anje waaddinoꞌneha, sabbakkinanni woyite mannu macciishsha giwinoꞌneha woy wolu fonqoli iillinoꞌneha ikkara dandaanno. Hatto ikkiro iillannoꞌne qarri Yihowa hagiirsiissinanni faro fanannoꞌneta qaagge. Qoleno Yihowa wolqaꞌnera aleenni ikkino fonqoli iillaꞌnera horo fajjannokkita deꞌinoonte. (1 Qor. 10:13) Isi dandiitine saꞌinanni jawaante aannoꞌne.

HEESHSHOTE MAGANI BAꞌRAASANNOꞌNE

10. Heeshshote Magani iso magansidhannorira maa assanno?

¹⁰ Yihowa iso magansidhannore baꞌraasanno Maganooti. (Ibi. 11:6) Isi xaa yannara keerenna harshammo afiꞌneemmo gede assannonke; hattono albillitte hegere heeshsho aannonke. Yihowara ninke baꞌraasate hasattonna wolqa noosita addaxxine iso hexxa dandiineemmo. Alba heedhinori ammanantinori Maganu soqqamaano assitinonte gede, togooti kaajjado ammana Yihowara diinaggaambe soqqammanni heeꞌneemmo gede assitannonke. Umi xibbi diro heeꞌrinohu Ximootewoosino hatto assino.—Ibi. 6:10-12.

11. Ximootewoosi songote giddo diinaggaawe soqqamanno gede kakkayisinosiri maati? (1 Ximootewoosi 4:10)

¹¹ 1 Ximootewoosi 4:10 nabbawi. Ximootewoosi heeshshote Magano hexxino. Hakko daafira isi wolootahonna Yihowara diinaggaawe soqqamino. Hiitte doogganni? Phaawuloosi isi sabbakanno woyitenna songote giddo rosiisanno woyite albinni roore worba ikkanno gede jawaachishinosi. Qoleno Ximootewoosi ammanate roduuwisira ajahono akkalahono dancha lawishsha ikkanno gede kulinosi. Isira mito shota ikkinokki looso uyinoonnisi; konni loosi giddo gamu amaale hasiissannonsare kaajjishe kayinni baxillunni amaalate. (1 Xim. 4:11-16; 2 Xim. 4:1-5) Ximootewoosi assannori mito woyite mannaho leella hoogiro woy mannu naada hoogiro nafa Yihowa baꞌraasannosita addaxxa dandaanno.—Rom. 2:6, 7.

12. Songote cimeeyye woꞌmanka woyite loosonsa diinaggaabbe loossanno gede assannonsari maati? (Misileno lai.)

¹² Xaa yannarano cimeeyye Yihowa loossannoha dancha looso laꞌꞌannotanna naadannota addaxxa dandiitanno. Hoshsha towaata, rosiisanna sabbakano agurranna batinye cimeeyye Magano magansiꞌnanni minna mina kaaꞌlitanno; hattono dano kalaqantanno woyite roduuwa kaaꞌlate looso loossanno. Wolootu cimeeyye Dhiwantinore Laꞌanno Gaamo giddo woy Hospitaalete Ledo Xaadissanno Komite giddo soqqantanno. Togoo loosira insaneeto shiqishshanno cimeeyye songo mannu dirijjite gede assite ikkikkinni Yihowa qixxaawo gede assite laꞌanno. Tini uyinoonninsa looso woꞌma lubbonsanni loossanno gedenna Yihowa baꞌraasannonsata woꞌmunni woꞌma addaxxitanno gede assitannonsa.—Qol. 3:23, 24.

13. Yihowa isira soqqamate assineemmore ma garinni laꞌꞌanno?

¹³ Baalanti halashshaano songote cimeeyye ikkitanno yaa diꞌꞌikkino. Ikkirono baalunku isira soqqamate assineemmori no. Maganinke isira soqqamate dandiinummore baala assineemmo woyite hagiidhanno. Alamete doyicho loosira fushshineemmo woxi ikki geeshshihano ikkiro isi tenne laꞌꞌanno. Yihowa waajja qeeꞌline gambooshshunniwa anga kayinse dawaro qolate sharrammanna laꞌꞌanno woyite hattono koffi assitinonkere gatona yineemmo woyite lowo geeshsha hagiidhanno. Yihowara soqqamate assattori garire lawa hoogihero nafa isi assattore naadannota addaxxi. Isi baxannohe hattono baꞌraasannohe.—Luq. 21:1-4.

HEESHSHOTE MAGANIWA GAMBA YITINE HEEDHE

14. Yihowawa gamba yine heeꞌra ammanamme heeꞌneemmo gede kaaꞌlitannonkehu hiittoonniiti? (Misileno lai.)

¹⁴ Yihowa xawe leellinkero isira ammanamme heeꞌra qarra diꞌꞌikkitannonke. Yooseefi dhagge tini halaale ikkase leellishshanno. Isi foorre tiyyiꞌre giwino. Isira Maganu xawe leellinosi hattono iso dadillisa dihasiꞌrino. (Kal. 39:9) Yihowa xawe leellannonke gede huuccatto assiꞌratenna Qaalesi xiinxallate yanna gaaꞌma hasiissannonke. Konni garinni isi ledo noonke jaaloomi kaajjanno. Yooseefi gede Yihowa ledo danchu jaaloomi heeꞌrinkero Iso dadillisannoha aye coyeno assa dihasiꞌneemmo.—Yai. 4:8.

15. Israeele halalla noo yannara assitinorinni maa ronseemmo? (Ibiraawoota 3:12)

¹⁵ Yihowa heeshshote Magano ikkinota deꞌannori isiwiinni xeertidhanno. Hanni Israeele halalla noo yannara ikkinore laꞌno. Insa Yihowa nooha ikkinota affino; kayinni insa towaatannonsata huluullama hanaffino. Insa “Kaaliiqi ledonke noonso dino?” yite nafa xaꞌmitino. (Ful. 17:2, 7) Hakkunni gedensaanni Maganoho finqiltino. Insaha busha lawishsha harunsa hasiꞌneemmokkiti egennantinote.—Ibiraawoota 3:12 nabbawi.

16. Ammananke fonqolara dandaannori maati?

¹⁶ Tini alame Yihowawa gamba yine heeꞌra qarra ikkitannonke gede assitanno. Batinyu manni Maganu nooha ikkinota diammananno. Duucha woyite, Maganoho hajajantannokkirira qiniinonsaha lawanno. Tenne laꞌneemmo woyite ammananke fonqolantara dandiitanno. Maganu noota kaandeemmokkiha ikkirono, isi ninke towaatannonketa huluullama hananfammora dandiineemmo. Faarso 73⁠te borreessaanchi hatto yee heda hanafino. Qooxeessisira noo manni Maganoho hajajamannokkiha ikkirono dancha heeshsho heeꞌrannota huwatino. Hakko daafira isi Maganoho soqqama kaaꞌlitannori nooronna teꞌee huluullama hanafino.—Far. 73:11-13.

17. Yihowawa gamba yine heeꞌneemmo gede kaaꞌlannonkeri maati?

¹⁷ Faarsaanchu gedensaanni hedosi biddi assiꞌranno gede kaaꞌlinosiri maati? Isi Yihowa habbannorira gedensoonni iillannonsare hiincino. (Far. 73:18, 19, 27) Qoleno isi Maganoho soqqamme afiꞌnanni atoote hedino. (Far. 73:24) Ninkeno Yihowawiinni afiꞌnoommo atoote hiinca dandiineemmo. Yihowara soqqama hoongoommoro heeshshonke hiittoota ikkitannoro xaa heeshshonke ledo heewisiinse laꞌꞌa dandiineemmo. Togo assa ammanamme heeꞌneemmo gedenna jeefote faarsaanchu yiinota yineemmo gede assitannonke; isi “Anera kayinni Maganunniwa gamba yaa woyyitannoe” yiino.—Far. 73:28.

18. Albillittete yanna waajja hasiissannonkekkihu mayiraati?

¹⁸ ‘Heeshshonnihunna halaalaanchu Magani soqqamaano’ ikkinoommo daafira, tenne goofimarchu yannara iillannonke fonqolo baala qeelle saꞌꞌa dandiineemmo. (1 Tes. 1:9) Maganinke iso magansidhannore kaaꞌlannoho noo Maganooti. Isi hunda heedhino soqqamaanora ledonsa ikkinota leellishino; xaa yannarano ledonke ikkanno. Muli yanna giddo uullate aana quuxxote qarri hanafanno. Ikkirono hatte yannara dicallanteemmo. (Isa. 41:10) Hakko daafira baalunku “hawaqiꞌne, ‘Kaaliiqi kaaꞌlaanchoꞌyaatina diwaajjeemmo’ . . . yineemmo.”—Ibi. 13:5, 6.