Qullaawu Maxaafihu Xintu Rosi Xaano Kaaꞌlannohe?

1. Umo halaale rositto woyite Qullaawu Maxaafi rosi kaaꞌlinohehu hiittoonniiti?

QULLAAWU MAXAAFIHU xintu rosi heeshshonke soorrino. Lawishshaho, Maganu suꞌmi Yihowa ikkinota ronsummoti isi jaalla ikkate umi qaafo adhinoommo. (Isa. 42:8) Reyino manni noo gara ronsummoti, ‘Shiiꞌnoommo manni qarramanni nookka?’ yine yaada agurroommo. (Ros. 9:10) Qoleno Maganu uulla Gannate assate qaale einota ronsummoti, albillittete yanna daafira yaada agurroommo. Heeshshote heeꞌneemmohu shiima yanna yaano 70 woy 80 diro calla ikkikkinni hegerera ikkinota ammannoommo.—Fa. 37:29; 90:10.

2. Layinki Pheexiroosi 1:12, 13 gikki yiino Kiristaana nafa Qullaawa Borrohu xintu rosi kaaꞌlannota leellishshannohu hiittoonniiti?

² Qullaawu Maxaafiha xintu roso horonta mulluri gede assine laꞌꞌa dihasiissannonke. Soqqamaasinchu Pheexiroosi layinki sokkasi borreessinohu, ‘halaalunni kaajje heeꞌrino’ Kiristaaniraati. (2 Pheexiroosi 1:12, 13 nabbawi.) Ikkirono hatte yannara, songo ayyaanaamittetenni gawajja hasidhannori kaphu rosiisaanonna maganiweelu manni waadinonsa. (2 Ph. 2:1-3) Pheexiroosi ammanate roduuwisi konne qarra qeeltanno gede kaaꞌlate insa jawaachisha hasiꞌrino. Hakko daafira isi alba rossinoha mito roso qaagiissinonsa. Kuni rosi jeefote geeshsha minshe nookkire ikkitanno gede kaaꞌlannonsa.

3. Baalunku Kiristaani Qullaawu Maxaafiha xintu roso hiinca agura hasiissannonsakkihu mayiraatiro leellishanno lawishsha kuli.

³ Ayyaanaamittetenni gikki yinanni haꞌneemmo woyite, Qullaawu Maxaafihu xintu rosinni haaro roso ronseemmoha ikkara dandaanno. Hanni mitto lawishsha laꞌno: Sagale qishate dandoo noosi manchinna xaalla qisha rosiisiꞌranni noo manchi sagale qishate hasiisannoha mittu gari coye horoonsiꞌrara dandaanno. Ikkollana sagale qishate dandoo noosi manchi gale hose kuri coyibba horoonsiꞌre baxxino garinni coommitanno sagale qisha rosino. Hatteente gede, Yihowara seeda diro soqqantinorinna Qullaawa Maxaafa haarote rossinori Qullaawu Maxaafiha xintu halaale laꞌanno gari babbaxxara dandaanno. Cuuammummo yannanni kayise heeshshonke gari woy soqqanshote qoossonke soorrantinoha ikkara dandaanno. Konni albaanni ronsoommo roso loosu aana hosiinsummoro, xaa heeshshonkera kaaꞌlannoha haaro ronso huwantammora dandiineemmo. Hanni gikki yiino Kiristaani sasu Qullaawu Maxaafihu xintu rosinni maa rosa dandaannoro laꞌno.

YIHOWA KALAQAANCHOHO

4. Yihowa Kalaqaancho ikkinota rosanke kaaꞌlitinonkehu hiittoonniiti?

⁴ “Baalanka coye kalaqinohu kayinni Maganoho.” (Ibi. 3:4) Baattonna aanase noore baalankare kalaqinohu hayyosiranna wolqasira taalle nookki Kalaqaancho ikkinota anfoommo. Kalaqinonkehu iso ikkino daafira, seekke afinonke. Hakkiino sae ninke daafira hedanno. Isi ninkera woyyannore afino. Yihowa Kalaqaancho ikkinota kulannoha konne huwatate qarrisannokki halaale afanke, lowo geya kaaꞌlitinonke; heeshshonke hagiirru noota ikkitanno gede assitino.

5. Umonke heeshshi assineemmore ikkineemmo gede kaaꞌlannonke halaali hiikkoyeti? (Isayaasi 45:9-12)

⁵ Yihowa Kalaqaancho ikkinota kulanno halaalinni umonke heeshshi assineemmore ikka hasiissannonketa ronseemmo. Iyyoobi quwa sae isiniitinna wolootu daafira heda hanafita, Yihowa isi woꞌmanka dandaanno Kalaqaancho ikkinota qaagiissinosi. (Iyo. 38:1-4) Tini Iyyoobi Maganu doogo mannunnita roortannota huwatanno gede kaaꞌlitinosi. Tenne hedo ledo sumuu yaanno garinni masaalaanchu Isayaasi togo yee borreessino: “Doru uduunnichi ganannoha, ‘Ma assitanni nootto?’ yee afannoni?”—Isayaasi 45:9-12 nabbawi.

6. Yihowa hayyonna wolqa hiinca roorenkanni kaaꞌlitannonkehu hiittoo woyiteeti? (Misillano lai.)

⁶ Mittu Kiristaanchi woꞌnaalsha afiꞌranni haꞌranno woyite, biddishsha afiꞌrate Yihowanna Qaalesi agure quwa sae umisi hedo addaxxa hanafara dandaanno. (Iyo. 37:23, 24) Kayinni Kalaqaanchisita taalle nookki wolqanna hayyo seekke hedannohalla ikki? (Isa. 40:22; 55:8, 9) Kuni xinta ikkino halaali woꞌmanka woyite umosi heeshshi assanno gedenna quwa sae umisi hedo addaxxannokki gede kaaꞌlannosi.

7. Raaheela biddi assinoonni coyira hajajamate maa assitino?

⁷ Isloveeniyaho heedhannoti Raaheela Kalaqaanchise daafira hedase, dirijjite biddi assitino coyira hajajantanno gede assitinoseta huwattino. Togo yitino: “Albisa ikkite massaggannori uyitanno biddishshira hajajama mito woyite shota diꞌꞌikkitannoe. Lawishshaho, 2023 Aliidi Bisi Rippoorte Kiiro 8 laoommaha ikkirono, ereeda lossiꞌrino rodii lallawo shiqishanna laummati masoomma. Hakko daafira konne biddi assinoonni coye roseemma gede kaaꞌlaera Yihowa huucciꞌroomma.” Raaheela Yihowa iimanna uulla kalaqinoha ikkino daafira, dirijjitesi haꞌra hasiissannose doogo massagate dandoo noosita huwattino. Atino biddi assinoonni coyira woy haarote uyinoonni biddishshira hajajama qarra ikkitinoheha ikkiro, umokki heeshshi assite Kalaqaanchinketa taalle nookki hayyonna wolqa hiinca dandaatto.—Rom. 11:33-36.

MAGANU QARRU HEEꞌRARA FAJJINOHU MAYIRAATI?

8. Maganu qarru heeꞌrara fajjinohu mayiraatiro rosanke kaaꞌlitinonkehu hiittoonniiti?

⁸ Maganu qarru heeꞌrara fajjinohu mayiraati? Tenne xaꞌmora dawaro afiꞌra dandiinokkihu mitu manni Maganoho hanqanno woy isi horonta dino yee hedanno! (Law. 19:3) Ati kayinni qarra abbinohu Yihowa ikkikkinni ragiꞌnoommo cubbonna guuntete xeꞌne ikkitinota rosootto. Qoleno Yihowa cincasi lowo miliyoone ikkanno manni iso afanno gedenna Yihowa qarra hegerera hunannohu hiittoonniitiro huwatanno gede assitinota rosootto. (2 Ph. 3:9, 15) Kuni halaali sheshifachishinohe; hattono Yihowawa shiqatto gede assinohe.

9. Yihowa qarru heeꞌrara fajjinohu mayiraatiro roorenkanni qaaga hasiissannonkehu hiittoo woyite ikkara dandaanno?

⁹ Yihowa qarra huna geeshsha cincine agadha hasiissannonketa anfoommo. Ikkirono ninkera woy banxeemmo mannira qarru iillanno woyite, miincanninke woyite woy shiiꞌneemmo woyite, ‘Yihowa rahe qaafo adhinokkihu mayiraati?’ yine hendammora dandiineemmo. (Imb. 1:2, 3) Togoo yannara, Yihowa keeraano qarrantara fajjannohu mayiraatiro hiinca hayyote.a (Fa. 34:19) Qoleno qarra hegerera hunannota kule uyino hexxo hiinca dandiineemmo.

10. Aani amase shiidhu gedensaanni sheshifattanno gede kaaꞌlinoseri maati?

¹⁰ Qarru iillannonkehu mayiraatiro afanke kaajjine uurrineemmo gede kaaꞌlitannonke. Hindete Wuqiyaanoosera Mayyootti yinanni giddichora heedhannoti Aani togo yitino: “Boodu diri albaanni amaꞌya shiiꞌroomma daafira lowo geya dadilloomma. Ikkirono, iillannonke qarrira xaꞌmamannohu Yihowa ikkinokkita woꞌmanka woyite qaageemma. Isi baalunku gari qarra hunatenna shiiꞌnoommo manna kayisate quqquxamanno. Konne halaale hiincaꞌya giddoyidi keere afiꞌreemma gede kaaꞌlitinoe; togoo keere afiꞌraꞌya duucha woyite dhagge ikkitannoe.”

11. Yihowa qarru heeꞌrara fajjinohu mayiraatiro afanke sabbaka agurreemmokki gede kaaꞌlitannonkehu hiittoonniiti?

¹¹ Yihowa qarru heeꞌrara fajjinohu mayiraatiro afanke sabbaka agurreemmokki gede kakkayissannonke. Pheexiroosi Yihowa cincinohu maaro eꞌannori gattara ikkinota kulihu gedensaanni togo yiino: “Qullaawa amanyoote haꞌrunsitinenna Maganoho galtinoonnire ikkitinoonnita leellishannore assitine hiittoo manna ikka hasiissannoꞌnero hedde.” (2 Ph. 3:11) ‘Maganoho galloommore ikkinoommota leellishannori’ giddo mittu sabbakate loosooti. Iimi Anninke gede ninkeno manna banxeemmo. Kuni manni keeraanchimma woꞌmitinote haaro alamera heeꞌrara hasiꞌneemmo. Yihowa cince qooxeessikkira heeꞌranno mannira iso magansiꞌranno faro fane no. Maganu ledo loosanna goofimarchu daara albaanni dandaami deerrinni lowo manni isi daafira rosanno gede kaaꞌla ninkera lowo ayirrinyeeti!—1 Qo. 3:9.

HEEꞌNOOMMOHU ‘GOOFIMARCHU BARRUWARAATI’

12. Heeꞌnoommohu “goofimarchu barruwara” ikkinota rosanke kaaꞌlitinonkehu hiittoonniiti?

¹² Qullaawu Maxaafi “goofimarchu barruwara” heeꞌranno manni akati hiittooha ikkannoro xawise kulanno. (2 Xim. 3:1-5) Qooxeessinkera noo manni ikkito laꞌne tini masaalo woꞌmitanni noota huwata dandiineemmo. Mannu akati roore bushanni haꞌranna laꞌneemmo woyite, Maganu Qaali addaxxinanniha ikkinota albinni roore ammanneemmo.—2 Xim. 3:13-15.

13. Yesuusi Luqaasi 12:15-21 kulino lawishshi garinni, ninkeneeto mayine xaꞌminammora dandiineemmo?

¹³ Heeꞌnoommohu goofimarchu barruwara ikkinota afanke balaxisiisa hasiissannonke coye balaxisiinseemmo gede kaaꞌlitannonke. Hanni Yesuusi Luqaasi 12:15-21 kulino lawishshinni tenne daafira maa ronseemmoro laꞌno. (Qummeeshsha nabbawi.) Dureessa mancho “gowwa” yinoonnihu mayiraati? Iso hatto yinoonnihu kuni manchi dureessa ikkino daafira ikkikkinni, balaxisiisa hasiissannosire balaxisiisinokki daafiraati. Isi, ‘umisira jiro duuꞌnino Maganu albaanni kayinni dureessa diꞌꞌikkino.’ Kuni manchi hatto assasi soꞌro ikkitinohu mayiraati? Maganu iso, “Konne hashsha reyatto” yiinosi. Xaa yannara ninkeno tenne alame goofimarchi gambise dayi kiiro ninkeneeto togo yine xaꞌma hasiissannonke: ‘Fushshiꞌreemmo mixo balaxisiisa hasiissannoe coye balaxisiiseemmota leellishshanno? Oosoꞌya hiittoo mixo fushshidhanno gede kaaꞌleemmo? Wolqaꞌya, yannaꞌyanna woxeꞌya horoonsiꞌreemmohu jiro iimanso uulla duuꞌnateeti?’

14. Miki lawishshi leellishannonte gede, goofimarchu barruwara heeꞌnoommota leellishshannota Qullaawa Borro taje hiinca hayyo ikkitinohu mayiraati?

¹⁴ Heeꞌnoommohu goofimarchu barruwara ikkinota leellishshanno taje hedanke heeshshote noonke lao soorritara dandiitanno. Miki yinanni rodoo woꞌnaalshi tenne leellishanno. Ise togo yitino: “Layinki dirimi roso gudummati saadate daafira xiinxalla hasiꞌrooomma. Qoleno suwisaancho ikkatenna sabbakkannori roore hasiissannowa haꞌre soqqamate mixo fushshiꞌroomma. Ayyaanaamittetenni gikki yitino jaallaꞌya konne looso loosanni heeꞌrenni ayyaanaamittete mixoꞌya wonshiꞌra dandeemmaronna teꞌee seekke hedeemma gede amaaltinoe. Insa tini alame mulenni baꞌannota qaagiissitinoe. Qoleno haaro alamera lowo saada daafira hegerera xiinxalla dandeemma. Hakko daafira looso afiꞌrate kaaꞌlannoeha shiima yanna giddo ronsanni roso doodhoomma. Kuni loosi woꞌma yanna suwisaancho ikkatenna gedensoonni sabbakkannori roore hasiissannowa Ikuwadoori yinanni gobba haꞌre soqqamate hasiisannoe woxe afiꞌreemma gede kaaꞌlinoe.” Mikinna minaannise xa hatte gobbara woradu looso loosanni no.

15. Mannu dancha duduwo macciishshe adha giwiro hexxo mudha hasiissannonkekkihu mayiraati? Lawishsha kuli. (Misillano lai.)

¹⁵ Mannu umi qara dancha duduwo macciishsha giwiro hexxo mudha dihasiissannonke. Mannu soorramara dandaanno. Hanni Yesuusi rodii Yaaqoobi lawishsha laꞌno. Isi Yesuusi anjesinni kayise lophanna, Buuraminoha ikkanna hattono aye manchino rosiisa dandaannokki garinni rosiisanna laino. Ikkirono, Yaaqoobi lowo diro Yesuusi haꞌrunsaancho ikkikki keeshshino. Yaaqoobi diinaggaawe soqqamanno rosaancho ikkinohu Yesuusi reyotenni kaihu gedensaanniiti!b (Yoh. 7:5; Gal. 2:9) Dancha duduwo macciishsha hasiꞌrannokki fiixinkeranna tenne sokka macciishshe adhinokki mannira hinge hinge kula afidhino wolqa mulluri gede assine laꞌnoonke. Heeꞌnoommohu goofimarchu barruwara ikkinota qaango; hakko daafira sabbakate loosi wiinamme loonsanniho. Insara xa kulattonsari quuxxote qarri hanafihu gedensaanni nafa kaaꞌlansara dandaanno.c

YIHOWA KULANNONKE QAAGIISHSHIRA GALATU NOONKETA LEELLINSHO

16. Yihowa kulanno qaagiishshi kaaꞌlinohehu hiittoonniiti? (“Woloota Kaaꞌlate Horoonsiꞌri” yitanno saaxineno lai.)

¹⁶ Sagaꞌlineemmote ayyaanaamittete sagale giddo gama Qullaawu Maxaafiha xintu halaale horo macciishshe egenninokki mannira qixxeessinannite. Lawishshaho, Sambatu barra shiqqannoti dagate lallawo, jw.org aana fultannoti mite birxichuwanna viidiyubba hattono mannaho ellanni metseetta roore anga Yihowa Farciꞌraasine ikkinokki mannira qixxeessinannite. Ikkirono tenne doogganni afiꞌneemmo qaagiishshi ninkeno kaaꞌlannonke. Kuni qaagiishshi Yihowara noonke baxilli lexxanno gede, Qaalisira noonke ammana kaajjitanno gedenna xinta ikkino halaale wolootaho rosiisate dandoonke woyyeessiꞌneemmo gede kaaꞌlannonke.—Far. 19:7.

17. Qullaawu Maxaafiha xintu roso hiincattohu hiittoo woyite ikkara dandaanno?

¹⁷ Yihowa Farciꞌraasine ikkinoommo daafira, alba huwantoommoha Qullaawu Maxaafi halaale biddi assinanni woyite lowo geya hagiidhineemmo. Ikkirono, halaalu minira dangeemmo gede kaaꞌlinonkeha Qullaawu Maxaafiha xinta ikkino halaaleno lowo geeshsha naandeemmo. Yihowa dirijjite uyitannonke biddishshira hajajama agurre uminke hedo addaxxate fonqolammeemmo woyite, umonke heeshshi assine tenne dirijjite massaganni noohu woꞌmanka dandaannohanna hayyosira taalle nookki Kalaqaancho ikkinota qaaga hasiissannonke. Ninkera woy banxeemmo mannira qarru iillanno woyite, cincineemmore ikkanna Yihowa qarru heeꞌrara fajjinohu mayiraatiro hiinca hasiissannonke. Qoleno yannankenna woxenke ma garinni horoonsiꞌneemmoro hendeemmo woyite, heeꞌnoommohu goofimarchu barruwara ikkinota qaaga hasiissannonke. Yihowa qaagiishshi jawaante ikkonke, loosoho kakkayisonke hattono hayyoota assonke.