1925—Xibbu Diri Albaanni

WOꞌMITUKKINNI KEESHSHITINO HEXXO

Batinye Qullaawu Maxaafi Rosaano 1925 uulla Gannate ikkitanno yite hexxitino. Mayira? Gedensoonni Aliidi Bisi miila ikke soqqaminohu Roduu Alberti Shirooderi togo yiino: “Hatte yannara gattinori buurantinori Kiristoosi haꞌrunsaano Maganu Gashshooti wido ikkate iimira hadhanno. Hattono alba reyitinori ammanantino labballi lawishshaho Abirihaami, Daawitinna wolootu reyotenni kaꞌe uullate aana Maganu Gashshooti hunda mootoolla ikkitanno yine hendeemmo.” Kuni diri goofanni haꞌrita heddinori woꞌminokki daafira mitootu hexxo mudhitino; tini dhagge diꞌꞌikkitannote.—Law. 13:12.

Insa heddinori ikkikki gatirono roore Qullaawu Maxaafi Rosaano sabbakate looso diinaggaabbe loossino; hattono loosa hasiissannohu lowo geeshsha hasiisanno loosi Yihowa daafira farciꞌra ikkitinota huwattino. Hanni insa lowo mannira sabbakate raadoone horoonsidhino gara laꞌno.

BATINYE RAADOONETE XAAWA QANSOONNI

Qullaawu Maxaafi Rosaano 1924 qassinohu WBBR yinannihu raadoonete xaawi dancha guma abbita Chikaago Illinoosi yinanni qooxeessira hakkiinni roore wolqa afiꞌrino xaawa qassino. Konne haaro xaawa QAALE yinoonni. Konne xaawa qansi woyite ijaarshu looso kaaꞌlinohu raadoonete xaawi maandisichi Raafi Lefileri togo yiino; “Qiidu batiꞌrannote hawadi woggara hashsha hashsha QAALE yinanniha konne xaawa addi addi bayicho xeertiꞌre heeꞌranno manni macciishshino.” Lawishshaho 5000 kiilomeetire xeertidhe Allaaskaho Payileeti Isteeshiini yinanniwa heedhannoti mitte maate umo sayinsoonni pirogiraame giddo mitte macciishshitino. Pirogiraame macciishshituhu gedensaanni tini maate raadoonete xaawira loossanno roduuwira jawaachishshannota ayyaanaamittete pirogiraame qixxeessitino daafira galatu sokka borreessitinonsa.

Sadaasa 1, 1925ti Agarooshshu Shae lowo manni macciishshannohu konni xaawi daafira kultanni togo yitino: “QAALE yinannihu kuni xaawi Yunayitidi Isteetisete lowo wolqa afiꞌrino xaawi giddo mittoho. Konne xaawa Yunayitidi Isteetisete Soojjaatinna Galchimi qaccera heeꞌranno manni macciishsha dandaanno. Konni albaanni halaale horo macciishshe egenninokkihu lowo manni konne xaawa macciishsha baxino.”

Tenne yannara Qullaawu Maxaafi Rosaano Kanaadaho raadoone horoonsidhe dancha duduwo sabbakate sharrantanni no. Hakkiinni 1924 Saskachiwaani noohu Saskatuuni yinanni katamira CHUC yinanniha raadoonete xaawa qansi. Kuni xaawi Kanaadaho umo qansoonnihu ammaꞌnote hajo daafira kulanno xaawi giddo mittoho. Hakkiinni 1925 konne shiima raadoonete xaawa wolewa qasa hasiissino. Hakko daafira Agarooshshu Shae Maamari Saskatuuni nooha akkala hintsa hire haaroonse konni xaawi pirogiraame hakko sayinsanni gede assino.

Konne xaawa qansoonni daafira Saskachiwaani qoqqowira sae sae heeꞌrannohu lowo manni mite yee dancha duduwo macciishshino. Lawishshaho mitto xeerto bayicho heedhannoti Girihaami yinanni mancho Pirogiraame macciishshituhu gedensaanni Qullaawu Maxaafi daafira kultanno borro sonkannise gede xaꞌmidhino. Joorji Naashi yinanni rodii hakkawarita qaage togo yiino: “Ise huurose gotti assite xawisse ‘Rosiissenke!’ yitinohu gedeeti; hakko daafira isera Qullaawa Borro Xiinxallo yaannoha woꞌma maxaafa sonkoommose.” Mulenni Girihaami Maganu gashshootiha dancha duduwo xeertowa noo bayicho nafa sabbakkino.

ALBA AMMANNOOMMORE BIDDI ASSA

Badheessa 1, 1925te Agarooshshu Shaera “Daga Ilantu” yaannohu dhagge ikkanno birxichi fulino. Kuni birxichi lowo geeshsha hasiissannoha ikkinohu mayiraati? Qullaawu Maxaafi Rosaano Sheexaaneho iima busha ayyaanu kalaqo amaddinoti illete leeltannokki dirijjite, uullate kayinni kaphu ammaꞌno, daddalunna poletiku uurrinsha amaddino dirijjite noosita affino. Ikkirono konni birxichi widoonni, ammanaminohunna wodanaamu borojjichi Yihowarano dirijjite noosita huwattanno gede kaaꞌlino; tini dirijjite woꞌmunni woꞌma Sheexaanu dirijjitewiinni baxxitinotenna isi dirijjite gibbannote. (Mat. 24:45) Qoleno borojjichu 1914 Maganu Gashshooti xintaminotanna hakko diro iima olu kaeenna Sheexaanenna agaanintesi iiminni tungoonnita, hattono uullate aana calla heedhanno gede assinoonnita xawisino.—Aju. 12:7-9.

Mite Qullaawu Maxaafi Rosaanora konne biddi assinoonni coye ammane adha qarra ikkitinonsa. Hakko daafira konni birxichira togo yitanno hedo no: “Tenne Agarooshshu Shaera fultinote biddi assinoonni hedora sumuu yitannokkiri heedhuro, cincitannore ikkitanno gedenna Yihowara ammanante soqqantanno woyite iso addaxxitanno gede jawaachinsheemmo.”

Ikkirono Biritaaniyaho heeꞌrannohu Toomi Ire yinanni suwisaanchi, roore Qullaawu Maxaafi Rosaanora mayi macciishshaminonsaro kulanni togo yiino: “Roduuwu Ajuuja 12 daafira xawinsoonni hedo lowo geeshsha baxxino. Maganu Gashshooti iima xintaminota huwantummoti konne dancha duduwo wolootaho kulate lowo geeshsha quqquxammoommo. Tini loosonke albinni roore diinaggaambe loonseemmo gedenna Yihowa albillitte dhagge ikkanno coye assara noota huwanteemmo gede kaaꞌlitannonke.”

YIHOWA DAAFIRA FARCIꞌRA

Xaa yannara Yihowa Farciꞌraasine Isayaasi 43:10 seekkite egentino; qummeeshshu, “Kiꞌne . . . doodhoommo soqqamaanoꞌyaatinna naqaashsheꞌyaati” yaanno. Ikkirono 1925 albaanni konne qummeeshsha borruwanke giddo hakkeeshsha qummi diassinanni. Xa kayinni tini gattino. Hakkiinni 1925 Isayaasi 43:10, 12 noo hedo 11 Agarooshshu Shaera xawinsoonni.

Woxawaajje 1925 jeefora Qullaawu Maxaafi Rosaano jawa gambooshshe assiꞌrate Indiyaanaho Indiyaanapolisi yinanni katamira gamba yitino. Attammoonnite gambooshshu pirogiraamera Raazerfordi togo yiino: “Konne gambooshshe dangoommohu Mootichuwiinni . . . . jawaante afiꞌne qanchoho haaro wolqanni isi daafira farciꞌrateeti.” Konni settu barri gambooshshiwa gambooshshe dagginori afidhu faro baala horoonsidhe Yihowa daafira Farcidhanno gede jawaachinshoonni.

Qidaamete barra Woxawaajje 29 Roduu Raazerfordi “Loosoho Kakkayisanno Woshshatto” yitanno lallawo shiqishino. Isi lallawo shiqishi woyite sabbakate looso loosa hasiissannota ikkitinohu mayiraatiro xawisanni togo yiino: “Yihowa mannisira ‘Ani Magano ikkaꞌyara kiꞌne naqaasheꞌyaati’ yiino. Hakkiinni isi mittoreno huluullamikkinni xawise ‘Mootichu doogo biddi asse’ yee hajajino. Mootichu ayyaani noonsarenna isi farciꞌraasine ikkitinore agurranna mannaho doogo biddi assannohu uullate aana wolu manni dino.”—Isa. 43:12; 62:10.

Roduu Raazerfordi lallawo shiqishihu gedensaanni macciishshanni noo mannira “Hexxote Sokka” yitanno borro nabbawino; macciishshanni noo manni baalu tini sokka yitannorira sumuu yiino. Tini sokka keere, “jiro, fayyimma, heeshsho, wolaphonna hegere hagiirre” abbannohu Maganu Gashshoote calla ikkinota kultanno. Tenne sokka batinyu afiinni tirroonni; hattono tiraaktete garinni attammoonni. Shoyilloo miliyoone meddi yitanno tiraakte mannaho elloonni.

Qullaawu Maxaafi Rosaano lowo diro Yihowa Farciꞌraasine yaamante woshshantukkinni keeshshitino. Ikkirono insa Yihowa daafira farciꞌra mageeshshi geeshsha hasiissannotero huwata hanaffino.

HASATTO NOONSARE GALAGALLE MARRE HASAAWISA

Alamete qooxeessira nooti Qullaawu Maxaafi Rosaano kiiro lexxitanni hadhuta, umi qara danchu duduwira hasatto noonsa manna galagalte marte hasaawissanno gede jawaachinshoonninsa. Hexxote Sokka yitanno tiraakte zamachunni ellihu gedensaanni, Buleetiinia yinanni borrora togo yaanno biddishshi fulino: “Borro uyinoonninsakkiha ikkirono Hexxote Sokka yitanno tiraakte adhino manna galagaltine martine hasaawisse.”

Arfaasa 1925 Buleetiini yinanni borrora Tekisaasi Pilaano yinanniwa heeꞌrannohu Qullaawu Maxaafi Rosaanchi togo yiino: “Konni albaanni duucha hinge sabbankoommo qoqqowira noo manna galagalle marre hasaawinse afiꞌnoommo gumi haaru qoqqowira sabbanke afiꞌnanni guma roorannota anfummoti dhagge assiꞌnoommo. Qoqqowinkera noohu mittu shiimu katamira saihu tonnu diri giddo onte hinge sabbankoommo. . . . Muli yannara Henderiski yinanni rodoonna amaꞌya konni katamira heeꞌranno manna galagale mare hasaawisino hattono albinni roore lowo maxaaffa elino.”

Panama yinanni gobbara heeꞌranno suwisaanchi togo yee borreessino: “Umi qara marummo yannara macciishsha giwinohu lowo manni galagale hasaawisate layinkimeeshshonna sayikkimeeshsho marummo yannara macciishshino. Konne diro roore sabbakoommohu konni albaanni hasaawisoommo manna galagale mare hasaawisanniiti hattono dhagge ikkanno guma afiꞌroommo.”

ALBILLITTETE YANNA

Roduu Raazerfordi diru jeefora baalante suwisaanora borreessino sokkara, hakko diro loonsoonni looso xaphi asse kulino hattono albillitte loonsanni lowo xawisino; isi togo yiino: “Sai diro dadillinoha lowo manna sheshifachishate qoosso afidhinoonni. Kuni loosi wodanaꞌne hagiirsiisino . . . . Aananno diro Maganunna Gashshootisi daafira farciꞌrate hattono addinta isi soqqamaano ayeootiro leellishate faro afidhinanni. . . . Baalunku mitteenni huuronke gotti assine woꞌmanka woyite Maganinkenna Mootichinkera guweenyu faarso faarsino.”

Roduuwu 1925 jeefora Birukiliini noo Beeteele halashshate soma fushshidhino. Hakkiinni 1926 dirijjite konni albaanni loosse egentinokkiha jawa ijaarshu looso hanaffanno.