BADHEESSA 30–DOTTEESSA 5, 2026
FAARSO 76 Hagiirsiissannohe?
Halaale Nyammo Afiꞌrino Garinni Coyiꞌri
‘Yihowa halaalu Maganooti.’—FA. 31:5.
GUULCHO HEDO
Halaale woloota kaaꞌlanno garinni coyiꞌra dandiineemmo gara ronseemmo.
1. Yihowa maate wido ikkate maa assa hasiissannonke?
MITTU ammanate rodiinke ledo mite yine xaandummoro duucha woyte mimmito xaꞌmineemmo xaꞌmuwa giddo mitte, “Halaale macciishshoottohu hiittoonniiti?” yitannote. Mitootu tenne xaꞌmora dawaro “Lophoommohu halaalu mineeti” yite qoltanno. Wolootu halaalu minira dagginohu muli yannara ikkinota coydhara dandiitanno. Hatto yine qolleemmohu Maganu Qaali giddo noo halaali garinni heeꞌneemmohuraati. Mayra? Korkaatuno Yihowa maate wido ikkineemmohu halaale banxeemmotanna konni halaali garinni heeꞌneemmota leellinshummoro calla ikkinota anfoommo. Tenne assineemmoti mitte doogo coyiꞌneemmorinninna assineemmorinni ammanammoommore ikkate.—Fa. 15:1-3.
2. (a) Yesuusira hiittoo suꞌmi noosi? (b) Yesuusi rosiisino halaali mannu hiikkanno gede assino?
2 Yesuusi woꞌmanka woyte halaale coyiꞌrino. Diinnasi isi coyiꞌrannore baxxannokkiha ikkiro nafa, halaale coyiꞌrannota ammante adhitino. (Mat. 22:16) Yesuusi, isi rosiisanno halaali abbanno guma kulanni togo yiino: “Ani dayommohu labbaa beetto annisiwiinni, meya beetto amasewiinni, beettu beettono ballosewiinni badammoraati.” (Mat. 10:35) Yesuusi, isinna haꞌrunsaanosi sabbakkanno sokka mannu giwara dihasiꞌranno; kayinni isi togoori ikkara dandaannota afino. (Mat. 23:37) Isi kulanno sokka manna lamewa baddannota afino; mitu Qullaawu Maxaafi halaale baxanno mitu dibaxanno.—2 Te. 2:9-11.
3. Konni birxichira maa xiinxallineemmo?
3 Duuchu manni baxannokkiha ikkiro nafa woꞌmanka woyte halaale coyiꞌne Yesuusi gede ammanammoommore ikkate sharrammeemmo. Coyiꞌneemmori mito manna hanqisara dandaannoha ikkiro nafa, Qullaawu Maxaafi halaale sabbankeemmo hattono rosiinseemmo. Hatto yaa kayinni rosiinseemmo halaale ma garinninna mamoote coyiꞌneemmoro dihendeemmo yaateni? Hatto yaa diꞌꞌikkino! Konni birxichira balanxe aante noote qara xaꞌmora dawaro afiꞌneemmo: Halaale afiꞌra dandiineemmohu hiikkiinniiti? Hakkiinni, aante noote tenne ledo xaadooshshe afidhino xaꞌmora dawaro afiꞌneemmo: Halaale mayra, hiittoonninna mamoote coyiꞌra hasiissannonke? Kuri xaꞌmuwara qollanni dawaro halaale shaqqillunni yaano hayyotenninna maltino yannara coyiꞌrate dandoonke woyyeessiꞌneemmo gede kaaꞌlitannonke.
HALAALE AFIꞌRA DANDIINEEMMOHU HIIKKIINNIITI?
4. Yihowa halaalu Buichooti yineemmohu mayraati?
4 Yihowa halaalu Buichooti. Isi coyiꞌrannori baalu halaaleho. Lawishshaho, isi garanna gara ikkinokkiri daafira kulannonkeri halaaleho. (Fa. 19:9; 119:142, 151) Albillittete yanna daafira coyiꞌrinori baalu woꞌmanno. (Isa. 55:10, 11) Isi horontanni eino qaale wonshikkinni digatanno. (Kir. 23:19) Isinni, Yihowa kaphara didandaanno! (Ibi. 6:18) Hakko daafira Yihowa “Halaalu Magano” yaa garankolla.—Fa. 31:5.
5. “Halaalu Magano” afiꞌra diqarrissannote yineemmohu mayraati? Xawisi. (Soqqamaasinete Looso 17:27)
5 Mitu manni, “Halaalu Magano” Yihowa afiꞌra qarrissannote yee hedannoha ikkirono hatto yaansa digaraho. Isi nooha ikkasi leellishshannoti qooxeessinkera batinye taje no. (Rom. 1:20) Phaawuloosi Ateenaho heeꞌrannohu lowo roso rosinohu Girikete mannira coyiꞌranni Maganu iso ‘afiꞌnammosira’ hasiꞌrannotanna “isi ninke mitti mittinkewiinni xeertiꞌrinoha” ikkinokkita coyiꞌrino. (Soqqamaasinete Looso 17:27 nabbawi.) Isinni, Yihowa halaale hasiꞌrannoha umonsa heeshshi assanno manna umisiwa abbanno.—Yoh. 6:44.
6. Qullaawu Maxaafi giddo noohu mitu halaali hiikkonneeti? Konne halaale naadattohu mayraati?
6 Yihowa afiꞌra dandiineemmoti mitte doogo Qullaawa Maxaafa xiinxallate. Konne maxaafa borreessitinore qullaawu ayyaani massaginonsa. (2 Ph. 1:20, 21) Hakko daafira, Qullaawu Maxaafi giddo noori baalu halaalehonna addaxxinannireeti. Lawishshaho, Qullaawu Maxaafi kalqe alamenna uullate aana noori heeshsho afiꞌrinori kalaqamino gara kulannore addaxxa dandiineemmo. (Kal. 1:1, 26) Hattono ninke baalunku cubbaataamma ikkinoommohu, qarru batiꞌrinohunna reyneemmohu mayraatiro kulannore addaxxa dandiineemmo. (Rom. 5:12; 6:23) Yihowa Beettisi widoonni ‘kaphu anni’ Sheexaanu abbino gawajjo baala hunannota kulannotano woꞌmunni woꞌma addaxxa dandiineemmo. (Yoh. 8:44; Rom. 16:20) Qoleno, Qullaawu Maxaafi Yesuusi bushuulle hunannota, reytinore kaysannota, uulla gannate assannotanna guuta ikkineemmo gede kaaꞌlannonketa kulanno hexxono addaxxa dandiineemmo. (Yoh. 11:25, 26; 1 Yo. 3:8) Yihowa dhagge ikkitanno qoosso uynonke! Isi halaale rosiisinonke hattono konne halaale wolootaho rosiinseemmo faro faninonke.—Mat. 28:19, 20.
HALAALE COYIꞌNEEMMOHU MAYRAATI?
7-8. Halaale coyiꞌneemmo gede kakkaysannonkeri maatiro heda hasiissannonke? Lawishsha kuli. (Maarqoosi 3:11, 12) (Misillano lai.)
7 Aleenni kullinte gede Yihowa maate wido ikka hasiꞌnummoro halaale coyiꞌra hasiissannonke. Ikkirono, iso hagiirsiisate noore coyiꞌratenni sainore assa hasiissannonke. Yihowa halaale coyiꞌranke calla ikkikkinni halaale coyiꞌneemmo gede kakkaysinonkeri maatirono laꞌꞌanno. Hanni Yesuusi uullate aana soqqamanni noo yannara ikkinore laꞌno. (Maarqoosi 3:11, 12 nabbawi.) Yesuusi Galiilu Baari mule sabbakanni heeꞌreenna lowo manni isiwa gamba yiino. Konni manni giddo durriisu amadinori mitootu Yesuusi albaanni ubbe “Ati Maganu Beettooti” yitanni raartino. Durriissa Yesuusi daafira halaale coydhinohu mayraati? Mixonsa mannu ammanannonsanna Yihowara soqqama aguranno gede assate. Durriissa coydhinori halaaleho; kayinni insa tenne assitinohu umonsa calla baxxannore ikkitinohuraati. Insa Yesuusa doga woy hagiirsiisa didandiitino. Isinni, Yesuusi durriissa isi daafira sabbakkannokki gede hajajino.
8 Tenne xaggenni maa ronseemmo? Yihowa halaale coyiꞌranke calla ikkikkinni halaale coyiꞌneemmo gede kakkaysinonkeri maatirono laꞌꞌanno. Hakko daafira, halaale dancha giddonni kaꞌne rosiisanna wolootu ayirrinye ninkera ikkikkinni Yihowara uytanno gede assa lowo geeshsha hasiissannote!—Mat. 5:16; Soqqamaasinete Looso 14:12-15 ledo heewisiisi.
Halaale rosiisatto woyte mannu aye illachishanno gede assatto? (Gufo 7-8 lai)
9. Maa assa qoropha hasiissannonke? Mayra?
9 Hanni uminkera ayirrinye hasiꞌneemmokki gede qoropha hasiissannonkeha wole coye laꞌno. Mittu qoosso noosi rodii kulinonke fojo wolootaho kulloommo yine hendo. Insa gedensoonni kulloommonsari halaale ikkinota affuro, dhagge assidharanna fojo ikkinoha lowo coye anfoommohu gede assite heddara dandiitanno. Tini, insa ninke naaddannonke gede assitannoha ikkara dandaanno; kayinni Yihowa dihagiirsiissanno. (Law. 11:13) Mayra? Korkaatuno, kulloommonsari halaale ikkirono tenne kulleemmonsa gede kakkaysinonkeri digaraho.
HALAALE COYIꞌRA HASIISSANNONKEHU HIITTOONNIITI?
10. ‘Nyammo afiꞌrinore’ coyiꞌrate yaa mayyaate? (Qolaasiyaasi 4:6)
10 Qolaasiyaasi 4:6 nabbawi. Soqqamaasinchu Phaawuloosi Qolaasiyaasi heeꞌranno Kiristaani coyiꞌrannori “ayewoyiteno nyammo afiꞌrinoha” ikka hasiissannosita qaagiissinonsa. Hatto yaa mayyaate? Girikete afiinni tini yaatto, woloota kaaꞌlannore calla ikkikkinni shaqqillunninna baxisanno garinni coyiꞌra hasiissannonketa leellishshannote.
11-12. Halaale qorophine rosiisa hasiissannonkehu mayraati? Lawishsha kuli. (Misillano lai.)
11 Wolootaho halaale rosiinseemmo woyte Phaawuloosi nyammo afiꞌrinore coyiꞌneemmo gede kulino amaale haꞌrunsa hasiissannonke. Qullaawu Maxaafi giddo noo halaale lubbonna ayyaana baddannote iibbado bisenni lawinsoonni. Togo yaa giddoydi hedonkenna mitto coye assate kakkaysinonkeri maatiro bande anfanni gede assanno yaate. (Ibi. 4:12) Kayinni Qullaawa Maxaafa hayyotenni horoonsiꞌneemmokkiha ikkiro, hasiisikkinni woloota koffi assinammoranna gibbo kalaqantanno gede assinammora dandiineemmo. Togoori kalaqamara dandaannohu hiittoonniiti?
12 Hanni tenne hedi. Soqqansho fulle heeꞌne ganye misilla magansiꞌrannohunna maatesi ledo Gannanna Faasika ayirrisa baxanno manchinni xaandummo. Qullaawa Maxaafa horoonsiꞌne heeshsho afidhinokki misilla magansiꞌra gowwimma ikkitinota hattono Gannunna Faasiku kaphu maganna magansiꞌranno manni ayirrisanno ayyaana ikkinota leellinshammosira dandiineemmo. (Isa. 44:14-20; 2 Qo. 6:14-17) Tenne kulleemmosihu isi ledo umo xaande hasaambeemmo woyte ikkiro, kullanni heeꞌnoommosiri halaaleho; kayinni Maganu Qaale hayyotenni dihoroonsiꞌnoommo.
Halaale hayyotenni rosiisa dandaattohu hiittoonniiti? (Gufo 11-12 lai)a
13. Coyiꞌneemmo coy maxinetenni cuukkinoonniha ikkanno gede assa dandiineemmohu hiittoonniiti?
13 Qoleno Phaawuloosi coyiꞌneemmo coy maxinetenni cuukkinoonnihu gedeeha ikka hasiissannota kulino. Phaawuloosi hatto yaasi halaale maaxate woꞌnaala hasiissannonke yaa diꞌꞌikkitino. Hatteentenni isi macciishshannonke mannira halaale baxisanno garinni kulate, coyiꞌneemmo coye maxinetenni “cuukkinoonnihu” gedeeha assiꞌneemmo gede jawaachishanni noonke. (Iyo. 12:11) Tenne assa ayirritankera dandiitanno. Lawishshaho, ninkera coommitinonke sagale wolootahono coommitanno yine hendeemmoha ikkara dandaanno. Hatteente gede ninke coyiꞌneemmo gara baalunku manni baxanno yine hendeemmoha ikkara dandaanno. Kayinni coy dihattooti. Lawishshaho, mitu budira mannu hasaawanni noohu diro insanni rooranno manni ledo ikkiro nafa, hedinore xaaddote coyiꞌranno. Wolu budira togoo hasaawi ayirrinye xeinoha woy koffi assannoha nafa ikkara dandaanno. Phaawuloosi ‘mittu mittunku manchira dawaro qola hasiissannonke gara’ afa hasiissannonketa coyiꞌrino. Togo yaa coyiꞌneemmo coy ninkera coommanno garinni woy budinke garinni ikkikkinni macciishshannonke mannira coommannoha ikkanno garinni cuukkaminoha ikka hasiissannosi yaate.
HALAALE MAMOOTE COYIꞌRA HASIISSANNONKE?
14. Yesuusi uullate aana noo yannara rosaanosira afinore baala rosiisinonsa? Xawisi.
14 Yesuusi woꞌmanka woyte haꞌrunsaanosira nyammo afiꞌrinore coyiꞌranno; hattono isi shaqqillunni lowo coye rosiisinonsa. (Maq. 6:34) Ikkirono, insa rosa hasiissannonsahu lowo coy no. Yesuusi insara afinoha baalanka coye rosiisate diwoꞌnaalino. Isi dhukansa afino. Isi, insara mito halaale rosate maltino yanna hasiissannonsata afino. Isinni, insa konne halaale duqqa dandiitannokkita coyiꞌrino. (Yoh. 16:12) Ninke tennenni maa ronseemmo?
15. Qullaawu Maxaafi rosaanonkera anfoommore baala mitte hinge rosiisa hasiissannonke? Xawisi. (Lawishsha 25:11) (Misileno lai.)
15 Yesuusi lawishshi leellishannonte gede, halaale anfoommo yaa anfoommore baala mitte hinge rosiisa hasiissannonke yaa diꞌꞌikkitino. Yesuusi lawishsha haꞌrunsa dandiineemmohu hiittoonniiti? Mannu noo gara heda hasiissannonke. Hanni maatesi ledo Gannanna Faasika ayirrisa baxanno manchi daafira lende laꞌno. Tini ayyaanna kaphu maganna magansiꞌranno manni ayirrisannotanna Magano hagiirsiissannokkita ikkitinota anfoommo. Hanni Ganna ayirrinsanni yanna iillitara mitte woy lame lamala gatte heedheenna konni manchira Qullaawa Maxaafa xiinxallisa hanafootto yine hendo. Qullaawu Maxaafi kaphu maganna magansiꞌranno manni ayirrisanno ayyaanna daafira mayyaannoro leellinshummosironna isi Ganna ayirrisa baychonkonni agura hasiissannosita kullummosiro, nyammo afiꞌrinore coyiꞌnanni heeꞌnoommo yaa dandiinanni? Hige mite rosaano Qullaawu Maxaafinni rossinore baala baychonkonni haꞌrunsitara dandiitanno. Wolootaho kayinni hedonsanna assootensa biddi assiꞌrate yanna hasiissannonsa. Qullaawu Maxaafi rosaanonkera afa hasiissannonsare maltino yannara yaano duqqa dandiitanno yannara kullummonsaro, ayyaanaamittetenni lophitanno gede kaaꞌlinammonsara dandiineemmo.—Lawishsha 25:11 nabbawi.
Halaale mamoote coyiꞌrattoronna mageeshshiha coyiꞌrattoro murate Yesuusi lawishsha haꞌrunsi (Gufo 15 lai)
16. Qullaawu Maxaafi rosaanonke ‘halaalu giddo millissanno’ gede kaaꞌla dandiineemmohu hiittoonniiti?
16 Wolootu Yihowa daafira rossanno gede kaaꞌlate geeshsha hagiirsiisannonkeri dino. Aane noore assinummoro, insa ‘halaalu giddo millissanno’ gede kaaꞌla dandiineemmo: Woꞌmanka woyte dancha lawishsha ikkensa. (3 Yo. 3, 4) Heeshshoꞌne Maganu Qaali giddo noo hexxo ammantinannita leellishshannoronna teꞌee buuxidhe. Halaale coydhinanni gede kakkaysannoꞌneri maatiro laydhe. Halaale rosiissinanni woyte maltino yannara shaqqillunni nyammo afiꞌrinore coydhe. Hattono ayirrinye baala Yihowara uyiyye. Hatto assitiniro, halaalu Maganire Yihoware ikkaꞌne leellishshinanni.
FAARSO 160 “Dancha Duduwo”!
a MISILETE XAWISHSHA: Umi fotora, roduu manchu mine noota Gannu haqqicho lae Gannu kaphu maganna magansiꞌranno manni ayirrisanno ayyaana ikkinota kulanno birxicho manchoho leellishanni no. Layinki fotora, roduu minu annira annuwa kaaꞌlitanno hedo amadino birxicho leellishanni no. Lamunku hasaawi giddo roore kaaꞌlannohu hiikkonneeti?