Wodo Hasiissannonkehu Mayraati?

1-2. Gatisannonkehu hasiisannohu mayraati? (Rooma 7:22-24) (Misileno lai.)

HANNI tenne hedi. Mitto mancho minu aanaho toe amadino. Isi lubbotenni no; kayinni hakkiinni umisinni fula didandaanno. Isi kaaꞌlo afiꞌrate raaranna gate fulannota hexxa agurranna asse afannori woluri dino.

² Ninke mittu mittunkuno hakko manchi gedeeti. Ma garinni? Addaami Kalaqaanchisira finqili woyte cubbaataamo ikkino. Gedensoonni isi oososira cubbo ragisiisino. Hakko daafira mannu sircho baala ragiꞌrino cubbi amadino; cubbu abbanno gawajjo qole uminkenni hooꞌla didandiineemmo. Soqqamaasinchu Phaawuloosi Roomaho heeꞌranno Kiristaanira borreessino sokkara cubbu abbinonke gawajjo dancha gede asse xawisino. (Rooma 7:22-24 nabbawi.) Isi “Tenne reyowa massitannoe mannimmawiinni ayi gatisannoe?” yee eeggifate huucciꞌrino. Phaawuloosi reyonniwa massannohu ragiꞌrino cubbi woshshaade amadinosi. (Rom. 6:23) Ninkeno kuni cubbi woshshaade amadinonke. Konnira gatisannohu hasiisannonke!

3. Wodo gatissannonkehu hiitte doogganniiti?

³ Phaawuloosi cubbu gawajjanno gara calla kule diagurino. Isi “Tenne reyowa massitannoe mannimmawiinni ayi gatisannoe?” yee xaꞌmihu gedensaanni, umisi dawaro qolanni “Yesuusi Kiristoosi widoonni gatisannoe Magani galatamo!” yiino. (Rom. 7:25) Phaawuloosi coyiꞌranni noohu Yesuusite wodote kakkaloa daafiraati. Tini kakkalo (1) cubbinkera maaro afiꞌneemmo gede, (2) cubbinkenni hurreemmo gedenna (3) Kalaqaanchinke ledo araarammeemmo gede assite gatissannonke. Tenne hedo xiinxallineemmo woyte “hexxo aanno Magani” Yihowara noonke baxilli lexxanno. (Rom. 15:13) “Wodo ikke wolaphineemmo gede” assinonkeha Yesuusano albinni roore naandeemmo.—Qol. 1:14.

WODO CUBBINKERA MAARO AFIꞌNEEMMO GEDE ASSITANNO

4-5. Baalunkura wodo hasiissannonkehu mayraati? (Rosiisaancho 7:20)

⁴ Cubbinkera maaro afiꞌrate wodo hasiissannonke. Guuntete xeꞌne noonsa manni baalu coyiꞌrannorinni woy assannorinni cubbo loosanno. (Rosiisaancho 7:20 nabbawi.) Mitu cubbi jawaho. Lawishshaho, Muse Seeri foorinohanna manna shiinoha shine qorichinshanni gede kulanno. (Lew. 20:10; Kir. 35:30, 31) Hige batinyu cubbi konni cubbi gede jawa ikka hoogara dandaanno; ikkirono cubboho. Lawishshaho faarsaanchu Daawiti, “Asseemmore baala qorophotenni asseemmo; arrawiꞌyanni sao dicoyiꞌreemmo” yiino. (Fa. 39:1) Addaho, mito woyte coyiꞌneemmori nafa cubbo ikkara dandaanno.—Yaq. 3:2.

⁵ Hanni konni albaanni coyiꞌroottorenna assoottore hedi. May coyiꞌralla hoogo yaatto gede assannohere wolootaho coydhe egennootto? Gaabbatto gede assitannohe soꞌro loosse egennootto? Lamente xaꞌmora ee yite qolattoti dihuluullissannote. Qullaawu Maxaafi togo yaanno: “Cubbu dinonke yine coyiꞌneemmoha ikkiro, umonke donganni heeꞌnoommo; halaaluno giddonke dino.”—1 Yo. 1:8.

6-7. Yihowa cubbonke gatona yaannohu maa kaima assiꞌreeti? (Misileno lai.)

⁶ Yihowa cubbonke gatona yaannohu wodo kaima assiꞌreeti. (Efe. 1:7) Ikkirono, togo yaa Yihowa loonsoommo cubbo lashshi asse aguranno yaa diꞌꞌikkitino. Yihowa cubbo loonsammora dihasiꞌranno. (Isa. 59:2) Isi taashshosi guuta ikkitino daafira cubbonke gatona yaate kaima ikkannori heeꞌranno gede assino.

⁷ Muse Seeri Israeele cubbinsara maaro afiꞌrate, saadate kakkalo shiqishshanno gede hajajanno. (Lew. 4:27-31; 17:11) Tini kakkalo taalle nookkite Yesuusi Kiristoosi kakkaloranna isi kakkalo abbitanno atootira caaleho. Yesuusi kakkalo Yihowa cubbonke gatona yaanno gede xinta ikkitanno. Phaawuloosi Qorontoosi heeꞌranno Kiristaanira borreessino sokka leellishshannonte gede, isi Kiristoosi kakkalo afidhino waaga huwatino. Phaawuloosi insa alba assitinoha busha coye kulihu gedensaanni togo yiino: “Mootichu Yesuusi Kiristoosi suꞌminninna Maganinke ayyaaninni hayishshantine keeraaꞌmitinoonni, qullaawoota ikkitinoonni hattono keeraanote yaamantinoonni.”—1 Qo. 6:9-11.

8. Tayxehu Qaagooshshu Ayyaanira qixxaawatto woyte maa heda dandaatto?

⁸ Tayxehu Qaagooshshu Ayyaanira qixxaawatto woyte, Yihowa maaro kaaꞌlitannohe gara hedate yanna gaaꞌmi. Lawishshaho, wodo baantoonnihe daafira loosootto cubbira maaro eittohu gedensaanni ateneeto bushiishshanni yaada dihasiissannohe. Cubbokki gatona yinoonniheta ammane adha qarralla ikkituhe? Ateneetira togo yaattoha ikkara dandaanno: ‘Yihowa gatona yaannoeta afoommo; kayinni aneneeto gatona yaa didandeemmo.’ Togoori macciishshamannoheha ikkiro tenne hedi: Cubbo gatona yaannohu Yihowaati; qoleno isi yoo yaanno gede biilloonye Beettisira uyno. Yihowa maarosi afiꞌrannohu ayetiro muꞌrate qoosso atera woy wolu aye manchirano diuyno. Qullaawu Maxaafi togo yaanno: “[Yihowa] umisi xawaabbaho noonte gede ninkeno xawaabbu giddo millinseemmoha ikkiro, . . . Yesuusi mundee cubbu baalunni keereensitannonke.” (1 Yo. 1:6, 7) Wole Qullaawu Maxaafi roso addaxxineemmonte gede tenneno addaxxa dandiineemmo. Wodo Yihowa cubbonke gatona yaanno gede kaima ikkitino hattono Qaalisi, isi ‘cubbo agurannoha’ ikkinota kulanno.—Fa. 86:5.

WODO CUBBINKENNI HURREEMMO GEDE ASSITANNO

9. Busha assooteno agurranna cubbo yaanno qaali wolere maa kulanno? (Faarso 51:5)

⁹ Qullaawu Maxaafi giddo cubbo yaanno qaali assoote calla ikkikkinni ilamummo woyte ragiꞌnoommota guuntete xeꞌneno leellishanno. (Faarso 51:5 nabbawi.) Tini xeꞌne gara ikkinokkire assineemmo gede calla ikkikkinni dhibbaho, geedhimmatenna reyote tugganno laanfe heedhannonke gede assitanno. Tini horo cubbo loosse egentinokki qaaqquulli dhiwantannohunna reytannohu mayraatiro huwanteemmo gede kaaꞌlitannonke. Qoleno bushu mannino danchu mannino dhiwamannohunna reyannohu mayraatiro huwanteemmo gede assitannonke. Korkaatuno Addaami sirchi baalu cubbo ragiꞌrino.

10. Addaaminna Heewani cubbu gawajjinonsahu hiittoonniiti?

¹⁰ Hanni umi minaannanna minaama cubbu gawajjinonsa gara hedi. Tini insa giddoydi keere hoogganno gede assitinonsa. Addaaminna Heewani finqiltuhu gedensaanni Maganu seera diiga abbitanno guma baychonkonni mixxitino; kuni seeri “wodaninsa giddo borreessamino” seeraati. (Rom. 2:15) Addaaminna Heewani uminsara noonsa lao soorrantinota wodanchitino. Insa bisonsa diphanna jaddo loosinohu gede Kalaqaanchinsa albinni maaxama hasiissinonsa. (Kal. 3:7, 8) Addaaminna Heewani mite yite insaneeto bushiishshannore, yaaddannore, beꞌe yitannore, xissiisidhannorenna saaltannore ikkitino. Addaaminna Heewani reyta geeshsha togoo hedo gawajjitannonsa.—Kal. 3:16-19.

11. Cubbu gawajjannonkehu hiittoonniiti?

¹¹ Cubbu umi minaannanna minaama gawajjinte gede ninkeno gawajjannonke. Guuntete xeꞌne yaandeemmonna xissiisiꞌneemmo gede assitannonke. Heeꞌnoommo gara woyyeessate aye gedeno woꞌnaallummoro, iillannonke qarra uminkenni calla tira didandiineemmo. Mayra? Korkaatuno Qullaawu Maxaafi kulannonte gede “haafu coyira” saꞌne aamammoommo. (Rom. 8:20) Ninke mittu mittunku calla ikkikkinni mannu baalunku haafu coyra sae aamamino. Lawishshaho, hanni mannu qooxeessu daafamannota agarate, jaddo gargarate, buxima hunatenna dagate mereero keere kalaqate sharramanno gara hedi. Insa aye geeshsha sharranturono konne qarra tira didandiitino. Wodo cubbunni gatissankera dandiitannohu hiittoonniiti?

12. Wodo hiitti hexxo heedhannonke gede assitino?

¹² Wodo baantoonninke daafira “kalaqamu sholate borojjimmanni” fulanno gede assitanno hexxo afiꞌnoommo. (Rom. 8:21) Maganu abbannote haaro alamera wodote qixxaawonni woꞌmunni woꞌma horo afiꞌneemmo woyte, ordunna surrete fayyimma heedhannonke; qoleno ninkeneeto dibushiinsheemmo, diyaandeemmo, beꞌe diyineemmo, dixissiisiꞌneemmo woy disaalleemmo. Tenneno aguranna baatto daafantannokki gede agaratenna keere heeꞌrate sharrammeemmo sharro haafa diꞌꞌikkitanno; woxxinonkehunna ‘Keeru Roorrichi’ Yesuusi Kiristoosi gashshannonke daafira qinaannonke.—Isa. 9:6, 7.

13. Tayxehu Qaagooshshu Ayyaanira qixxaawatto woyte wolere maa heda dandaatto?

¹³ Hanni cubbunni gatakki kaaꞌlitannohe gara hedi. Barru baala goxoottowiinni kaꞌꞌatto woyte tashshi yaannohe; ati woy baxatto manni dihudidhinanni, didhiwantinanni woy direytinanni; hakko daafira yaachishannoheri diheeꞌranno. ‘Lubbonkera markaawete cifichi gede ikkitinota huluullammannikkita kaajjado hexxo’ seekkite cuꞌmiꞌrittoro xa nafa keere heeꞌra dandaatto. (Ibi. 6:18, 19) Markaawete cifichi yowolo milli yitannokki gede assannonte gede, hexxo ammanakki kaajjado ikkitanno gedenna xaa yannara iillannoheha aye qarrano dandiite saꞌꞌatto gede kaaꞌlitannohe. Yihowa “woꞌmu wodaninni hasidhannosire baꞌraasannoha ikkinota” addaxxa dandaatto. (Ibi. 11:6) Xa sheshonna albillittete hexxo afiꞌroottohu wodo baantoonnihe daafira callaati.

WODO YIHOWA LEDO ARAARAMMEEMMO GEDE ASSITANNO

14. Cubbu Kalaqaanchinke ledo noonke jaalooma gawajjinohu hiittoonniiti? Mayra?

¹⁴ Addaaminna Heewani cubbo loossuhunni kayisse mannu ooso Maganuwiinni xeertidhino. Wole agurina Qullaawu Maxaafi mannu ooso baala Maganu diinna ikkitinota kulanno. (Rom. 8:7, 8; Qol. 1:21) Mayra? Korkaatuno Yihowa guuta biddissa fushshannoha ikkino daafira, cubbo lashshi asse diaguranno. Qullaawu Maxaafi Yihowa daafira togo yaanno: “Illekki lowo geeshsha keeraancho ikkitinohura busha coye dilaꞌanno. Atino busha coye assinanna laꞌe dicincatto.” (Imb. 1:13) Konni garinni cubbu mannunna Maganu mereero lowo xeertinyi heeꞌranno gede assino. Yihowa ledo araarama hoongummo geeshsha ninke giddo isi ledo jaalooma kalaqiꞌrara dandaannohu dino. Addaho, wodo Yihowa ledo araarammeemmo gede assitannonke.

15. Yesuusi reyo mannu ooso galagalte Yihowa ledo jaalla ikkitanno gede assitinohu hiittoonniiti?

¹⁵ Qullaawu Maxaafi Yesuusi “cubbinkera keeraaꞌmate kakkalo ikke [kakkalaminota]” kulanno. (1 Yo. 2:2) Yesuusi reyo mannu ooso galagalte Yihowa ledo jaalla ikkitanno gede assitinohu hiittoonniiti? Yesuusi reyo, guutu Maganinke Yihowa mannu ooso ledo keere kalaqanno gede xinta ikkitino. (Rom. 3:23-26) Yihowa Kiristoosi reyara albaanni iso ammanante magansidhinore nafa keeraanote gede asse kiirinonsa. (Kal. 15:1, 6) Mayra? Isi hatto assinohu albillitte shiqqanno wodo kaima assiꞌreeti. Yihowa, Beettisi Yesuusi wodo baatannota horo dihuluullamino. (Isa. 46:10) Wodo mannu Maganu ledo araaramanno faro fantino.

16. Tayxehu Qaagooshshu Ayyaanira qixxaawatto woyte wolere maa heda dandaatto? (Misileno lai.)

¹⁶ Hanni Maganu ledo araarama kaaꞌlitannohe gara hedi. Lawishshaho, Yesuusi rosiisinonte gede Yihowa “Annanke” yite woshsha dandaatto. (Mat. 6:9) Mito woyte isinni Yihowa “Jaalaꞌya” yite woshsha dandaatto. Yihowa “Annanke” woy “Jaalanke” yine woshshineemmo woyte, iso lowo geeshsha ayirrisanna umonke heeshshi assa hasiissannonke. Mayra? Korkaatuno cubbaataamma ikkinoommo daafira uminkenni Yihowawa gamba yaa didandiineemmo. Yihowa ledo jaalooma kalaqiꞌra dandiinoommohu wodo baantoonninke daafira callaati. Yihowa, “Kiristoosi qarru haqqi aana dunino mundee widoonni keere kalaqe . . . isiniiti ledo [araarsinonke].” (Qol. 1:19, 20) Cubbaataamma ikkinummorono xaa yannara Yihowa ledo jaalooma kalaqiꞌra dandiinoommohu iseraati.

WODO YIHOWA MAARO LEELLISHSHANNO

17. Wodo Yihowa maaro leellishshannohu hiittoonniiti? (Efessooni 2:4, 5)

¹⁷ Wodo Yihowa “maarote dureessa” ikkinota leellishshanno. Isi, “reyine heeꞌnoommo yannara nafa heeshshonnire” assinonke. (Efessooni 2:4, 5 nabbawi.) “Hegere heeshshowa massannohu suwashshu wodani noonsari”, ragiꞌnoommo cubbi woshshaadote gede qalxe amadinonsatanna gatisannonsahu hasiisannota huwattino daafira kaaꞌlo afiꞌrate raartanno. (Soq. 13:48) Yihowa danchu duduwi widoonni insa Isonna Beettosi Yesuusa affanno gede asse raarensara dawaro qolanno. (Yoh. 17:3) Sheexaanu Addaaminna Heewani cubbo loossino daafira, Maganu hedinore agurino yee hedinoha ikkiro soꞌrino.

18. Wodote daafira hiincineemmo woyte hiittenne hajo qaaga hasiissannonke?

¹⁸ Wodo kaaꞌlitannonke gara hiincineemmo woyte mitte jawa hajo qaaga hasiissannonke. Wodo ninke kaaꞌlitara qixxeessinoonni qixxaawo gede assine calla laꞌꞌantenni, Sheexaanu Edenete kaashshu basera kaysino xaꞌmora dawaro qolate Yihowa horoonsiꞌranno doogo ikkitinotano qaaga hasiissannonke. (Kal. 3:1-5, 15) Yihowa wodote widoonni suꞌmasi qullaawanna minshe nookkiha ikkanno gede assanno. Qoleno ninke cubbunna reyotenni gatise baxannonke Magano ikkinota leellishino. Hakkiinni saeno cubbaataamma ikkinummorono eltosinni ninkeno Sheexaanu kaysino xaꞌmora dawaro qolleemmo gede fajjinonke. (Law. 27:11) Wodo naadattota leellisha dandaattohu hiittoonniiti? Aananno birxichira tenne xaꞌmora dawaro qollanni.