Wodote Galatu Nooheta Leellisha Dandaattohu Hiittoonniiti?

1-2. Yesuusiti wodote kakkalo maa assineemmo gede xixxiibbannonke? Mayra? (2 Qorontoosi 5:14, 15) (Misileno lai.)

MINU toe amadeennahe mittu manchi hakkiinni gatise fushshihero, konni manchira galata qoꞌla hasiissannoe yite dihedatto? Wolootuno gatte fultinoha ikkiro nafa, kuni manchi heeshshokki gatisinoheta mulluri gede assite laꞌꞌattokkita leellishate ati galata qoꞌla hasiꞌrattoha ikkara dandaanno.

² Sai birxichira ronsummonte gede, ragiꞌnoommo cubbi abbanno gawajjonni uminkenni gata didandiineemmo. Ikkirono Yesuusiti wodote kakkalo (1) cubbinkera maaro afiꞌneemmo gede, (2) guuntete xeꞌnenni woꞌmunni woꞌma hurate hexxo heedhannonke gedenna (3) Maganu ledo araarammeemmo gede assite gatissannonke. Hakko daafira Yihowa abbannote haaro alamera hegerera heeꞌrate hexxo noonke. Addanko, wodo Yesuusi guuta mancho ikke ilamara lowo diri albaanni nafa manna baxannota leellishshanno. (Law. 8:30, 31) Soqqamaasinchu Phaawuloosi “Kiristoosi baxilli xixxiiwannonke” yee borreessino. (2 Qorontoosi 5:14, 15 nabbawi.) Hatto yaa Yesuusi baxillira galatu noonketa leellisha hasiissannonke yaate; qoleno isita wodote kakkalo mulluri gede assine laꞌꞌa dihasiissannonke.

3. Mittu mittunku manchi wodote galatu noosita leellishanno gari babbaxxara dandaannohu mayraati?

³ Wodote galatu nooheta leellishate maa assa dandaatto? Ati qolatto dawaronna wolu manchi qolanno dawaro mitte ikka hooggara dandiitanno. Hanni hatto yineemmohu mayraatiro afate sasu manni mitto baycho mare iillate qixxaawino yine hendo; kayinni mittu mittunku kaꞌannohu addi addi quchuminniiti. Insa heddinowa iillate addi addi doogo widoonni hadhanno. Ati marte iillate hedootto baychi woy mixokki maati? Wodote galatu nooheta leellishate. Ikkollana ati wodote galatu nooheta leellishate assattori wolootu assitannori ledo mitto ikka hoogara dandaanno. Tenne wodanaho wodhine konni birxichira sasu gari manni daafira laꞌneemmo: Insano (1) Qullaawu Maxaafi rosaanooti, (2) Cuuamino Kiristaanaatinna (3) hoshshatewiinni ballehino geꞌreewooti.

QULLAAWU MAXAAFI ROSAANO

4. Yihowa Qullaawu Maxaafi rosaano ma garinni laꞌꞌanno?

⁴ Qullaawa Maxaafa xiinxallitanni noottoha ikkiro, hanni tenne hedi: Dancha duduwo macciishshite adhakki Yihowa ledosi jaalooma kalaqidhanno gede isiwa abbinori wido ikkoottota leellishshanno. (Yoh. 6:44; Soq. 13:48) Yihowa “mannu wodana . . . fonqole laꞌꞌanno.” Togo yaa Yihowa isi daafira rosate sharramattota laꞌꞌanno hattono biddissisi ledo sumuu yite heeꞌrate biddi assiꞌra hasiissannohere biddi assidhanna laꞌꞌanno woyte hagiidhanno yaate. (Law. 17:3; 27:11) Wodo Yihowa ledo muli jaalooma kalaqiꞌratto gede assitannohe. (Rom. 5:10, 11) Tenne horonta mulluri gede assite laꞌooti.

5. Qullaawu Maxaafi rosaano Filiphisiyusi 3:16 noo biddissa haꞌrunsa dandiitannohu hiittoonniiti?

⁵ Qullaawa Maxaafa xiinxallitanni noottoha ikkiro, wodote galatu nooheta leellisha dandaattohu hiittoonniiti? Tenne assa dandaattoti mitte doogo soqqamaasinchu Phaawuloosi Filiphisiyusi Kiristaana amaalino amaale haꞌrunsate; isi “Lophinoommo deerrinni tenne doogora amanyootunni alba hinge qaanfo” yiino. (Fil. 3:16) Wole Qullaawu Maxaafi tiro konne qummeeshsha togo yitino: “Xa haꞌnanni heeꞌnoommo doogora haꞌra agurroonke.” Tenne amaale garinni aye coyno heeshshote doogora haꞌra aguratto gede guficho ikkahera wodhitooti.—Mat. 7:14; Luq. 9:62.

6. Qullaawu Maxaafi rosaano biddi assiꞌra hasiissannonsare biddi assiꞌra ayirritunsaro maa assa dandiitanno? (Marro 30:11-14) (Misileno lai.)

⁶ Mule rosoottoha Qullaawu Maxaafi roso ammane adha ayirritinohehalla ikki? Konni rosi daafira seekkite xiinxalli hattono roore huwatatto gede kaaꞌlahera Yihowa huucciꞌri. (Fa. 86:11) Kuri coyibba assiteennano konne roso huwata qarra ikkituhero mite yanna geeshsha agari; kayinni Qullaawa Maxaafa xiinxalla agurtooti. Qullaawu Maxaafi ledo sumuu yaannokki assoote agura ayirritinohehalla ikki? Yihowa guuta ikkinokki manni assa dandaannokkire horo asse yaannokkita qaagi. Isi biddissi garinni heeꞌra dandaatto. (Marro 30:11-14 nabbawi.) Qoleno Yihowa kaaꞌlahera qaale eino. (Isa. 41:10, 13; 1 Qo. 10:13) Konnira hexxo mudhitooti. Xa iillanni noohe qarra calla hedantenni wodote qixxaaworanna Yihowa assinohehu danchu coy baalaho galatu nooheta leellishatto gara hedi. Yihowara noohe baxilli lexxanni haꞌri kiiro ‘hajajosi ayirritannota ikkitinokkita’ huwatatto.—1 Yo. 5:3.a

7. Halaalu mine lophitino wedellooti maa hiinca dandiitanno?

⁷ Kiꞌne halaalu mine lophitinoonni wedellootina? Kiꞌneno Qullaawu Maxaafi rosaanooti. Isinni kiꞌne, anniꞌnenna amaꞌne roorenkanni xiinxallisa hasiissannonsa rosaanooti. Qullaawu Maxaafi togo yaanno: “Maganunniwa shiqqi yiiyye; isino kiꞌnewa shiqqi yaanno.” (Yaq. 4:8; 1 Du. 28:9) Ati umikkinni kaꞌe Yihowawa shiqattoha ikkiro, isino atewa shiqanno. Yihowa halaalu minira maatekki laꞌe dayottohu gede asse dihedanno. Isi mitto mittonka mancho halaalu mine lophitinoreno umisiwa abbanno. Yihowa ledo hojju jaalooma kalaqiꞌratto gede kaaꞌlannoheri maati? Wodote; wodo horonta mulluri gede assite laꞌꞌa dihasiissannohe. (Rom. 5:1, 2) Hakko daafira tayxeha Qaagooshshu Ayyaana haꞌrattora albaanni Yesuusi reyo kaaꞌlitannohe gara hiinca dandaatto. Tini Yihowa Beettisi widoonni qixxeessino wodora galatu nooheta leellishate ayyaanaamittete mixo fushshiꞌratto gede assitannohe.b

CUUAMINO KIRISTAANA

8. Cuuamino Kiristaani wodo ammanannota leellishinohu hiittoonniiti?

⁸ Ati cuuamootto Kiristaanchootiro wodo ammanattota addi addi doogganni leellishootto. Lawishshaho, Yihowawa shiqqi yaatenna biddissisi garinni heeꞌrate mite qaafo adhootto. Qoleno ammanakki daafira wolootaho kulte Yesuusi manna rosaano assineemmo gede hajajinonke hajajo ayirrisootto. Heeshshokki Yihowara sayisse uyte cuuamootto. Halaalu magansiꞌrara halamootto daafira mannu xiiwinohe? (2 Xi. 3:12) Ammanante cincakki Yihowa baxattotanna isi Beettisi widoonni qixxeessino wodora galatu nooheta leellishshanno.—Ibi. 12:2, 3.

9. Cuuamino Kiristaani maa qoropha hasiissannonsa?

⁹ Cuuammoommo Kiristaana ikkinoommo daafira qoropha hasiissannonke coy no. Galle honse wodo mulluri gede assine laꞌnammora dandiineemmo. Togoori kalaqamara dandaannohu hiittoonniiti? Hanni umi xibbi diro heeꞌrinohu Efessooni Kiristaani daafira laꞌno. Reyotenni kainohu Yesuusi insa kaajjite uurritino daafira galatinonsa. Ikkirono isi, “Misheemmohe coyi no; hakkuno umi baxillekki agurootto” yiino. (Aju. 2:3, 4) Yesuusi coyiꞌrinori leellishannonte gede mittu Kiristaanchi Yihowa mulla yinoomme yaate geeshshira calla magansiꞌra hanafara dandaanno. Togoo manchi huuccatto assiꞌrara, gambooshshe haꞌraranna soqqansho fulara dandaanno; kayinni kuri coyibba assannohu mulla woga wonshate geeshshiraati. Isi kuri coyibba assannohu baxillunni kae diꞌꞌikkino. Yihowara noohe baxilli albi gede kaajjado ikkinokkita huwatittoro maa assa dandaatto?

10. Ayyaanaamittete coye ‘hiincanna woꞌmunni woꞌma illachisha’ dandaattohu hiittoonniiti? (1 Ximootewoosi 4:13, 15)

¹⁰ Soqqamaasinchu Phaawuloosi Ximootewoosira, ayyaanaamittete coyibba ‘hiincanno gedenna woꞌmunni woꞌma illachishanno’ gede kulinosi. (1 Ximootewoosi 4:13, 15 nabbawi.) Tenne amaale garinni ‘ayyaanunni huffi yite iibbite’ heeꞌra dandaatto gede, albinni roore Yihowa laalaatte magansiꞌrate maa assa dandaattoro hedi. (Rom. 12:11) Lawishshaho, gambooshsheho albinni roore seekkite qixxaawanna gambooshshunniwa albinni roore hixamanyite macciishsha dandaatto. Woy callikki heedhe hiincate injaannohe baycho xiinxallite hojju xiinxallokki roore baxissannota assiꞌra dandaatto. Giira buwa agurtannokki gede haqqe worranninte gede, wodotenna Yihowa uynohe coy baalaho galatu nooheta leellishate kuri coyibba woꞌmanka woyte assa dandaatto. Qoleno Qaagooshshu Ayyaanira albaanni noo lamalara Yihowa Farciꞌraasine ikkankenni afiꞌnoommoha baxxino atoote hiinca dandaatto. Tini Yihowa ledo jaalooma kalaqiꞌratto gede assitinohe wodora noohe galati lexxanno gede kaaꞌlitannoheti dihuluullissannote.

11-12. Mito geeshsha diinaggekki ajjino yaa Maganu ayyaana hoogootto yaateni? Xawisi. (Misileno lai.)

¹¹ Mite yanna geeshsha halaalu magansiꞌrara hasiꞌrootto gede diinaggaawoottokkiha lawihero, hexxo mudhitooti woy Maganu ayyaana hoogoommo yite heddooti. Soqqamaasinchu Phaawuloosi Qorontoosi Kiristaanira soqqanshosi daafira borreessinore qaagi; isi, “Baxummokki assummoro nafa Maganu konne looso eeggo uyinoe” yiino. (1 Qo. 9:17) Hatto yiinohu mayyaateeti?

¹² Phaawuloosira sabbakate hasattosi ajjino woyti no. Isi hatte yannara togoori macciishshaminosiha ikkirono hexxo mudhe sabbaka diagurino. Atino hatto assa dandaatto. Hasattokki baꞌanno woyte nafa gara ikkinore assate murciꞌri. Yihowa “hasattonna wolqa oye” loosoho kaꞌꞌatto gede assahera huucciꞌri. (Fil. 2:13) Ganyite ayyaanaamittete coye assa agurtooti. Togo assakki mite yanna gedensaanni Yihowara noohe baxilli lexxanno gedenna galagalte diinaggaawattoha ikkatto gede kaaꞌlitannoheta addaxxa dandaatto.

13. “Ammanatenni” kaajjine heeꞌnoommoronna teꞌee woꞌmanka woyte layiꞌra dandiineemmohu hiittoonniiti?

¹³ Layinki Qorontoosi 13:5 noo biddissi garinni yannate kiiro ninkeneeto seekkine layiꞌra danchate; qummeeshshu “Ammanatenni kaajjitine heedhinoonnironna teꞌee buuxiꞌrate woꞌmanka woyte kiꞌneneeto qonqolchitine layidhe” yaanno. Saꞌne saꞌne ninkeneeto aante noo xaꞌmuwa xaꞌma dandiineemmo: ‘Maganu Gashshoote balaxisiisanni noommo?’ (Mat. 6:33) ‘Doodheemmo boohaarshi busha coye giweemmota leellishanno?’ (Fa. 97:10) ‘Ammanate roduuwiꞌya mereero keerunna mittimma heedhanno gede asseemmo?’ (Efe. 4:2, 3) Yihowa qixxeessinote wodote qixxaawo daafira roore hiincineemmoti Qaagooshshu Ayyaani yanna, ninkeneeto layiꞌneemmo gedenna uminkera ikkikkinni Kiristoosira heeꞌneemmoro buuxiꞌneemmo gede faro fantannonke.c

HOSHSHATEWIINNI BALLEHINO GEꞌREEWO

14. Mitu Kiristaani hoshshatewiinni ballehanno gede assannonsari maa ikkara dandaanno?

¹⁴ Mitu Kiristaani boode aganna woy diro ammaname soqqamihu gedensaanni gambooshshe haꞌra agurino. Mayra? Mitu manni ‘heeshshote daafira yaadanni’ hexxo mudhino. (Luq. 21:34) Mitootu ammanate roduuwinsa coydhinori woy assitinorinni gufidhino. (Yaq. 3:2) Wolootu kayinni jawa cubbo loosse kaaꞌlo xaꞌmiꞌrate hobbi ruxxi yitino. Korkaatu ikkihano ikkiro, ati hoshshatewiinni ballehoottoha ikkiro maa assa dandaatto? Yihowa baxillunni qixxeessinoti wodote qixxaawo maa assatto gede xixxiibbannohe?

15. Yihowa hoshshatewiinni ballehino geꞌreewira hedannota leellishannohu hiittoonniiti? (Hiziqeeli 34:11, 12, 16)

¹⁵ Hoshshatewiinni ballekkinori daafira Yihowara may macciishshamannosiro hiinci. Isi insara fiile dihoꞌlannonsa. Hatteentenni isi baino geꞌreewo hasanno. Itisannonsa hattono isiwa higganno gede kaaꞌlannonsa. (Hiziqeeli 34:11, 12, 16 nabbawi.) Yihowa aterano hatto assanno? Eewana! Tenne borro xiinxallakki umise Yihowa hagiirsiisa hasiꞌrattota leellishshanno. Yihowa wodanikkira nooha dancha coye lae halaalu minira abbinohente gede xaano galagale isiwa qolahe ikka?

16. Songotenni ballehino geꞌreewi Yihowawa higanno gede may kaaꞌlansara dandaanno? (Misileno lai.)

¹⁶ Yihowawa Higi yitanno birosherera togo yitannoti jawaachishshanno hedo no: “Yihowa isiwa higatto wote anga fane haarannoheta huluullantooti. Isi yaachishannohere qeelatto gedenna xissiisinohe coye tiratto gede kaaꞌlannohe; qoleno keeraancho tiia afidhe wodanunna surrete salaame afiꞌratto gede assannohe. Hakkiinnino bashshokkinte gede ammanate roduuwikki ledo Yihowara soqqamate kaꞌꞌattora dandaatto.” Songote cimeeyyeno kaaꞌlitahera quqquxantannota qaagi. Insa ‘bubbetenna wishotenni goꞌlinanni’ baycho ikkitinota leellisha dandiitanno. (Isa. 32:2) Wodote galatu nooheta leellishate ateneeto togo yite xaꞌmi: ‘Yihowa ledo mala hasate xa hiittoo qaafo adha dandeemmo?’ (Isa. 1:18; 1 Ph. 2:25) Lawishshaho, Gambooshshu Addaraashe hadhe gambooshshe assiꞌra dandaatto? Ayyaanaamittetenni kaaꞌlannohe gede mitto cimeessa shiqqe hasaawisa dandaatto? Kuni cimeessi mite yanna geeshsha Qullaawa Maxaafa xiinxallatto gede assara dandaanno. Yihowa, huuccatto assidhe Beettisi kakkalora galatu nooheta leellishate assattore maassiꞌrannoheta addaxxa dandaatto.

GALATU NOOHETA LEELLISHA DANDAATTO GARA

17-18. Tayxehu Qaagooshshu Ayyaani iillara albaanni yannanke hayyotenni horoonsiꞌra dandiineemmohu hiittoonniiti?

¹⁷ Yesuusi, wodo qixxeessinoonnihu iso “ammanannohu baalu hegere heeshsho afiꞌranno gede ikkinnina baꞌꞌannokki gede” ikkinota coyiꞌrino. (Yoh. 3:16) Wodo Yihowa ninke cubbunninna reyotenni gatisate qixxeessino qixxaawooti. Ninke giddo mittuno wodo mulluri gede assine laꞌꞌa dihasiissannonke. (Rom. 3:23, 24; 2 Qo. 6:1) Qaagooshshu Ayyaanira albaanni noo yanna Yihowanna Yesuusi leellishshinonke baxille hiincineemmo faro fantannonke; kuni baxilli insa assitinonkerira galatu noonketa leellinsheemmo gede xixxiiwannonke.

¹⁸ Wodote galatu nooheta leellishattohu hiittoonniiti? Ati qolatto dawaro wolu mannitenni baxxitara dandiitanno. Ikkirono, Yihowa ‘uminsara heeꞌra agurte insara yee reyinohura heedhannori’ lowo miliyoone ikkitannori ledo iso magansiꞌrate assattore maassiꞌrannoheta addaxxa dandaatto.—2 Qo. 5:15.