Ayyarete Gade Soorrante Bao Abbita Ikka?—Qullaawu Maxaafi Mayyaanno?

“Ayyarete gade soorramase dano dawaawano abbitanni no. Baatto xa nafa heeꞌra dandiinannikki deerra martanni no.”—Ze Gaardiyan.

Mannu ooso uminsa abbidhino qarri qalxe amadinonsa. Rooru sayinsete egennaammi, baattote iibbilli roore lexxanno gede assanni noohu manna ikkinota ammantanno. Baattote iibbilli lexxasi xa nafa ayyarete gade soorrantanno gede asse buutote qarra qalanni no. Kuri giddo gamu aante nooreeti:

• Ayyarete gade waajjishanno garinni xaa xaa soorrantanno; lawishshaho ruqaꞌnino iibbilli, moollenna hombobalatte qarra ikkitino; tini qolte albinni roore lolahunna dubbu giira batidhanno gede assitino.

• Jajjabba kaadenna Arkitiki kaade shiiltanni no.

• Baaru gaxi roore lexxanni no.

Baattote aana ayyarete gade gawajjitinokki dargi dino yaa dandiinanni. Niwu York Taymis gaazeexi 193 gobbara ikkinore odeessihu gedensaanni togo yiino: “Baatto kaaꞌleꞌꞌe yite raartanni no.” Ayyarete gade soorrante lowo manni lubbo galaaffattanninna gawajjitanni noo daafira, Alamenniti Fayyimmate Uurrinsha, kuni qarri “manchi beetti fayyimma gawajjannoho qarra roore qarraati” yitino.

Ikkollana, albillittete yanna hexxotenni agadhineemmo gede assannonkeri no. Qullaawu Maxaafi giddo yannankera ikkanni noore balanxe masaalloonni; qoleno Maganu qaafo adhanno yine hexxineemmohu mayiraatironna isi albillitte dancha heeshsho heeꞌneemmo gede maa assannoro xawinsoonni.

Ayyarete gade soorrantannota Qullaawu Maxaafi giddo masaalloonnini?

Ee. Baattote iibbilli lexxe abbinohu ayyarete qarri Qullaawu Maxaafi giddo kulloonni ikkito ledo sumuu yaannoho.

Masaalo: “Goofimarchu barra qarrissanno yanna daggannota afi. Mannu umosi baxannoha, woxe baxannoha, . . . qullaawa heeshsho afiꞌrinokkiha, . . . araara giwannoha, . . . yiinowa hosannokkiha, . . . booꞌnatenni ufuufaminoha . . . ikkanno.”—2 Ximootewoosi 3:1-4.

Mannu ayyare daafanno gede assinoha addi addi akatanna amuraate Qullaawu Maxaafi giddo balanxe himannoonni. Mangistubbanna daddalu uurrinshuwa konni kaꞌi ilama heeshsho daafira hedantenni woxe roorsidhino. Insa mitteenni loosate woꞌnaaltanno woyite nafa, ayyarete iibbille hoolate assa hasiissanno coyira sumuu yaa didandiitanno.

Tini masaalo leellishshannonte gede, mannu ooso xaphoomunni akatansa biddi assidhe baattonke baotenni gatissanno yine hexxa didandiineemmo. Hatteentenni, Qullaawu Maxaafi kulannonte gede, hafuuraammunna bushu mannooti “bunshete aana bunshe leddanno.”—2 Ximootewoosi 3:13.

Maganu qaafo adhannota huluullammeemmokkihu mayiraati?

Qullaawu Maxaafi kulanno garinni, Kalaqaanchinke Maganu Yihowa,a baattotenna aanase heeꞌranno manni daafira hedanno. Hanni Maganu qaafo adhanno yine hexxineemmo gede assannonkeha sase qummeeshsha laꞌno.

1. 1. Maganu “baatto seekke kalaqinohunna xintinohu . . . fano heedhara ikkikkinni, mannu heeꞌranno gedeeti.”—Isayaasi 45:18.

   Maganu baattote hedinore woꞌmanno gede assanno. (Isayaasi 55:11) Isi baatto baꞌara woy heeꞌrate injiitannokkita ikkitara wore diaguranno.

2. 2. “Shaqqaddu kayinni baatto ragidhanno; atootenna keere afidhe hagiidhitanno. Keeraano baatto ragidhanno; ise aanano hegerera heedhanno.”—Faarso 37:11, 29.

   Maganu mannu ooso baattote aana hegerera keerunni heedhanno yee hexxo uyino.

3. 3. “Bushuulle kayinni Kaaliiqi baattote aaninni haaꞌre hoolanno.”—Lawishsha 2:22.

   Maganu bunshe assa agurtannokkire lawishshaho baatto huntanni noore baala hunanno.

Maganu albillitte assankera hedinore

Maganu baattote hedinore wonshannohu hiittoonniiti? Isi tenne assannohu alame woꞌma gashshannohu mittu gashshooti widoonniiti; kuni gashshooti Maganu Gashshooteeti. (Maatewoosi 6:10) Kuni gashshooti gordoho heeꞌre gashshannoho. Kuni gashshooti baattotenna qarqaru qarra tirate uullate gashshaasine ledo sheemaate dieanno. Hatteentenni, Maganu Gashshooti mannu gashshoote baala hune insa bayicho amadanno.—Daanieeli 2:44.

Maganu Gashshooti mannu oosoranna baattote dancha danchare assanno. (Faarso 96:10-13) Hanni Maganu Yihowa Gashshootisi widoonni maa assannoro laꞌno.

• Qarqara haaroonsanno

  Qullaawu Maxaafi togo yaanno: “Molo baatto hagiidhitanno; halalli baattorano daraaro fultanno.”—Isayaasi 35:1.

  Hatto yaa mayyaate? Yihowa baattonke wole agurina mannu baasa daafino qarqara nafa haaroonse biddi assanno.

• Ayyare gabbi assanno

  Qullaawu Maxaafi togo yaanno: “Gugganno hombobolatte gabbi assi; dambaluno sammi yii.”—Faarso 107:29.

  Hatto yaa mayyaate? Kalaqamu wolqa hajajate Yihowara wolqa noosi. Hatte yannara manna gawajjannohu ayyarete qarri diheeꞌranno.

• Baatto towaantanni gara rosiisanno

  Qullaawu Maxaafi togo yaanno: “Rosiiseemmohe; haꞌratto doogono kuleemmohe; amaaleemmohe.”—Faarso 32:8.

  Hatto yaa mayyaate? Yihowa mannu ooso baatto towaattanno gede qeecha uyinonsa. (Kalaqama 1:28; 2:15) Isi kalaqamasi danchu garinni towaatanna qarqaru gawajjamannokki garinni heeꞌra dandiineemmo gara rosiisannonke.