Alamete Doyichora 2023 Arru Dannimale Batiꞌrino—Qullaawu Maxaafi Mayyaanno?

Xaa yannara alamete doyichora iibbillu baasa batiꞌrino; qoleno iibbillu batinyinni kainohunni wole lowo dano iillitanni no. Hanni aante noo rippoortuwa laꞌno:

• “Alamenniha iibbillu jilba bikka hananfihunni kayise saihu 174 diri giddo, ayyare Ellu aganira tayixe gede ikkite iibbite diegentino.”—Naashinaal Oshaynik End Atmoosferik Adiministireeshin, Yu. Essi. Dippaartment ofi Komersi, Maaja 13, 2023.

• “Xaa yannara Ixaaliyaho, Ispeenete, Faransayete, Jarmanetenna Poolaandete iibbillu lowo geeshsha batiꞌrino; isinni Sisiliyinna Sardiiniya yinanni giddichuwara 48°C [118°F] ikkanno yine hendanni. Awuroppaho ayyare togo ikkite ruqaꞌnitinoti wole yanna dino yaa dandiinanni.”—Yiropiyan Ispeesi Ajensii, Maaja 13, 2023.

• “Baatto roore iibbitanni hadhanno woyite, waajjishannoha lowo xeena mule mulenni ganannoti egennantinote; tini qolte albinni roore lolahu batiꞌranno gede assitanno.”—Isteefan Yulinbrook, Alamennite Mitiyorolojete Uurrinshara wayinna wayi doyicho xiinxallo sooreessa, Maaja 17, 2023.

Ayyarete gade soorrantanninna roore bushshanni noota kultanno rippoorte lexxitanni haꞌrase yaachishshannohe? Tenne buutote hajo daafira Qullaawu Maxaafi yaannore hanni laꞌno.

Ayyare togo bushshannota Qullaawu Maxaafi giddo masaalloonni?

Ee masaalloonni. Alamete doyichora batiꞌrino iibbillinna wole ayyarete gade soorrama, Qullaawu Maxaafi yannankera ikkanno yee balaxe kulinoreeti. Lawishshaho, Yesuusi yannankera “anfe egenninoonnikkirinna waajjishshannoti jajjabba malaatta” leeltannota masaalino. (Luqaasi 21:11) Alamete aana batiꞌrino iibbilli, batinyu manni mannu ooso baatto coꞌonta huntakka yee yaadanno gede assino.

Baatto horo heeꞌra dandiinannikki deerra marta ikka?

Hakko deerra dimartanno. Maganu baatto kalaqinohu ninkera geedote qaenke ikkitaraati; hakko daafira mannu ooso baatto huntara wore dilaꞌꞌanno. (Faarso 115:16; Rosiisaancho 1:4) Isinni ‘baatto huntannore hunara’ qaale eino.—Yohaannisi Ajuuja 11:18.

Qullaawu Maxaafi, Maganu kalaqamu dano baatto gawajjitannota hoola dandaannotanna hoolannota kulanno.

• “Gugganno hombobolatte gabbi assi; dambaluno sammi yii.” (Faarso 107:29) Maganoho kalaqamu wolquwa ittisate wolqa noosi. Isi xaa yannara ayyarete gade soorranteenna mannu oosora iillanni noo qarra baala hoola dandaanno.

• “Baatto towatootto; lowo geeshshano qawaaxxisootto; . . . ati yootto garinni, baatto jajja fushshitino.” (Faarso 65:9) Maganu baatto maassiꞌre gannate ikkitanno gede assanno.

Albillitte baatto haarooꞌmite biiffannota kultannote Qullaawu Maxaafi hexxo daafira ledde afate, “Baatto Gatisannohu Heeꞌrakka?” yaanno birxicho nabbawi.