Yesuusi Ola Uurrisanno

Yesuusi uullate aana noo yannara, manna lowo geeshsha baxannota leellishino; wole agurina heeshshosi nafa mannaho yee sayise uyino. (Maatewoosi 20:28; Yohaannisi 15:13) Muli yannara qole mannaho noosi baxille leellishate, “baattote qacce geeshsha nooha ola uurrisanno”; isi Maganu Gashshooti Moote ikkino daafira noosi silxaane horoonsiꞌre konne assanno.—Faarso 46:9.

Hanni Qullaawu Maxaafi Yesuusi ma assanno yaannoro laꞌno:

• “Qarraataamo woshshiꞌrannosi woyite gatisannosi; buxichonna gadadaamo kaaꞌlanno. Buxanenna wolqiweeloota mararanno; qarraataamma reyotenni gatisanno. Insa heeshsho isi albaanni ayirrado ikkitino daafira, gadadaamma shettotewiinni fushshannonsa.”—Faarso 72:12-14.

Yesuusi kageeshsha assinonkeriranna albillitte assannonkerira galatu noonketa leellisha dandiineemmohu hiittoonniiti? Mitte doogo, ‘Maganu Gashshootihu danchu duduwi’ daafira lede rosate; Yesuusi duduwinoti qara sokka tenneeti. (Luqaasi 4:43) “Maganu Mangiste Maati?” yaanno birxicho nabbawi.