Yesuusi Buxima Hunanno

Yesuusi uullate aana noo yannara, manna hakko iso buxxinorenna hawaaxantinore baxannota leellishino. (Maatewoosi 9:36) Isi manna kaaꞌlate yee heeshshosi nafa kakkalo assino. (Maatewoosi 20:28; Yohaannisi 15:13) Muli yannara qole, mannaho noosi baxille leellishate, uulla woꞌmate aaninni buxima hunanno; isi Maganu Gashshooti Moote ikkino daafira noosi silxaanenninna wolqanni konne assanno.

Qullaawu Maxaafi Yesuusi albillitte assannore dancha gede asse kulanno:

• “Moote buxanete halaale coyiꞌro; gadadaamma kaaꞌlo.”—Faarso 72:4.

Yesuusi kageeshsha assinonkeriranna albillitte assannonkerira galatu noonketa leellisha dandiineemmohu hiittoonniiti? Mitte doogo, ‘Maganu Gashshootihu danchu duduwi’ daafira lede rosate; Yesuusi duduwinoti qara sokka tenneeti. (Luqaasi 4:43) “Maganu Mangiste Maati?” yaanno birxicho nabbawi.