Yihowa Farciꞌraasine Ilamate Barra Ayirrissannokkihu Mayiraati?

Ninke Yihowa Farciꞌraasine ilammoommo barra diayirrinseemmo; korkaatuno Maganu togoo bude dibaxanno. Qullaawu Maxaafi xawise ilamate barra ayirrisa cubboho yaannokkiha ikkirono, togoo yannara assinanni coyibba heeshshi gotti assine hendeemmo gedenna Maganu hedo huwanteemmo gede kaaꞌlannonke. Konni budi ledo xaadooshshe afiꞌrinoha shoole coyenna Qullaawu Maxaafiha xintu seera laꞌno.

1. Ilamate barra ayirrisate rosichi dayinohu Magano affinokki dagawiinniiti. Addi addi ayyaanna daggino gara kulannohu mittu maxaafi (Funk & Wagnalls Standard Dictionary of Folklore, Mythology, and Legend) ilamate barra ayirrisate rosichi hiittenne ammana aana xintaminohoro xawisanno; kuni maxaafi kulanno garinni, mittu manchi ilamino barra “busha ayyaanna hakkonne mancho gawajjitanno faro afidhanno”; konni daafira “jaalla maransanna isira dancha halchonsa kulansa hakkonne mancho gawajjotenni agartanno” yine ammannanni. Ze Loori ofi Berzideysi yaanno maxaafi, hundi waro ilammoonni barra borreesse wora “beeddahe kiire (buusa laꞌne)” “mittu manchi kaayyo afate lowo geeshsha kaaꞌlitanno.” Qoleno kuni maxaafi kulanno garinni, “ilammoonni barra xawinsanni shaami [ilamino barra ayirrisanno manchira] dancha kaayyo iillitanno gede assannota baxxitinota digintete wolqa afiꞌrino yine ammannanni.”

   Qullaawu Maxaafi kayinni diginte, kiilo, agaanintete coyenna woleno “hattoo coye” assa cubbo ikkitinota kulanno. (Marro 18:14; Galatiyu Sokka 5:19-21) Maganu hundiha Baabiloonete katama giwinohu mittu korkaati, hakko katamira heeꞌranno manni beeddahe kiirannoha (buusa laꞌꞌannoha) ikkino daafiraati; kunino kiilu widira kiiramanno. (Isayaasi 47:11-15) Yihowa Farciꞌraasine mittu mittunku budi xintamino gara calla xiinxallitanni hossannore diꞌꞌikkitino; ikkirono Qullaawu Maxaafi togo xawise kulanno biddishsha lashshi diassineemmo.

2. Hundi Kiristaani ilamino barra diayirrisino. Ze Worlidi Buuki Insayikilopiidiya yaanno garinni, hundi Kiristaani “mittu manchiha ilamino barra ayirrisa Magano ammantinokki gosa bude ikkino gede asse laꞌꞌanno.” Baalunku Kiristaani Yesuusi soqqamaasinenna isi rosaano faale haꞌra hasiissannonsata Qullaawu Maxaafi kulanno.—2 Teselonqe 3:6.

3. Kiristaanu ayirrisanno gede hajanjoonnihu mittu ayyaani calla no; hakkuno Yesuusi ilamino barra ikkikkinni reyosiiti. (Luqaasi 22:17-20) Tini dhaggeeffantannita diꞌꞌikkitino; korkaatuno Qullaawu Maxaafi, “Ilamate barrinni reyote barri woyyanno” yaanno. (Rosiisaancho 7:1) Yesuusi uullate aana heeꞌrino heeshshora jeefote, Maganu albaanni dancha suꞌma afiꞌrino; hakko daafira, ilamino barrinni reyino barri rooranno gede assino.—Ibiraawoota 1:4.

4. Qullaawu Maxaafi giddo ilamino barra ayirrisinota kulloonnihu mittuno Maganu soqqamaanchi dino. Kuni hambeenna gatinore diꞌꞌikkino; korkaatuno Maganu Qaali, Magano magansiꞌrannokkihu lamu manni ilamino barra ayirrisinota kulanno. Ikkollana, lamunku manchi xagge danchuri gede assine kulloonnita diꞌꞌikkitino.—Kalaqama 40:20-22; Maarqoosi 6:21-29.

Yihowa Farciꞌraasine ooso ilantino barra ayirrisa hoogansanni gate bainonsari nooha lawannonsa?

Danchu anninna ama assitannonte gede, Yihowa Farciꞌraasineno oosonsara diro woꞌma baxille leellishshanno; lawishshaho oosonsara hagiirsiisannore uyitannonsa, hattono wolootu ledo gamba yite hagiirsiissanno yanna sayissanno gede assitanno. Konni garinni Maganunniha guuta lawishsha harunsitanno; Maganu barra agadhikkinni baxino saatera oososira danchare aanno. (Maatewoosi 7:11) Aanchine laꞌneemmonte gede, Yihowa Farciꞌraasine ooso gate bainonsari nooha dilawannonsa:

• “Mitto coye hedoottokki woyite uyinihero roore hagiirsiisanno.”—Tamii, 12 diriti.

• “Ilamoommo barra mitore aa hoongierono, anniꞌyanna amaꞌya wole woyite mitore hire aannoe. Agadhummokki hedeweelcho aannoe daafira tini roore baxissannoe.”—Girigorii, 11 dirihu.

• “Shiinqa keekenna mittichu sirbi noohu tonnu daqiiqi jili jilaho? Jilaho yaa mayyaatero laꞌinayina ninketa amme!”—Eeriki, 6 dirihu.