Qeesicha Lawinonsa

Chiili gobbara, mitte hige Osmaani minaamasinna qaaqqonsa ledo waammate bayichi qooxeessira borrote gaarenni sabbakanni no. Hakkiinni hedeweelcho, madaarsha fulinohu lowo manni muuziiqa luushshanni dayi. Hakkunni manni giddo mitootu, Osmaani qeesichansa lawinonsa daafira shiqqi yite rimmi assitusihu gedensaanni, “Qeesicha, agarre heeꞌnoommohena, hawalle yannante dayitto!” yitusi.

Osmaani qeesicha ikkinokkita kulansara woꞌnaalinoha ikkirono, mannu kayinni koocanni noo daafira yiinori dileellinonsa. Mannu waammanniwa sae haꞌrihunni shiima yanna gedensaanni, boodu manni galagale hige iso togo yiisi: “Qeesicha, waammanniwa marre agarre heeꞌnoommohewe.”

Mannu shiima geeshsha sammi yiita, Osmaani isi ayetironna hakko ma assanni nooro kulinsa. Insa qeesichinsa daa hooginotera giirante kaꞌe, Osmaani togo yitusi: “Maahoyena, konni gamba yee noo mannira dagge Qullaawu Maxaafinni mitore dikulatto ballo?” Osmaanino tennera maahoyye yii.

Isi insa ledo madaarshu bayichira haꞌranni heeꞌre, reyitino mancho daafira mitore xaꞌminsa; qoleno kulannonsa qummeeshsha hedanni haꞌrino. Osmaani waammanniwa iillihu gedensaanni, gamba yiino mannira isonooto egensiise kae, Yihowa Farciꞌraasincho ikkino daafira dancha duduwo mannaho duduwate looso loosannota kulinsa.

Hakkiinni, isi Yohaannisi Ajuuja 21:3, 4 nna Yohaannisi 5:28, 29 horoonsiꞌre, Maganu hunda mannu reyara horonta hedinokkita kulinsa. Qoleno, Maganu reyitinore muli yannara kayisannotanna insano uullate aana hegerera heeꞌrate faro afidhannota xawise kulinsa. Osmaani coyiꞌre kaita, batinyu manni iso mare rimmi asse “Yihowa soyinoha dancha duduwo” kulinonsa daafira galattinosi. Hakkiinni isi borrote gaarewa higi.

Madaarshu gedensaanni, wiꞌlaanchu giddo mitootu borrote gaarewa dagge Osmaaninna maatesi Qullaawu Maxaafi xaꞌmo xaꞌmitino. Lowo saate hasaabbuhu gedensaanni, gaarete aana noota rooriidi borro adhite hadhino.