Songote Gambooshshiwa Mimmito Jawaachishshe

1. Gambooshshunniwa dawaro qolleemmohu mayiraati?

SONGOTE gambooshshe haꞌneemmohu mayiraati? Qaru korkaati Yihowa guwisiꞌrateeti. (Far. 26:12; 111:1) Qoleno gambooshshe haꞌneemmohu tenne qarru yannara mimmito jawaachishateeti. (1 Tes. 5:11) Gambooshshe haꞌne anga kayinse dawaro qolleemmo woyite konne lamenka coye assinanni heeꞌnoommo.

2. Songote gambooshshiwa dawaro qolleemmoti hiitti faro noonke?

² Lamalate kiiro gambooshshunniwa dawaro qolleemmo faro afiꞌneemmo. Lawishshaho Sambatu barri gambooshshiwa Agarooshshu Shae Xiinxallo yannara dawaro qola dandiineemmo. Kiristaanu Heeshshonna Soqqansho gambooshshiwa kayinni Maganu Qaalinni Ronseemmore yitanno kifile shiqqanno yannara, Songonnite Qullaawu Maxaafi Xiinxallo yannaranna wole hasaawunni shiqqanno kifilla yannara dawaro qola dandiineemmo.

3. Qarra ikkannori mayi tuncu yaankera dandaanno? Ibiraawoota 10:24, 25 kaaꞌlitannonkehu hiittoonniiti?

³ Ninke baalunku Yihowa guwisiꞌranna ammanate roduuwanke jawaachisha hasiꞌneemmo. Kayinni dawaro qolleemmo woyite qarra ikkannori tuncu yaankera dandaanno. Dawaro qola waajjineemmoha woy duucha hinge qola hasiꞌne heeꞌneennanni xaꞌma hoongankera dandiinanni. Fonqolo ikkannoha konne coye qeela dandiineemmohu hiittoonniiti? Soqqamaasinchu Phaawuloosi Ibiraawootu Kiristaanira borreessino sokka tenne xaꞌmora dawaro afiꞌrate kaaꞌlitannonke. Isi gamba yaa hasiissannonketa kuli woyite ‘mimmito jawaachishate’ illachisha hasiissannonketa coyiꞌrino. (Ibiraawoota 10:24, 25 nabbawi.) Harancho dawaro nafa qolle ammana noonketa leellishanke woloota jawaachishshannota huwantummoro, anga kayinse dawaro qola hakkeeshshi geeshsha diwaajjishshannonke. Qoleno dawaro qolleemmo gede duucha hinge xaꞌma hoonginkero songote giddo noori wolootu dawaro qoltanno faro afidhinota anfoommo daafira hagiidha dandiineemmo.—1 Phe. 3:8.

4. Konni birxichira hiikkonne sase coye ronseemmo?

⁴ Konni birxichira umo, dawaro qolannohu gari manni nookkite shiima songora mimmito jawaachisha dandiineemmohu hiittoonniitiro ronseemmo. Hakkiinni, dawaro qolannohu batinyu manni noote jawa songora mimmito jawaachisha dandiineemmohu hiittoonniitiro ronseemmo. Jeefote, dawaro woloota jawaachishanno garinni qola dandiineemmohu ma garinniitiro ronseemmo.

SHIIMA SONGO GIDDO MIMMITO JAWAACHISHA

5. Shiimu manni noo songora woy gaamora mimmito jawaachisha dandiineemmohu hiittoonniiti?

⁵ Shiima songora woy gaamote giddo massaganno rodii dawaro qolanno gede xaꞌmannohu gari manni diheeꞌranno. Mito woyite, massaganno rodii dawaro qolanno manchi anga kayisa geeshsha shiima yanna agara hasiissannosiha ikkara dandaanno. Togoo woyite gambooshshu ceeꞌmishannoha lawara dandaanno; tini qolte dijawaachishshannote. Togoo woyite ma assa dandaatto? Dawaro duucha higge qolate woꞌnaali; tini wolootuno duucha higge qoltanno gede kakkayissansara dandiitanno.

6-7. Dawaro qolleemmo woyite waajjineemmo gede assannonkere ajisha dandiineemmohu hiittoonniiti?

⁶ Dawaro qolate hedatto woyite waajjishannohella ikki? Batinyu roduuwino dawaro qolate heddanno woyite waajjitanno. Ikkirono, ammanate roduuwaꞌne albinni roore jawaachishate dawaro qoltinanni woyite waajjitinanni gede assannoꞌnere ajishate woꞌnaalle. Tenne assa dandiitinannihu hiittoonniiti?

⁷ Konni albaanni Agarooshshu Shaera fultinota mite hedo wirro xiinxalla kaaꞌlitaꞌnera dandiitanno.b Lawishshaho seekkitine qixxaabbe. (Law. 21:5) Seekkitine qixxaabbiniro dawaro qoltinanni woyite hakkeeshshi geeshsha diwaajjitinanni. Hattono harancho dawaro qolle. (Law. 15:23; 17:27) Qoltinanni dawaro harancho ikkituro waajjitinanni gede assannoꞌneri ajanno. Seeda hedo coyiꞌrantenni mitte woy lame coyi fooliishsho calla coyiꞌra roduuwinkeno qolloommo dawaro roore huwattanno gede kaaꞌlitanno. Umikki yaattonni harancho dawaro qola dancha gede qixxaawoottotanna roso seekkite huwatoottota leellishshanno.

8. Yihowa gambooshshunniwa dawaro qolate dandiinummore baala assineemmota ma garinni laꞌꞌanno?

⁸ Kuri hedo loosu aana hosiisate woꞌnaaloottoha ikkirono xaano dawaro lame sase higge qolate hedatto woyite waajjishannohehalla ikki? Yihowa dandiittore baala assate sharramattota naadannota addaxxa dandaatto. (Luq. 21:1-4) Yihowa dandiineemmokkire asse diyaannonke. (Fil. 4:5) Maa assattoro hedi, mixo fushshiꞌri hattono wodanaaꞌmatto gede kaaꞌlahera Yihowa huucciꞌri. Umi qara fushshiꞌratto mixo mitte harancho dawaro qola ikkitara dandiitanno.

JAWA SONGO GIDDO MIMMITO JAWAACHISHA

9. Jawa songo giddo hiittoo qarri tuncu yaara dandaanno?

⁹ Songoꞌnera noo halashshaano lowota ikkituro wolu fonqoli tuncu yaahera dandaanno. Dawaro qoltannori batinyu roduuwi noo daafira anga duucha higge kayisittorono xaꞌma hoongahera dandiinanni. Lawishshaho Daanieele yinanni rodoo woꞌmanka woyite gambooshshunniwa dawaro qola baxxanno.c Ise gambooshshunniwa dawaro qola Yihowa magansiꞌrate, roduuwa jawaachishatenna Qullaawu Maxaafi halaali surresera qaꞌmiꞌranno gede assiꞌrate kaaꞌlitannose faro gede assite laꞌanno. Kayinni ise jawa songo hadhuta dawaro qoltanno gede xaꞌminannisehu saꞌne saꞌneeti; mito woyite isinni gambooshshu goofa geeshsha mitte hinge nafa dixaꞌminannise. Ise togo yitino: “Tennera caaccaawoomma; hattono qoosso hoogoommahu gede asse hedoomma. Duucha hinge xaꞌma gimbiro laꞌnanni heeꞌnenni gimboonniha lawanno.”

10. Gambooshshunniwa dawaro qolleemmo faro afiꞌrate maa maa assa dandiineemmo?

¹⁰ Daanieelera macciishshaminose gedeeri macciishshame egenninohe? Hatto ikkiro hexxo mudhattoranna gambooshshe macciishshite calla agurte haꞌrattora dandaatto. Ikkirono kayinni dawaro qolate woꞌnaala agurtooti. Ma assa dandaatto? Gambooshshe haꞌratto kiiro duucha dawaro qixxaabbe haꞌrakki kaaꞌlitahera dandiitanno. Hatto ikkiro umi qara dawaro qolatto gede xaꞌma hoongihero, gambooshshu goofa geeshsha dawaro qolatto faro afiꞌrattora dandaatto. Agarooshshu Shae qixxaawatto woyite mitte mittenti gufo xiinxallote birxichi cuꞌmo ledo mayi xaadooshshe afidhinoro hedi. Hatto assittoro xiinxallo gooffa geeshsha qolattota dancha dawaro dihoogatto. Qoleno xawise kulate qarrisannoha gufote giddo kulloonniha hawa gede huwantannikkiha Qullaawu Maxaafi halaale xawisse kulate qixxaawa dandaatto. (1 Qor. 2:10) Mayira? Korkaatuno togoo woyite dawaro qolanno manni shiima ikkara dandaanno. Kuri coyibba baala assoottoha ikkirono gambooshshunniwa dawaro qolate faro afiꞌrittokki keeshshoottohalla ikki? Hatto ikkiro massaganno rodiira hiittee xaꞌmora dawaro qola hasiꞌrattoro kulattosira dandaatto.

11. Filiphisiyusi Sokka 2:4te ma assineemmo gede jawaachinshoonninke?

¹¹ Filiphisiyusi Sokka 2:4 nabbawi. Soqqamaasinchu Phaawuloosi qullaawu ayyaani massageennasi Kiristaanu wolootu hasatto balaxisiisanno gede jawaachishino. Gambooshshu yannara tenne amaale harunsa dandiineemmohu hiittoonniiti? Wolootuno ninkente gede gambooshshunniwa dawaro qola hasidhannota dea dihasiissannonke.

12. Songote gambooshshiwa roduuwanke jawaachisha dandiineemmoti qara doogo hiittenneeti? (Misileno lai.)

¹² Hanni tenne hedi. Jaallakki ledo hasaawatto woyite insara hasaabbanno faro uyittokkinni sammi yite hasaawatto? Dihasaawatto! Insano hasaabbara hasiꞌratto. Hatteente gede dandaami deerrinni gambooshshunniwa batinyu manni dawaro qolara hasiꞌneemmo. Isinni ammanate roduuwanke jawaachinsheemmote qara doogga giddo mitte insa ammanansa daafira coyidhanno faro afidhanno gede assate. (1 Qor. 10:24) Hanni tenne assa dandiineemmo gara laꞌno.

13. Batinyu roduuwi dawaro qolate faro afidhanno gede assa dandiineemmohu hiittoonniiti?

¹³ Umihunni harancho dawaro qola hasiissannonke; tini wolootu dawaro qoltanno yanna heedhanno gede assitanno. Songote cimeeyyenna wolootu woꞌnaalshu noonsa halashshaano tenne assate dancha lawishsha ikka hasiissannonsa. Qolatto dawaro harancho ikkituro nafa duucha hedo coyidhooti. Gufote giddo noore baalankare coyiꞌrittoro wolootu qoltannori diheeꞌranno. Lawishshaho tenne gufora lame hedo kulloonni; harancho dawaro qola hasiissannonketanna duucha hedo coyiꞌra hasiissannonkekkita kulloonni. Tenne gufora dawaro qolatto gede umo xaꞌminihero mitte hedo calla qolate woꞌnaali.

14. Dawaro qolate anga mamoote mamoote kayinseemmoro afate kaaꞌlannonkeri maati? (Misileno lai.)

¹⁴ Dawaro qolate anga mamoote mamoote kayinseemmoro heda hasiissannonke. Anga xaa xaa kayinseemmoha ikkiro massaganno rodiira wolootu dawaro mitte higge nafa qoltukkinni ninke calla xaꞌmannonke gede xixxiimbanni heeꞌnoommosiha lawasira dandaanno. Tini qolte wolootu hexxo mudhite anga kayisa agurtanno gede assitara dandiitanno.—Ros. 3:7.

15. (a) Dawaro qolleemmo gede xaꞌma hoonginkero ma assa hasiissannonke? (b) Massaganno rodii baalunkura hedannota leellisha dandaannohu hiittoonniiti? (“Xiinxallo Massaganno Rodoo Kaaꞌlitanno Amaale” yitanno saaxine lai.)

¹⁵ Batinye halashshaano dawaro qolate anga kayissanno woyite, ninke hasiꞌnoommo gede duucha hinge xaꞌma hoongankera dandiinanni. Mito woyite massaganno rodii horonta xaꞌma hoogankera dandaanno. Tini hexxo mudhineemmo gede assitankera dandiitanno; kayinni xaꞌma hooginonke daafira koffi yaa dihasiissannonke.—Ros. 7:9.

16. Dawaro qoltinore jawaachisha dandiineemmohu hiittoonniiti?

¹⁶ Ati hasiꞌrootto gede duucha higge dawaro qolate faro afiꞌroottokkiha ikkiro, wolootu dawaro qoltanno woyite seekkite macciishshi; hattono gambooshshu gedensaanni qoltino dawarora galatinsa. Insa galatakki qolattora hedootto dawaro gede jawaachishshansara dandiitanno. (Law. 10:21) Mimmito jawaachinsheemmoti wole doogo roduuwanke galatate.

MIMMITO JAWAACHINSHEEMMOTA WOLE DOOGGA

17. (a) Annuwunna amuuwu oosonsa diro heddanni insa dawaro qolate qixxaabbanno gede kaaꞌla dandiitannohu hiittoonniiti? (b) Viidiyo leellishshannonte gede, dawaro qolate qixxaawa dandiineemmoti shoole doogo hiittenneeti? (Lekkaalliidi qaagiishshano lai.)

¹⁷ Gambooshshunniwa mimmito jawaachisha dandiineemmoti wole doogga hiittenneeti? Annuwanna amuuwa, dirinsa deerra heddinanni oosoꞌne gambooshshunniwa dawaro qolate qixxaabbanno gede kaaꞌlensa. (Mat. 21:16) Mito woyite gambooshshunniwa shota ikkitinokki haja daafira lawishshaho, adhantinori mereero kalaqamanno qarri daafiranna amanyootu daafira ronsanni; togoo woyite ooso dawaro qola dandiitannoti mitte woy lame gufo heedhara dandiitanno. Qoleno oosoꞌne anga kayissu kiiro xaꞌma hoongansara dandiinannihu mayiraatiro huwattanno gede kaaꞌlensa. Hatto assaꞌne insa agurre woloota xaꞌminanni woyite hexxo mudhitannokki gede kaaꞌlitannonsa.—1 Xim. 6:18.d

18. Dawaro qolleemmo woyite uminke daafira illachinsheemmokki gede qoropha dandiineemmohu hiittoonniiti? (Lawishsha 27:2)

¹⁸ Ninke baalunku Yihowa ayirranno gede assitannotanna ammanate roduuwanke jawaachishshannota kiꞌanno dawaro qixxaawa dandiineemmo. (Law. 25:11) Mito woyite haransine uminke woꞌnaalsha kula dandiineemmoha ikkirono, ninkeneeti daafira lowore coyiꞌneemmokki gede qoropha hasiissannonke. (Lawishsha 27:22 nabbawi; 2 Qor. 10:18) Dawaro qolleemmo woyite Yihowa, Qaalesinna mannasi illachishate sharrammeemmo. (Aju. 4:11) Hige uminke daafira kulleemmo gede xaꞌmininkero hatto assa hasiissannote. Lawishshaho konni birxichite aantanno gufora hatto assa dandiineemmo.

19. (a) Gambooshshe dayino manni baalunkura hendeemmota leellishanke mayi guma abbitanno? (Roomu Sokka 1:11, 12) (b) Gambooshshunniwa dawaro qola baxisannohehu mayiraati?

¹⁹ Dawaro qolleemmo woyite assa hasiissannonkeha mitto mittonka coye kulloonnikkiha ikkirono, ninke baalunku woloota jawaachishshanno dawaro qolate sharrama dandiineemmo. Togo assate albinni roore duucha hinge dawaro qola hasiissannonkeha ikkara dandaanno. Woy dawaro qolate faro afiꞌnummoro tennenni kassi yaanna wolootuno dawaro qoltanno faro afidhanno woyite hagiidha hasiissannonke. Gambooshshunniwa wolootu hasatto balaxisiinseemmoha ikkiro ninke baalunku ‘mimmito jawaachisha’ dandiineemmo.—Roomu Sokka 1:11, 12 nabbawi.