Sabbakatto Gara Yannate Garinni Soorridhanni Nootto?
1. Alamete ikkito soorramase maa maa biddi assiꞌneemmo gede assitannonke?
1 Qullaawu Maxaafi 1 Qorontoosi 7:31 aana yaanno garinni alame, xaa xaanni soorrantanno ikkito leellishanno diraami shiqanno madirake gedeeti. Alamete ikkito konni garinni soorrantanni noo daafira, sabbankeemmo doogga, pirogiraamenkenna manna coyishiinsheemmo gara yannate kiiro soorriꞌra hasiissannonke. Ati konni garinni soorridhanni nootto?
2. Yihowa dirijjite ledo taalo qaafate sabbankeemmo gara soorriꞌra hasiissannonkehu mayiraati?
2 Sabbakatto Doogga: Kiristaanu songo hundanni jammarte yannate ledo sumuu yaannore assitanno. Yesuusi umo rosaanosi sabbakkara soyi wote sagalete ogoronna woxe wodhitanno borsa anga adhitannokki gede kulinonsa. (Mat. 10:9, 10) Gedensaanni kayinni soqqamaanosi albillitte mannu giwannotanna sabbakate loosi wolu qooxeessi geeshsha halaꞌlanni haꞌrannota hede konne biddishsha taashshino. (Luq. 22:36) Saihu xibbu dirinni jammarte, Yihowa dirijjite sabbakate addi addi doogga horoonsidhanni keeshshitino; lawishshaho, farciꞌrate horoonsiꞌnanni kaardenni, raadoonete xaawi widoonni, hattono makeenu aana mayikirafoone worte lallabbe, yannate ledo sumuu yaanno garinni farcidhino. Yannankera haammatu qooxeessira duucha wote manna mine anfannikki daafira minunni mine haꞌne calla ikkikkinni sabbakate fulloommokki wotenna dooggateno farciꞌneemmo gede amaalloonninke. Qoleno, barra mannu loosunniwa hosannoha ikkiro minunni mine hawarrinse soqqammeemmo gede amaalloonninke. Iimihu Yihowa saragalli haꞌranno raga soorranno wote, atino konni saragalli ledo taalo qaaffanni nootto?—Hiz. 1:20, 21.
3. Mannaho xiwe noore hasaawa soqqanshonkenni roore guma afiꞌneemmo gede kaaꞌlitannonkehu hiittoonniiti?
3 Manna Coyishiishatto Gara: Xaa yannara qooxeessikkira noo manna cannaqamanno gede assannonsari maati? Miinjaho? Maatete hajootinso? Olaho? Qooxeessinke mannira sumuu yaanno garinni hasaawa jammarate qixxaambeemmo gede yannankera mannaho qarra ikke noore afanna mannu noo gara wodancha lowo geeshsha kaaꞌlitannonke. (1 Qor. 9:20-23) Minu anni xiwinosi coye coyiꞌranno wote anfummore yine ninke qixxaamboommo assaawewa saꞌꞌantenni, iso xiwinore hasaawa woyyitanno.
4. Sabbankeemmo gara ranke yannate garinni soorriꞌra hasiissannonkehu mayiraati?
4 Tenne alameti jeefote “ikkito” muli barra gumulanteenna bayiru qarri jammaranno. “Gattino yanna shiimate.” (1 Qor. 7:29) Konni daafira, tenne gooffe daggino yanna giddo wolqanke assitu deerrinni lowo looso loosa dandiineemmo gede sabbankeemmo gara yannate garinni soorriꞌra addinta hasiissannote!