Massagaanchinke Yesuusira Hajajamme

1. Xaa yannara Yihowa hedinori maati?

XAA YANNARA Maganu hedinori Maganu Mangisteha dancha duduwo gobba baalate dudumbanni gedeeti. (Maq. 13:10; 1 Xim. 2:3, 4) Kuni Yihowa loosooti; isi konne lowo geeshsha hasiisanno looso massagara baxanno Beettosi doorino. Dandoo noosihu Yesuusi massaganni noo daafira, kuni sabbakate loosi goofimarchu daara albaanni Yihowa hasiꞌranno garinni loosame goofannota dihuluullammeemmo.—Mat. 24:14.

2. Konni birxichira maa ronseemmo?

² Konni birxichira, Yesuusi ‘ammanaminohanna wodanaamo borojjicho’ horoonsiꞌre ayyaanaamittete sagale shiqishanni noo garanna halaꞌladu sabbakate loosira harunsaanosi qineessanni noo gara laꞌneemmo. (Mat. 24:45, NW) Qoleno ninke mittu mittunku Yesuusiranna ammanamino borojjichira hajajamate maa assa dandiineemmoro laꞌneemmo.

YESUUSI SABBAKATE LOOSO MASSAGANNI NO

3. Yesuusira uyinoonni roorre maati?

³ Yesuusi sabbakate looso massaganni no. Tenne anfeemmohu hiittoonniiti? Yesuusi iimira haꞌrara shiima yannara albaanni Galiilu ilaalira mite ammanantino harunsaanosi ledo xaadino. Isi insara, “Roorre baala gordohonna baattote uyinoonnie” yiino. Isi hakkiinni aane, “Xaate hadhine gosa baala . . . rosaanoꞌya assensa” yiinota wodanche. (Mat. 28:18, 19) Hakko daafira Yesuusira uyinoonni roorre giddo mitte sabbakate looso massagate.

4. Yesuusi xaa geeshsha sabbakate looso massaganni noota huluullammeemmokkihu mayiraati?

⁴ Yesuusi sabbakatenna manna rosaano assate looso ‘gosa baalate’ loonsannita coyiꞌrino; qoleno “gobbate goofimarchi geeshsha” harunsaanosi ledo heeꞌrannota kulino. (Mat. 28:20) Tini xaa geeshsha Yesuusi sabbakate looso massaganni noota leellishshanno.

5. Faarso 110:3 noo masaalo woꞌmitanno gede kaaꞌlinanni heeꞌnoommohu hiittoonniiti?

⁵ Yesuusi tenne alame goofimarchi yannara sabbakate looso loosanno manni ajanno yee diyaadino. Isi faarsaasinchu coyiꞌrinohu masaalote qaali woꞌmannota afino; faarsaasinchu, “Olaho fulatto barra olantokki baxxe ledokki fultanno” yiino. (Far. 110:3) Sabbakate looso loossanni noottoha ikkiro, Yesuusiranna ammanamino borojjichira hajajantanni nootto; hattono tini masaalo woꞌmitanno gede kaaꞌlitanni nootto. Konne looso loonsanni heeꞌnoonni; kayinni qarra ikkannorino no.

6. Xaa yannara Maganu Mangiste daafira sabbakkannorira qarra ikkannonsahu mittu coyi maati?

⁶ Maganu Mangiste daafira sabbakkannore mannu giwannonsa; qarra ikkannonsa coyi giddo mittu konneeti. Kaadaasine, ammaꞌnote massagaanonna poletiku mannooti loosinke daafira kapho tareessitanno. Fiixinke, anfoommo manninna ledonke loossannori konne totao adda assidhe, Yihowara soqqamanna sabbaka agurreemmo gede xixxiibbankera dandiitanno. Mite gobbara, gibbannonkeri ammanate roduuwanke waajjishiishshansara, gawajjitansara woy usurtansara dandiitanno. Tenne dhagge diassiꞌneemmo. Yesuusi, “suꞌmiꞌya daafira yitineenna mannu baalu giwannoꞌne” yee masaalino. (Mat. 24:9) Isinni mannu ninke konni garinni giwansa Yihowa hagiirsiinsanni heeꞌnoommota leellishshanno. (Mat. 5:11, 12) Mannu giwannonke gede assannohu Daawuloosiiti. Kayi isi Yesuusi ledo ditaalamanno! Yesuusi kaaꞌlonni danchu duduwi gosa baalate iillanni no. Hanni tenne leellishshanno taje laꞌno.

7. Yohaannisi Ajuuja 14:6, 7 noo masaalo woꞌmitanni noota leellishshanno taje hiitteeti?

⁷ Maganu Mangiste daafira sabbankeemmo woyite qarra ikkannonkehu wolu coyi mannu addi addi qaale coyiꞌrannoha ikkansaati. Yesuusi soqqamaasinchu Yohaannisira leellishino ajuujara, mannu addi addi qaale coyiꞌrannoha ikkansa yannankera dancha duduwo duduwate guficho ikkitannokkita kulino. (Yohaannisi Ajuuja 14:6, 7 nabbawi.) Hiittoonni? Dandiinummo deerrinni batinyu manni Maganu Mangiste sokka macciishshanno gede assinanni heeꞌnoommo. Xaa yannara jw.org webisayitenkera Qullaawu Maxaafi aana xintantino borronke 1,000 saꞌꞌanno afiinni afiꞌra dandiinanni; hakko daafira alamete doyichora noo manni nabbawa dandaanno. Aliidi Bisi manna rosaano assate horoonsiꞌneemmoha qara uduunnicho yaano Hegerera Hagiidhitanni Heeꞌra Dandaatto! yaanno maxaafa 700 saꞌꞌanno afiinni tirranni gede fajjino! Qoleno ayyaanaamittete sagale danqootaho viidiyotenni ballootaho bireeletenni qixxeessinoonni. Qullaawu Maxaafi masaalo woꞌmitanna laꞌnanni heeꞌnoommo. ‘Addi addi daga wido ikkinohu duuchunku afii giddonni fulino’ manni Qullaawu Maxaafi halaaliha “xalala qaale” rosanni no. (Zak. 8:23; Sof. 3:9, NW) Kuni baalu loosi loosaminohu dandoo noosihu Yesuusi Kiristoosi massaganni noo daafiraati.

8. Xaa geeshsha sabbakate loosinke abbino gumi maati?

⁸ Xaa yannara 240 gobbara heeꞌrannohu 8,000,000 saꞌꞌanno manni Yihowa dirijjite wido ikkino; qoleno diru kiiro lowo kume ikkanno manni cuuamanno! Kuni haarote rosaano ikkino manni kiirontenni roore hasiissannota Maganu baxanno akatta yaano “haaro mannimma” uddiꞌrino. (Qol. 3:8-10) Batinyu manni amanyoote bainore assa, finqille, manna mulla kae giwanna gobbansa woletenni roorse baxa agurino. Isayaasi 2:4 noo masaalo woꞌmitanni no; qummeeshshu, “hakkunni gedensaanni olaho qixxaawannohu diheeꞌranno” yaanno. Haaro mannimma uddiꞌrate sharramanke mannu Maganu dirijjitewa daanno gede kaaꞌlitanno; qoleno massagaanchonke Kiristoosa Yesuusa harunsinanni heeꞌnoommota leellinsheemmo. (Yoh. 13:35; 1 Phe. 2:12) Kuni baalunkuri hedeweelcho ikkinore diꞌꞌikkino. Yesuusi kaaꞌlanni noonke.

YESUUSI BOROJJICHO SHOOMINO

9. Maatewoosi 24:45-47 kultanno garinni Yesuusi goofimarchu yannara mayi ikkannota kulino?

⁹ Maatewoosi 24:45-47 (NW) nabbawi.b Yesuusi goofimarchu yannara ayyaanaamittete sagale shiqishannoha ‘ammanaminohanna wodanaamo borojjicho’ shoomannota kulino. Hakko daafira kuni borojjichi yannankera diinaggaawe loosannota anfoommo. Tini halaale ikkase leeltino. Yesuusi Maganu manniranna wolu hasatto noonsa mannira ayyaanaamittete “sagale hasiissanno yannara” shiqishate buurantinori giddonni boode labballo horoonsiꞌrino. Kuri labballi wolootu ammanara mootooꞌmitinohu gede assite diheddanno. (2 Qor. 1:24) Hatteentenni insa, mannisira ‘gaadaanninna roorrichu’ Yesuusa ikkinota affino.—Isa. 55:4.

10. Misilete noo borro giddo hegere heeshsho doogora haꞌratto gede kaaꞌlitinoheti hiitteeti?

¹⁰ Ammanaminohunna wodanaamu borojjichi 1919nni hanafe, hasatto noonsa manni mite yee Qullaawu Maxaafi giddo noo halaale rosanno gede kaaꞌlitannota addi addi borro qixxeessanni keeshshino. Kuni borojjichi 1921nni, hasatto noonsari Qullaawu Maxaafiha xinta ikkino halaale rossanno gede kaaꞌlate, Maganu Gingilaate yinanni maxaafa qixxeessino. Yanna soorrantanni hadhuta lende wole borro qixxeessinoonni. Aante noo borro giddo ati baxillaancho iimi annanke afattonna baxatto gede kaaꞌlitinoheti hiitteeti? “Maganu Halaalaanchoho,” Hegere Heeshshowa Massanno Halaale, Uullate Aana Gannatete Hegerera Heeꞌra Dandaatto, Hegere Heeshshowa Massitanno Egenno, Qullaawu Maxaafi Addinta Mayyee Rosiisanno? Qullaawu Maxaafinni Maa Ronseemmo? woy Hegerera Hagiidhitanni Heeꞌra Dandaatto! yitannote haarote fultino borrooti? Tini baalanti borro qixxeessini yannara lowo geeshsha kaaꞌlitinote.

11. Ninke baalunku ayyaanaamittete sagale sagaꞌla hasiissannonkehu mayiraati?

¹¹ Kaajjado sagale hasiissannohu hasatto noonsata leellishino mannira calla diꞌꞌikkino. Ninke baalunkura hasiissannonke. Soqqamaasinchu Phaawuloosi kaajjado sagale hasiissannohu “lowiddaannu” [“gikki yiino mannira” NW] ikkinota borreessino. Phaawuloosi lede Qullaawu Maxaafinni ronsoommo halaale loosu aana hosiisanke “danchanna busha bade afate” kaaꞌlitannonketa borreessino. (Ibi. 5:14) Tenne qarrissanno yannara lowo manni amanyoote bainore assannoha ikkino daafira, Yihowa biddishshi garinni heeꞌra qarra ikkitankera dandiitanno. Ikkollana Yesuusi ayyaanaamittete sagale widoonni hasiissannonke jawaante afiꞌneemmo gede assanno. Tenne sagale buicho qullaawu ayyaaninni borreessinoonniho Maganu Qaaleeti. Ammanamino borojjichi, Yesuusi massaganna tenne sagale qixxeessanno; hattono tuqisanno.

12. Yesuusi gede ninkeno Maganu suꞌmi ayirranno gede assinoommohu hiittoonniiti?

¹² Yesuusi gede ninkeno Maganu suꞌmi ayirranno gede assineemmo. (Yoh. 17:6, 26, NW) Lawishshaho 1931nni Qullaawa Borro aana xintaminohu Yihowa Farciꞌraasine yinanni suꞌminni woshshama hananfoommo; tini Maganu suꞌma lowo geeshsha naandeemmotanna suꞌmisinni woshshama hasiꞌneemmota leellishshanno. (Isa. 43:10-12, NW) Hakko diro Birru aganinni hananfe Maganu suꞌma Agarooshshu Shaera aaniidi qoolira fushsha hananfoonni. Qoleno Qullaawa Borrote Haaro Alame Tirora Maganu suꞌma bayichosi qolloonni. Tini, suꞌmu Kiristaaniwiinni baxxinoommore ikkinoommota leellishshanno; insa batinye Qullaawu Maxaafi tironsa giddonni Yihowa suꞌma fushshite hooltino!

YESUUSI HARUNSAANOSI QINEESSANNO

13. Xaa yannara Yesuusi ‘ammanaminohanna wodanaamo borojjicho’ horoonsiꞌranni noota ammanatto gede assinoheri maati? (Yohaannisi 6:68)

¹³ Yesuusi ‘ammanaminohunna wodanaamu borojjichi’ widoonni uullate aana xalala magansiꞌra halashshitannota dhagge ikkitanno dirijjite xintino. Tenne dirijjite daafira mayi macciishshamannohe? Aterano soqqamaasinchu Pheexiroosira macciishshaminori macciishshamahera dandaanno; isi Yesuusa togo yiino: “Ayenkewa haꞌneemmo? Atera hegere heeshsho qaali noohe.” (Yoh. 6:68) Yihowa dirijjitewa daa hoongoommoro kawoote hiikko heeꞌnoommo? Kiristoosi tenne dirijjite widoonni ayyaanaamittete sagale dancha gede sagaꞌlineemmo gede assanni noonke. Qoleno isi dancha gede soqqammeemmo gede qajeelsannonke. Hakkiino sae isi, Yihowa hagiirsiisate “haaro mannimma” uddiꞌneemmo gede kaaꞌlannonke.—Efe. 4:24.

14. Koroonu fayya ubbu yannara Yihowa dirijjite wido ikkakki kaaꞌlitinohehu hiittoonniiti?

¹⁴ Yesuusi qarru yannara kaaꞌlanno biddishsha aannonke. Koroonu fayya ubbu yannara kuni biddishshi kaaꞌlannonke gara huwantoommo. Alamete noohu batinyu manni assaare hawe gurchaawe noo yannara, Yesuusi fayyimmanke agadhate kaaꞌlannonkeha kaajja biddishsha uyinonke. Maaske wodhineemmo gedenna mannunniwa gamba yineemmokki gede jawaachinshoonninke. Cimeeyye baalante halashshaano ledo ganyite xaaddanno gedenna maalaamittetenna ayyaanaamittete noo gara affanno gede jawaachinshoonninsa. (Isa. 32:1, 2) Aliidi Bisi rippoorte widoonnino biddishsha uyinoonninke hattono jawaachinshoonninke.

15. Koroonu fayya ubbu yannara gambooshshe assineemmo garanna sabbankeemmo gara kulannoha hiittoo biddishsha uyinoonninke? Tini mayi guma abbitino?

¹⁵ Qoleno Koroonu fayya ubbu yannara songote gambooshshe assiꞌneemmo garanna ma garinni sabbankeemmoro kulloonninke. Koroonu fayya ubbanni heedheennanni songote gambooshshe, woradu gambooshshenna qoqqowu gambooshshe viidiyote widoonni assiꞌra hananfoommo. Qoleno sokka borreessinenna silke dowwolle soqqama hananfoommo. Yihowa assinoommore maassiꞌrino. Batinye sinu biiro halashshaanote kiiro lexxitinota kultino. Isinni tenne yannara batinyu roduuwi jawaachishanno woꞌnaalsha afidhino.—“Yihowa Sabbakate Loosonke Maassiꞌranno” yitanno saaxine lai.

16. Huluullammeemmokki coyi maati?

¹⁶ Mitu manni Yihowa dirijjite Koroonu fayya qorophate quwa saꞌanno yee hedara dandaanno. Ikkollana uyinanninke biddishshi kaaꞌlannoha ikkinota duucha hinge wodanchinoommo. (Mat. 11:19) Yesuusi mannasi baxillunni massaganni noo gara hiincinummoro, albillitte baxi coyi ikkirono Yihowanna baxanno Beettisi ledonke noota dihuluullammeemmo.—Ibiraawoota 13:5, 6 nabbawi.

17. Yesuusi massaganna loosatto daafira mayi macciishshamannohe?

¹⁷ Yesuusi massaganna loonseemmore ikkinoommo daafira lowo geeshsha baꞌraaꞌnoommoreeti! Heeꞌnoommo dirijjite baalunku budi manni addi addi gobbahunna addi addi afoo coyiꞌranno manni mitto ikke heeꞌrannote. Kiꞌannota ayyaanaamittete sagale sagaꞌlineemmo hattono sabbakate loosira qajeelloommo. Ninke mittu mittunku haaro mannimma uddiꞌra dandiineemmo garanna mimmito banxeemmo gara ronsoommo. Massagaanchinke Yesuusinni fenjeejjineemmo gede assannonkehu ikkadu korkaati noonke!