Heeꞌnoommohu ‘Goofimarchu Barraati’?

1. Albaage ikkannore kulannonkehu maati?

TELEVIZHIINETE woyi raadoonete zeena macciishshite, ‘Tini alame isi hiikkitanni no’ yite xagge assidhe egennootto? Masisanno coyi hedeweelcho kalaqamanno daafira mannu ooso gaꞌa ikkannore diaffanno. (Yaaqoobi 4:14) Ikkollana konni kaꞌa ikkannore Yihowa afino. (Isayyaasi 46:10) Seeda yanna albaanni Qaalisi Qullaawu Maxaafi yannankera ikkanni nooha dadillisanno coye calla ikkikkinni muli barra ikkannoha hagiirsiisanno coyeno masaalino.

2, 3. Rosaanosi Yesuusa mayite xaꞌmitusi? Isina mayyee qolinsa?

² Yesuusi Kiristoosi Maganu Mangistere coyiꞌrino; tini mangiste bunshe baala huntanno hattono uulla gannate assitanno. (Luqaasi 4:43) Hakkawaro mannu tini Mangiste dagganno yanna afara hasiꞌrino. Isinni Yesuusi rosaano, “Ati koye ninke ledo heeꞌrattota anfeemmohunna alamete goofimarchi malaati maati?” yite xaꞌmitinosi. (Maatewoosi 24:3, NW) Isino tenne alame goofimarchi daannohu mamooteetiro afinohu Magano Yihowa callaati yee qolinonsa. (Maatewoosi 24:36) Ikkirono Yesuusi Maganu Mangiste keerenna geꞌne abbasera albaanni uullate aana heedhanno ikkitore masaalino. Isi coyiꞌrinori xa yannankera ikkanni no!

³ Heeꞌnoommohu ‘alamete goofimarchira’ ikkinota leellishshanno taje buuxankera albaanni, hanni mannu ooso laꞌꞌa dandiitinokki olire laꞌno. Kuni oli kainohu ayyaanaame alamera ikkirono, ninke aana abbinori no.

IIMA KAINO OLA

4, 5. (a) Yesuusi Nugusa ikkanni heeꞌreennanni iima mayi maikki? (b) Ajuu[j]a 12:12 garinni, iima kaino oli marichcho abbino?

⁴ Konni maxaafira saꞌu fooliishshora Yesuusi Kiristoosi 1914⁠nni iima Nugusa ikkinota xawinsoonni. (Daanieeli 7:13, 14) Yesuusi Nugusa ikkanni heeꞌrenni qaafo adhino. Qullaawu Maxaafi, “Iima olu kai” yaanno. ‘Mikaeelinna sokkaanosi dhudhuufunna [yaano Sheexaanu Daawuloosinna] sokkaanosi ledo olantu.’a Sheexaanunna busha sokkaanosi agaaninte olunni qeelante iiminni uullara tugantino. Maganunniti ammanantino sokkaano Sheexaanunna agaanintesi iiminni shorrantinohura hagiidhitino. Mannu ooso kayinni insa gede dihagiidhitino. Isinni Qullaawu Maxaafi togo yaanno: ‘Uullatenna baaraho bayisibao korkaatuno Sheexaanu shiima yanna gattinosita afe lowo hanqinni kiꞌnewa dirrinona.’—Ajuu[j]a 12:7, 9, 12.

⁵ Iima kaino oli abbinore wodanchi. Sheexaanu lowo geeshsha hanqinohura uullate aana heedhannorira qarra naqino. Laꞌꞌattonte gede, ninke xa heeꞌnoommohu hattee qarru yanna giddooti. Ikkollana kuni qarri “shiima” yannalla heeꞌranno. Sheexaanu nafa tenne afino. Qullaawu Maxaafi tenne yanna “goofimarchu barra” yaanno. (2 Ximootewosi 3:1, NW) Maganu muli yanna giddo Daawuloosi abbanni noo gawajjo uullate aaninni hunannohura lowo geeshsha tashshi yaannonke! Hanni Qullaawu Maxaafi balaxe masaaleenna xa yannankera ikkanni noo coyi giddo gama laꞌno. Kunino heeꞌnoommohu goofimarchu barra ikkinotanna Maganu Mangiste muli yanna giddo Yihowa baxxannorira hegere atoote abbitannota buuxisiisanno. Umo assine, Yesuusi yannankera ikkanno yiino malaatita shoole kifile laꞌno.

GOOFIMARCHU BARRA IKKITANNOTA BAYIRA IKKITO

6, 7. Yesuusi olanna hude lainohunni masaalino masaalo yannankera woꞌmitanni noohu hiittoonniiti?

⁶ “Gosa gosate aana mangiste mangistete aana ola kayissanno.” (Maatewoosi 24:7, NW) Sai xibbi dirira miliyoonetenni kiirranni manni olunni reyino. Mittu Ingilizete gobbahu xaggete borreessaanchi togo yee borreessino: “Lemiikki sani xaggete diri baalunkunni roore lowo mundee duꞌnantinoho. . . . Uurrannokki oli ikkino sanaati yaa dandiinanni; wossanamino bayichcho shiima yanna fooliishsho agurranna, buuto qodhino wottaaddari base baalate olamino.” Alamete ikkito xiinxallitanno dirijjite fushshitino rippoorte togo yitanno: “[Lemiikki] sanira reyino manni, umi sani M.D kayise 1899 geeshsha noo oli baalunkunni reyinohunni sase ero rooranno.” Kunino 1914 M.D jammare kaino olinni 100 miliyoone ikkanno manni reyino. Olunni mitto mancho nafa shiira mageeshsha xissiissannoro anfoommohura, miliyoonetenni kiirranni manni olunni goofa mageeshsha xissiissannoronna manchintanni gedde assitannoro heda dandiinanni.

⁷ “Hude ikkanno.” (Maatewoosi 24:7) Xiinxallaano saiha 30 diro gidu lowo geeshsha misino yitino. Ikkollana batinynyu manni gide hidhanno geeshshi woxe diafiꞌrino woyi gide wixiꞌranno baatto dinonsa. Konni daafira xaano hude no. Miliyoonetenni kiirranni manni xaano hudetenni gawajjamanni no. Alamete Fayyimmate Dirijjite heddanno garinni taaltino sagale hoonginni diru dirunkunni onte miliyoone saꞌꞌanno qaaqquulli reyanno.

8, 9. Yesuusi uullate huxanonna xibba lainohunni masaalino masaalo woꞌmitinota leellishannori mayi no?

⁸ “Bayira uullate huxano ikkitanno.” (Luqaasi 21:11, NW) Sayintistootu gaamo yitino gara ikkiro, 1990⁠nni jammare nafa fooqete minna diigatenna baatto darate wolqa afidhinoti mereerimunni 17 uullate huxano diru dirunku ikkitino. Qoleno mereerimunni, fooqete minna uullate gantanno wolqa afidhinoti uullate huxano diru dirunku ikkitino. Wole dirijjite qolte togo yitino: “Uullate huxano saihu 100 diri giddo [600,000 saino] manna shitinoha ikkanna tekinolojete lophpho reyanno manni kiiro shiimarella qannassino.”

⁹ “Xibba ikkanno.” (Luqaasi 21:11) Hikkiminnu sayinse lowo geeshsha lophphiturono keeshshinohu ikko haaru xibbi manna gawajjanni no. Mitte rippoorte yitino garinni shombu xibba, shekkeerenna koleera mitteenni kiirreenna 20 anfoonni xibbi muli diri kawa halaꞌlanni haꞌrino; mitu xibbi isinni xaggatenni nafa hurannokkiha ikkino. Isinni ajayi ajeenna 30 haaru xibbi kalaqamino. Kuri giddo gamu xagga nookkihonna shaannoho.

GOOFIMARCHU BARRA HEEꞌRANNO MANNA

10. Layinki Ximootewosi 3:1-5 aana masaalloonni garinni yannankera mannu akati hiittooho?

¹⁰ Qullaawu Maxaafi goofimarchu barra alamete aana ikkitannota bayira ikkito calla ikkikkinni mannu ooso akatino soorramannota masaalino. Hawaariya Phaawuloosi xaphphoomunni mannu akati hiittooha ikkannoro xawisino. Qullaawu Maxaafi 2 Ximootewosi 3:1-5 aana togo yaanno: ‘[Goofimarchu] barra qarrisanno diri daanno.’ Phaawuloosi xawisinohu mannu akati giddo gamu konni woroonni nooho:

• umonsa baxxannore

• woxe baxxannore

• annahonna amate hajajantannokkire

• ammanantinokkire

• baxillu noonsakkire

• umonsa qeeꞌlitannokkire

• kaajjadda

• Maganunni roorsite qawaaxxo baxxannore

• ammaꞌnitinore labburono ammanate wolqa kayinni kaaddinoreeti

11. Bushuullu albaagge ikkitannore Faarso 92:7 mayite xawissanno?

¹¹ Heeꞌratto qooxeessira mannu hattooha ikkinoni? Hattooha ikkinoti dihuluullissannote. Bunshe assanno manni baalankawa no. Tini qolte Maganu muli yanna giddo bushuulle hunannota leellishshanno; korkaatuno Qullaawu Maxaafi togo yaanno: “Bushuullu muꞌrote gede latturo, qoleno jaddo loossannori baalu daraarturo, hatti insa hegerera baꞌannota leellishshanno.”—Faarso 92:7.

HAGIIRSIISSANNO IKKITO!

12, 13. “Halaalaancho egenno” tenne “goofimarchu yanna” giddo batidhinohu hiittoonniiti?

¹² Addaho Qullaawu Maxaafi masaalinonte gede, goofimarchu diri qarru woꞌminoho. Ikkollana tenne qarru woꞌmino alame giddo, Yihowa magansiꞌranno manni mereero hagiirsiisanno coyi no.

¹³ Daanieeli masaalo, “Halaalaancho egenno batidhanno” yitanno. Kuni ikkannohu mamarooti? ‘Goofimarchu yannaraati.’ (Daanieeli 12:4) Roorenkanni 1914 kawa, Yihowa isira addinta soqqama hasidhannorira Qullaawu Maxaafi egennonsa lexxitanno gede kaaꞌlinonsa. Maganu suꞌmanna alaamasi, Yesuusi Kiristoosita wodote kakkalo, reyino manni noo garanna kaote hexxo lainohunni tashshi assanno halaale roore huwattanni hadhino. Hakkiinni saeno, Yihowa magansidhanno gosa uminsara horoomanno garinninna Maganoho ayirrinynye abbanno garinni heeꞌra rossino. Qoleno, Maganu Mangiste loosi maatironna tini mangiste uullate aani qarra hiittoonni tirtannoro seekkite buuxxino. Insa tenne egennonsanni ma assitanno? Tini xaꞌmo konni goofimarchu diri giddo woꞌmitanni nootewa wole masaalowa saꞌneemmo gede assitannonke.

14. Xaa yannara Mangistenniha dancha duduwo sabbakate loosi mageeshshi geeshsha halaꞌlino? Sabbakkanni noorina ayeooti?

¹⁴ Yesuusi Sheexaanu alame goofimarcho lainohunni coyiꞌrino masaalo giddo togo yiino: “Kuni [Maganu] Mangistehu danchu duduwi uulla woꞌmate sabbakamanno.” (Maatewoosi 24:3, 14, NW) Uulla woꞌmate aana, Mangistennihu danchu duduwi yaano Maganu Mangiste maatiro, ise ma assitannoronna abbitanno atoote ragiꞌneemmohu hiittoonniitiro 500 aleenni ikkanno afiinni 235 saꞌanno gobbara sabbankanni heeꞌnoonni. Miliyoonetenni kiirranniri Yihowa Farciꞌraasine, Mangistenniha dancha duduwo diinaggaabbe sabbakkanno. Insa ‘[daga dagantenninna] gaꞌre gaꞌrentenni, [gosa gosantenninna] afuu afuunkunni’ fulte gamba yitinoreeti. (Ajuu[j]a 7:9) Kuri Farciꞌraasine Qullaawu Maxaafi addinta mayyee rosiisannoro afa hasidhannore miliyoonetenni kiirranni manna woxe baatikki mitto mittoho Qullaawa Maxaafa xiinxallissanno. Yesuusi, Kiristaana ‘[mannu baalu] giwanno’ yee masaalinota hendanni wote, tini masaalo woꞌmitino gari maalaꞌlisanno!—Luqaasi 21:17.

ATI XA MA ASSATE HEDOOTTO?

15. (a) Xa heeꞌnoommohu goofimarchu diro ikkinota ammanatto? Mayira? (b) Yihowara badhe wodhitannori “goofimarchu” yannara maikkitanno? Maganu Mangistera maahoyye yite galtannori hakkawote maa afidhanno?

¹⁵ Qullaawu Maxaafiti batinynye masaalo woꞌmitinota laꞌnanni wote, xa heeꞌnoommohu goofimarchu diro dilawannohe? Danchu duduwi Yihowa ikkino yaa geeshsha sabbakamihu gedensaanni, “goofimarchu” mitte huluullo nookkiha daanno. (Maatewoosi 24:14) “Goofimarchu” yaa Maganu uullate aaninni bunshe hunanno yannaati. Yihowa, affanni heedhenni isira badhe wodhitinore baala hunara Yesuusanna wolqaataamma sokkaano soyaanno. (2 Teselonqe 1:6-9) Hakkunni gedensaanni Sheexaanunna agaanintesi manna disoꞌrisiissanno. Hakkiinnino Maganu Mangiste, isera maahoyye yite galtannorira baalaho lowo atoote dirrissanno.—Ajuu[j]a 20:1-3; 21:3-5.

16. Busule ikka maa assate?

¹⁶ Sheexaanu alamera goofimarchu mule ikkino daafira, ‘Xa ma assa hasiissannoekka?’ yine ninkeneeto xaꞌma hasiissannonke. Yihowarenna isi ninkewiinni hasiꞌrannore rosa agura hooga busullete. (Yohaannisi 17:3) Qullaawa Maxaafa jawaantetenni xiinxalli. Yihowa fajjo assate hasiꞌranno manni ledo ganynyite gamba yaa roso assiꞌri. (Ibiraawuyaani 10:24, 25) Maganu Yihowa alame woꞌmate noo mannira qixxeessinota lowo egenno afiꞌrate jawaati; qoleno Maganu albaanni ayirrinynye afiꞌratto gede heeshshokki soorrite biddi assiꞌri.—Yaaqoobi 4:8.

17. Rooru mannira bao hedeweelcho kataffi yitannonsahu mayiraati?

¹⁷ Rooru manni heeꞌnoommohu goofimarchu diro ikkinota kultanno taje adhannokkita Yesuusi balaxe masaalino. Bushuulleho bao hedeweelchonna agarroonnikki garinni dagganno. Duuchchu mannira bao hashsha mooraanchu daanno garinni hedeweelcho kataffi yitanno. (1 Teselonqe 5:2) Yesuusi togo yee qorowisiisino: “Nohi yannara ikki gede, Manchi Beetti daa hakko garinni ikkitanno. Hakka waro wayi daga hunara albaanni Nohi howolo ei barri geeshsha, mannu itanninna aganni, adhanninna adhamanni no. Daga huni wayi daye woꞌmanka feye huni geeshsha diaffino. Manchi Beetti daano hakko garinni ikkitanno.”—Maatewoosi 24:37-39.

18. Yesuusi coyiꞌrinoha hiikkonne qorowishsha hixamanynya hasiissannonke?

¹⁸ Konni daafira Yesuusi macciishshanni noo manna togo yiino: “Deerriweelo itatenninna agatenni hattono heeshshote daafira yaadatenni wodaniꞌnera duhu batiꞌrannokki gedenna hakku barri hedeweelcho woshshaadote gede ikke daannoꞌnekki gede umiꞌnera qorophphe. Hakku barri uullate aana heeꞌranno manni duuchchaho daannona. Daannoha woꞌmanka coye dandiitine saꞌinanni gedenna Manchu Beetti albaanni [ayirrinynye afidhine] uurritinanni gede woꞌma wote huuccidhinanni baqqi yitine agadhe.” (Luqaasi 21:34-36, NW) Konne Yesuusi coyiꞌrino qaale seekke hixamanynya busullete. Mayira? Korkaatuno Maganinke Yihowanna “Manchu Beetti” yaano Yesuusi Kiristoosi albaanni ayirrinynye afiꞌranno manni, Sheexaanu alame baꞌanno yannara keere saꞌꞌatenna xa daggara mule nootera haaro alamera hegerera heeꞌrate kaayyo afiꞌranno!—Yohaannisi 3:16; 2 Pheexiroosi 3:13.