Maalaamittete Coye Ikkikkinni Maganu Mangiste Hasidhe

1. Hasiisannonke coyinna afiꞌra hasiꞌneemmo coyi mereero mayi badooshshi no?

‘MANNAHO hasiisannori shiimaho, mannu afiꞌra hasiꞌranno coyiꞌra kayinni gawalo dino’ yinanna macciishshoottoha ikkara dandaanno. Lowo manni kayinni, hasiisannonsahu maalaamittete coyinna afiꞌra hasiꞌranno coyi mereero noo badooshshe buuxinokkiha lawanno. Konni lamunku coyi mereero noo badooshshi maati? “Hasiisanno coyi” heeshshote heeꞌrate afiꞌra hasiissannoho. Sagale, uddanonna gallanni bayichi hasiisannonkereeti. “Afiꞌra hasiꞌneemmori” heeꞌrankera hasiꞌneemmoreeti; kayinni tini coyibba heeshshote heeꞌrate hasiissannonketa diꞌꞌikkitino.

2. Mannu heedhansara hasiꞌrannoti mite coyibba hiikkuriiti?

² Mannu afiꞌra hasiꞌranno coyi, gobba gobbate garinni babbaxxara dandaanno. Lophitanni noo gobbuwara heeꞌrannohu batinyu manni lowo woxe afiꞌre mobayile, dhoqqi dhoqqe, woy shiima baatto hidha hasiꞌrannoha ikkara dandaanno. Lophitino gobbuwara heeꞌranno manni, lowo uduunne afiꞌra, hoola yinoonni mine miꞌna, woy lowo woxinni hidhinanni kaameela hidha hasiꞌrannoha ikkara dandaanno. Heeꞌnoommo gobba ikkitutano ikkituro, maalaamittete coye quwa saꞌne baxa woshshaado ikkitankera dandiitanno; tini qolte mitto coye hidhate anga assitunkerono assa hooggunkerono, woy hakku coyi hasiisannonkeha ikkirono ikka hoogirono maalaamittete coye lexxate hasatto heedhannonke gede assitara dandiitanno.

MAALAAMITTETE COYE BAXA WOSHSHAADO IKKITANNOꞌNEKKI GEDE QOROPHE

3. Maalaamittete coye baxate yaa mayyaate?

³ Maalaamittete coye baxate yaa mayyaate? Maalaamittete coye baxate yaa ayyaanaamittete coyinni roore maalaamittete coyiꞌra kabbi facci yaate. Mittu manchi hasatto, heeshshosi giddo balaxisiisannorinna illachishannori maalaamittete coye baxannoronna teꞌee leellishanno. Maalaamittete coye banxeemmoha ikkiro, lowoha maalaamittete coye afiꞌra hasiꞌneemmoha ikkara dandaanno. Maalaamittete coye baxanno manchi lowo woxi noosiha ikka hoogara woy lowo woxinni hidhinannire hidha hoogara dandaanno. Anga ajino manni nafa maalaamittete coye baxannoha ikkaranna Maganu Mangiste balaxisiisannokkiha ikkara dandaanno.—Ibi. 13:5.

4. Sheexaanu manna dogate ‘illete halchishannore’ horoonsiꞌrannohu hiittoonniiti?

⁴ Sheexaanu alamennita daddalu uurrinshuwa horoonsiꞌre, hagiirraame heeshsho heeꞌrate hasiisannonkehunni sainoha maalaamittete coye afiꞌra hasiissannonke yine hendeemmo gede asse dogate woꞌnaalanno. Isi ‘illete halchishannore’ leenqisate fullahinoho. (1 Yoh. 2:15-17; Kal. 3:6; Law. 27:20) Alame addi addi gariha maalaamittete coye, yaano hoola yinoonni coyinni kayisse tidhinokki coyi geeshsha baxisannori gede assite shiqishshanno. Ati mitore hasiisannohehura ikkikkinni egensiishshaho kullanna woy suuqete worroonniwa illete laꞌeenna baxisinohehura calla hidhite egennootto woti no? Hakkonne uduunnicho hidhittohu gedensaanni, hidha hoogoottoro nafa hakkeeshshi geeshsha hasiisannoheha ikkinokkita huwatootto woti no? Togoohu hasiisannokki coyi daafurolla ledannonke; hattono heeshsho duha ikkitannonke gede assanno ikkinnina kaaꞌlannori dino. Togoo coyibba hedonke billaallitanno gede assite ayyaanaamittete coye lawishshaho, Qullaawa Maxaafa xiinxallineemmokki gede, gambooshsheho qixxaambe haꞌneemmokkinna ganyine soqqansho fulleemmokki gede assitankera dandiitanno. Soqqamaasinchu Yohaannisi “Alamenna alamete halcho saꞌanno” yiinota deꞌooti.

5. Maalaamittete coye duuꞌnate sharramanni wolqansa guxxanno mannira mayi tuncu yaansara dandaanno?

⁵ Sheexaanu, ninke Yihowa agurre jirote borojje ikkinammora hasiꞌranno. (Mat. 6:24) Maalaamittete coye duuꞌnate sharramanni wolqansa guxxanno manni, uminsa hasatto wonshiꞌrate daafira calla hedanno daafira heeshshonsa haafa ikkitanno; tini ayyaanaamittensa gawajjantanno gede assitanno, hattono dadillannonna caaccaawanno gede assitara dandiitanno. (1 Xim. 6:9, 10; Aju. 3:17) Konni manni gari, Yesuusi wixa wixiꞌrino manchire coyiꞌrino lawishshi giddo qummi assino wixi gedeeti. Yesuusi, “utu mereero uwino wixi masalo, . . . wole yorto wodaninsa giddora eꞌe, macciishshitino qaale beeshshiteenna gumiweelte gattannore” kultannota coyiꞌrino.—Maq. 4:14, 18, 19.

6. Baarooki lawishshinni maa ronseemmo?

⁶ Hanni masaalaanchu Ermiyaasi borreessaanchi Baarooki xagge hedi. Masaalotenni kulloonni garinni Yerusaalame baꞌanno yanna gambissino yannara, Baarooki umisira “addire” afiꞌra hasiꞌrino; kuni qole geedannokki coyeeti. Ikkollana, Baarooki afiꞌreemmo yee hexxa hasiissannosi coyi, Yihowa “marittowa baala reyattokki gede agareemmohe” yee eino qaaleeti. (Erm. 45:1-5) Hakka waro Maganu hunate hedino katami giddo heeꞌranno manni afiꞌrino jajja baꞌꞌannokki gede assate qaale dieino. (Erm. 20:5) Heeꞌnoommohu tenne alame goofimarchi daara rahino yanna giddo ikkino daafira, tini yanna maalaamittete coye duuꞌnineemmota diꞌꞌikkitino. Noonke coyi aye geeshshi waaga afiꞌrinoha ikkirono, bayiru qarri yannara gate saꞌꞌanno yine heda dihasiissannonke.—Law. 11:4; Mat. 24:21, 22; Luq. 12:15.

7. Kawiinni aanchine maa laꞌneemmo? Tenne assa maaho kaaꞌlitannonke?

⁷ Yesuusi hedonke bebbeehantukkinni, maalaamittete coye banxeemmore ikkinummokkinni, hattono hasiisannokkirira yaandummokkinni heeshshote heeꞌrate hasiisannonkere wonshiꞌrate kaaꞌlitannota kaajja amaale uyino. Isi ilaalaho rosiisi yannara tenne amaale qummi assino. (Mat. 6:19-21) Xa hanni Maatewoosi 6:25-34 noo qummeeshsha nabbambanni mitto mittonka coye anna anna bande laꞌno. Togo assanke maalaamittete coye ikkikkinni Maganu ‘gashshoote hasiꞌneemmo’ gede kaaꞌlitannonke.—Luq. 12:31.

YIHOWA MAALAAMITTETE HASIISANNONKERE AANNONKE

8, 9. (a) Hasiisannonkerira nafa quwa saꞌne yaada hasiissannonkekkihu mayiraati? (b) Yesuusi manna yaachishannorenna hasiisannonsare afino yineemmohu mayiraati?

⁸ Maatewoosi 6:25 nabbawi. Yesuusi macciishshaanosi ‘heeshshonsara yaaddannokki’ gede kulinsa yannara, “yaada agurre” yiinonsahu gedeeti. Insa yaada hasiissannonsakki coyiꞌra yaaddanno. Yesuusi yaada agurre yiinohu dimullaati. Hasiisannokkirira yaada, wole agurina hasiisannorira nafa yaada, hedo billaallitanno gede assitanno; tini ayyaanaamittete coye lashshi assinanni gede assitara dandiitanno. Yesuusi rosaanosira hedanno daafira, ilaalaho rosiisi yannara insa yaaddannokki gede shoole hige qorowisiisino.—Mat. 6:27, 28, 31, 34.

⁹ Yesuusi inteemmorira, angeemmoriranna uddiꞌneemmorira yaandeemmokki gede hajajinohu mayiraati? Tini coyibba heeshshote heeꞌrate lowo geeshsha hasiissannonketa diꞌꞌikkitino? Hasiissannonketi egennantinote! Kuri coyibba afiꞌra hoongummoro, yaadanke gattannoni? Digattanno; Yesuusino tenne afino. Isi mannaho barru barrunkunni heeꞌrate hasiisannonsari maatiro seekke afino. Qoleno, isi yannate gedensaanni rosaanosira, ‘qarrissannote goofimarchu yannara’ addi addihu mitiinsanno coyi tuncu yaannonsata afino. (2 Xim. 3:1) Mitiinsitanno coyibba giddo mitu, looso hoogate, hidhinanniri waaga iibbate, sagalete anjeetinna buluulle buxate. Ikkirono, Yesuusi ‘sagale lubbo, uddano mannimma roortannota’ huwatino.

10. Yesuusi harunsaanosira huuccidhanno gara rosiisi yannara, heeshshonsa giddo roore maa balaxisiisa hasiissannonsata kulinonsa?

¹⁰ Yesuusi ilaalaho rosiisi yannara macciishshaanosi iimi Anninsa maalaamittete coye aansara huuccidhanno gede rosiisanni “techo barrita sagalenke uyinke” yite huuccidhara kulinonsa. (Mat. 6:11) Qoleno isi wole yannara, “Techo barrita sagalenke uyinke” yite huuccidhara lede kulinonsa. (Luq. 11:3) Ikkirono, Yesuusi togo yee amaalinohu woꞌmanka wote maalaamittete coyi daafira calla hendeemmo gede diꞌꞌikkino. Yesuusi tenne lawishshu huuccatto rosiisi yannara, balanxe Maganu Mangiste dagganno gede huucciꞌnammora kulino. (Mat. 6:10; Luq. 11:2) Hakkiinni Yesuusi Yihowa hasiisannonkere aate taalamannosihu nookki Magano ikkinota xawise, macciishshaanosi yaaddannokki gede kulinonsa.

11, 12. Yihowa iimi ceara hasiisannonsare aannonsa gari maa rosiisannonke? (Hanafote noo misile lai.)

¹¹ Maatewoosi 6:26 nabbawi. ‘Iima buubbanno cea laꞌꞌa’ hasiissannonke. Cea shiimmaadda ikkiturono lowo laalo, gumma, shiimmaadda lubbuwanna daꞌmuulla sagaꞌlitanno. Cea aana mannu geeshshita ikkitoommero mannu itanno sagale roore ittara dandiitanno. Ikkollana, cea baatto diloosidhanno; hattono ittanno sagale laashshiꞌrate wixa diwixidhanno. Yihowa kayinni hasiisannonsare baala aannonsa. (Far. 147:9) Yihowa ceate afiira sagale worannokkiti egennantinote! Cea hadhe sagale xinqira hasiissannonsa; hadhuro kayinni falakkino sagale afidhanno.

¹² Yesuusi, iimi Annisi ceate sagale aanni heeꞌre mannu oosora hasiissannonsa coyibba aannota horo dihuluullamino.^[1] (1 Phe. 5:6, 7) Yihowa sagale abbe aannonkekkiti egennantinote; ikkirono sagale woy barru barrunkunni hasiisannonkere hidhineemmo woxe afiꞌrate sharrammeemmo sharro maassiꞌranno. Qoleno, qarrammeemmo yannara wolu manni noonsa coye aannonke gede kakkayisara dandaanno. Yesuusi iima buubbanno cea galtannowa afidhanno gara kulinokkiha ikkirono, Yihowa mine miꞌnitanno dandoo uyinonsa; hattono mine miꞌnate hasiisannore qixxeessinonsa. Hatteente gede Yihowa ninkenna maatenke galleemmo mine afiꞌneemmo gede kaaꞌlannonke.

13. Mannu ooso, cea lowo geeshsha roortannota buuxisannonkeri maati?

¹³ Yesuusi macciishshaanosi, “Kiꞌne cea lowo geeshsha diroortinanni?” yee xaꞌmino. Yesuusi togo yii yannara muli yanna giddo heeshshosi mannu oosora yee sayise aannota hedinoti dihuluullissannote. (Luqaasi 12:6, 7 ledo heewisiisi.) Maganu Yesuusa wodote kakkalo asse uyinohu wolu kalaqamira diꞌꞌikkino. Yesuusi reyinohu iima buubbanno ceara yee diꞌꞌikkino; isi reyinohu mannu ooso hegere heeshsho afidhanno gedeeti.—Mat. 20:28.

14. Mittu manchi yaade horo assa dandaannokki coyi maati?

¹⁴ Maatewoosi 6:27 nabbawi. Yesuusi mittu manchi yaade hojjasi aana mitte cigile lexxa dandaannokkita coyiꞌrinohu mayiraati? Korkaatuno, heeshshote hasiisannonkerira yaada lowo diro heeꞌneemmo gede diassitannonke. Isinni quwa saꞌne yaada heeꞌneemmo diro ajishshara dandiitanno.

15, 16. (a) Yihowa dubbu daraarora hasiisannore wonshanno gari maa rosiisannonke? (Hanafote noo misile lai.) (b) Ninkeneeto hiittenne xaꞌmuwa xaꞌma hasiissannonke? Mayira?

¹⁵ Maatewoosi 6:28-30 nabbawi. Dancha uddano uddiꞌra giwanno manchi nookkiti egennantinote; soqqammeemmo wote, songote gambooshshenna jajjabba gambooshshe haꞌneemmo yannara isinni, roore seense haꞌra hasiꞌneemmo. Ikkirono, ‘uddanote’ yaada hasiissannonkeni? Yesuusi uddanote yaada hasiissannonkekkita coyiꞌri woteno Yihowa kalaqinore laꞌneemmo gede kulinonke. “Dubbu daraaro” biinfillinni lowore rosa dandiineemmo. Yesuusi togo yii wote uminsanni seessannota arfaasu daraarchi gedeeta mullawa fultanno daraaro hedinoha ikkara dandaanno. Daraaro disuqqidhanno, uddano digophitanno woy digaꞌnitanno. Ikkirono, daraaro illete laꞌnanni wote baasa biiffanno! “Selemooni nafa kunni baalu ayirrinyisinni daraarote giddonni mittu daraarchi gede diuddiꞌrino”!

¹⁶ Yesuusi, ‘Kiꞌne ammana xeꞌinoꞌneri, Maganu . . . hayissote togo asse uddisiisannoha ikkiro, kiꞌne hiitto roorse diuddisiisannoꞌne?’ yiinota deꞌinoonte. Maganu tenne assannota dihuluullammeemmo! Yesuusi rosaanora kayinni ammana xeꞌinonsa. (Mat. 8:26; 14:31; 16:8; 17:20) Insara kaajjado ammana, hattono Yihowa addaxxa hasiissinonsa. Ninkena? Yihowa hasiisannonkere aa hasiꞌrannotanna tenne assate dandoo noosita ammanneemmo?

17. Yihowa ledo noonke jaalooma hunara dandaanno coyi maati?

¹⁷ Maatewoosi 6:31, 32 nabbawi. Ninke, iima heeꞌrannohu baxillaanchu Anni Mangistesi balaxisiisanno mannira hasiisannonsare aannonsata addaxxitannokki ‘daga’ faale haꞌra dihasiissannonke. Daga ‘afiꞌrate qarrantannore’ gamba assiꞌrate sharrammeemmoha ikkiro, Yihowa ledo noonke jaaloomi baꞌꞌara dandaanno. Assa hasiissannonkere assinummoro, yaano ayyaanaamittete coye balaxisiinsummoro kayinni Yihowa dancha coye dihoꞌlannonke. ‘Magano magansiꞌneemmore’ ikkinoommohura, “inteemmorinna uddiꞌneemmori heeꞌrinkero ikkannonke” yine kassi yee heeꞌra hasiissannonke.—1 Xim. 6:6-8.

HEESHSHOꞌNE GIDDO MAGANU MANGISTE BALAXISIISSINANNI HEEDHINOONNI?

18. Yihowa ninke mittu mittunku daafira maa afino? Isi ninkera maa assanno?

¹⁸ Maatewoosi 6:33 nabbawi. Kiristoosi rosaano aye woteno heeshshonsa giddo Maganu Mangiste balaxisiisa hasiissannonsa. Ninkeno hatto assineemmoha ikkiro, Yesuusi yiinonte gede ‘hakkuyi kaꞌire baala lendanninke.’ Yesuusi togo yiinohu mayiraati? Isi konni qummeeshshira aleenni noo kiirora togo yiino: “Kiꞌnera kuni baalu hasiisannota gordu Anniꞌne egennino.” Yihowa inteemmori, uddiꞌneemmorinna galleemmo base hasiissannonketa balaxe afino. (Fil. 4:19) Isi soorriꞌneemmo uddano hasiissannonke yanna afino. Mannimmankera hiitti sagale sumuu yitannoronna, maatenkera ikkitannoti ikkado galleemmo base hasiissannonketa afino. Yihowa ninkera addinta hasiisannonkeri noonkeronna teꞌee laꞌꞌanno.

19. Albillitte ikkara dandaanno coyira yaada hasiissannonkekkihu mayiraati?

¹⁹ Maatewoosi 6:34 nabbawi. Yesuusi lede, “Yaaddinoonte” yiinota huwatte. Isi, Yihowa kaaꞌlannonketa ammanne mittu barrira calla hasiisannonkerira hendammora hasiꞌranno. Mittu manchi albillitte ikkara dandaanno coyiꞌra quwa sae yaadannoha ikkiro, Magano addaxxa agure umosi addaxxa hanafara dandaanno; tini qolte Yihowa ledo noosi jaaloomi baꞌꞌanno gede assitanno.—Law. 3:5, 6; Fil. 4:6, 7.

MAGANU MANGISTE BALAXISIISSE, GATINORE ISI WONSHANNOꞌNENA

20. (a) Yihowara soqqamate hiittenne mixo fushshiꞌra dandaatto? (b) Heeshshokki bikkunnita assiꞌrate maa assa dandaatto?

²⁰ Maalaamittete coye afiꞌrate yine Maganu Mangiste balaxisiisa agura mulla daafurooti. Hatteentenni ayyaanaamittete mixo fushshiꞌra hasiissannonke. Lawishshaho, sabbakkannori roore hasiissanno songo hadhine soqqama dandiitinanni? Suwisaano ikkitine soqqama dandiitinanni? Suwisaano ikkitine soqqantinanni heedhinoonniha ikkiro, Maganu Mangiste Sawaakooti Rosi Minira eate heddine egentinoonni? Beeteelete woy tirote biirora looso kaaꞌla dandiitina ikka? Gimbaatu Akeeka Fushshitannonna Mintanno Booso kaaꞌla woy Mangistete Addaraashe loosira kaaꞌlama dandiitinanni? Ayyaanaamittete looso albinni roore loosate, heeshshoꞌne bikkunnita assiꞌrate maa biddi assa dandiitinanniro hedde. “Heeshshokki Bikkunnita Assiꞌra Dandaatto Gara” yitanno saaxine huuccatto assidhine heddine, fushshidhinoonni mixo wonshiꞌrate kaaꞌlannoꞌnere asse.

21. Yihowawa albinni roore shiqate kaaꞌlannoheri maati?

²¹ Yesuusi maalaamittete coye ikkikkinni Maganu Mangiste balaxisiinseemmo gede rosiisinohu dimullaati. Hatto assinummoro, hasiisannonkehu maalaamittete coyi daafira diyaandeemmo. Maganu Mangiste balaxisiisa Yihowa addaxxate kaaꞌlitannonke daafira, isiwa albinni roore shinqeemmo; qoleno, hidhate anga assitannonkeha ikkiro nafa, alame leenqissanno coye baala hidhinanni kabbi facci diyineemmo. Xaa yannara heeshshonke bikkunnita assiꞌneemmoha ikkiro, albillitte daggannota “halaalaancho heeshsho afiꞌrate” kaaꞌlannonkere assinanni heeꞌnoommo.—1 Xim. 6:19.