“Baarigaarraꞌne Baxxe” Yaa Mayyaate?
Qullaawu Maxaafi mayyaanno?
Yesuusi ilaalu aana rosiisanni heeꞌre, “Baarigaarraꞌne baxxe” yiino. (Maatewoosi 5:44; Luqaasi 6:27, 35) Hatto yaasi, gibbannonkerira woy miiccannonkerira baxille leellisha hasiissannonketa leellishshanno.
Yesuusi beebba assidhinosire gatona yee baarigaarrasi baxannota leellishino. (Luqaasi 23:33, 34) Isi baarigaarranke banxeemmo gede rosiisino rosi Ibiraawootu Afiiti Qullaawa Borro woy Akkalu Gondoori yaannori ledo sumuu yaannoho.—Fulo 23:4, 5; Lawishsha 24:17; 25:21.
“Baarigaarraꞌne baxxe; xiibbannoꞌnerirano huuccatto asse.”—Maatewoosi 5:43, 44.
Konni birxichira
Baarigaarrakki baxa hasiissannohehu mayiraati?
Maganu lawishsha ikkinonke. Maganu “galata afidhinokkiriranna bushuulleho nafa shaqqadoho.” (Luqaasi 6:35) Isi “bushuulleho . . . arrishsho fushshanno.”—Maatewoosi 5:45.
Baxillu baarigaaranke ikkino manchi woyyaawanno gede kakkayisara dandaanno. Qullaawu Maxaafi baarigaarinkera danchare assineemmo gede amaalannonke; qoleno hatto assa, ‘umisi aana kashilo duuna’ ikkitinota kulanno. (Lawishsha 25:22, Haaro Alame Tiro) Tini yaatto, ayirrado shiilo giiratenni daaqinse ishine aaninni hoollanni gara kultannote. Hatteente gede, gibbannonkerira danchare assineemmoha ikkiro, hanqinsa daaqe baeenna danchu akatinsa xawo fulanno gede kaaꞌlinammora dandiineemmo.
Baarigaarrakki baxattota leellisha dandaattoti mite doogga hiikkuriiti?
“Gibbannoꞌnerira danchare asse.” (Luqaasi 6:27) Qullaawu Maxaafi, “Baarigaarikki hudiꞌriro itisisi; gooꞌriro hayikkisisi” yaanno. (Roomu Sokka 12:20) Yesuusi uyinota mitte kaajja amaale loosu aana hosiisattoha ikkiro, giwannohe mannira baxille leellishattota wole dooggano afiꞌrattora dandaatto; Yesuusi togo yiino: “Mannu kiꞌnera assaꞌnera hasidhinannire baala kiꞌneno insara assensa.”—Luqaasi 6:31.
“Runtannoꞌnere maassidhe.” (Luqaasi 6:28) Giwannonke manni xissiisannonkere coyiꞌriro nafa, shaqqillunninna awu afiinni coyishiinsheemmonsaha ikkiro, insa maassiꞌnanni heeꞌnoommo yaate. Qullaawu Maxaafi, “Maassidhe ikkinnina, bunshe bunshetenni, xonono xonotenni qoltinoonte” yaanno. (1 Pheexiroosi 3:9) Tini amaale mimmito giwa uurritanno gede assate kaaꞌlitannohe.
“Sao assitannoꞌnerira Magano huuccensa.” (Luqaasi 6:28) Mittu manchi xonihero, assino bunshera “busha assite qoltooti.” (Roomu Sokka 12:17) Hatteentenni, Maganu maarannosi gede huuccatto assisi. (Luqaasi 23:34; Soqqamaasinete Looso 7:59, 60) Rabbisiꞌrate kaꞌꞌantenni, Maganu guuta taashshosi garinni coyekki isi amadanno gede isira aguri.—Leewaawoota 19:18; Roomu Sokka 12:19.
“Baarigaarraꞌne baxxe! Gibbannoꞌnerira danchare asse. Runtannoꞌnere maassidhe; sao assitannoꞌnerira Magano huuccensa.”—Luqaasi 6:27, 28.
‘Cinci; hattono eli.’ (1 Qorontoosi 13:4) Soqqamaasinchu Phaawuloosi baxillu mayimma tittire xawisi woyite horoonsiꞌrinohu Giriikete afii qaali (agaappe), Maatewoosi 5:44 nna Luqaasi 6:27, 35 borreessinoonni qaali ledo mittoho. Cincaaleeyyenna shaqqadda ikkine, hattono hinaanseemmore, woy kakkachoota ikka hoogatenni baarigaarrankera nafa togooha Kiristaanu baxille leellisha dandiineemmo.
“Baxillu cincanno; baxillu elanno; baxillu dihinaasanno; baxillu dinaaxxanno; baxillu dibooꞌnanno. Baxillu seerimale gede diꞌꞌikkanno; baxillu umisire diroorsiꞌranno; baxillu dicaaccaawanno; baxillu koma dikiiranno. Baxillu halaalu coyira hagiidhanno; bunshete coyira dihagiidhanno. Baxillu baalankare cincanno; baalanka addaxxanno; baalanka hexxanno; dargasi diaguranno. Baxillu geedonniho.”—1 Qorontoosi 13:4-8.
Baarigaarrakki ledo olama hasiissannohe?
Dihasiissannohe; mayira yiniro, Yesuusi rosaanosi diinnansa ledo olama hasiissannonsakkita gede rosiisino. Lawishshaho, isi Yerusaalamete katami aana bao daggannota kulinsa woyite, insa olantanno gede ikkikkinni fulte xooqqanno gede kulinonsa. (Luqaasi 21:20, 21) Yesuusi soqqamaasincho Pheexiroosino togo yiino: “Bise fushshidhannori baalu bisetenni gooffannona, bisekki bayichose qoli.” (Maatewoosi 26:52) Qullaawu Maxaafino ikko alamete xagge leellishshannonte gede, umi xibbi diro heedhinori Yesuusi rosaano diinnansa ledo olantara digaaddino.a—2 Ximootewoosi 2:24.
Baarigaara baxate daafira mannu hedannota soꞌrote hedo
Soꞌrote hedo: Maganu Israeelete dagara uyino Seeri insa diinnansa gibbanno gede kulanno.
Halaale: Muse Seeri giddo hattoo hajajo dino. Hatteentenni, hakku seeri Israeelete daga ollaansa baxxanno gede kulanno. (Leewaawoota 19:18) “Manna” woy “olliicho” yaanno qaali manna baala kulannoha ikkirono, mitu Ayihudooti kuni qaali insante gede Ayihude ikkino manna calla kulannoho yite heddanno; hakko daafira insa Ayihude ikkinokki manna diinu gede assite kiirte gibbanno. (Maatewoosi 5:43, 44) Yesuusi danchu woy shaqqadu Samaarichire kulanno lawishsha coyiꞌre, tenne soꞌrote hedonsa taashshino.—Luqaasi 10:29-37.
Soꞌrote hedo: Diinnanke banxummoro bunshensara sumuu yinoommohu gedeeti.
Halaale: Qullaawu Maxaafi rosiisanno garinni, mitto mancho assanno bunshera sumuu yinikkinni baxa dandiinanni. Lawishshaho, Yesuusi finqille giwannoha ikkirono, shitanni noosirira huuccatto assino. (Luqaasi 23:34) Qoleno isi cubbo giwannoha ikkirono, cubbaataammu daafira yee heeshshosi sayise uyino.—Yohaannisi 3:16; Roomu Sokka 6:23.
a Ernest Wiiliyaami Baarnezi qixxeessinohu Kiristaanu Ammaꞌno Kaima (Ingilizete Afoo) yaanno maxaafi togo yaanno: “Noo taje seekkine xiinxallineemmo woyite, Maarkes Oriliyes diri geeshsha [161 kayise 180 M.D. geeshsha gashshinoha Roomu gashshaancho] olaho gaadino Kiristaanchi dino; Kiristaana ikkihu gedensaanni olantote giddo soqqamino olamaanchino dino.”