1. Yesuusi ayeti?

Yesuusi gordoho heeꞌrannoho wolqaataamo sokkaasinchooti. Maganu Yihowa wolere baalankare kalaqara albaanni Yesuusa kalaqino. Hakko daafira, Yesuusa “kalaqamu baalunkura umiidiho [woy bayiraho]” yinoonnisi. (Qolasiyaasi Sokka 1:15) Yihowa xaaddote kalaqinohu Yesuusa calla ikkino daafira, Qullaawu Maxaafi Yesuusa Maganoho ‘mitto Beettosiiti’ yaanno. (Yohaannisi 3:16) Yesuusi Annisi Yihowa ledo mitteenni baxillunni loosino; hakko garinni isi Yihowa wolere baalankare kalaqi woyite looso kaaꞌlino. (Lawishsha 8:30 nabbawi.) Xaano Yesuusira Yihowa ledo danchu jaaloomi noosi. Isi Maganu sokkanna biddishsha sokkaasinetenna mannaho iillishanni, Maganoho ‘Qaale’ woy afoo ikke ammaname soqqamanno.—Yohaannisi 1:14.

Cubbaataamma ikkinoommohu, qarrammeemmohunna reyineemmohu umi manni Addaaminna Heewani Maganoho hajajama giwino daafiraati.a Kayinni hexxo dinonke yaa diꞌꞌikkino. Cubbunninna reyotenni ganteemmo gede, Yihowa Beettosi Yesuusi Kiristoosi ninke daafira reyara uullara soyino. Qullaawu Maxaafi, Yesuusi reyo wodo ikkitinonketa kulanno. Wodo mitto mancho keere fushshate baantanni waagaati. Yesuusi ninkera yee baatino waagi, guuta mancho ikke heeꞌranno heeshshooti. (Maatewoosi 20:28 nabbawi.) Yesuusi uullate aana guuta mancho ikke ilamino daafira, uullate aana hegerera heeꞌrate qoosso noosi. Ikkollana, isi hattee qoossosi umisi fajjonni facci asse agure, Addaaminna Heewaninni kainohunni hoongoommore baalankare wirro afiꞌneemmo gede doogo faninonke. Yesuusi assinori isinna Yihowa mageeshshi geeshsha baxxannonkero leellishanno. Kuni rosi Yesuusi reyora noohe galati lexxanno gede kaaꞌlannohe.

1. Yesuusi reyo xaa yannara kaaꞌlitannonkehu hiittoonniiti?

Cubbaataamma ikkinoommo daafira, Yihowa dadillisannoha lowo coye assineemmo. Ikkollana, cubbinkera addinta gaabbinummoro, Yihowa Yesuusi Kiristoosi widoonni gatona yaannonke gede huucciꞌnummoronna loonsoommo soꞌro lende loonseemmokki gede dandaaminkere baala assineemmoha ikkiro, Maganu jaalla ikkine heeꞌra dandiineemmo. (1 Yohaannisi 2:1) Qullaawu Maxaafi togo yaanno: “Kiristoosino ninke Maganunniwa shiqishara yee, keeraancho ikke heeꞌrenni, keeraanchimma afiꞌnoommokkirira cubbinkenni kainohunni mitte hige qarra adhe reyino.”—1 Pheexiroosi 3:18.

2. Yesuusi reyo albillitte kaaꞌlitannonkehu hiittoonniiti?

Yihowa, Yesuusi guuta mancho ikke heeꞌranno heeshshosi sayise aanno gede soyino; isi hatto assinohu Yesuusa “ammaꞌninohu baalu hegere heeshsho afiꞌranno gede ikkinnina baꞌꞌannokki [gedeeti].” (Yohaannisi 3:16) Yesuusi wodo ikkinonke daafira, Yihowa muli yannara Addaami finqille abbitinoha busha coye baalanka hunanno. Hatto yaa, Yesuusi wodo ammanneemmota leellinsheemmoha ikkiro, uullate aana gannatete hegerera hagiidhinanni heeꞌra dandiineemmo yaate!—Isayaasi 65:21-23.

LEDDE XIINXALLI

3. Yesuusi reyo cubbunna reyotewiinni keere fushshitannonke

VIIDIYO: Yesuusi Reyinohu Mayiraati?—Gafa 1 (2:01)

• Addaami cubbo loosi woyite mayi faro huꞌnino?

Roomu Sokka 5:12 nabbabbe; hakkiinni aante noo xaꞌmo hasaabbe:

• Addaami loosino cubbi ate gawajjinohehu hiittoonniiti?

Yohaannisi 3:16 nabbabbe; hakkiinni aante noo xaꞌmo hasaabbe:

• Yihowa Beettosi uullara soyinohu mayiraati?

1. Addaami umo guuta manchooti; hakkiinni Maganoho hajajama giwino; isinni kainohunni mannu ooso cubbaataamma ikkitino daafira reyitanno

2. Yesuusino guuta manchooti; isi kayinni Maganoho hajajamino; isi widoonni mannu ooso guuta ikkite hegerera heedhanno faro afidhino

4. Yesuusi reyo mannu baalunkura kaaꞌlitannote

VIIDIYO: Yesuusi Reyinohu Mayiraati?—Gafa 2 (2:00)

• Mittu manchi reyo manna baalaho kaaꞌlitannohu hiittoonniiti?

Umi Ximootewoosi 2:5, 6 nabbabbe; hakkiinni aante noo xaꞌmo hasaabbe:

• Addaami guuta mancho ikkirono, cubbo loosino; hakko daafira mannu baalunku cubbaataamonna reyannoha ikkino. Yesuusino uullate aana noo yannara guuta manchooti. Yesuusi kakkalo assino heeshsho cubbunninna reyotenni gatissannonkehu hiittoonniiti?

5. Wodo Yihowa atera uyinohe eltooti

Yihowa jaalla, wodo insara addinni uyinoonninsa elto gede assite laꞌanno. Galatiyu Sokka 2:20 nabbabbe; hakkiinni aante noo xaꞌmo hasaabbe:

• Soqqamaasinchu Phaawuloosi wodo isira addinni uyinoonni elto gede asse laꞌꞌannota coyiꞌrinohu hiittoonniiti?

Addaami cubbo loosita, isinna sirchisi baalunku reyitannore ikkitino. Ikkollana, hegerera hagiidhitanni heeꞌra dandaatto gede, Yihowa Beettosi ate daafira reyanno gede soyino.

Aane noo qummeeshsha nabbawatto woyite, Yihowa Beettisi shete reyi woyite mageeshshi geeshsha xissiisiꞌrinoro hedate woꞌnaali. Yohaannisi 19:1-7, 16-18 nabbabbe; hakkiinni aante noo xaꞌmo hasaabbe:

• Yihowanna Yesuusi assitinohere hedatto woyite mayyaatto?

XAPHISHSHA

Yesuusi reyinonke daafira, Yihowa cubbonke gatona yaa dandaanno; qoleno hegere heeshsho ragiꞌra dandiineemmo.

Kageeshsha Rosoottore

• Yesuusi reyinohu mayiraati?

• Yesuusi kakkalo assino heeshsho cubbunninna reyotenni gatissannonkehu hiittoonniiti?

• Yesuusi reyo kaaꞌlitannohehu hiittoonniiti?

EGENNO LEXXI

Yesuusita guuta heeshsho wodote yinoonnihu mayiraatiro rosi.

“Yesuusi Kakkalo ‘Lowo Mannira Wodo’ Ikkitinohu Hiittoonniiti?” (Webisayitenkera fultino borro)

Gato afiꞌrate maa assa hasiissannonke?

“Yesuusi Gatisannonkehu Hiittoonniiti?” (Webisayitenkera fultino borro)

Yihowa jawa cubbono gatona yaanno?

“Qullaawu Maxaafi Xaꞌmonna Dawaro” (Agarooshshu Shae, Onkoleessa 1, 2013)

Mittu manchi Kiristoosi wodo daafira rosasi akatasi biddi assiꞌranno gede kaaꞌlitinosi gara wodanchi.

“Xaate Finqillete Borojjicho Diꞌꞌikkoommo” (Webisayitenkera fultino borro)

1. Maganunna Kiristoosi assitinonkerira galatu noonketa leellisha dandiineemmoti mitte doogo hiitteeti?

Qullaawu Maxaafi “[Yesuusa] ammaꞌninohu baalu hegere heeshsho afiꞌranno” yee hexxo aanno. (Yohaannisi 3:16) Yesuusa ammannoommota leellinsheemmohu hiittoonniiti? Ammananke doodhineemmo coyinninna assineemmorinni leellisha hasiissannonke. (Yaiqoobi 2:17) Assineemmorinninna coyiꞌneemmorinni ammananke leellinsheemmoha ikkiro, Yesuusinna Annisi Yihowa ledo noonke jaaloomi kaajjanno.—Yohaannisi 14:21 nabbawi.