Yihowa “Kaajjite Guma Laaltannore” Baxanno

1, 2. (a) Mannu sokkanke macciishshannokki qoqqowira ammanante soqqantanno roduuwi lawishshi jawaachishannonkehu mayiraati? (Hanafote noo misile lai.) (b) Yesuusi “ayiddisi giddo” sabbakate daafira mayyiino? (Lekkaaliidi qaagiishshi lai.)

AMEERIKAHO Serjonna Olinda yinanniri 80 diri balla ikkannonsari suwisaano ikkino minaanninna minaama no. Muli yanna kawa lekka xibbannonsa daafira seeda doogo haꞌra didandaanno. Ikkirono soodihunni mitte saatenni katamu giddo mannu batiꞌrannowa maranno; insa lowo diro togo assanni keeshshino. Kuri minaanninna minaama otobise uurritannowa ofolle saꞌꞌaahu higaahura Qullaawu Maxaafi aana xintantino borronke elanno. Rooru manni caaqqi yee nafa dilaꞌꞌannonsa; ikkirono insa hakkira mara diagurino, hattono mitu manni laꞌꞌannonsa woyite muushshi yaanno. Barri widoonni insa sunu sununni mininsara haꞌranno. Layinki barra soodo mitte saatenni xaano otobise uurritannowa haꞌranno. Kuri ammanamino minaanninna minaama lamalate giddo lee barra soodo soodo Maganu Mangiste sokka duduwanno daafira loosu batiꞌrinonsareeti.

² Serjonna Olinda gede, alamete doyichora batinyu ammanamino roduuwinke sokkanke macciishshannohu gari manni nookkihu songonsa qoqqowira lowo diro soqqamanni keeshshino. Atino togoo qoqqowira soqqantanni noottoha ikkiro, hexxo mudhite farciꞌra aguroottokki daafira galanteemmohe.a Kaajjite Yihowara soqqamakki batinye roduuwa jawaachishshanno; togo assakki halaalu mine lowo diro keeshshitinore nafa jawaachishshara dandiitanno. Mitu woradu aliidi laꞌꞌaano togo yitino: “Togoohu ammanamino roduuwi ledo looseemmonna soqqameemmo woyite, insa lawishshi jawaante ikkannoe.” “Insa ammanante heeꞌransa soqqanshoꞌyanni kaajje heeꞌreemmonna worba ikkeemmo gede kaaꞌlitinoe.” “Insa lawishshi wodanaꞌya tashshi assannoe.”

3. Konni birxichira hiikkuri xaꞌmuwara dawaro afiꞌneemmo? Tini maaho kaaꞌlitannonke?

³ Konni birxichira sase xaꞌmuwara dawaro afiꞌneemmo. Insano: Hexxo mudhineemmo gede assannonkeri maa ikkara dandaanno? Guma laala dandiineemmohu hiittoonniiti? Kaajjine guma laallanni heeꞌrate mayi kaaꞌlannonke? Kuri xaꞌmuwara dawaro afiꞌranke Yesuusi uyinonkeha sabbakate looso kaajjine umo fushshate kaaꞌlitannonke.

HEXXO MUDHINEEMMO GEDE ASSANNONKERI MAA IKKARA DANDAANNO?

4. (a) Phaawuloosira Yihudootu kulinonsa sokka adha gibbuta mayi macciishshaminosi? (b) Phaawuloosi dadillinohu mayiraati?

⁴ Soqqantinannihu batinyu manni sokkanke macciishshannokki qoqqowira ikkiro, kiꞌnerano soqqamaasinchu Phaawuloosira macciishshantinosi gedee hedo macciishshantaꞌnera dandiitanno. Phaawuloosi 30 meddi yaanno diro soqqamino soqqanshonni batinyu manni Kiristoosi harunsaano ikkanno gede kaaꞌlino. (Soq. 14:21; 2 Qor. 3:2, 3) Isi batinyu Yihudu manni halaalu magansiꞌrawa daanno gede kaaꞌlate sharraminoha ikkirono, hakkeeshshi geeshsha diqiniinosi. Isinni batinyu manni macciishsha giwino, mitootu qolte darte iillishshinosi. (Soq. 14:19; 17:1, 4, 5, 13) Ikkina tennera Phaawuloosira mayi macciishshaminosiyya? Isi togo yee xawise coyiꞌrino: “Kiristoosinni noommo daafira halaale coyiꞌreemmo. . . . Lowo dadillinna agurannokki qarri wodaniꞌya giddo no.” (Rom. 9:1-3) Phaawuloosi togo dadillinohu mayiraati? Isi sabbakate loososinna manna baxanno. Qoleno Yihudu mannira sabbakinohu insara giddosinni hedanno daafiraati. Konni daafira, insa Maganu maaro adha gibbuta dadillino.

5. (a) Mannaho sabbankeemmo gede assannonkeri maati? (b) Hexxo mudhineemmo yanna heedhara dandiitanno yineemmohu mayiraati?

⁵ Phaawuloosi gede, ninkeno mannaho farciꞌneemmohu insara giddonkenni hendeemmo daafiraati. (Mat. 22:39; 1 Qor. 11:1) Yihowara soqqantannori afidhannoha bae atoote anfoommo. Qoqqowinkera noo manna hendeemmo woyite, ‘Mayi gate baꞌꞌanni noonsarella affa!’ yine hendeemmo. Konnira, Yihowa daafira halaale ikkinorenna isi mannu oosora hedinore rossanno gede jawaachisha diagurreemmo. Sabbankeemmo manchira ‘Muxxe aamamooshshe abbinoommohena adhi ballo’ yinanni heeꞌnoommohu gedeeti. Mannu konne aamamooshshe adha giwanno woyite, ‘wodaninke dadillara dandaanno.’ Ikkirono dadillanke ammana ajjinonketa leellishshannota diꞌꞌikkitino; hatteentenni mannanna sabbakate loosonke lowo geeshsha banxeemmota leellishshanno. Konnira hexxo mudhineemmo gede assannonkeri iillinkerono, kaajje uurra hasiissannonke. Ninkerano 25 saꞌꞌanno diro suwisaancho ikkite soqqantinoti Eleena yinanni rodoo gede macciishshamankera dandaanno. Ise togo yitino: “Sabbaka shota diꞌꞌikkitinoe. Ikkirono wolu baalunku loosinni roore kuni loosi baxisannoe.”

GUMA LAALA DANDIINEEMMOHU HIITTOONNIITI?

6. Konninni aanchine hiitte xaꞌmo xiinxallineemmo? Tenne xaꞌmora dawaro afiꞌra maaho kaaꞌlitannonke?

⁶ Soqqammeemmo qoqqowi ikkihano ikkiro, soqqanshonkenni guma laala dandiineemmo. Hatto yineemmohu mayiraati? Tenne xaꞌmora dawaro afiꞌrate, Yesuusi “guma laala” hasiissannonketa xawisate horoonsiꞌrinota lame lawishshuwa laꞌno. (Mat. 13:23) Umihu woyinete haqqicho daafira coyiꞌrino lawishshaati.

7. (a) ‘Loosannohu,’ ‘woyinete’ haqqichonna ‘sinna’ aye riqibbanno? (b) Hiittenne xaꞌmora dawaro afiꞌneemmo?

⁷ Yohaannisi 15:1-5, 8 nabbawi. Yesuusi soqqamaasinesira togo yiino: “Batinye guma laaltiniro, konninni Anniꞌya ayirranno. Kiꞌneno ane rosaano ikkitinoonnita anfanni.” Konni lawishshira “loosannohu” Yihowa, “woyinete haqqicho” Yesuusa, “sinna” qolte rosaanosi ikkitinota xawinsoonni.b Ikkina Kiristoosi rosaano laala hasiissannonsa gumi maatiyya? Yesuusi konni lawishshi giddo gumu maatiro dikulino; ikkirono gumu ayimma afate kaaꞌlannore eerinonke.

8. (a) Yesuusi coyiꞌrino lawishshi giddo kulloonni gumi, haaro rosaano halaalu minira dagganno gede assa diꞌꞌikkino yineemmohu mayiraati? (b) Yihowa soqqamaanosi wolqansara aleenni ikkino coye asse yaannoni? Xawisi.

⁸ Yesuusi “guma laalannokki sina baala Anniꞌya mure hunanno” yiino. Wole yaattonni, Yihowa soqqamaanosi gede asse kiirannonkehu guma laalleemmoha ikkiro callaati. (Mat. 13:23; 21:43) Konni daafira, lawishshu giddo kulloonnihu mittu mittunku Kiristaanchi laala hasiissannosi gumi, haaro rosaano halaalu minira dagganno gede assa diꞌꞌikkino. (Mat. 28:19) Hatto ikkiro, mannu sabbankeemmo sokka macciishsha hasiꞌrannokki qooxeessira soqqamannohu ammanamino Kiristaani Yesuusi lawishshu giddo kullite guma laaltannokki sinna gedeeti. Hatto yee heda kayinni gara diꞌꞌikkitino! Mayira? Korkaatuno mannu Yesuusi rosaano ikkanno gede giddeessa didandiineemmo. Kuni wolqankera aleenni ikkino coyeeti; baxillaanchu Anninke Yihowa wolqankera aleenni ikkino coye assa hoongoommo daafira soqqamaasinesi gede asse dikiirannonke yine heda sorote. Yihowa wolqankera aleenni ikkino coye asse diyaannonke.—Mar. 30:11-14.

9. (a) Guma laala dandiineemmohu hiikkonne looso loonsummorooti? (b) Xa hiikkonne lawishsha laꞌneemmo? Togo assanke maaho kaaꞌlitannonke?

⁹ Ikkina ninke laala hasiissannonke gumi maatiyya? Kuni gumi, ninke baalunku laala dandiineemmoha ikka hasiissannosi. Ikkina ‘guma laalate’ gede assine kiirranni loosi hiikkonneeti? Kuni loosi Maganu Mangisteha dancha duduwo duduwate loosooti.c (Mat. 24:14) Yesuusi wixu daafira coyiꞌrino lawishshi tenne leellishanno. Hanni xa konne layinki lawishsha laꞌno.

10. (a) Yesuusi coyiꞌrino lawishshi giddo kulloonni wixinna bushshi maa riqiwanno? (b) Sindete muro maa laaltanno?

¹⁰ Luqaasi 8:5-8, 11-15 nabbawi. Yesuusi wixa wixara fulino manchi daafira coyiꞌrino lawishshira kulino wixi “Maganu Qaaleeti” woy Maganu Mangiste sokkaati. Bushshu mannu oosoha lawishshu wodana riqiwanno. Shaqqadu bushshira uwino wixi, rumuxxe murino, hattono lophanni haꞌrino. Hakkiinni “lophe xibbe ero laalino.” Hanni winxoonni wixi sindete yine hendo. Sindete muro laaltanno gumi maati? Tini muro, mulese wole shiimmaadda sindete muro mudhannoni? Dimudhanno. Sindete muro haaro guma amaddanno ikkinnina wole shiimmaadda muro dimudhanno; kuni gumi yannate gedensaanni winxiro wole guma ikkanno. Konni lawishshira kulloonni garinni, mittu wixu gumi xibbe guma laalino. Kuni lawishshi soqqanshonke ledo mayi xaadooshshe afiꞌrino?

11. (a) Yesuusi wixa wixanno manchi daafira coyiꞌrino lawishshi soqqanshonke ledo mayi xaadooshshe afiꞌrino? (b) Maganu Mangiste guma laala dandiineemmohu hiittoonniiti?

¹¹ Kiristaana ikkino anninkenna amanke woy wole Yihowa Farciꞌraasine umo Maganu Mangiste daafira rosiissunke woyite danchu bushshira wixxinohu gedeeti. Qoleno insa wixunni lawinsoonnita Maganu Mangiste sokka macciishshine adhinummota hagiidhitino. Yesuusi lawishshu giddo kulinohu shaqqadu bushshi wixaho injiinte gede, ninkeno Maganu Mangiste sokka macciishshine wodaninkera wodhinoommo. Kuni Maganu Mangiste wixi wodaninke giddo rumuxxe lawishshu yaattonni muro ikkino; tini muro galte hosse guma laalate iillitino. Aleenni laꞌnummonte gede sindete muro guma amaddanno ikkinnina, wole shiimmaadda muro dimudhanno; hatteente gede mittu Kiristaanchi guma laalino yinannihu haaru manni halaalu minira daanno gede assanno woyite ikkikkinni haaro Maganu Mangiste guma laalanno woyiteeti.d Haaro Maganu Mangiste guma laala dandiineemmohu hiittoonniitiyya? Wolu mannira Maganu Mangiste sokka kullummo kiiro, wodaninke giddo winxoonni wixa fushshine winxanni woy halashshinanni heeꞌnoommo yaa dandiinanni. (Luq. 6:45; 8:1) Konni daafira, kuni lawishshi leellishanno garinni, Maganu Mangiste sokka duduwa agura hoongummo geeshsha ‘kaajjine guma laallanni’ heeꞌnoommo.

12. (a) Yesuusi woyinete haqqichonna wixa wixanno manchi daafira coyiꞌrino lawishshinni maa ronseemmo? (b) Tenne afakki mayi macciishshamannohe gede assitinohe?

¹² Yesuusi woyinete haqqichonna wixa wixanno manchi daafira coyiꞌrino lawishshuwanni maa ronseemmo? Kuri lawishshuwa, mannu sabbankeemmo sokka adhirono adha giwirono, ammanamme soqqammummo geeshsha guma laallanni heeꞌnoommota huwanteemmo gede kaaꞌlitannonke. Phaawuloosino “Mittu mittunku loosisi garinni daafurisi guma adhanno” yaasi tenne leellishshanno. (1 Qor. 3:8) Yihowa atootesi aannonkehu loosinkenniiti ikkinninna loosinke abbino guminni diꞌꞌikkino. Mitilda yinanniti 20 diro suwisaancho ikkite soqqantino rodoo “Yihowa sharrammeemmo sharrora maassiꞌrannonketa afaꞌya lowo geeshsha hagiirsiissannoe” yitino.

KAAJJINE GUMA LAALLANNI HEEꞌRA DANDIINEEMMOHU HIITTOONNIITI?

13, 14. Roomu Sokka 10:1, 2 kultanno garinni, Phaawuloosi Maganu Mangiste sokka adha giwanno mannira sabbaka agurannokki gede assinosiri maati?

¹³ Cincine guma laallanni heeꞌrate mayi kaaꞌlannonke? Aleenni laꞌnummonte gede Phaawuloosi Ayihudete manni Maganu Mangiste sokka adha giwino daafira dadillino. Ikkirono isi hexxo mudhe insara farciꞌra diagurino. Hanni isi Roomaho heeꞌranno Kiristaanira borreessino sokka laꞌno; togo yiinonsa: “Wodaniꞌyara nooti lowo halchonna Maganoho shiqishiꞌreemmo huuccatto manniꞌya Israeele gattanno gedeeti. Halaalu egennota ikka hoogginota ikkinnina, insara Maganu laala noonsata aninni farciꞌreemmo.” (Rom. 10:1, 2) Phaawuloosi hexxo mudhikkinni soqqamanno gede kaaꞌlinosiri maa ikkinota xawisino?

¹⁴ Umihunni, Phaawuloosi Ayihudete mannira farciꞌranno gede assitinositi ‘wodanisi giddo noo halcho’ ikkitinota coyiꞌrino. Isi Ayihudete manni gato afiꞌrara halchino. (Rom. 11:13, 14) Layinkihunni, Phaawuloosi insa daafira ‘Maganoho huuccatto shiqishiꞌrino.’ Isi mittu mittunku Yihudu wido ikkino manchi Maganu Mangiste sokka macciishshe adhanno gede Yihowa huucciꞌrino. Sayikkihunni, Phaawuloosi insara ‘Maganoho laala’ noonsata coyiꞌrino. Phaawuloosi suwashshu wodani noonsa mannira noonsa laala garu egenno aana xintantinota ikkitanno gede assiꞌriro, Kiristoosi harunsaano ikka dandaannota huwatino; isi umisi lawishshi tenne leellishanno.

15. Phaawuloosi lawishsha harunsa dandiineemmohu hiittoonniiti? Lawishsha kuli.

¹⁵ Ninke Phaawuloosi lawishsha harunsa dandiineemmohu hiittoonniiti? Umihunni, “hegere heeshsho afiꞌrate gara ikkitinoti wodanu dooꞌꞌo” noonsa manna afiꞌrate halcha hasiissannonke. Layinkihunni, dancha lao noonsa mannira wodanansa fananno gede Yihowa huucciꞌra dandiineemmo. (Soq. 13:48, NW; 16:14) Silvaana yinanniti 30 meddi yaanno diro suwisaancho ikkite soqqantino rodoo togo yitino: “Qoqqowiꞌyara nooha mitto mine hasaawisammara albaanni, gara ikkitino lao heedhannoe gede kaaꞌlaera Yihowa huucciꞌreemma.” Ninkeno sokkaasine suwashshu wodani noonsa manniwa massitannonke gede kaaꞌlankera Magano huucciꞌra dandiineemmo. (Mat. 10:11-13; Aju. 14:6) Rooberti yinannihu 30 saꞌꞌanno diro suwisaancho ikke soqqamino rodii togo yiino: “Sokkaasinete ledo mittee loosa lowo geeshsha hagiirsiissannote; korkaatuno insa hasaawinseemmo manchira mayi tuncu yiinosiro affino.” Sayikkihunni, sabbankeemmo mannira noonsaha dancha akata wodanchate woꞌnaalanna konni kaꞌa Yihowa soqqamaasine ikkitara dandiitanno yine heda dandiineemmo. Karlii yinannihu cuuaminku 50 diro saꞌꞌannosi rodii togo yiino: “Hasaawiseemmo manchira suwashshu wodani noosita leellishshannota shiimmaadda coyibba, lawishshaho, muushshi yiinota, faasiiqa ikkinotanna dancha xaꞌmo xaꞌmannota wodanchate woꞌnaaleemmo.” Ee, ninkeno Phaawuloosi gede cincine guma laala dandiineemmo.

“HASHSHA GEESHSHA WIXA AGURTOOTI”

16, 17. (a) Rosiisaancho 11:6 te noo hajajonni maa ronseemmo? (b) Winxeemmo wixi laꞌꞌannonke manna kaaꞌlannota leellishanno lawishsha kuli.

¹⁶ Sabbankeemmo sokka mannu macciishsha giwirono, loonseemmohu wixa wixate loosi mittoreno dikaaꞌlanno yine heda dihasiissannonke. (Rosiisaancho 11:6 nabbawi.) Batinyu manni kulleemmonsa sokka macciishsha giwannoha ikkirono, ninke laꞌꞌansa digattanno. Bikku uddano uddiꞌneemmota, danchu akati noonketanna manna faasinqe hasaawinseemmota huwattara dandiitanno. Akatinke wolootu ninke daafira noonsa lao gara ikkitinokkita huwatte laonsa biddi assidhanno gede assara dandaanno. Konni birxichi hanafora kulliri Serjonna Olinda lawishshi tenne leellishanno.

¹⁷ Serjo togo yiino: “Xissinonke daafira, shiima yanna geeshsha otobise uurritannowa mara hoongoommo. Wole yannara hakka marrummota saꞌꞌaahu higaahu ‘Ma ikkitini? Qaalliwe assitinoonninke’ yaannonke.” Olinda ledde togo yitino: “Otobise kaddannori keere haadhannonke, hattono mitootu makeeninsa giddo heedhe ‘Loossinanni heedhinoonnihu dancha loosooti!’ yitannonke. Mito woyite isinni metseete uyinammonsara nafa xaꞌmitannonke.” Mittu manchi kuri minaanninna minaama sabbakannowa mare awawa uyinonsa, hattono loossanno looso naadannota kule jawaachishinonsa.

18. ‘Kaajjite guma laalate’ murciꞌroottohu mayiraati?

¹⁸ Ee, hexxo mudhine Maganu Mangiste wixa wixa agura hoongummo geeshsha, “daga baalantera” sabbankanni heeꞌnoonni loosiꞌra kaaꞌla dandiineemmo. (Mat. 24:14) Baalunkunni roore, Yihowa hagiirsiinsanni heeꞌnoommota afanke tashshi assitannonke; korkaatuno isi “kaajjite guma laaltannore” baxanno.