Kiristaanu Heeshshonna Soqqanshote Xiinxallote Maxaafichora Qummi Assinoonni Borro—WOCAWAARO 2020
WOCAWAARO 7-13
MAGANU QAALI GIDDO NOO JIRO | FULO 23-24
“Mannu Batinye Laꞌe Hoodensa Hadhooti”
(Fulo 23:1)
Halaale Seekkite Buuxootto?
7 Jaallakkira woy wolu egennootto mannira imeeletenni woy borrote sokka soya baxisannohe? Hatto ikkiro, mitte haaro odoo macciishshatto woyite wolu balaxihekki wolootaho kula hasiꞌrattoha ikkara dandaanno. Ikkollana imeeletenni woy borrotenni sokka soyattora albaanni ateneeto togo yite xaꞌmi: ‘Tini odoo adda ikkitinota seekke buuxoommo?’ Tini odoo adda ikkase buuxoottokkiha ikkiro, hedittokkinni roduuwinke mereero kaphu odoo tuqisattora dandaatto. Odoo adda ikkase huluullamittoro woleho sokkooti; isinni hattenne sokka huni.
8 Muddamme sokka woleho sayisa wole qarrano abbitanno. Mite gobbuwara, Yihowa Farciꞌraasine hasidhu gede soqqama didandiitanno; mitowa isinni loosonke agamboonni. Hatte gobbara heeꞌrannohu giwannonke manni roduuwinke waajjanno woy mimmito ammanannokki gede assitannota kaphu odoo tuqisara dandaanno. Hanni alba Sooviyeti Yuneenete ikkinore laꞌno. KGB yinanni polise mitu Yihowa dirijjite giddo egennantino roduuwi kaadaasine ikkitino yite kapho halashshitino. Batinyu konne kapho ammante Yihowa dirijjite giddonni fultino. Tini dadillissannote! Yannate gedensaanni insa giddo batinyu higgino; mitootu kayinni dihiggino. Baaru aana dano iilliteenna hiiqqaqqantino markaawe gede, insa ammanano hatto ikkitino. (1 Xim. 1:19) Ninkera togoo gawajjo iillitannonkekki gede qoropha dandiineemmohu hiittoonniiti? Gara ikkitinokkita woy buunxoonnikki odoo tuqinseemmokki gede qoropha hasiissannonke. Dogammeemmokki gede qorophanna macciishshinoommori adda ikkinotanna teꞌee buuxa hasiissannonke.
(Fulo 23:2)
it-1 11 guf. 3
Aarooni
Aarooni sasente yannara soꞌro loosi woyite, umisinni kae loosinoha diꞌꞌikkino; hatteentenni, soꞌro loosanno gede xixxiiwinosihu wole manna woy hakkawoyite kalaqaminori ikkikki digatino. Hakko iso Aarooni umi soꞌro loosi woyite, “Batinye laꞌe hoodensa hadhooti” yaanno seera harunsa dandaannohu baino. (Fu 23:2) Ikkollana, hakkuyi gedensaannino Qullaawa Borro giddo Aarooni suꞌma danchatenni kayinsoonni; Maganu Beettino uullate aana noo yannara, Aarooni sirchinni daggino kakkalaanchimma halaalaancho ikkitinota xawisino.—Fa 115:10, 12; 118:3; 133:1, 2; 135:19; Mt 5:17-19; 8:4.
(Fulo 23:3)
it-1 343 guf. 5
Ballimma
Yoo yinanni woyite halaale wira ballimmate gede ikkitinota xawinsoonni; Muse Seeri gubbo, mussinnu, mursotenna gosoomu daafira lowore qorowisiisanno; korkaatuno kuri coyibba mittu daanyi ballannonna yoo shokkishanno gede assitara dandiitanno. “Yoo yaanno manchira ille ballisse, keeraanchu qarramanno gede assitannona gubbo ittooti.” (Fu 23:8) “Gubbo egennaammu ille ballisse, halaalaanote qaale shokkishshannona gubbo ittinoonte.” (Mar 16:19) Mittu daanyi ayi geeshsha ammanaminohanna xiinxalla ikkirono, mannu aannosi gubbo afanni heeꞌre woy wodanchikkinni gara ikkitinokki yoo yaanno gede assitasira dandiitanno. Maganu seeri, mitto mancho gubbo calla ikkitukkinni umisi hedo nafa ballissasira dandiitannota kulanno; togo yaanno: “Buxichoho godowa hossinoonte; dureessa waajjitinoonte.” (Le 19:15) Konni daafira mittu daanyi, mararrotenni woy mannu naadasira yee dureeyye miica dihasiissannosi.—Fu 23:2, 3.
Qullaawa Borro Giddo Noota Muxxe Jiro Hasiꞌra
(Fulo 23:9)
Manni Gobba Mannira Danchare Assa Habbinoonte
4 Yihowa Israeele wolewiinni dayino manna ayirrissanno gede hajajantenni, insa manni gobbara noowarita heddanno gede assinonsa. (Fulo 23:9 nabbawi.) Insa manni gobbara heeꞌne mageeshsha ‘qarrammanniro’ affino. Wole agurina Ibiraawootu borojje ikkitara albaanni nafa, Gibitsete manni sirchonsa gotti asse laꞌꞌannohura woy Ibiraawootu ammaꞌno baxxitinota ikkitinohura lowo geeshsha giwannonsaha ikkara dandaanno. (Kal. 43:32; 46:34; Ful. 1:11-14) Israeele manni gobbara noowaro beebba assiꞌnoonninsaha ikkirono, Yihowa insa wolewiinni dayino manna “fiixinsa” gede assite laꞌanno gede kulinonsa.—Lew. 19:33, 34.
(Fulo 23:20, 21)
it-2 393
Mikaaeeli
1. Qullaawu Maxaafi giddo, Gabirieeli agurranna suꞌmisinni qummi assinoonnihu qullaawu sokkaasinchinna “sokkaasinete roorrichi” yinoonnihu Mikaaeeli callaati. (Yih 9) Mikaaeeli yaanno suꞌma mite yine qummi assinoonnihu Daanieeli fooliishsho tonneteeti; konni qummeeshshira iso, “sokkaasinete albisaanchi” yinoonni; “Faarisi gashshoote agaranno sokkaasinchi” mitto Maganu sokkaasincho ittisi woyite, Mikaaeeli daye kaaꞌlinosi. Qoleno Mikaaeeli, ‘[Daanieeli] manna agarannohu jawu sokkaasinchi’ hattono “Israeele agaranno sokkaasincho” yinoonni. (Da 10:13, 20, 21; 12:1) Tini Israeelete daga halalla massagino sokkaasinchi Mikaaeeli ikkinota leellishshanno. (Fu 23:20, 21, 23; 32:34; 33:2) “Sokkaasinete roorrichi Mikaaeeli nafa Muse reeshshi daafira Daawuloosi ledo” coyiꞌraminota kultanno hedono, tenne huwanteemmo gede kaaꞌlitannonke.—Yih 9.
Qullaawu Maxaafi Niwaawe
(Fulo 23:1-19)
Nabbawano Xaꞌmitanno Xaꞌmo
Tenne hajo lainohunni heda hasiissannonkehu duuchu coyi no. Kiristaanu ammanaminore ikka hasiissannonsa. Yihowa seeri ledo kiphi yaa hoogi geeshsha, heedhanno gobba fushshitino seera harunsa hasiissannonsa. (Mat. 22:21; Rom. 13:1, 2; Ibi. 13:18) Qoleno qooxeessinsa budenna wodho ayirrisa hattono ‘olliichonsa uminsa gede assite baxa’ hasiissannonsa. (Mat. 22:39; Rom. 12:17, 18; Rom. 12:17, 18) Alamete doyichora heeꞌranno Kiristaani, konne xintu seera harunsa hasiꞌranno daafira, loosaasinete mitore aa hasiissannonsaronna teꞌee huluullamanno.
Duucha gobbuwara, mannu qoossonsa ikkino coye afiꞌrate yee mangistete loosaasinera mitore diaanno. Mangistete loosaasine loossanno loosira mangiste damooza baattannonsa daafira, mitore uyinansara dixaꞌmidhanno woy uyinanninke yite diheddanno. Batinye gobbara, mangistete loosaasine loosonsa loossanni heedhe gubbo adhituro woy wolere assinanninsa gede xaꞌmidhuro tini seera diigate. Mittu loosaasinchi mitore adhe kae yiinore assa hoogiro nafa, hatti gubbote gedeeti. Konni daafira, hattoo gobbara heeꞌranno Kiristaanchi mangistete loosaasinera mitore aa hasiissannosikkiti egennantinote. Hatto assa gara diꞌꞌikkitino!
Ikkollana, togoo seeri nookkiwa woy konne seera woꞌmunni woꞌma harunsinannikki gobbuwara heedhannori mangistete loosaasinera baxxitino lao noonsa. Mite gobbara mangistete silxaane noonsa manni silxaanensa garimale horoonsiꞌranno; qoleno mannaho soqqama hasiissannansa mannu woxe woy wole coye adhate sharrantanno; isinni woxe uyininsakkinni mittoreno diloossanno. Konnira adhanna adhama higge affinota assitannori, qaraxo gamba assitannori, gimbaatu fajjo ledo xaadooshshe afiꞌrinore loossannori mitore uyinanninsa gede xaꞌmitanno. Insa mitore aa hoonginsaro mannu tootayyaawanno gede woy afiꞌra hasiissannonsare afiꞌrikki gatanno gede assitara dandiitanno. Isinni mitte gobbara giira kaꞌanno woyite xoyissitanno loosaasine balanxe woxe aa hoonginsaro giira xoyissitannokkita kulloonni.
Togoo gobbuwara heeꞌranno manni, gubbo uyinummokkinni hasiꞌnoommore afiꞌra didandiineemmo yee hedanno. Mittu Kiristaanchi, togoo mannira woxe aa hajasi wonshinannisi gede lende baantanni woxi gede asse laꞌꞌara dandaanno. Mussinnu batiꞌrino gobbara heeꞌranno Kiristaani kayinni, Maganu albaanni gara ikkinorenna gara ikkinokkire seekke buuxa hasiissannonsa. Qoossonke ikkinore afiꞌrate yine mitore aanna qoossonke ikkinokkire afiꞌrate hasiꞌne mitore aa addi addiiti. Mussinnu batiꞌrino gobbara, mitu manni qoossonsa ikkinokkire afiꞌrate yite mangistete silxaane noonsarira mitore uyitanno; woy qorichunni gatate yite polisete mitore uyitanno. Togoo coye adha gara ikkitinokkinte gede, aano digaraho. Lamunku assooti halaale wirranni gede assannoho.—Ful. 23:8; Mar. 16:19; Law. 17:23.
Qullaawu Maxaafinni qajeelino tiiꞌꞌi noonsari batinyu gikki yitino Kiristaani, mangistete loosaasinera mitore uyitanno gede tiiꞌꞌinsa difajjannonsa. Hatto assa seera lashshi assate woy mussinna halashshate gedeeti yite heddanno. Konni daafira, loosaasinete ayi gari mursono diuyitanno.
Gikki yiino Kiristaani qoossonsa ikkinokkire afiꞌrate mitore aa gubbote gedeeti yite hedanno; ikkollana, heedhanno qooxeessi garinni qoossonsa ikkinore afiꞌrate woy totayyaawa gatate yite mitore uyitara dandiitanno. Mitu Kiristaani, mangistete hospitaalera woxe baatikkinni akkaꞌmihu gedensaanni akimoota galatate mitore aara dandaanno. Insa konne coye uyitannohu akkaꞌmitara albaanni ikkikkinni akkaꞌmituhu gedensaanni ikkino daafira hatto assanke qarra diafidhino yite heddanno; konnira insa mitore uyitinohu woyyino garinni xaginsansara yite diꞌꞌikkino.
Tenne hajo daafira, mitte mittente gobba seeri daafira xawisa didandiinanni. Konni daafira, gobbansa seeri ikkihano ikkiro, Kiristaanu mitto coye assate kaꞌꞌanno woyite tiiꞌꞌansa xursiisannore diassanno. (Rom. 14:1-6) Insa seeru ledo kiphi yaannore assitannokki gede qoropha hasiissannonsa. (Rom. 13:1-7) Yihowa suꞌma mishiishara dandaannore woy wolootu gufidhanno gede assannoha aye coyeno assa dihasiissannonsa. (Mat. 6:9; 1 Qor. 10:32) Hatteentenni, manna baxxannota leellishannore assa hasiissannonsa.—Maq. 12:31.
WOCAWAARO 14-20
MAGANU QAALI GIDDO NOO JIRO | FULO 25-26
“Xaadooshshu Dunkaanira Heeꞌrannoha Lowo Geya Hasiisanno Coye”
(Fulo 25:9)
it-1 165
Gondooru Taawoota
Loonsanni Garanna Akeeka. Yihowa Muse xaadooshshu dunkaana seekkanno gede hajajisi woyite, balaxe Taawoota seekkinanni garanna akeeka kulinosi; korkaatuno Taawootu xaadooshshu dunkaani giddono ikko Israeelete mereero lowo ayirrinye afiꞌrinoho. Taawootu seendille lame cigilenna darate, baqo mitte cigilenna darate, hojja mitte cigilenna darate ikkanno. Taawoota seekkinoonnihu waaccote haqqinniiti; hattono giddoonninna gobbaanni fila culka xallinoonni. “Culku xiyyo” aaniido dibbanno, hattono biifissanno. Taawootu tuana haqqunni seekkine culka xallinoonniha ikkikkinni, woꞌmunni woꞌma culkuni seekkinoonni. Konni tuanira aananni culka daashshine seekkinoonniti lame kiruubeelete misilla no; lamenti misile alba alba higge umo heeshshi yite qoolansa iima qolte Taawoota dibbino. (Fu 25:10, 11, 17-22; 37:6-9) Konne tuana ‘maarote barcimano’ yinoonni.—Ib 9:5.
(Fulo 25:21)
it-1 166 guf. 2
Gondooru Taawoota
Taawootu qaagooshsheho ikkannore worrannite qullaawa saaxineeti; tenne saaxinera worroonnihu qaru uduunni naqaashshennite lame kinnaati woy Tonne Hajajooti. (Fu 25:16) Taawootu giddo ‘mennaho yinanni sagale worroonnihu culkunni seekkinoonni xiltinna lattinoti Aarooni siqqicho’ no; yannate gedensaanni Salamooni qullaawa mine minara albaanni kayi hoolloonni. (Ib 9:4; Fu 16:32-34; Ki 17:10; 1Mo 8:9; 2Du 5:10) Muse reyara albaanni “Seeru Maxaafa” Leewaawootu wido ikkitino kakkalaasine Taawootu giddo ikkikkinni ‘mannu baalunkura naqaashshe ikkanno gede Maganinsa Kaaliiqi Gondoori Taabooti mule wortanno’ gede uyino.—Mar 31:24-26.
(Fulo 25:22)
it-1 166 guf. 3
Gondooru Taawoota
Maganu leella ledo xaadooshshe afiꞌrino. Taawootu noo yannara baalantera Maganu leella ledo xaadooshshe afiꞌrinoho. Yihowa togo yiino: “Hakkiicho ani atera leelleemmohe; Gondooru Taabooti aana noo misilla mereero heeꞌre Israeelete mannira kulatto hajajo baala eemmohe.” “Ani maarote barcimi aana gomichunni leelleemmona.” (Fu 25:22; Le 16:2) Saamueeli Yihowa “ayirrinyu barcimi kirubeelira aanaanni no” yee borreessino (1Sa 4:4); konnira kirubeele Yihowa “saragalla” riqibbanno. (1Du 28:18, NW) “Muse Kaaliiqi ledo hasaawara Dukkanu giddora [eanno] yannara, Kaaliiqi kirubeeli mereero noohura Gondooru Taabooti tuani aana heeꞌre coyiꞌranna” macciishshannohu konni garinniiti. (Ki 7:89) Yannate gedensaanni, Iyyaasunna Kakkalaanote Roorrichi Finihaasino Taawootu albaanni Yihowa huuccidhino. (Iy 7:6-10; Ej 20:27, 28) Ikkirono dirunni mitte hige Qullaawa Holge eꞌꞌe Taawoota laꞌꞌa dandaannohu kakkalaanote roorricha callaho; isi eannohu Yihowa ledo hasaawara ikkikkinni Cubbo Diwate Barra kakkalo shiqishateeti.—Le 16:2, 3, 13, 15, 17; Ib 9:7.
Qullaawa Borro Giddo Noota Muxxe Jiro Hasiꞌra
(Fulo 25:20)
it-1 432 guf. 1
Kirubeele
Halalla minnoonnihu xaadooshshu dunkaanira noo uduunnira kirubeelete misilla no. Taawootu tuanira qaccenna qaccete culka daashshine seekkinooniti lame kirubeelete misilla no. Insa alba alba higge magansidhanni nooha lawanno garinni umo heeshshi yite no. Mittu mittunkura ale hige diriirinohu lamu lamu qooli noonsa; insa agarte nooha lawanno garinni qoolinsanni tuana dibbe no. (Fu 25:10-21; 37:7-9) Qoleno xaadooshshu dunkaanira giddoonni noo hoccira hattono Qullaawa Dukkananna Qullaawa Holge baddanno dukko aana kirubeelete misilla goonde seekkinoonni.—Fu 26:1, 31; 36:8, 35.
(Fulo 25:30)
it-1 802 guf. 7, 8
Leella Woy Heeꞌra
Albu manni bisi giddo baxxe leellanno; wolu bisinni roore mittu manchi ayimma xawise leellishanno; konni daafira mito woyite “alba” yaanno qaale mancho umosi kulate horoonsiꞌnanni. Lawishshaho Haaro Alame Tirora, 2 Saamueeli 7:9; 17:11; Soqqamaasinete Looso 3:19 nooti “ate albaanni,” “ate umokki” yinanni yaatto Ibiraawootu woy Giriikete afiinni “ate alba” woy “alba” yaate. Wole widoonni kayinni Soqqamaasinete Looso 3:13 (NW) yitannonte gede, albu mittu manchi heeꞌrasi woy leellasi xawisanno.
Xaadooshshu dunkaanira shiqinshanni timi Ibiraawootu afiinni noo gedeenni tirriro timu alba yaate (Fu 25:30); kuni qole hakko Yihowa leellannota xawisanno. Tini yaatto isi mannisira mule noota leellishshanno.
Qullaawu Maxaafi Niwaawe
(Fulo 25:23-40)
WOCAWAARO 21-27
MAGANU QAALI GIDDO NOO JIRO | FULO 27-28
“Kakkalaasine Uddidhanno Uduunninni Ronseemmore”
(Fulo 28:30)
it-2 1143
Uriiminna Tumiimi
Batinye Qullaawu Maxaafi fullahaano Uriiminna Tumiimi hixaho yite ammantanno. Jeemsi Mofaati tiro Fulo 28:30 noo hedo “qullaawa hixa” yite tirtino. Mitootu kuni hixi sasericho ikkinotanna, mittoho “ee,” mittoho “deeꞌni,” yine borreessinoonnita hattono sayikkihura mittoreno borreessinoonnikkita coyidhanno. Xaꞌmo xaꞌminihu gedensaanni, hixu fulanno woyite dawaro anfanni; mittoreno borreessinoonnikki hixi fuliro, dawaro dino yaate. Wolootu kayinni Uriiminna Tumiimi mitto wido waajjo mitto wido kolishsho lame kinchooti yite heddanno. Hixa tunganni woyite lamunku kinchi waajjo wido ikkiro, “ee” yaate; lamunku kolishshu wido ikkiro kayinni “deeꞌni” yaate; lamunku kolishshonna waajjo ikkiro, dawaro dino yaate. Mitte hige Saaooli Filisxeemete ledo olamonso aguro yee kakkalaanchu widoonni qole xaꞌmi woyite dawaro diafiꞌrino. Cubbo loosinohu no yee hedino daafira, “Israeelete Magano ballo, Tumiimi widoonni dawarinke” yee huucciꞌrino. Hakkiinni lamunku giddo cubbo loosinohu ayetiro afate Saaoolinna Yoonaataani mannu mereerinni bande hixa tungoonni. Tenne xaggera Saaooli, “Tumiimi widoonni dawarinke” yee huucciꞌrino huuccatto lamunkura tungoonni hixi ledo xaadooshshe afidhinota labburono lamunku coye babbaxxinoha ikkikki digatino.—1Sa 14:36-42, NW.
(Fulo 28:36)
it-1 849 guf. 3
Alba
Israeelenniha Kakkalaanote Biilo. Israeelennihu kakkalaanote biili umoho wodhannohu xaanxoonni koffiyyira albaanni culku migirara, “Kaaliiqira, baxxinoho” yine borreessinoonni. (Fu 28:36-38; 39:30) Kakkalaanote biili Israeele Yihowara shiqishidhanno kakkalora qara riqiwaancho ikkino daafira, loososi loosanno woyite qullaawa ikka hasiissannosi; qoleno kuni malaati baalanti Israeele Yihowara soqqantanno soqqansho qullaawa ikka hasiissannota qaagiissannonsa. Hakkiinnino sae Maganu qullaambe luphi assite leellishshanno kakkalaanchimmara soqqamanno gede Yihowa shoominosihu bayiru Kakkalaanote Biili Yesuusi Kiristoosira kaajja lawishshaati.—Ib 7:26.
(Fulo 28:42, 43)
w08 8/15 15 guf. 17
Heeshshoꞌnenni Yihowa Ayirrisse
17 Yihowa ayirrinye afiꞌrino garinni magansiꞌra hasiissannonke. Rosiisaancho 5:1, “Maganu minira eatto yannara qaafokki agadhi” yitanno. Museno Iyyaasuno qullaawa basera uurritu woyite caammansa fushshidhanno gede hajanjoonninsa. (Ful. 3:5; Iya. 5:15) Hatto assansa ayirrinyu noonsata leellishshanno. Israeelete kakkalaasineno “hunda iillitino luko” uddidhanno gede hajanjoonninsa. (Ful. 28:42, 43) Hatto assansa kakkalote darga soqqantanno woyite bisinsa leellannokki gede assitanno. Mittu mittunku kakkalaasinete maate miili Maganu danchu amanyooti daafira fushshino seera ayirrisa hasiissannosi.
Qullaawa Borro Giddo Noota Muxxe Jiro Hasiꞌra
(Fulo 28:15-21)
w12 8/1 26 guf. 1-3
Ati Tenne Afootto?
Israeelennihu kakkalaanote biili gagasu kiisera wodhannohu muxxe kinchi mamii dayinoho?
Israeele Gibitsetenni fulte halalla noo yannara Maganu kakkalaanote biili uddiꞌranno uddanora gagasu kiise gobbanno gede hajajino. (Fulo 28:15-21) Gagasu kiisera duumo dilqa, baqqala dilqa, daama xawado dilqa, haanja xoxxorraamo dilqa, bule dilqa, hincilaallaamo dilqa, daama xoxxorraamo dilqa, xiillicha dilqa, bule dilqa, burcuqqaamonna haanja dilqa worranni. Ikkina Israeele kuri muxxe kinna mamii afidhu?
Hundi waro mannu dilqa kinna muxxe jajji gede asse laꞌꞌanno hattono daddaloho horoonsiꞌranno. Lawishshaho hundi Gibitsaawooti xeertowa hadhe muxxe kinna afiꞌrate sharrantanno; insa tenne kinna afiꞌrate Iraanenna Afigaanistaane wole agurina Hindete geeshsha nafa hadhukki digattino. Gibitsete gobbarano shiilo untannorino babbaxxitinota muxxe kinna fushshitanno. Gibitsete mootoolla qeelte adhitino gobbara noota shiilo ummanni base uminsata assidhanno. Iyyoobi isi waro heeꞌrino manni muxxe kinna afiꞌrate bale umanno gara xawisino. Isi balete giddonni umme fushshinanni shiilo giddo xoxxorraamonna baqqala dilqa kincho qummi assino.—Iyyoobi 28:1-11, 19.
Fulote maxaafira noo xagge Israeele Gibitsetenni fultu woyite, “Gibitsete jiro gudhite” fultinota kultanno. (Fulo 12:35, 36) Konni daafira Israeele kakkalaanote biili uddiꞌranno uddanora gagasu kiisera worrannita muxxe kinna Gibitsetenni afidhinota ikkitara dandiitanno.
(Fulo 28:30)
w01 9/1 27 guf. 5
Dancha Doorsha Doodha Dandiitinannihu Hiittoonniiti?
Hundinni kayise mannu dancha doorsha doodha dandaanno gede kaaꞌlinohu mitto addaxxinanni Magano Yihowa agurranna wolu dino. Lawishshaho isi hundi Israeelera uyinonsari Uriiminna Tumiimi yiniri lame qullaawa hixa ikkikki digatino; insa lowo geeshsha hasiisanno coyi tuncu yaannonsa woyite konne hixa tuqqitanno. Yihowa Uriiminna Tumiimi widoonni xaꞌmonsara dawaro qolannonsa hattono Israeelete geerri murtinori isi fajjo ledo sumuu yaannohoronnna teꞌee buuxxanno gede kaaꞌlannonsa.—Fulo 28:30; Leewaawoota 8:8; Kiiro 27:21.
Qullaawu Maxaafi Niwaawe
(Fulo 27:1-21)
WOCAWAARO 28–BIRRA 4
MAGANU QAALI GIDDO NOO JIRO | FULO 29-30
“Yihowara Uyinanni Fushshaate”
(Fulo 30:11, 12)
it-2 764-765
Borreessama
Siina Ilaalira. Israeele Yihowa hajajonni mite yite borreessantinohu Gibitsete fultuhunni layinki diro layinki aganira Siina ilaalira dukkaꞌnitu woyiteeti. Konni loosira Muse kaaꞌlate mitte mittente gaꞌrenni mitto mitto sooreessa doorroonni; mittu mittunku sooreessi gaꞌresi borreessantinoronna teꞌee seekke buuxanno. Gaadoho haꞌrate ikkadda ikkitinori 20 dironna hakkuyi ale ikkannonsa labballi borreessantino; Muse Seeri xaadooshshu dunkaani giddo assinannirira borreessamino manni baalu giwire baatanno gede hajajanno. (Fu 30:11-16; Ki 1:1-16, 18, 19) Borreessamino manni hatte gobbara ragge afidhinokki Leewaawoota agurranna xaphoomunni 603,550 ikkanno. Leewaawootu qullaawu minira giwire dibaattanno hattono gaadoho dihadhanno.—Ki 1:44-47; 2:32, 33; 18:20, 24.
(Fulo 30:13-15)
it-1 502
Fushsho
Muse Seeri fushsho fushshinanni gede hajajanno. Muse Israeele kiiri woyite 20 dironna hakkuyi ale ikkannonsa labballi baalu heeshshonsara wodo ikkitanno fushsho fushshitanno gede hajajinonsa. Kuni woxi cubbonsa agursiisatenna xaadooshshu dunkaani hajara Yihowara fushshinanni fushshooti. (Fu 30:11-16) Ayihudennihu xaggete borreessaanchi Joosefesi (The Jewish War, VII, 218 [vi, 6]) yiino garinni konne “woxe” hakkunni gedensaanni diru kiiro baantoonni.—2Du 24:6-10; Mt 17:24; GIWIRE yaannoha lai.
(Fulo 30:16)
w11 11/1 12 guf. 1-2
Ati Tenne Afootto?
Yerusaalamete noohu qullaawu mini hajara woxe anfannihu mamiinniiti?
Qullaawu minira loonsannihu addi addi loosira woxe anfannihu giwirunninna roorenkanni baalunku manni fushshanno asaraatinniiti. Ikkollana wolu gari giwirino no. Lawishshaho xaadooshshu dunkaana seekkini woyite Yihowa, Muse borreessaminohu baalu fushsho fushshanno gede assara hajajino.—Fulo 30:12-16.
Hatte yanna gedensaanni mittu mittunku Yihudichi diru kiiro murroonniha qullaawu mini giwire baatikki digatino. Yesuusi Pheexiroosira qulxuꞌmichote afiinni saante haaꞌre konne giwire baatanno gede hajajinosi.—Maatewoosi 17:24-27.
Qullaawa Borro Giddo Noota Muxxe Jiro Hasiꞌra
(Fulo 29:10)
it-1 1029 guf. 4
Anga
Anga Aanaho Wora. Mannu aana woy mittu coyiꞌra anga aanaho worrannihu babbaxxino korkaatiraati. Xaphoomunni hatto assa mitto mancho woy mitto coye doora leellishshanno. Kakkalaanote qixxaawo xintini woyite Aarooninna oososi kakkallanni bootiranna lamu geꞌreewira anga aanaho wortino; hatto assansa kuri saada kakkalloonnihu Aarooninna oososi Yihowara kakkalaano ikkite soqqantara yine ikkinota leellishshanno. (Fu 29:10, 15, 19; Le 8:14, 18, 22) Muse Maganu hajajino garinni Iyyaasu iso lekkisanno gede shoomi woyite angasi aanaho worino; hakkiinni Iyyaasu Israeele garunni massaga dandaanno gede Yihowa ‘egenno wonshinosi.’ (Mar 34:9) Mitu manni atoote afiꞌranno gede assateno anga aanaho worranni. (Ka 48:14; Marq 10:16) Yesuusi Kiristoosino xiwantinore hursi woyite mito amammadinonsa hattono anga aanaho worinonsa. (Mt 8:3; Marq 6:5; Lu 13:13) Mitu manni qullaawu ayyaani elto adhinohu soqqamaasine anga aanaho wortunsa gedensaanniiti.—Soq 8:14-20; 19:6.
(Fulo 30:31-33)
it-1 114 guf. 1
Buurantinore, Buura
Muse Seeri giddo Yihowa buurranni zayite loonsanni gara kulino. Tenne zayite qimame, kaarbe, tanni yee suꞌnaannoha haqqu omolcho, hixicho, suꞌniitanno haphaayyonna ejersu zaayitenni loonsanni. (Fu 30:22-25) Aye manchino togoo zayite loosiꞌre qullaawa ikkinokkirira woy fajjinoonnikkirira horoonsiꞌra lowo cubbooti. (Fu 30:31-33) Tini qullaawa zaayitenni buurre uyinanni qoosso qullaawanna ayirrado ikkitinota leellishshanno.
Qullaawu Maxaafi Niwaawe
(Fulo 29:31-46)
km 1/11 4 guf. 5-7; 6, saaxine
Maate Kaaꞌlitanno Qixxaawo
5 Maate Woꞌmanta Yanna Mitteenni Hasaawa Hasiissannonsa? Minaanninna minaama hattono ooso afidhino maate Qullaawu Maxaafire hasaabbanno woyite mimmito jawaachishshanno. (Rom. 1:12) Hattono albinni roore mimmitunniwa shiqqanno. Hakko daafira Maatete Magansiꞌra yannara assa hasiissannonsahu qaru coyi Qullaawu Maxaafi hasaawaati. Ikkollana mittu mittunku maatete miili gama yanna hojju xiinxallo assiꞌrate horoonsiꞌra dandaanno. Lawishshaho maate mitteenni hasaabbuhu gedensaanni, ofoltinowa heedhenni hojjunni xiinxalla lawishshaho gambooshsheho qixxaabbe guda woy nabbawa hanaffino metseete guda dandiitanno. Mite maate hakko hashsha woꞌma televizhiine fana hoogate doodhitino.
6 Insa Ma Garinni Hasaawa Hasiissannonsa? Woꞌmanka woyite xaꞌmotenninna dawarotenni calla hasaawa hasiissannonsa yaa diꞌꞌikkino. Batinye maate maatensa magansiꞌra baxissannotanna hagiirsiissannota ikkitanno gede lamalate mereero assiꞌnanni gambooshshi garinni assidhanno. Insa hasaawa babbaxxino gafira beekke kifilla addi addi garinni shiqqanno gede assitanno. Lawishshaho insa Qullaawa Maxaafa mitteenni nabbabbara, songote gambooshshita gama kifile mitteenni qixxaabbara hattono soqqantanno gara rosiisidhara dandiitanno. Qoola 6 tennera kaaꞌlitannota mite hedo kulloonni.
7 Annunna Ama Maa Assate Sharrama Hasiissannonsa? Woꞌmunku maatete miilla horo afidhannohu maatete magansiꞌra baxissannonna hagiirsiissannota ikkiturooti. Ayyare injiitannoha ikkiro, mito woyite gobba xiinxalla dandiitinanni. Hasiisannoha ikkiro xiinxallo mereeroho agurtine fooliishshiꞌra dandiitinanni. Mitootu maatete magansiꞌra gedensaanni boohaartanno. Annunna ama maatete magansiꞌra seejjotenna boroorate horoonsidhannokkiha ikkirono, maatensa giddo qarra ikkinore kayisse hasaawa hasiissannonsaha ikkara dandaanno. Ikkollana mitto qaaqqo roduuwisi albaanni saalsiisasira dandaannore kayise hasaawantenni wole woyite hasaawa woyyitanno. Maatete Magansiꞌra ceeꞌmishshannota ikkitukkinni hagiirraamu Maganinke hasiꞌranno gedeeta ikka hasiissannose.—1 Xim. 1:11, NW.
Maatete Magansiꞌrara Kaaꞌlitannota Mite Hedo
Qullaawa Maxaafa:
• Lamalannite Qullaawu Maxaafi niwaawe giddo gama mitteenni nabbabbe. Gafu borreessaminohu diraamu garinni ikkiro, mittu odeessaancho ikke wolootu kayinni xaggete giddo kulloonniha wole ikkite nabbawa dandiitanno.
• Qullaawu Maxaafi niwaawe giddonni gama gafa diraamu garinni shiqishshe.
• Mittu mittunku maatete miili Qullaawu Maxaafi fooliishshuwa balaxe nabbawe mitte woy lame xaꞌmo qixxeesse daanno gede asse. Hakkiinni mittu mittunku xaꞌmo mitteenni seekkitine xiinxalle.
• Lamalate kiiro mitte kaardera mitto qummeeshsha borreessitine hakkonne qummeeshsha qaagatenna xawisate woꞌnaalle. Kaarde gamba assitinihu gedensaanni meꞌꞌe qummeeshsha qaagginanniro lamalate kiiro mimmito xaꞌme.
• Qoonqotenni qaddaꞌnoonnita Qullaawu Maxaafi niwaawe faꞌnitine harunse.
Songote Gambooshshe:
• Gama songote gambooshshi kifilla mitteenni qixxaabbe.
• Dagganno lamalara songote gambooshshiwa faarsinanni faarso rosiisidhe.
• Maateꞌne miilla giddo kifile noosihu nooro, ma garinni shiqisha dandaannoro hasaabbe woy shiqishanni rosiisiꞌranno gede asse.
Maatete Hasiisannore:
• Wedellu Xaꞌmanno Xaꞌmo woy Bayiru Rosiisaanchi Yaannore Macciishshi yitanno maxaaffa giddonni mito gafa doortine hasaabbe.
• Rosu mine tuncu yaanno fonqolira dawaro qola dandiinanni gara hasaabbe.
• Annunna ama oosote gede, ooso kayinni annunna amate gede ikkite rosiisiꞌra dandiitanno. Ooso mitte hajo daafira xiinxallite dagge anninsaranna amansara xawissanno.
Soqqansho:
• Qidaamenna Sambata soqqansho fultinanni woyite manna ma garinni hasaawissinanniro rosiisidhe.
• Maatete miilla Qaagooshshu Ayyaani yannara woy fooliishshote yannara albinni roore soqqamate quwa saꞌinokki mixo fushshiꞌra dandiitanno.
• Mittu mittunku maatete miili mannu soqqanshonniwa xaꞌmo xaꞌmanno woyite, mayyee dawara dandaannoro qixxaawanno gede boode daqiiqa gaamme; hakkiinni rosiisidhe.
Wole Hedo:
• Muli yannara fultino metseetta giddonni mitto birxicho mitteenni nabbabbe.
• Mittu mittunku maatete miili muli yannara fultino metseetta giddonni baxino birxicho nabbawe huwatinore xawisanno gede asse.
• Mito woyite mitto halashshaancho woy minannanna minaama Maatete Magansiꞌra ledoꞌne assiꞌranno gede koyisse; insa qaalu xaꞌmo xaꞌma dandiitinanni.
• Viidiyubbanke giddonni mitte laꞌine hasaabbe.
• Baqqi Yiiyye! yinanni metseetera fultinota “Wedellu Xaꞌmanno Xaꞌmo” woy “Maatete Kaaꞌlitanno Hedo” yitanno birxichuwa mitteenni hasaabbe.
• Agarooshshu Shaera fultinota “Oosoꞌne Rosiisse” woy “Wedellootaho” yitanno birxichuwa mitteenni hasaabbe.
• Diru Maxaafira woy muli yannara Qoqqowu Gambooshshiwa fultino borro giddonni gama gafa hasaabbe.
• Qoqqowu woy Woradu Gambooshshe assidhinihu gedensaanni qara qara hedo hasaabbe.
• Yihowa kalaqinore laꞌinihu gedensaanni, konni kalaqaminni Yihowa daafira maa rossinoonniro hasaabbe.
• Mito looso mitteenni loosse; lawishshaho mituri akeeka, kaarta woy sanxarazhe seekka dandiitinanni.