Aliyyenni Daanno Sia!

1. Raasilinna miillasi Qullaawa Maxaafa xiinxallate ma gari hayyo horoonsidhino? Tini dancha guma abbitinohu hiittoonniiti?

XIBBE saꞌꞌanno dirira albaanni Roduu Chaarliisi Teezi Raasilinna boode Maganu Qaali rosaano mitteenni gama yaa hanaffino. Insa Qullaawu Maxaafi Maganu Yihowa, Yesuusi Kiristoosi, reyitinori noo garanna wodote daafira rosiisanno halaale afa hasidhino. Insa xiinxallate aante noo hayyo horoonsidhanno. Insa giddonni mittu xaꞌmo xaꞌmanno; hakkiinni woꞌmanti gaamo hattee hajo ledo xaadooshshe afidhino qummeeshshuwa baala xiinxallitanno. Jeefote afidhu dawaro borreessite amaddanno. Yihowa kaaꞌlonni kuri suwashshu wodani noonsa Kiristaani xaa yannara lowo geeshsha naandeemmoha batinye Qullaawu Maxaafiha xinta ikkino halaale huwata dandiitino.

2. Qullaawu Maxaafi masaalo xiinxallineemmo yannara mito woyite garimale huwanteemmo gede assannonkeri maati?

² Ikkollana, kuri Rosaano mulenni Qullaawu Maxaafi masaalo afidhino tiro huwata Qullaawu Maxaafiha xinta ikkino halaale huwatate geeshsha shota ikkitinokkita buuxxino. Mayira? Mittu korkaati duucha woyite Qullaawu Maxaafi masaalo woꞌmunni woꞌma huwata dandiineemmohu woꞌmitanno woyite woy woꞌmituhu gedensaanniiti. Kayinni, wolu korkaatino no. Masaalo afidhino tiro garunni huwatate qooxeessaho no hedo xiinxalla hasiissannonke. Masaalonnita mitte hedo calla illachinshe wole agurreemmoha ikkiro, garimale huwantammora dandiineemmo. Iyueeli maxaafira noo masaalo huwantoommohu konni garinni ikkikkinni digatino. Hanni tenne masaalo wirro xiinxalline xa huwantoommo gara biddi assa hasiissinohu mayiraatiro laꞌno.

3-4. Iyueeli 2:7-9 noo masaalo mayine huwante keeshshinoommo?

³ Iyueeli 2:7-9 nabbawi. Iyueeli kanchafaru Israeelete baatto gawajjannota masaalino. Doobbiyunnite gedee hinkonna kelta afiꞌrinohu kuni ite duuwannokki kanchafari Israeelete gobba aana noore baala shakki asse gudanno. (Iyu. 1:4, 6) Lowo diro, tini masaalo Yihowa Farciꞌraasine, hoola dandiinannikki kanchafari gede ikkite sabbakate looso loossannota kultannote yine ammanne keeshshinoommo. Kuni loosi “uulla,” woy ammaꞌnote massagaano hunda noo manna gawajjannoho yine huwantoommo.b

⁴ Iyueeli 2:7-9te noo hedo calla nabbambe agurreemmoha ikkiro, kuni xawishshi gara lawankera dandaanno. Ikkollana, qooxeessaho noo hedo xiinxallinummoro, huwantoommo gara biddi assiꞌra hasiissannonketa buunxeemmo. Hanni hatto yineemmo gede assannonkeha shoole korkaata laꞌno.

TENNE MASAALO HUWANTOOMMO GARA BIDDI ASSA HASIISSINOHA SHOOLE KORKAATA

5-6. Aante noo qummeeshshuwa hiikkuri xaꞌmuwa xaꞌmineemmo gede assitannonke? (a) Iyueeli 2:20? (b) Iyueeli 2:25?

⁵ Umihunni, Yihowa “Aliyyenni daggannoꞌneta olantote biite [kanchafare] shorreemmo” yee qaale einota qaango. (Iyu. 2:20) Kanchafaru Yesuusira hajajante sabbakkannorenna manna rosaano assitannore Yihowa Farciꞌraasine riqiwannoha ikkiro, Yihowa insa shorreemmo yee qaale mayira eanno? (Hiz. 33:7-9; Mat. 28:19, 20) Konnira, Yihowa shorrannohu ammanantino soqqamaanosi ikkikkinni insara diina ikkino coye woy mannaati.

⁶ Layinkihunni, hanni Iyueeli 2:25te noo hedo laꞌno. Hakkiicho Yihowa togo yiino: “Ani saꞌu dirrara soommoti, batiꞌra bagadaano, kanchafaru biite guddinota, jiroꞌne qoleemmoꞌne.” Yihowa konni qummeeshshira kanchafaru gudino jiroꞌne “qoleemmoꞌne” yee qaale einota qaango. Kanchafaru Maganu Mangiste sawaakoota riqiwannoha ikkiro, insa dudubbanno sokka gawajjitannote yaate. Ikkollana, tini heeshsho gatissanno sokka bushu manni bunshensa agure maaro eanno gede assitannote. (Hiz. 33:8, 19) Addaho, tini sokka manna lowo geeshsha kaaꞌlitannote!

7. Iyueeli 2:28, 29 nooti “kunni gedensaanni” yitanno hedo maa huwatate kaaꞌlitannonke?

⁷ Iyueeli 2:28, 29 nabbawi. Sayikki korkaati masaalote giddo kulloonni coyi yannate aante ledo xaado afiꞌrinoho. Yihowa “kunni gedensaanni” yaano kanchafaru loosonsa gudihu gedensaanni “ayyaanaꞌya duneemmo” yiinota wodanchitinoonni? Kanchafaru Maganu Mangiste daafira sabbakkannore riqiwannoha ikkiro, Yihowa ayyaanasi insa loosonsa gudduhu gedensaanni dunannohu mayiraati? Insa dartu iillinsarono wole agurina sabbakate loosonke agambiro nafa sabbaka agurtinokkihu Maganunnihu wolqaataamu ayyaani kaaꞌlinonsa daafiraati.

8. Yohaannisi Ajuuja 9:1-11 xawinsoonni kanchafari ayeoo riqiwanno? (Aaniidi qoolira noo misile lai.)

⁸ Yohaannisi Ajuuja 9:1-11 nabbawi. Hanni xa shoolki korkaata laꞌno. Alba Iyueeli masaalora kulloonni kanchafari sabbakate loosinke daafira kulannoho yine ammannoommohu ajuujate maxaafira hattoo masaalo noo daafiraati. Ajuujate maxaafira kulloonni kanchafarira ‘uminsara culkunni seekkinoonni worraaqqa lawannori no. Albinsa mannunniha lawanno.’ (Aju. 9:7) Insa Maganu sumudi albinsara nookki manna [Maganu diinna] calla ontu agani geeshsha shetissanno; ontu agani mittu kanchafarchi mereerimunni heeshshotenni heeꞌranno yannaati. (Aju. 9:4, 5) Tini masaalo buurantinote Yihowa soqqamaasine daafira kultannota ikkitukkinni digattino. Insa tenne busha alamera Maganu yiino yoo worbimmatenni kultanno; tini alamete wido ikkino manna shetissannonsa.

9. Iyueeli laino kanchafarinna ajuujate maxaafira kulloonni kanchafari mereero noo badooshshi maati?

⁹ Ajuujate maxaafiranna Iyyueeli maxaafira noo masaalo mitto assannonsari nooti dihuluullissannote. Ikkollana, badooshshuno noonsa. Lawishshaho, Iyueeli masaalora kulloonni kanchafari muro shakki asse ite gudino. (Iyu. 1:4, 6, 7) Yohaannisi laino ajuujara noo kanchafari kayinni baattote aana no muro ‘gawajjannokki gede’ kulloonninsa. (Aju. 9:4) Iyueeli laino kanchafari aliyyenni dayino. (Iyu. 2:20) Yohaannisi laino kanchafari kayinni qile balenni fulino. (Aju. 9:2, 3) Iyueeli masaalora kulloonni kanchafare shorrinoonni. Ajuujate maxaafira kulloonni kanchafare kayinni dishorrinoonni; hatteentenni loosonsa guddara fajjinoonninsa. Insa Yihowa dadillissinota leellishannori dino.—“Kanchafaru Daafira Kultanno Masaalo—Mittu Garita Ikkite Heedhenni Babbaxxitinote” yitanno saaxine lai.

10. Iyueeli maxaafiranna ajuujate maxaafira kulloonni kanchafari addi addire riqiwannota leellishannoha Qullaawa Borro lawishsha kuli.

¹⁰ Lamente masaalo mereero noo badooshshe afanke tini lamenti masaalo babbaxxitinota ikkitinota huwatate kaaꞌlitannonke. Ikkina, Iyueeli masaalo giddo kulloonni kanchafari ajuujate maxaafi giddo kulloonni kanchafari ledo mitto diꞌꞌikkino yinanni heeꞌnoommo? Ee! Qullaawu Maxaafi giddo lawishshu tiro afiꞌrinohu mittu coyi addi addi tiro afiꞌrannoti rosantinote. Lawishshaho, Yohaannisi Ajuuja 5:5te Yesuusa “Yihudu gaꞌre ikkino Doobbiichi” yinoonni; wole widoonni kayinni Umi Pheexiroosi 5:8 Daawuloosi ‘ittananno doobbiicho’ yinoonni. Tenne masaalo xa huwantoommo gara lainohunni heedhannonke xaꞌmora wole xawishsha afiꞌra hasiissannonke. Hiittoo xawishsha?

KANCHAFARU MAA RIQIWANNOYYA?

11. Iyueeli 1:6nna 2:1, 8, 11 noo hedo kanchafaru riqiwannore afate kaaꞌlitannonkehu hiittoonniiti?

¹¹ Iyueeli maxaafira noota wole qummeeshshuwa xiinxallinummoro, tini masaalo olanto siꞌanno siꞌꞌi daafira kultanni noota buunxeemmo. (Iyu. 1:6; 2:1, 8, 11) Yihowa isira hajajama gibbinota Israeelete daga qorichishate ‘batiꞌra bagadaanosi’ (Baabiloonete olanto) horoonsiꞌrannota coyiꞌrino. (Iyu. 2:25) Tenne olanto aliyye olanto yaa garankolla; korkaatuno Baabiloone Israeele horritinohu aliyyeenni daggeeti. (Iyu. 2:20) Tenne olanto dancha gede qiniino kanchafari ledo lawinsoonni. Iyueeli togo yiino: “Mittu mittunku [olamaanchi] dirasi amade haꞌranno . . . ; katamu giddono qoqqobbissanno; kinchu huxxi aanaanni higge doddanno; minnano gidditanno. Mooraanchu gede maskootete giddoonni higge eꞌanno.” (Iyu. 2:8, 9) Hanni ikkitonsa hedi. Base baalate olanto no. Marre maaxammanniwi dino. Ayeno Baabiloonete olanto bisenni gata didandaanno!

12. Iyueeli kanchafaru daafira masaalino masaalo woꞌmitinohu hiittoonniiti?

¹² Kanchafaru gede Baabiloonete olanto 607 K.A. Yerusaalamete katama horritino. Qullaawu Maxaafi togo yaanno: “Baabilooni mooteno . . . ,Yihudunnita aja ooso baala shee gudi. Maganu sayise uyinosi daafira aju akkali, meya labbaahu gatikkinni baalanka mararikkinni gudino. Qullaawa mine, Yerusaalamete katama, mootete minna jajjunku ledo giiri; katamunniha kinchu huxxano diigi.” (2 Dud. 36:17, 19) Baabiloonete olanto Israeelete baatto horrite gudduhu gedensaanni laꞌꞌanno manni togo yaanno. “Baatto Baabiloonootu angara eꞌino daafira, mannunna saada heedhannokkita ona ikkitanno.”—Erm. 32:43.

13. Ermiyaasi 16:16, 18 afidhino tiro xawisi.

¹³ Iyueeli masaalo coyiꞌrihunni mitu 200 diri gedensaanni, Yihowa Ermiyaasi konni siꞌꞌi daafira wolere lede masaalanno gede assino. Yihowa olanto bunshe loosannoha Israeelete manna baala hasse qafaddannota coyiꞌrino. Isi togo yiino: “‘Qulxuꞌme woshshaandannihu gede woshshaaddannorenna moyicho ugaanxannihu gede assite ugaaxxannore soyeemmo. Insano ilaallatenna gaarrate, hattono kinnate giddo noo goddara ugaaxxe amaddannonsa. . . . [assitino bunshera] qorichisheemmonsa.’” Busha loosonsa agurannokkihu Israeelete manni baaru giddono ikko dubbu giddo maaxame Baabiloonete olanto anganni gatara didandaanno.—Erm. 16:16, 18.

HAAROOꞌMA

14. Iyueeli 2:28, 29 noo masaalo woꞌmitinohu mamarooti?

¹⁴ Hakkiinni Iyueeli haarooꞌmate diri daannota masaalino. Baatto wirro lattanno hattono gidu woꞌminota ikkitanno. (Iyu. 2:23-26) Qoleno, albillitte ayyaanaamittete sagale woꞌmitanno. Yihowa togo yiino: “Ayyaanaꞌya mannu baalunku aana duneemmo. Oosoꞌne labballunna seennu himana coyidhanno . . . Hattonni hakkawaro labbaanna meya soqqamaanoꞌya aana ayyaanaꞌya duneemmo.” (Iyu. 2:28, 29) Maganu ayyaanasi duninohu Israeelete daga Baabiloonete gobbanni qaensa higganni heedheennanni diꞌꞌikkino. Hatteentenni isi ayyaanasi duninohu lowo diri saihu gedensaanni 33 M.D. yaano Phenxeqosxete ayyaani barraati. Tenne mayinni anfeemmo?

15. Soqqamaasinete Looso 2:16, 17 kultanno garinni Pheexiroosi Iyueeli 2:28 noota hiittee hedo agurino? Tini maa leellishshanno?

¹⁵ Soqqamaasinchu Pheexiroosi qullaawu ayyaaninni Iyueeli 2:28, 29 noo masaalo Phenxeqosxete barra dhagge ikkanno garinni woꞌmitinota coyiꞌrino. Hakko barra soodihunni sase saate balla maalaletenni qullaawu ayyaani mannu aana duꞌnamino; hattono qullaawu ayyaani dirrino manni “Maganunniha jawa looso” coyiꞌra hanafino. (Soq. 2:11) Pheexiroosi qullaawu ayyaaninni Iyueeli masaalo qummi asse coyiꞌri woyite umo noota boode hedo agurino. Isi hiittenne hedo agurinoro buuxxinoonni? (Soqqamaasinete Looso 2:16, 17 nabbawi.) Pheexiroosi “kunni gedensaanni” yitanno hedo agure, “goofimarchu barra” yee hanafino; konni qummeeshshira goofimarchu barra yinihu Yerusaalamete kataminna qullaawu mini baꞌꞌara albaanni no yannaati; hatte yannara Maganu ‘ayyaanasi mannu baalu aana dunanno.’ Tini, Iyueeli coyiꞌrino masaalo woꞌmitinohu lowo diri gedensaanni ikkinota leellishshanno.

16. Umi xibbi diro Maganu ayyaani sabbakate looso kaaꞌlinohu hiittoonniiti? Xa yannarana?

¹⁶ Maganu umi xibbi diri Kiristaanira ayyaanasi maalaletenni dunihu gedensaanni, insa hatte yannara noo alame woꞌmate sabbaka hanaffino. Soqqamaasinchu Phaawuloosi 61 M.D. balla Qolasiyaasi Kiristaanira sokka borreessi yannara dancha duduwo ‘kalqe baalate kulloonni’ yee coyiꞌrino. (Qol. 1:23) Phaawuloosi ‘kalqe baala’ yiiti hakkawaro isinna wolootu hadhe sabbakkino gobba baalate. Yihowahu wolqaataamu qullaawu ayyaani kaaꞌlonni xaa yannara sabbakate loosi hakkawarinni roore halaꞌlino; hattono “gobbate qacce” geeshsha sabbankoonni.—Soq. 13:47; “Ayyaanaꞌya Duneemmo” yitanno saaxineno lai.

SOORRAMINORI MAATI?

17. Kanchafaru daafira kultannota Iyueeli masaalo buunxoommo gara lainohunni soorraminori maati?

¹⁷ Ikkina, soorraminori maati? Xa Iyueeli 2:7-9 noo masaalo albinni roore garunni huwantoommo. Kuri qummeeshshuwa diinaggaambe loonseemmohu sabbakate loosinke daafira kultannota diꞌꞌikkitino; hatteentenni 607 K.A. Baabiloonete olanto Yerusaalame horritu woyite ikkannore kultannote.

18. Yihowa manni daafira soorraminokkiri maati?

¹⁸ Soorraminokkiri maati? Yihowa manni addi addi hayyo horoonsiꞌre gobba baalate sabbakanni no. (Mat. 24:14) Mangiste sabbakate loosonke loonseemmota hoola didandiitanno. Yihowa kaaꞌlonni Maganu Mangisteha dancha duduwo albinni roore worbimmatenni sabbankanni heeꞌnoommo! Qoleno, Yihowa yannasira “halaalu baalunniwa” massagannonketa addaxxineemmo daafira, Qullaawu Maxaafi masaalo garunni huwanteemmo gede kaaꞌlankera biddishshasi hasiꞌra diagurreemmo!—Yoh. 16:13.