Manna Rosaano Assate Looso Kaaꞌla Dandaatto?

1. Yihowa assinoheri maati?

YIHOWA FARCIꞌRAASINCHO ikkoottohu hiittoonniiti? Umo ‘dancha duduwo’ macciishshootto; macciishshoottohu annikkinna amakkiwiinni, ledokki loossannori woy rossannoriwiinni woy roduuwu minunni mine hadhe sabbakkanni dagge kulteennahe ikkara dandaanno. (Maq. 13:10) Hakkiinni, mittu rodii lowo yanna Qullaawa Maxaafa xiinxallisinohe hattono ate kaaꞌlate lowore assino. Xiinxallokki Yihowa baxatto gedenna isino baxannoheta afatto gede kaaꞌlitinohe. Yihowa halaalu minira abbinohe; hakko daafira xa Yesuusi Kiristoosi rosaancho ikkoottohura hegerera heeꞌrate hexxo noohe. (Yoh. 6:44) Yihowa mittu rodii rosiisannohe gede kakkayisinoteranna soqqamaanchosi assiꞌrinohe daafira galatattositi dihuluullissannote.

2. Konni birxichira maa ronseemmo?

² Ninke halaale anfoommo daafira, wolootuno ledonke hegere heeshshowa massitanno doogo hadhanno gede kaaꞌlate qoosso afiꞌnoommo. Minunni mine haꞌne sabbaka qarrisa hooggankera dandiitanno; ikkirono mannu Qullaawa Maxaafa xiinxallanno gede koyisanna Qullaawa Maxaafa xiinxallisa qarra ikkitankera dandiitanno. Aterano tini qarra ikkitinohe? Hatto ikkiro konni birxichira kulloonni hedo kaaꞌlitahera dandiitanno. Manna rosaano assate looso kaaꞌlineemmo gede kakkayisannonkeri maatiro laꞌneemmo. Hattono Qullaawa Maxaafa xiinxallinseemmokki gede guficho ikkankera dandaannore qeela dandiineemmo gara ronseemmo. Hanni balanxe dancha duduwo sabbaka calla ikkikkinni rosiisa hasiissannonkehu mayiraatiro laꞌno.

YESUUSI SABBANKEEMMO GEDE CALLA IKKIKKINNI ROSIINSEEMMO GEDENO HAJAJINONKE

3. Sabbankeemmohu mayiraati?

³ Yesuusi uullate aana noo yannara harunsaanosira lame gafa afiꞌrino looso uyinonsa. Umihunni Maganu Mangisteha dancha duduwo sabbakkanno gede kulinonsa hattono tenne assa dandiitanno gara leellishinonsa. (Mat. 10:7; Luq. 8:1) Lawishshaho Yesuusi rosaanosi, mannu Maganu Mangiste sokka macciishshe adhanno woyite maa assa hasiissannonsaro hattono macciishsha giwanno woyite maa assitannoro kulinonsa. (Luq. 9:2-5) Qoleno Yesuusi harunsaanosi “gobbate qacce geeshsha” sabbakkannota kule, kuni loosi mageeshshi geeshsha halaꞌlannoro masaalino. (Mat. 24:14; Soq. 1:8) Mannu macciishshirono macciishsha giwirono, Yesuusi rosaano baalunku mannira Maganu Mangisterenna tini Mangiste abbitannore duduwa hasiissannonsa.

4. Maatewoosi 28:18-20 yitanno garinni, Maganu Mangiste sabbakano agurranna maa assa hasiissannonke?

⁴ Yesuusi rosaanosi hajajinonsahu layinki coyi maati? Harunsaanosi mannu isi hajajinore baala agadhanno gede rosiissara kulinonsa. Kayi mitu manni yaannohu gede, konne sabbakatenna rosiisate looso loosa hasiissannonsahu umi xibbi diro heeꞌrino Kiristaana callahoni? Deeꞌni; Yesuusi konne looso “gobbate goofimarchi geeshsha” yaano, yannanke geeshshano loonsannita coyiꞌrino. (Maatewoosi 28:18-20 nabbawi.) Yesuusi hatto yee hajajinohu 500 saꞌanno rosaanosira leelli woyite ikkikki digatino. (1 Qor. 15:6) Qoleno isi ajuujatenni Yohaannisi hasaawisi woyite, baalanti rosaanosi mannu Yihowa daafira rosanno gede kaaꞌla hasiissannonsata coyiꞌrino.—Aju. 22:17.

5. Umi Qorontoosi 3:6-9 yitanno garinni, Phaawuloosi sabbakanna rosiisa xaadooshshe afidhinota lawishshunni kulinohu hiittoonniiti?

⁵ Soqqamaasinchu Phaawuloosi manna rosaano assate loosi kaashsho towaaxxate gede ikkinota xawisino; tini kaase calla agura hasiissannokkita leellishshanno. Isi Qorontoosi Kiristaanira, “Ani kaasummo; Aphiloosi waa hayikkisi. . . . Kiꞌneno Maganu hoꞌrichooti” yiino. (1 Qorontoosi 3:6-9 nabbawi.) Ninke ‘Maganu hoꞌrichira’ loonseemmore ikkinoommo daafira, kaanse calla agurreemmoha ikkikkinni waa hayikkinseemmo hattono lophanni nooronna teꞌee ganyine towaanteemmo. (Yoh. 4:35) Ikkollana lossannohu Magano ikkinota dideꞌneemmo.

6. Manna rosiinseemmo woyite maa assa hasiissannonke?

⁶ “Hegere heeshsho afiꞌrate gara ikkitinoti wodanu dooꞌꞌo noonsare” hansanni heeꞌnoommo. (Soq. 13:48, NW) Insa Yesuusi rosaano ikkitanno gede kaaꞌlate, Qullaawu Maxaafinni rossannore (1) huwattanno gede, (2) ammante adhitanno gede hattono (3) loosu aana hosiissanno gede kaaꞌla hasiissannonke. (Yoh. 17:3; Qol. 2:6, 7; 1 Tes. 2:13) Songote giddo noo halashshaano baala Qullaawu Maxaafi rosaano kaaꞌla dandiitanno; insa tenne assate kuri haaruuddeho baxille leellishshannonsa hattono gambooshshe dagganno woyite anga fante haadhannonsa. (Yoh. 13:35) Qullaawa Maxaafa rosiisanno rodiino, rosaanchu gara ikkinokki rosonna bude aguranno gede lowo yanna diinaggaawe kaaꞌla hasiissannosiha ikkara dandaanno; ‘qiishote’ gede ikkinoha konne rosonna bude rosaanchu lowo diro cuꞌmiꞌre keeshshinoha ikkara dandaanno. (2 Qor. 10:4, 5) Isi konne coye biddi assiꞌre cuuamate deerra iillanno gede kaaꞌlate lowo aganna hasiissannoha ikkara dandaanno. Hatto assanno gede kaaꞌlate sharrama kayi gaabbissannota diꞌꞌikkitino.

BAXILLU MANNA ROSAANO ASSINEEMMO GEDE KAKKAYISANNONKE

7. Sabbankeemmo gedenna manna rosaano assineemmo gede kakkayisannonkeri maati?

⁷ Sabbakatenna manna rosaano assate looso loonseemmohu mayiraati? Umihunni, Yihowa banxeemmo daafiraati. Yesuusi sabbankeemmo gedenna manna rosaano assineemmo gede hajajinonke hajajo wonshate dandaaminkere baala assineemmoha ikkiro, Yihowa banxeemmota leellinshanni heeꞌnoommo. (1 Yoh. 5:3) Hanni tenne hedi: Yihowara noohe baxilli minunni mine hadhe sabbakatto gede assinohe. Ikkollana hatto assa shota ikkitinoheni? Hatto ikka hoogara dandaanno. Mite yite sabbakate fulitto woyite waajjootto? Waajjoottoti dihuluullissannote! Ikkirono kuni Yesuusi loosi yiinohe looso ikkinota afootto daafira hajajante loosootto. Sunu sununni sabbakate loosi waajjisha agurinoheha ikkara dandaanno. Qullaawa Maxaafa xiinxallisana? Tenne hedatto woyite waajjishannohe? Waajjishannoheha ikkara dandaanno. Ikkollana, waajja qeeꞌlite mannu Qullaawa Maxaafa xiinxallanno gede koyisa dandaatto gede kaaꞌlahera Yihowa huucciꞌrittoro, isi manna rosaano assate hasattokki lexxitanno gede asse kaaꞌlannohe.

8. Maarqoosi 6:34 kultanno garinni manna rosiinseemmo gede kakkayisannonkehu wolu coyi maati?

⁸ Layinkihunni, manna banxeemmo daafira tini halaale rosiinseemmonsa gede assitannonke. Mitte yannara Yesuusinna rosaanosi sabbakkanni hossinowiinni higganni lowo geya daafurte no. Insa fooliishshiꞌra hasidhinoha ikkirono lowo manni hoodensa dayi. Yesuusi konne manna mararino daafira “lowo coye rosiisinsa.” (Maarqoosi 6:34 nabbawi.) Isi daafurinoha ikkirono isonooto diqooffatino. Mayira? Yesuusi mannu qarra umisihu gede asse laino. Isi insa lowo geeshsha qarrantinotanna hexxo hasiissannonsata afino daafira insa kaaꞌla hasiꞌrino. Xaa yannarano mannu hatto ikke no. Insa laꞌnanni woyite hagiirraamma labbara dandiitanno. Kayinni insa baxxite baꞌinote allaalaanchu nookki geꞌrecho gede ikkitino. Phaawuloosi togoo manna, Magano affukkinni hexxo noonsakkiha heedhannori gede asse coyiꞌrino. (Efe. 2:12) Insa ‘baote widira massitanno’ doogo hadhanni no. (Mat. 7:13) Qoqqowinkera noo manni ayyaanaamittetenni gattaawe noota laꞌneemmo woyite, baxillunna mararro insa kaaꞌlineemmo gede assitannonke. Insa kaaꞌla dandiineemmoti baalantenni roortino doogo Qullaawa Maxaafa xiinxallitanno gede koyisate.

9. Filiphisiyusi Sokka 2:13 kultanno garinni Yihowa kaaꞌlannohehu hiittoonniiti?

⁹ Qullaawa Maxaafa xiinxallisate lowo yanna hasiissannota afootto daafira mannu Qullaawa Maxaafa xiinxallanno gede koyisate hobbi ruxxi yaattoha ikkara dandaanno. Hatto ikkiro giddokkita Yihowara hasaaphi. Isi Qullaawa Maxaafa xiinxallisatto mancho hasiꞌratenna xiinxallisate hasatto heedhannohe gede kaaꞌlahera huucciꞌri. (Filiphisiyusi Sokka 2:13, [NW] nabbawi.b) Soqqamaasinchu Yohaannisi Maganu fajjosi ledo sumuu yitanno huuccatto macciishshannota buuxisinonke. (1 Yoh. 5:14, 15) Hakko daafira Yihowa manna rosaano assate hasattokki lexxitannohe gede kaaꞌlannoheta huluullantooti.

QARRA IKKANNOHA WOLE COYE QEELA DANDIINEEMMOHU HIITTOONNIITI?

10-11. Qullaawa Maxaafa xiinxallisate hobbi ruxxi yineemmo gede assankera dandaannori maati?

¹⁰ Manna rosaano assate looso hasiꞌnoommo geeshsha loonseemmokki gede guficho ikkannonkeri tuncu yiinkerono konne looso mulluri gede assine dilaꞌneemmo. Hanni fonqolo ikkannonkehu mitu coyi maatironna qeela dandiineemmohu hiittoonniitiro laꞌno.

¹¹ Hasiꞌnoommo geeshsha soqqama dandiineemmokkiha ikkara dandaanno. Lawishshaho mito roduuwa geedhimma woy dhibbu waadannonsa. Ateno togoori waadannohe? Hatto ikkiro, hanni Koroonu vayiresenni kainohunni ronsoommori giddonni mitto coye laꞌno. Elektirooniksete uduunnicho horoonsiꞌne Qullaawa Maxaafa danchu garinni xiinxallisa dandiineemmota ronsoommo! Hakko daafira minekki heedhenni Qullaawu Maxaafi xiinxallo hanafiisiisanna xiinxallisa dandaatto; hatto assa roore shota ikkitahera dandiitanno. Xiinxallisa dandiineemmoti wole farono noonke. Mitootu Qullaawa Maxaafa xiinxalla hasidhannoha ikkirono roduuwu sabbakkanno yannara insara diꞌꞌinjaannonsa. Insara soodo guto woy hashsha injaansara dandaanno. Togoo manna insara injiitannonsa yannara xiinxallisate mitore biddi assiꞌra dandaatto? Yesuusi Niqoodimoosi rosiisinohu hashshaati; isi rosa hasiꞌrinohu hatte yannaraati.—Yoh. 3:1, 2.

12. Qullaawa Maxaafa dancha gede rosiinseemmo gede kaaꞌlannonkeri maati?

¹² Qullaawa Maxaafa xiinxallisate dandoo dinoe yine hendeemmoha ikkara dandaanno. Manna Qullaawa Maxaafa xiinxallisate lowo egenno woy dandoo hasiissannonke yine hendeemmoha ikkara dandaanno. Ati hatto yite hedattoha ikkiro, hanni waajjattokki gede kaaꞌlannoheha sase coye laꞌno. Umihunni, Yihowa ati manna rosiisate ikkadoho yiinohe. (2 Qor. 3:5) Layinkihunni, ‘gordohonna baattote roorre uyinoonnisihu’ Yesuusi rosiisatto gede hajajinohe. (Mat. 28:18) Sayikkihunni, Yihowanna ammanate roduuwikki kaaꞌlitannohe. Yihowa, Yesuusi mayyee rosiisannoro afanno gede kaaꞌlisinte gede ateno kaaꞌlannohe. (Yoh. 8:28; 12:49) Qoleno, soqqanshote gaamokkihu aliidi laꞌꞌaanchi, dandoo noosi suwisaanchi woy woꞌnaalshu noosi halashshaanchi Qullaawu Maxaafi xiinxallo hanafisiisanna xiinxallisa dandaatto gede kaaꞌlahera xaꞌmiꞌra dandaatto. Qullaawa Maxaafa xiinxallisa waajjattokki gede kaaꞌlannohe coyi giddo mittu, togoo halashshaano xiinxallissanno woyite ledonsa xiinxallisate.

13. Haaro hayyo rosa hasiissannonkehu mayiraati?

¹³ Haaro rosiisate hayyonna rosiisate horoonsiꞌneemmoha haaro uduunnicho rosa qarra ikkitankera dandiitanno. Xa Qullaawa Maxaafa xiinxallinseemmo gari soorramino. Manna xiinxallisate horoonsiꞌneemmoti qara borro, Hegerera Hagiidhitanni Heeꞌra Dandaatto! yitanno borrooti; xiinxallinsammora albaanni tenne borro qixxaambeemmo garinna xiinxallinseemmo gari albiwiinni baxxinoho. Tenne borro xiinxallinsanni woyite boode gufo nabbambanni hattono roore yanna hasaambannihu rosaanchu ledooti. Konne maxaafa horoonsiꞌne xiinxallinseemmo woyite albinni roore lowo viidiyonna elektirooniksete uduunnichinni qixxeessinoonnire lawishshaho JW Layibirere horoonsiꞌneemmo. Konne uduunne horoonsiꞌnanni gari wosiꞌnihero roduuwu kaaꞌlitannohe gede xaꞌmiꞌra dandaatto. Duucha woyite ronsoommore calla assa rakkannonke. Mitto haaro coye rosa shota diꞌꞌikkitannonke. Ikkirono Yihowanna roduuwu kaaꞌlonni tenne haaro hayyo rosa dandaatto hattono tenne hayyo horoonsidhe manna xiinxallisa albinni roore nafa hagiirsiissahera dandiitanno. Mittu suwisaanchi tini hayyo, “rosaanchono rosiisaanchono hagiirsiissannota” ikkitinota coyiꞌrino.

14. Mannu sokkanke macciishsha hasiꞌrannokki qoqqowira sabbankeemmo woyite maa qaaga hasiissannonke? Umi Qorontoosi 3:6, 7 jawaachishshannonkehu hiittoonniiti?

¹⁴ Sabbankeemmo qoqqowira manna Qullaawu Maxaafi xiinxallo hanafisiisa shota ikka hooggankera dandiitanno. Mannu sabbankeemmo sokka hasiꞌra hoogara woy giwankera nafa dandaanno. Togoo qoqqowira hexxo mudhinummokkinni sabbankeemmo gede kaaꞌlannonkeri maati? Tenne qarru batiꞌrino alamera mannu noo gari mule mulenni soorramara dandaannotanna kulleemmo sokka hasiꞌrannokki manni Maganu aanno biddishshi hasiisannonsata wodanchara dandaannota qaagi. (Mat. 5:3) Alba borronke adha giwannohu mitu manni gedensoonni Qullaawa Maxaafa xiinxallate sumuu yiino. Qoleno loosu Mootichi Yihowa ikkinota anfoommo. (Mat. 9:38) Yihowa agurrummokkinni kaansammoranna waa hayikkinsammora hasiꞌrannoha ikkirono lossannohu kayi isooti. (1 Qor. 3:6, 7) Xa Qullaawu Maxaafi xiinxallo noonkekkiha ikkiro nafa, Yihowa maassiꞌrannonkehu afiꞌnoommo gumi deerrinni ikkikkinni manna kaaꞌlate sharrammoommo deerrinni ikkinota afanke jawaachishshannonke!c

MANNA ROSAANO ASSITINE HAGIIDHE

15. Mittu manchi Qullaawa Maxaafa xiinxalle rosinore loosu aana hosiisanno woyite Yihowara mayi macciishshamannosi?

¹⁵ Yihowa mittu manchi Qullaawu Maxaafi halaale ammane adhe wolootaho kulanno woyite lowo geeshsha hagiidhanno. (Law. 23:15, 16) Isi xaa yannara loonsanni heeꞌnoonniha sabbakate looso laꞌꞌanno woyite lowo geeshsha hagiidhannoti dihuluullissannote! Lawishshaho, 2020nnihu soqqanshote diro Koroonu vayirese nooha ikkirono, 7,705,765 manna Qullaawa Maxaafa xiinxallinsoommo hattono konni manni giddo 241,994 manni heeshshonsa Yihowara sayise oye cuuamino. Kuni haarote cuuamino mannino, manna Qullaawa Maxaafa xiinxallise Yesuusi rosaano ikkanno gede assanno. (Luq. 6:40) Manna rosaano assate looso loonseemmo woyite Yihowa hagiidhannoti dihuluullissannote.

16. Hiittoo mixo fushshiꞌra dandiineemmo?

¹⁶ Manna rosaano assa shota looso diꞌꞌikkitino; ikkirono Yihowa kaaꞌlonni mannu iimi Annanke baxanno gede rosiisate wolqanke assitu geeshsha kaaꞌla dandiineemmo. Ajayi ajeenna mitto mancho Qullaawu Maxaafi xiinxallo hanafisiisatenna xiinxallisate mixo fushshiꞌra dandaatto? Xaandeemmo manna Qullaawa Maxaafa xiinxallanno gede koyisate afiꞌnummo faro baala horoonsiꞌneemmoha ikkiro dancha guma afiꞌne hagiidhinammora dandiineemmo. Yihowa assineemmore maassiꞌrannota dihuluullammeemmo.

17. Manna Qullaawa Maxaafa xiinxallinsummoro mayi atoote afiꞌneemmo?

¹⁷ Mannaho halaale sabbakano ikko rosiisa ninkera lowo ayirrinyeeti! Kuni loosi addu hagiirre afiꞌneemmo gede assannonke. Soqqamaasinchu Phaawuloosi Teselonqe katamira heeꞌrannohu lowo manni rosaano ikkanno gede kaaꞌlino; isi hagiirresi xawisanni togo yiino: “Mootichinke Yesuusi Kiristoosi daanno yannara albasiinni ayirrineemmoti hexxonke, woy hagiirrinke woy qeellete worraaqqanke dikiꞌneeti? Addintanni kiꞌne ayirrinyenkeetinna hagiirrenkeeti.” (1 Tes. 2:19, 20; Soq. 17:1-4) Xaa yannarano batinyu roduuwi togoo hagiirre afidhino. Istefaani yinanni rodoo minaannise ledo, lowo manni cuuamanno gede kaaꞌlitino; ise togo yitino: “Mannu heeshshonsa Yihowara sayise aanno gede kaaꞌlate geeshsha hagiirsiisannori dino.”