Didandiineemmo Yitine Agurtinoonte—Ikkado Diꞌꞌikkoommo Yitanno Hedo Qeela
1. Mitootu Qullaawa Maxaafa xiinxallissannokkihu mayiraati?
1 Qullaawu Maxaafi xiinxallo marrae diafeemmo yite aguratto? Hundiri ammanantino soqqamaano, lawishshaho Musenna Ermiyaasi, Yihowa uyinonsa looso loosate ikkado ikkitinokkihu gede ikke macciishshaminonsa yanna no. (Wol. 3:10, 11; 4:10; Erm. 1:4-6) Yannankerano batinyu roduuwira hatto macciishshamannonsa. Ikkina togoo hedo qeela dandiinannihu hiittoonniiti?
2. Minunni mine haꞌne soqqammoommohura calla kassi yine, Qullaawu Maxaafi xiinxallo wolootu marraꞌara sammi yaa hasiissannonkekkihu mayiraati?
2 Yihowa assa dandiineemmokkire asse yaannonkekkita qaaga hasiissannonke. (Far. 103:14) Konni daafira, isi uyinonkehu ‘manna rosaano assatenna’ ‘rosiisate’ loosi, assa dandiineemmoreeti. (Maat. 28:19, 20) Yihowa konne looso temokkiro afidhinoriranna egennaammaho calla diuyino. (1 Qor. 1:26, 27) Konni daafira, minunni mine haꞌne soqqammoommohura calla kassi yine, Qullaawu Maxaafi xiinxallo wolootu marraꞌara sammi yaa dihasiissannonke.
3. Yihowa Qullaawu Maxaafi xiinxallo marraꞌꞌate ikkadda ikkineemmo gede kaaꞌlannonkehu hiittoonniiti?
3 Yihowa Ikkadda Ikkineemmo Gede Assannonke: Manna rosaano assate loosira ikkadda assannonkehu Yihowaati. (2 Qor. 3:5) Isi dirijjitesi widoonni qole batinyu tenne alame egennaammi nafa affinokkiha Qullaawu Maxaafi halaale rosiisanni noonke. (1 Qor. 2:7, 8) Isi, harunsineemmo gede Bayiru Rosiisaanchinke Yesuusi rosiisino gara kultanno xagge borreessante xaa geeshsha heedhanno gede assino, hakkiinni saeno songote widoonni qole qajeelsanni noonke. Qoleno Yihowa, Qullaawa Maxaafa rosiisate kaaꞌlannonkere ninke uminke qixxeessiꞌnammora facci asse diagurino. Hatteentenni, halaale gafu gafunninna eanno garinni rosiisate kaaꞌlannonkere, lawishshaho Qullaawu Maxaafi Roso yinanni maxaafa qixxeessinonke. Qullaawu Maxaafi xiinxallo marraꞌꞌa, ninke hendeemmo geeshsha kabbaade ikka hooggara dandiitanno.
4. Qullaawu Maxaafi xiinxallo marraꞌꞌate Yihowa kaaꞌlannonke yine addaxxa dandiineemmohu mayiraati?
4 Musenna Ermiyaasi Yihowa kaaꞌleennansa uyinonsa halaafinate wonshitino. (Wol. 4:11, 12; Erm. 1:7, 8) Ninkeno Yihowa kaaꞌlannonke gede xaꞌmiꞌra dandiineemmo. Qullaawu Maxaafi xiinxallo marraꞌneemmo wote, rosiinseemmo manchira Yihoware kulanno halaale rosiinsanni heeꞌnoommo, hatto assanke Yihowa hagiirsiissanno. (1 Yo. 3:22) Konni daafira, lowo geeshsha hagiirsiisannohanna kiisannoha Qullaawu Maxaafi xiinxallo marraꞌꞌate looso diinaggaambe loosate mixiꞌno.