Dancha Duduwo Dudumbanni Heeꞌnoonnihu Hiittoonniiti?

Yihowa muli yannara, Mangistesi widoonni qarranke baala hunanno. Kuni duduwi lowo geeshsha dancha ikkino daafira, mannu baalunkura kula hasiissannoho. Yesuusi rosaanosi tenne sokka manna baalaho kultara hasiꞌranno! (Maatewoosi 28:19, 20) Yihowa Farciꞌraasine Yesuusi hajajinore wonshitanni noohu hiittoonniiti?

1. Maatewoosi 24:14te noo masaalo yannankera woꞌmitanni noohu hiittoonniiti?

Yesuusi togo yee masaalino: “Kuni Maganu Gashshootihu Danchu Duduwi gobba baalate kulamanno.” (Maatewoosi 24:14) Yihowa Farciꞌraasine konne lowo geeshsha hasiisanno looso loosa baxxanno. Dancha duduwo alamete doyichora 1,000 saꞌꞌanno afiinni sabbankanni heeꞌnoommo! Konne halaꞌlado looso loosate lowo sharronna dancha gede qinaawa hasiissanno. Yihowa kaaꞌlo nookkiha konne looso umo fushsha didandiinanni.

2. Mannaho dancha duduwo duduwate sharrammeemmohu hiittoonniiti?

Mannu noowa baalankawa sabbankeemmo. Umi xibbi diri Kiristaaninte gede, ‘minunni mine’ haꞌne sabbankeemmo. (Soqqamaasinete Looso 5:42) Konni garinni diinaggaambe soqqammeemmo daafira, diru dirunku lowo miliyoone ikkanno manna hasaawinseemmo. Mito woyite mannu mine heeꞌrannokki daafira, gudumaalehonna tuutiwano sabbankeemmo. Woꞌmanka woyite mannaho Yihowarenna isi ninkera hedinore kulate faro hasiꞌneemmo.

3. Dancha duduwo duduwa hasiissannonsari ayeooti?

Addu Kiristaani baalunku dancha duduwo mannaho kula hasiissannonsa. Konne looso mulluri gede assine dilaꞌneemmo. Dudumbeemmo sokka mannu lubbo gatissannota anfoommo daafira, dandaaminke deerrinni konne looso woꞌma wolqankenni loonseemmo. (1 Ximootewoosi 4:16 nabbawi.) Qullaawu Maxaafi “Calla adhitinoonnire calla uuyye” yaanno daafira, sabbankeemmohu woxe uyineennanke diꞌꞌikkino. (Maatewoosi 10:7, 8) Hige batinyu manni sokkanke macciishsha hasiꞌrannokkita anfoommo. Ikkirono, sabbakanke Yihowara hajajama ikkitino daafiranna iso hagiirsiissannohura, sabbakanke diagurreemmo.

LEDDE XIINXALLI

4. Mannu baalunkura halaale duduwate sharrammeemmo

VIIDIYO: “Gobbate Qacce Geeshsha” Halaale Duduwa (7:33)

• Yihowa Farciꞌraasine halaale duduwate sharrantanno gara hedatto woyite dhagge ikkannoheri maati?

Maatewoosi 22:39 nna Roomu Sokka 10:13-15 nabbabbe; hakkiinni aante noo xaꞌmuwa hasaabbe:

• Soqqanshonke manna banxeemmota leellishshannohu hiittoonniiti?

• Dancha duduwo dudubbannori Yihowa albaanni hiittooreeti?—Kiiro 15 lai.

5. Ninke Maganu ledo loonseemmoreeti

Batinye woꞌnaalshuwa leellishshannonte gede, Yihowa loosonke qineessanni no. Lawishshaho, Niwu Zilaandete gobbara Pooli yinanni rodii barra minunni mine haꞌre soqqamanni heeꞌre mitte manchonni xaadino. Tini mancho hakko barra soodo widoonni, mittu manchi daye hasaawisannose gede kaaꞌlasera Yihowa yinanniha Maganu suꞌma gante huuccatto assidhino. Pooli, “Sase saate gedensaanni minisera maroommo” yiino.

Umi Qorontoosi 3:9 nabbabbe; hakkiinni aante noo xaꞌmo hasaabbe:

• Niwu Zilaandete gobbara ikkinohu gedee woꞌnaalshi, Yihowa loosonke massaganni noota leellishannohu hiittoonniiti?

Soqqamaasinete Looso 1:8 nabbabbe; hakkiinni aante noo xaꞌmo hasaabbe:

• Soqqanshonkera Yihowa kaaꞌlo hasiissannonkehu mayiraati?

Ati tenne afootto?

Lamalate kiiro, lamalate mereero assiꞌneemmo gambooshshiwa soqqanshote kaaꞌlanno qajeelsha afiꞌneemmo. Togoo gambooshshe hadhe macciishshite egennoottoha ikkiro, konni qajeelshi daafira mayyaatto?

6. Maganu halaale dudubbe yee hajajinonke hajajo ayirrinseemmo

Umi xibbi diro, halaale gibbannori Yesuusi rosaano sabbakkannota hoolate woꞌnaaltino. Hundi Kiristaani “Dancha Duduwo xiibbannore gargare” sabbakate qoossonsa agarantanno gede assiꞌrino. (Filiphisiyusi Sokka 1:7) Xaa yannara Yihowa Farciꞌraasineno hatto assitanno.a

VIIDIYO: Danchu Duduwira Higgetenni Gaarama (2:28)

Soqqamaasinete Looso 5:27-42 nabbabbe; hakkiinni aante noo xaꞌmo hasaabbe:

• Sabbaka agurreemmokkihu mayiraati?—Kiiro 29, 38, nna 39 lai.

XAPHISHSHA

Yesuusi rosaanosi dancha duduwo daga baalate dudubbanno gede hajajino. Yihowa mannisi konne looso loosanno gede kaaꞌlanni no.

Kageeshsha Rosoottore

• Dancha duduwo alame woꞌmate aana dudumbanni heeꞌnoonnihu hiittoonniiti?

• Soqqanshonke manna banxeemmota leellishshannohu hiittoonniiti?

• Sabbakate loosi hagiirsiisanno looso lawannohe? Mayira?

EGENNO LEXXI

Yihowa Farciꞌraasine jajjabba katammara heeꞌranno mannira sabbakkannohu hiittoonniiti?

Paarisi Katamira Soqqammoonnita Baxxitinota Gudumaalu Soqqansho (5:11)

Yihowa Farciꞌraasine darame dayino manna kaaꞌlate maa assitino?

Darame Dayino Manni Giddo Ayyaanaamittetenni Goodhinore Kaaꞌla (5:59)

Mitte rodoo woꞌma yanna soqqansho heeshshose hagiirru woꞌminota ikkitanno gede kaaꞌlitinose gara kultanna macciishshi.

Hawallella Konne Looso Doodhumma (6:29)

Sabbakate loosira kaaꞌlitinoti yoote mini yiinoti mite yoo hiitteeti?

“Maganu Mangiste Duduwaasine Coyensa Yoote Mini Afanno Gede Assidhu” (Maganu Mangiste Gashshite No!, fooliishsho 13)