‘Surreꞌne Ayewoteno Iimi Coye Heddanno Gede Assidhe’

1, 2. (a) Umi xibbi diro Qolasiyaasi songora mittimma daafannori mayi kalaqamino? (b) Qolasiyaasi songora noo roduuwi kaajjite uurritanno gede mayine amaalloonninsa?

UMI XIBBI diro Qolasiyaasi songora noo Kiristaanira mittimmansa daafannori kalaqamino! Hatte songo giddo mitootu Muse Higge agadha hasiissanno yite babbadooshshe kalaqqanno. Wolootu qolte Magano ammantinokki daga bude harunsite, meessaneeto gadadisa woy quwa saꞌne kaada hasiissanno yitanno hedo tareessitanno. Hawaariya Phaawuloosi togoohu kaphu rosira umo ganate Qolasiyaasi songora togo yee sokka borreessino: “Kiristoosi aana ikkikkinni alamennite xintu coyibba aananna mannu budi aana xintantino hayyonni hattono kaphu doganni ayino woshshaade amadannoꞌnekki gede qorophe.”—Qol. 2:8.

² Kuni buuramino Kiristaani “alamennite xintu coyibba” aana illachishannoha ikkiro, hatti Yihowa gatote qixxeessino qixxaawo adha giwate. (Qol. 2:20-23) Phaawuloosi insa Maganu ledo noonsaha muxxe fiixooma agadhite heedhanno gede kaaꞌlate togo yee amaalinonsa: “Surreꞌne ayewoteno uullate coye ikkikkinni iimi coye heddanno gede assidhe.” (Qol. 3:2) Addaho, hakkuri Kiristoosi roduuwi ayewoteno iima afidhannota baꞌannokki heeshsho hexxo heda hasiissinonsa.—Qol. 1:4, 5.

3. (a) Buuramino Kiristaani hiittee hexxo aana illachishanno? (b) Konni birxichira dawaro afiꞌneemmo xaꞌmuwa hiikkuriiti?

³ Yannankerano buuramino Kiristaani Maganu Mangistenna ‘Kiristoosi ledo ragidhara’ uyinoonninsa hexxo aana illachishanno. (Rom. 8:14-17) Uullate aana heeꞌrate hexxo noonsarina? Phaawuloosi uyino amaale insarano kaaꞌlitanno? “Wolu geꞌreewi” surrensa “iimi coye” heddanno gede assiꞌra dandaannohu hiittoonniiti? (Yoh. 10:16) Qoleno ninke baalunku, hundi waro addi addi qarri heeꞌreennanni surrensa iimi coye heddanno gede assiꞌrinohu Abirahaaminna Muse gedee manni faale haꞌra dandiineemmohu hiittoonniiti?

SURRENKE IIMI COYE HEDDANNO GEDE ASSIꞌRATE YAA MAYYAATE?

4. Wolu geꞌreewi surrensa iimi coye heddanno gede assiꞌra dandaannohu hiittoonniiti?

⁴ Wolu geꞌreewi iimira haꞌrate hexxo noonsakkiha ikkirono, insano surrensa iimi coye heddanno gede assiꞌra dandaanno. Hiittoonni? Konne assate, heeshshonsa giddo Magano Yihowanna Mangistesi balaxisiisa hasiissannonsa. (Luq. 10:25-27) Kiristoosi assinohuno konneeti; ninkeno isi faale haꞌra hasiissannonke. (1 Phe. 2:21) Umi xibbi diro heeꞌrino Kiristaaninte gede qooxeessinkera noote tenne Sheexaanu alamerano haafa hedo, alamete hayyonna maalaamittete coye harunsa lawinori woꞌmino. (2 Qorontoosi 10:5 nabbawi.a) Yesuusi harunsaano ikkinoommo daafira, ayyaanaamittenke daafannoha togoo coye feexiꞌne gargadha hasiissannonke.

5. Woxehonna maalaamittete miinjira noonke lao afate ninkeneeto mayine xaꞌma dandiineemmo?

⁵ Woxenna maalaamittete miinja alame laꞌanno garinni laꞌꞌa jammarroommokka? Assaambeemmo coyinna assootinke maa banxeemmoro leellishanno. Yesuusi togo yiino: “Jirokki noowa wodanikkino hakko heeꞌranno.” (Mat. 6:21) Wodaninke mamira qole haare haꞌranni noonkero afate, ninkeneeto yannate kiiro seekkine layiꞌra hasiissannonke. Ateneeto togo yite xaꞌmi: ‘Woxu daafira hedanni sayiseemmo yanna mageeshshite? Duucha wote, daddaꞌline durooꞌminanni garanna roore qawaaxxiꞌra dandeemmo gara hedeemmonso, illeꞌya ayyaanaamittete coye xunsitanno gede assiꞌrate woꞌnaaleemmo?’ (Mat. 6:22) Yesuusi ‘uullate aana jiro duuꞌnate’ mixidhannori Yihowa ledo noonsa fiixooma huꞌnitannota qummi assino.—Mat. 6:19, 20, 24.

6. Maalaamittete dooꞌꞌonke ledo sharramme qeelate maa assa hasiissannonke?

⁶ Guuntete xeꞌne noonke daafira maalinkera baxisannore assate dooꞌꞌo noonke. (Rom. 7:21-25) Heeshshonke giddo Maganunnihu qullaawu ayyaani loosannokkiha ikkiro, “tunsichu loosi” qeelankera dandaanno. Kuri giddo mitootu ‘quwa saino qeexaala, dimba . . . foorrenna mancaꞌꞌa assooteeti.’ (Rom. 13:12, 13) ‘Uullate coyibba’ yaano maalinke baxanno coyibba qeelate surrenke ayewoteno iimi coye heddanno gede assiꞌra hasiissannonke. Konne assa shotate yaa diꞌꞌikkino. Hawaariya Phaawuloosi togo yiinohu iseraati: “Mannimmaꞌya hulmanni borojjichu gede maahoyye yite galtannoe gede asseemmo.” (1 Qor. 9:27) Ee, heeshsho afiꞌrate qolchammeemmo qolchansho umo fushshate, maalinke ledo gaarama hasiissannonke! Hanni hunda lamu ammanamino manni ‘Magano hagiirsiisate’ assinore laꞌno.—Ibi. 11:6.

ABIRAHAAMI “YIHOWA AMMANI”

7, 8. (a) Abirahaamiranna Saarara mayi qarri iillinonsa? (b) Abirahaami surresi marichi aana illachishshanno gede assiꞌrino?

⁷ Yihowa Abirahaami maatesi adhe Kanaani gobba haꞌranno gede kulisita, Abirahaami maahoyye yee haꞌrino. Abirahaami ammana noosihanna owaata ikkino daafira Yihowa isi ledo togo yee gondooro eino: “Lowo daga ikkatto gede asseemmohe, qoleno maassiꞌreemmohe.” (Kal. 12:2) Ikkollana, lowo diri sai gedensaannino Abirahaaminna Saara ooso diꞌꞌilino. Yihowa Abirahaamira eino qaale hawinokka? Qoleno, Kanaani gobbara heeshsho kabbaadete. Abirahaaminna maatesi Mesophoxaamiyaho Uuri yinannihu dureessu katamira qaensanna ayiddensa agurte hadhino. Insa Kanaani iillate 1,600 kiilomeetire saꞌanno doogo hadhino; qolteno hakkiicho dunkaanaho heedhino, hudidhino, hattono mulqidhannori qarrissinonsa. (Kal. 12:5, 10; 13:18; 14:10-16) Ikkirono, insa albi qawaaxxonsawa higa horonta dihasidhino!—Ibi. 11:8-12; Ibiraawuyaani 11:15 nabbawi.b

⁸ Abirahaami “uullate coyi” aana illachisha agure, “Yihowa ammanino.” (Kal. 15:6) Ee, isi Maganu eino qaali aana illachishino daafira surresi iimi coye heddino yaa dandiinanni. Abirahaami ammana noosiha ikkino daafira Duuchunkura Aliidi Magani togo yiinosi: “‘Hanni ballo iimira higge laꞌe, dandaattoha ikkiro beeddahe kiiri.’ Hakkiinnino, ‘Sirchikkino hatto batiꞌranno’ yiisi.” (Kal. 15:5) Kuni Abirahaamira lowo geeshsha jawaachishanno qaaleeti! Abirahaami iima hige beeddahe woꞌmitino gordo lai kiiro, Yihowa sirchosi batiseemmo yee eino qaale qaagannoti egennantinote. Maganu yiino yanna iillituta, Abirahaami eꞌnoonnisi qaali garinni ragiꞌranno beetto ilino.—Kal. 21:1, 2.

9. Abirahaami faale haꞌranke Maganoho ayewoteno wiinamme soqqammeemmo gede jawaachishshannonkehu hiittoonniiti?

⁹ Ninkeno Abirahaaminte gede Maganu einonke qaali woꞌmanno yanna agadhine heeꞌnoommo. (2 Phe. 3:13) Surrenke iimi coye heddanno gede assiꞌra hoongummoro, Maganu eino qaali keeshshinoha lawankera dandaanno; qoleno ayyaanaamittete millimmonkera diinaggaawa hoongammora dandiineemmo. Lawishshaho, suwisaancho ikkite soqqamate woy wolu garinni soqqanshokki halashshiꞌrate yite umikki xiqime agurootto woti no? Hatto ikkiro, tini galantannihe gede assitannote. Xana ma garinni nootto? Abirahaami “halaalaanchu xinti noo katama” agadhe kaajje uurrinota deꞌooti. (Ibi. 11:10) Isi “Yihowa ammanino; tini qolte keeraanchimmate gede ikkite kiirantinosi.”—Rom. 4:3.

MUSE “ILLETE LEELLANNOKKI MAGANO” LAINO

10. Muse wedellichu noo waro hiitto heeshsho heeꞌrino?

¹⁰ Surresi iimi coye heddanno gede assiꞌrinohu wolu manchi Museeti. Isi wedellichu noo waro, “Gibitsete daga hayyo baalanta rosiinsoonnisi.” Kuni mulla gede assine laꞌnanni roso diꞌꞌikkino. Hakkawaro Gibitse alame woꞌmate aana wolqaataame mangisteeti; qoleno Muse heeꞌrannohu Feriooni mineeti. Muse lowore rosinoha ikkino daafira, “coyiꞌranno coyino ikko assootisi jawaata” ikkasi maalaꞌlinannita diꞌꞌikkitino. (Looso 7:22) Konni daafira Muse maccaha ikkannota lowo faro afiꞌra dandaannota heda dandiinanni! Isi kayinni surresi roorino coye yaano Maganu fajjo assate daafira heddanno gede assiꞌrino.

11, 12. Muse kaffi asse laino rosi hiikkoyeti? Tenne mayinni anfeemmo?

¹¹ Muse qaaqqu noo waro amasi Yokaabeedi, Ibiraawete Magani daafira rosiissinositi dihuluullissannote. Muse Yihowa daafira afiꞌrino egenno kaffi asse laino, hattono wole baalante jironni roorse laino. Konni daafira Feriooni maate mereero heeꞌrasinni afiꞌrara dandaanno qoossonna faro facci asse agurino. (Ibi. 11:24-26; Ibiraawuyaani 11:27 nabbawi.c) Addaho, Muse adhinohu ayyaanaamittete qajeelshinna Yihowara noosi ammana surresi iimi coye heddanno gede kaaꞌlitinosi.

¹² Muse Gibitsete gobbara dooramino roso rosino; ikkina konne roso silxaane afiꞌrate, maccaha ikkate woy jiro duuꞌnate horoonsiꞌrinoni? Deeꞌni. Hatto ikkoommero, ‘lophi gedensaanni Feriooni beetto beettooti yinannisita digiwanno; qoleno cubbunni afiꞌnanniha geedannokki hagiirre agure Maganu manni ledo qarrama didoodhanno.’ Hatteentenni, Muse afiꞌrinota ayyaanaamitte egenno Maganu alaamira horoonsiꞌrino.

13, 14. (a) Muse Yihowa aannosi loosira ikkado ikkanno gede kaaꞌlinosiri maati? (b) Muse gede ninkerano mayi hasiisannonke?

¹³ Muse Yihowanna Maganu manna baxanno. Isi 40 diro ikkisita, Maganu manna Gibitsete borojjimmanni fushsha dandaannohu gede asse hedino. (Looso 7:23-25) Ikkollana, Yihowa konne looso aasira albaanni, Musera hasiisinori woluri no. Isira shooshanqe, cinca, shaqqillenna meessaneeto qeeꞌla labbino akatta lossiꞌra hasiissinosi. (Law. 15:33) Musera iillasira dandaanno fatananna mitiimma qeelate qixxaawinoha ikkanno gede assannosi qajeelshi hasiisinosi. Isi 40 diro geꞌreewo allaalasi tenne akatta lossiꞌranno gede kaaꞌlitinosi.

¹⁴ Muse geꞌreewu allaalaancho ikke afiꞌrino qajeelshi kaaꞌlinosiri no? Ee, lowo geeshsha kaaꞌlinosi! Maganu Qaali Muse “uullate aana noo manni baalunkunni roore jooga” ikkinota kulannonke. (Zeh. 12:3) Isi shooshaqa ikkino; kuni akati addi addi gari mannanna qarransa cince heeꞌra dandaanno gede kaaꞌlinosi. (Wol. 18:26) Ninkeno daannoha “bayira qarra” saꞌne Maganu abbannota keeraanchimma woꞌmitinota haaro alame eate ayyaanaamitte akatta lossiꞌra hasiissannonke. (Aju. 7:14) Mannu ledo sumuu yine heeꞌra, lawishshaho rahe koffi yaannoho yine hendeemmo manni ledo heeꞌra dandiineemmo? Hawaariya Pheexiroosi uyino amaale harunsanke tennera kaaꞌlitannonke; isi togo yiino: “Duuchunku gari manna ayirrisse; hattono roduuwu maamara gudissine baxxe.”—1 Phe. 2:17.

SURRENKE AYEWOTENO IIMI COYE HEDDANNO GEDE ASSIꞌRA

15, 16. (a) Surrenke ayewoteno gara ikkinore heddanno gede assiꞌra hasiissannonkehu mayiraati? (b) Kiristaanaho danchu amanyooti hasiisannohu mayiraati?

¹⁵ Heeꞌnoommohu “dandee heeꞌrate qarrisannohu baxxino diri” giddooti. (2 Xim. 3:1) Hakko daafira, ayyaanaamittetenni baqqi yine heeꞌrate surrenke ayewoteno iimi coye heddanno gede assiꞌra hasiissannonke. (1 Tes. 5:6-9) Hanni konne assa dandiineemmota sase doogga laꞌno.

¹⁶ Amanyootenke: Pheexiroosi danchu amanyooti lowo geeshsha hasiisannota huwatino. Isi togo yiino: “Insa illensanni laꞌinohu danchu loosiꞌnenni kainohunni Magano ayirrissanno gede, dagate mereero danchu amanyooti heeꞌroꞌne.” (1 Phe. 2:12) Mine heeꞌnoommo wote, loosu bayicho, rosu mine, boohaarshu yannara woy soqqammeemmo wote danchu amanyootinkenni Yihowara ayirrinye abbate sharrammeemmo. Hige guuntete xeꞌne noonke daafira, ninke baalunku soꞌneemmoreeti. (Rom. 3:23) Ikkirono, “dancha ammanate ola olama” agurreemmokkiha ikkiro, cubbaataamo maalanke qeela dandiineemmo.—1 Xim. 6:12.

17. Kiristoosite gedee hedo heedhannonke gede kaaꞌlannonkeri maati? (Umi misile lai.)

¹⁷ Hendeemmo gara: Danchu amanyooti noonkere ikkate, gara ikkitino lao hasiissannonke. Hawaariya Phaawuloosi togo yiino: “Kiristoosi Yesuusira nooti tini hedo kiꞌnerano heedhoꞌne.” (Fil. 2:5) Kiristoosira hiitto lao noosi? Isi shooshaqaho. Shooshaqa ikkasi, umisi xiqime agure soqqamanno gede assitinosi. Isihu qaru loosi Maganu Mangisteha dancha duduwo mannaho kulate. (Marq. 1:38; 13:10) Yesuusi baalunkunni roorino biddishsha amadinohu Maganu Qaaleeti yee ammanino. (Yoh. 7:16; 8:28) Isi Qullaawa Borro yitannore qummi assa, mannaho xawise kulanna Maganu Qaalira xawaqa ikka dandaanno gede diinaggaawe xiinxallino. Ninkeno shooshaqoota, hattono diinaggaambe soqqammeemmorenna Qullaawa Maxaafa ceeꞌminummokki xiinxallineemmore ikkinummoro, hedonke albinni roore Kiristoosi hedo gedeeta ikkitanno.

18. Yihowa looso loosa dandiineemmohu hiittoonniiti?

¹⁸ Sharronke: Yihowa alaami, “iimanna uulla . . . noori baalunku Yesuusi suꞌminni guluphitanno [gedeeti].” (Fil. 2:9-11) Yesuusi lowo ayirrinye afiꞌrinoha ikkirono, Annisi fajjora shooshanqetenni maahoyye yee galanno; ninkeno konne assa hasiissannonke. (1 Qor. 15:28) Hiittoonni? Konne assate, loonsammora hajanjoonninke looso woꞌmu wodaninkenni loosa hasiissannonke; kuni “baalante daga manna rosaano asse” yine uyinoonninke loosooti. (Mat. 28:19) Qoleno, “mannu baalunkura” yaano olliichinkerano ikko roduuwinkera “danchare assa” hasiꞌneemmo.—Gal. 6:10.

19. Maa assate murciꞌre kaꞌꞌa hasiissannonke?

¹⁹ Yihowa surrenke ayewoteno iimi coye heddanno gede assiꞌnammora qaagiissannonke daafira galanteemmosi! ‘Albankeenni noo qolchansho kaajjine uurrine qolchama’ hasiissannonke. (Ibi. 12:1) Konnira ninke baalunku ‘Yihowara loonseemmota hende woꞌma lubbonkenni loonso’; hatto ikkiro, iimi Anninke sharronke maassiꞌranno.—Qol. 3:23, 24.